ALATIKE AKO 48
“Kotou Fakaʼosi Te Gaue ʼAe Neʼe Kotou Kamata Fai”
“Kotou fakaʼosi te gaue ʼae neʼe kotou kamata fai.”—2 KO. 8:11.
KATIKO 35 “Ke Kotou Iloʼi Papau Te ʼu Meʼa ʼAe ʼe Maʼuhiga”
TE ʼU MANATU FAKANOUNOU *
1. Kotea ʼae ʼe fakafealagia mai e Sehova ke tou fai?
KO SEHOVA ʼe ina fakafealagia mai ke tou filifili te faʼahiga maʼuli ʼae ʼe tou loto ki ai. ʼE ina akoʼi tatou ke tou toʼo he ʼu tonu ʼe lelei. Pea moka tou toʼo he ʼu tonu ʼe ina leleiʼia, ʼe tokoni mai ia Sehova ke tou lava fakahoko. (Pes. 119:173) Ka tou maʼuliʼi te ʼu tokoni fakapotopoto ʼae ʼi te Tohi-Tapu, ʼe feala ai ke tou toʼo he ʼu tonu ʼe lelei.—Hep. 5:14.
2. Kotea te faigataʼaʼia ʼae ʼe feala ke tou tau mo ia moka tou toʼo he tonu?
2 Kae, tatau aipe pe ʼe tou toʼo he tonu ʼe lelei, ʼe feala pe ke faigataʼa hatatou fakaʼosi te aluʼaga ʼae neʼe tou kamata fai. Tou vakaʼi he ʼu faʼifaʼitaki. Ko he tehina ʼe ina fakatotonu ke ina lau katoa te Tohi-Tapu. Lolotoga ni vahaʼa neʼe hoholo lelei pe tana lau tohi, kae neʼe ina tuku leva. Ko he tuagaʼane ʼe ina fakatotonu ke pionie katoa, kae ʼe ina holoʼi tuʼumaʼu pe tana fakatuʼutuʼu ʼaia. Ko he kau tagata ʼafeā ʼi he kokelekasio, ʼe natou fakatotonu ke toe lahi age tanatou fai te ʼu ʼaʼahi fakatauhi ovi. Kae hili ki ai ni mahina, neʼe heʼeki natou fakahoko te tonu ʼaia. ʼE kehekehe te ʼu aluʼaga ʼaia, kae ko te ʼu tonu ʼae neʼe natou toʼo neʼe mole natou fakahoko. Ko te kau ʼuluaki Kilisitiano ʼae neʼe nonofo ʼi Kolonito, neʼe natou tau mo te faigataʼaʼia ʼaia. Tou vakaʼi pe ʼe kotea ʼae ʼe feala ke tou ako mai ia natou.
3. Kotea te tonu ʼae neʼe toʼo e te kau Kolonito? Kae kotea ʼae neʼe hoko?
3 ʼI te teitei taʼu 55 H.T.S., * ko te kau Kolonito neʼe natou toʼo he tonu ʼe maʼuhiga. Neʼe natou logo ko ʼonatou tehina mo tuagaʼane ʼi Selusalemi pea mo Sutea neʼe fakaʼofaʼofa mo masisiva. Pea neʼe natou toe logo ʼe tanaki falā ʼihi kokelekasio moʼo tokoni kia natou ʼaia. Neʼe agalelei mo lotofoaki te kau Kolonito ʼo natou toʼo ai te tonu ʼae ke natou tokoni mo natou ki ʼonatou tehina mo tuagaʼane. Pea neʼe natou fakalavelave ki te apositolo ko Paulo pe ʼe feafeaʼi hanatou lava tokoni. Neʼe fakaha leva e Paulo te ʼu fakatuʼutuʼu ki te kokelekasio pea neʼe ina kole kia Tito ke tokoni ki te tanaki ʼo te ʼu meʼa ʼofa. (1 Ko. 16:1; 2 Ko. 8:6) Kae hili ki ai he ʼu mahina, neʼe iloʼi e Paulo ki muli age, neʼe heʼeki kamata tanaki e te kau Kolonito ʼanatou meʼa ʼofa. Koia ʼe mahino ia neʼe mole tokalelei ʼonatou meʼa ʼofa ke momoli fakatahi mo te ʼu meʼa ʼofa ʼo te ʼu kokelekasio ʼae.—2 Ko. 9:4, 5.
