ʼE ui fenei e Rose: “ ʼE au maʼu he mahaki kovi pea ʼe au mamahi hoholo tuʼumaʼu. ʼE faigataʼa ʼaupito toku maʼuli.” Ko te tahi ʼo te ʼu faigataʼaʼia lalahi ʼae neʼe ina maʼu, neʼe faigataʼa ai tana haga ako te Tohi-Tapu pea mo te ʼu meʼa fakalaumalie. Kae neʼe tokoni lahi age te ʼu palalau ʼaeni ʼa Sesu ia Mateo 19:26: “Ki te ʼAtua ko meʼa fuli ʼe feala.” Neʼe iloʼi leva e Rose, ʼe ʼi ai te tahi age ʼu faʼahiga ako. Kae ʼuhi ko tona mamahi kovi, neʼe mole feala ai hana lautohi. Neʼe ina kamata fakalogo te lau ʼo te Tohi-Tapu mo te ʼu tohi Fakatohi-tapu ʼae neʼe puke. * ʼE ina ui fenei: “Ka na ʼaua la te ʼu meʼa ʼae neʼe puke, neʼe mole feala haku taupau he ʼu felogoi lelei mo te ʼAtua.”

Moka lotomamahi ia Rose ʼi tana mole lava fai he meʼa, ʼe ina maʼu te fakalotofimalie ʼi te ʼu palalau ʼae ia 2 Kolonito 8:12: “Kapau ʼe ʼuluaki maʼu ai te lotolelei, ʼe tali leleiʼi e te ʼAtua ʼo mulimuli ki te meʼa ʼae ʼe maʼu e he tahi, kaʼe mole ki te meʼa ʼae ʼe mole ina maʼu.” Ko te ʼu palalau ʼaia ʼe natou fakamanatuʼi age kia Rose ʼe fiafia te ʼAtua ki ʼona fealagia, koteʼuhi logo la ʼona tuʼakoi kae ʼe faiga pe.

ʼE kei manatuʼi e Delphine, ʼae neʼe tou talanoa ki ai: “Hili te mate ʼo taku taʼahine ʼae neʼe taʼu 18, neʼe lahi ʼaupito toku mamahi pea neʼe au manatu ai neʼe mole  kei he ʼuhiga ʼo haku maʼuli. He ʼe mole kei tatau anai toku maʼuli.” Neʼe ina maʼu he lotofimalie ʼi te ʼu palalau ʼae neʼe fai e te tagata faipesalemo ki te ʼAtua, ia Pesalemo 94:19: “Kapau e lahi te u tuania ia au o hage e hahai kaugamalie, ko au fakapelepele e natou fakafiafiai [ia au].” ʼE ui fenei e Delphine: “Neʼe au faikole kia Sehova ke tokoni mai ke au fai he ʼu gaue ʼe fakamaʼamaʼa ai ʼoku mamahi.”

Neʼe maʼumaʼua ia Delphine ʼi he gaue neʼe ina leleiʼia. Neʼe ina fakatatau ia ia ki he kiʼi peni lanu. Koteʼuhi maʼia pe la mo te ʼu peni lanu ʼae kua fasifasi ʼe kei fakaʼaogaʼi pe. ʼO toe feia pe mo ia, na logo la tona mamahi kae ʼe kei feala pe ke tokoni ki ʼihi. ʼE ina manatuʼi: “ ʼI taku fakaʼaogaʼi te ʼu pelesepeto mo te ʼu vaega ʼo te Tohi-Tapu moʼo fakafimalieʼi ʼo ʼoku kau ako, neʼe ko te faʼahiga fakafimalie ʼaia ʼa Sehova kia au.” Neʼe fai e Delphine te lisi ʼo te ʼu tagata mo te ʼu fafine ʼo te