4. Ka tou lau ia 2 Kolonito 8:7, 10, 11, kotea ʼae neʼe fakalotomalohiʼi e Paulo ke fai e te kau Kolonito?
4 Neʼe toʼo e te kau Kolonito he tonu ʼe lelei. Neʼe fakamalo ai ia Paulo kia natou ʼo ʼuhiga mo tanatou tui malohi pea mo tanatou fia lotofoaki. Kae neʼe tonu foki ke fakalotomalohiʼi e Paulo ia natou ke natou fakaʼosi te fakatuʼutuʼu ʼae neʼe natou kamata. (Lau ia 2 Kolonito 8:7, 10, 11.) ʼE tou ako mai tonatou faʼifaʼitaki, ʼe feala pe ki te kau kilisitiano agatonu ke faigataʼa hanatou fakahoko he tonu ʼe lelei neʼe natou fai.
5. Kotea te ʼu fehuʼi ʼae ka tou tali anai ki ai?
5 ʼE feala pe ke faigataʼa tatatou fakahoko he ʼu tonu neʼe tou fai ohage pe ko te kau Kolonito. Kotea tona tupuʼaga? Koteʼuhi ʼe tou agahala, pea koia ʼae ʼe feala ai ke tou holoʼi tuʼumaʼu te fakahoko ʼo he tonu. Peʼe feala ke hoko he ʼu aluʼaga fakapunamaʼuli ʼo faigataʼa ai hatatou fakahoko he tonu neʼe tou fai. (Ekl. 9:11; Loma 7:18) ʼE feafeaʼi hatatou iloʼi pe ʼe tonu ke tou toe vakaʼi he tonu neʼe tou toʼo? Pea kapau ko ia, ʼe tou fakahoko feafeaʼi anai te faʼahi ʼaia? Pea ʼe feafeaʼi hatatou lava fakaʼosi te fakatuʼutuʼu ʼae kua tou kamata fai?
ʼI MUA ʼO TE FAI ʼO HE TONU
6. Ko te temi fea ʼae ʼe ʼaoga ke tou fetogi ai he tonu?
6 ʼE ʼi ai ʼihi tonu maʼuhiga ʼe mole tou fetogi anai ʼi he temi. Ohage la, neʼe tou fakatotonu ke tou tauhi kia Sehova pea mo tou fakapapau ke tou nofo agatonu ki totatou ʼohoana. (Mat. 16:24; 19:6) Kae ko ʼihi tonu leva, ʼe lagi ʼaoga ke fetogi. Kotea tona tupuʼaga? Koteʼuhi ʼe fetogi te ʼu aluʼaga ʼo te maʼuli. Koia, kotea ʼae ʼe ʼaoga ke tou fai ke tou toʼo ai te ʼu tonu ʼae ʼe lelei tukupau?
7. Kotea ʼae ʼe tonu ke tou kole kia Sehova, pea kotea tona tupuʼaga?
7 Tou faikole ke tou maʼu te poto. Neʼe takitaki e Sehova ia Sakopo ke ina tohi fenei: “Kapau ʼe ʼi ai he tahi ia koutou ʼe ʼaoga ki ai te poto, ke ina haga kole ki te ʼAtua, pea ʼe foaki age anai ki ai, koteʼuhi ʼe foaki lahi e te ʼAtua ki te hahaʼi fuli ʼaki tona loto katoa.” (Sakopo 1:5) ʼI ʼihi aluʼaga, ʼe ‘ ʼaoga kia tatou fuli ia te poto.’ Koia, kotou kole kia Sehova ke tokoni atu ʼi te temi ʼae ʼe kotou toʼo ai he tonu. Pea kotou toe fai feia ʼi te temi ʼae ʼe maʼua ke kotou fetogi ai te tonu ʼae neʼe kotou fai. ʼE tokoni atu anai ia Sehova ke kotou toʼo he ʼu tonu ʼe fakapotopoto.
8. Kotea ʼae ʼe maʼuhiga ke tou fai ʼi muʼa ʼo hatatou toʼo he tonu?
8 Tou fai he ʼu fekumi. Kotou vakaʼi te Folafola ʼa te ʼAtua, mo lau te ʼu tohi ʼa te kautahi ʼa Sehova. Pea kotou palalau kia natou ʼae ʼe natou foaki atu anai he ʼu tokoni fakapotopoto. (Taag. 20:18) ʼE maʼuhiga te fai ʼo te ʼu fekumi ʼaia ʼi muʼa ʼo hakotou fetogi gaue, mo hakotou hiki ki he tahi age ʼapi, peʼe ko te filifili ʼo te faʼahiga ako ʼae ʼe ina fakafealagia atu ke kotou haga tauhi kia Sehova.
9. Kotea anai te ʼu fua lelei mo kapau ʼe tou aga fakahagatonu kia tatou totonu?
9 Tou sivisivi te ʼu tupuʼaga ʼae ʼe ina uga tatou ke tou toʼo he ʼu tonu. ʼE maʼuhiga kia Sehova te ʼu tupuʼaga ʼo te ʼu tonu ʼae ʼe tou toʼo. (Taag. 16:2) Pea ʼe loto e Sehova ke tou aga fakahagatonu ia meʼa fuli. Koia, ka tou toʼo he tonu pea mo tou sivisivi ʼona tupuʼaga, ʼe tou fia aga fakahagatonu anai, ʼo mole tou kakaʼi pe ia tatou totonu pea mo ʼihi. ʼE feala ke faigataʼa kia tatou te fakahoko ʼo te tonu ʼae neʼe tou toʼo mo kapau neʼe mole tou aga fakahagatonu. Ohage la, ʼe feala ke fakatotonu e he tehina ke pionie katoa. Kae hili ki ai he temi, ʼe faigataʼa tana fai ʼona hola ke katoa ʼi tona ʼuhiga pionie. Pea ʼe mole kei ina maʼu te fiafia ʼi tana faifakamafola. Neʼe lagi manatu ia, ko te tupuʼaga tafito ʼo tana toʼo te selevisi pionie ko tana fia fakafiafiaʼi ia Sehova. Kae neʼe lagi ina fia toʼo te selevisi pionie ʼuhi pe ko tana fia fakafiafiaʼi ʼana matuʼā peʼe ko he tahi ʼe ina fakaʼapaʼapaʼi.
10. Kotea ʼae ʼe tokoni mai ke tou fai he ʼu fetogi?
10 Tou fakakaukauʼi age muʼa te aluʼaga ʼaeni: Ko he tagata ʼe ina ako te Tohi-Tapu ʼe fakatotonu ke tuku tana suluka. Lolotoga he vahaʼa ʼe tahi peʼe lua, ʼe mole suluka tatau aipe pe ʼe faigataʼa, kae neʼe ina toe toʼo leva tana suluka. Kae ki muli age, neʼe ina lavaʼi te tuku ʼo tana suluka. Neʼe ina lava tuku te agamahani kovi ʼaia, ʼuhi ko tona ʼofa kia Sehova pea mo tana fia fakafiafiaʼi tona loto.—Kol. 1:10; 3:23.
11. He koʼe ʼe tonu ke kotou fai he ʼu fakatuʼutuʼu ʼo ʼuhiga mo he aluʼaga tafito?
11 Tou fai he ʼu fakatuʼutuʼu ʼo ʼuhiga mo he aluʼaga tafito. Kapau ʼe kotou iloʼi papau te aluʼaga tafito ʼae ʼe kotou fakatuʼutuʼu ki ai, ʼe faigafua anai kia koutou tona fakahoko. Ohage la, neʼe lagi kotou fakatotonu ke kotou lau tuʼumaʼu te Tohi-Tapu. Kae kapau neʼe mole kotou fai he polokalama ʼo ʼuhiga mo te aluʼaga ʼaia, * ʼe lagi faigataʼa anai hakotou fakahoko te fakatuʼutuʼu ʼaia. Koʼeni te tahi faʼifaʼitaki: Ko he kau tagata ʼafeā ʼi he kokelekasio, ʼe natou fakatotonu ke toe lahi age te fai ʼo ʼanatou ʼaʼahi fakatauhi ovi. Kae hili ki ai he temi, neʼe mole pe la natou fai he ʼu fakatuʼutuʼu ki te aluʼaga ʼaia. ʼE feala pe ke natou fai te ʼu fehuʼi ʼaeni: “Neʼe kua tou fakatuʼutuʼu koa pe ʼe ko te ʼu tehina mo tuagaʼane fea ʼae ʼe ʼaoga tafito ke ʼaʼahi? Neʼe kua tou fakatuʼutuʼu koa ia he temi ke tou olo ai ʼo ʼaʼahi te ʼu tehina mo tuagaʼane ʼaia?”
12. Kotea ʼae ʼe lagi tonu anai ke tou fai, pea kotea tona tupuʼaga?
12 Tou maʼu he ʼu manatu ʼe fakapotopoto. ʼE mole kei tou maʼu he temi, mo he ʼu fealagia pea mo he malohi moʼo fai ʼo meʼa fuli ʼae ʼe tou loto ki ai. Koia ʼae ʼe tonu ai ke tou maʼu he ʼu manatu ʼe fakapotopoto. Kapau ʼe tou fakatokagaʼi ʼe mole feala hatatou fakahoko he tonu neʼe tou fai, ʼe lagi ʼaoga anai ke fetogi te tonu ʼaia. (Ekl. 3:6) Kae, ʼe feafeaʼi mo kapau neʼe kotou toe vakaʼi pea mo fetogi te tonu ʼaia, ʼo kotou manatu ai ʼe feala tona fakahoko? Tou vakaʼi faʼahi ʼe nima ʼe tokoni atu ke kotou fakaʼosi te fakatuʼutuʼu ʼae neʼe kotou kamata fai.
TOU FAKAHOKO TE ʼU TONU ʼAE NEʼE TOU FAI
13. ʼE feafeaʼi hatatou maʼu te malohi ʼae ʼe ʼaoga moʼo fakahoko ʼatatou tonu?
13 Tou kole te malohi kia Sehova. ʼE feala ke foaki mai e te ʼAtua “te malohi” moʼo fakahoko ʼatatou tonu. (Flp. 2:13) Koia tou kole kia te ia tona laumalie maʼoniʼoni ke tou maʼu te malohi ʼae ʼe ʼaoga mai kia tatou. Pea tou haga faikole tatau aipe pe ʼe hage kia tatou ʼe mole heʼeki tali ʼatatou faikole. Ohage pe ko tona ui fenei e Sesu: “Kotou haga kole [te laumalie maʼoniʼoni], pea ʼe foaki atu anai.”—Luka 11:9, 13.
14. ʼE tokoni feafeaʼi mai te pelesepeto ʼo Taaga Lea 21:5, ke tou fakahoko ʼatatou tonu?
14 Tou teuteuʼi tatatou fakatuʼutuʼu. (Lau ia Taaga Lea 21:5.) ʼE ʼaoga ke tou fai he ʼu fakatuʼutuʼu moʼo fakahoko he faʼahiga gaue pe. Kapau kua tou tohi te ʼu faʼahi kehekehe ʼo te fakatuʼutuʼu, tou muliʼi lelei ʼona faʼahi takitahi. ʼO toe feia pe, ka tou toʼo he tonu, tou tohi te ʼu faʼahi fuli ʼae ʼe tonu ke tou fai moʼona fakahoko. Kapau ʼe tonu ke tou fai he gaue ʼe faigataʼa, tou vaevae fakakoga ke faigafua tona fakahoko. ʼI te temi fuli pe ʼae ʼe tou fakahoko ai he koga ʼo te gaue ʼaia, ʼe feala ai leva ke tou fakafuafua te ʼu gaue ʼae kua tou fai. Neʼe fakalotomalohiʼi e Paulo ia te kau Kolonito ke natou tuku keheʼi he foʼi falā “ ʼi te ʼuluaki ʼaho ʼo te vahaʼa fuli.” Kapau ʼe natou fai feia, ʼe mole natou tanaki falā anai ʼi te ʼaho pe ʼae ʼe tau mai ai ia Paulo. (1 Ko. 16:2) Ka vaevae fakakoga he gaue faigataʼa, ʼe feala pe anai tona fakahoko.
15. Kotea ʼae ʼe tonu ke tou fai moka kua tou tohi te ʼu faʼahi kehekehe ʼo tatatou fakatuʼutuʼu?
15 Kapau ʼe tou tohi te ʼu faʼahi kehekehe ʼo 1 Ko. 14:40) Ohage la, ʼe fakalotomalohiʼi te ʼu kolesi ʼo te kau tagata ʼafeā ke natou hinoʼi he tagata ʼafeā ke ina tohi te ʼu tonu fuli ʼo te kolesi ʼo tona kokelekasio. ʼE tonu anai ke ina tohi pe ʼe ko ai ʼae ka tokaga ki te aluʼaga ʼae ʼe maʼua ke vakaʼi. Pea ʼe tonu foki ke ina tohi mo te ʼaho ʼae ʼe tonu ke fakatokatoka ai te aluʼaga ʼaia. Kapau ʼe mulimuli lelei te kau tagata ʼafeā ki te faʼahiga fai ʼaia, ʼe faigafua anai tanatou fakahoko ʼanatou tonu. (1 Ko. 9:26) ʼE feala pe mo tatou ke tou fakaʼaogaʼi te faʼahiga fai ʼaia. Ohage la, ʼe feala pe ke tou tohi te ʼu gaue ʼae ʼe tonu ke tou fai ʼi te ʼaho fuli, ʼo tou kamata fai te ʼu gaue ʼae ʼe maʼuhiga. Kapau ʼe tou fai feia, ʼe faigafua anai tatatou fakaʼosi he gaue neʼe tou kamata. Pea ʼe toe feala ai foki ke tou fai he tahi ʼu gaue.
tatatou fakatuʼutuʼu, ʼe faigafua anai te fakahoko ʼo ʼatatou tonu. (16. Ka tou lau ia Loma 12:11, kotea ʼae ʼe maʼuhiga ke tou fai ke tou fakahoko ʼatatou tonu?
16 Tou fai he ʼu faiga. ʼE ʼaoga anai ke tou fai he ʼu faiga ke tou mulimuli lelei ki te ʼu faʼahi kehekehe ʼo tatatou fakatuʼutuʼu pea mo fakaʼosi te gaue ʼae neʼe tou kamata. (Lau ia Loma 12:11.) Neʼe tokoni ia Paulo kia Timoteo ʼo ina ui age ke “kataki” pea mo “haga fai fakamalotoloto” tana faiakonaki. ʼE feala ke tou mulimuli ki te tokoni ʼaia ʼa Paulo mo kapau ʼe tou fia fakahoko he faʼahiga gaue pe maʼa Sehova.—1 Tim. 4:13, 16.
17. ʼE feala ke tokoni feafeaʼi mai ia Efeso 5:15, 16 ke tou fakahoko ʼatatou tonu?
17 Tou fakaʼaogaʼi fakapotopoto totatou temi. (Lau ia Efeso 5:15, 16.) Tou toʼo he temi ke tou fakahoko ai te gaue ʼae neʼe tou fakatuʼutuʼu pea mo tou mulimuli lelei ki te temi ʼaia. ʼAua tatatou atalitali ke tokalelei ia meʼa fuli pea hoki tou kamata leva tatatou gaue. ʼE mahino ia, ʼe lagi mole tokalelei anai ia meʼa fuli ʼi he temi. (Ekl. 11:4) Tou tokakaga naʼa kaihaʼa e te ʼu meʼa ʼae ʼe mole maʼuhiga, ia totatou temi mo totatou malohi ʼae ʼe ʼaoga ki te ʼu meʼa ʼae ʼe maʼuhiga. (Flp. 1:10) Tou filifili te temi ʼae ʼe mole fakaleluʼi ai anai te fakahoko ʼo tatatou gaue. Tou fakaha ki ʼihi ʼe ʼaoga he temi feʼauga ke tou fakakaukau ai. Pea ʼe lelei ke tou matehi tatatou telefoni pea mo tou vakaʼi ʼi he tahi lakaga pe ko ai ʼae neʼe faitohi mai peʼe ko te fakatahiʼaga ʼi te Neti. *
18-19. Kotea ʼae ka tokoni mai anai ke tou haga fakahoko he tonu neʼe tou fai logo la tona faigataʼa?
18 Tou fakakaukauʼi te ʼu fua lelei ʼae ka tou maʼu. ʼE hage pe te ʼu fua lelei ʼae ka tou maʼu, ko te ikuʼaga ʼo he folau. ʼE mahino ia, ʼe tou fia kaku ki te koga meʼa ʼae ʼe tou olo ki ai. Koia, tatau aipe pe neʼe mapunuʼi te ala ʼae ʼe tou olo ai ʼo maʼua ai ke tou toʼo he tahi ala, kae ʼe tonu ke tou hoko atu totatou fagona. ʼO toe feia pe, kapau ʼe tou fakakaukau ki te meʼa ʼae ka tou “utu” anai, ʼe faigafua anai tatatou fakalaka ʼi te ʼu fihifihia.—Kal. 6:9.
19 ʼE mole faigafua te toʼo ʼo he ʼu tonu ʼe lelei, pea ʼe toe feia pe mo tona fakahoko. Kae ʼe feala ke foaki mai e Sehova ia te poto, mo te malohi ʼae ʼe ʼaoga ke tou fakaʼosi te gaue ʼae neʼe tou kamata.
KATIKO 65 Tou Haʼele Ki Muʼa
^ pal. 5 ʼE kotou fakahemala koa ki ʼihi tonu neʼe kotou toʼo? Peʼe faigataʼa koa ʼi ʼihi temi takotou toʼo pea mo fakahoko he ʼu tonu ʼe lelei? ʼE tou vakaʼi anai ʼi te alatike ʼaeni pe ʼe kotea ʼae ʼe tonu ke tou fai moʼo fakaʼosi te gaue ʼae neʼe kua tou kamata.
^ pal. 3 Ko te ʼu mataʼi tohi ʼaeni H.T.S. ko tona fakaʼuhiga: Hili te Temi ʼo Sesu.
^ pal. 11 Ke kotou fai hakotou polokalama, ʼe feala ke kotou fakaʼaogaʼi te “Polokalama ʼo Te Lau ʼo Te Tohi-Tapu,” ʼi te kaupepa Tou Vakaʼi Ia Te Tohi-Tapu ʼi Te ʼAho Fuli 2019, pasina 4-5.
^ pal. 17 Kapau ʼe kotou fia maʼu he tahi ʼu fakamahino, kotou vakaʼi te alatike “20 façons de libérer du temps” ʼi te Réveillez-vous ! ʼo Apelili 2010.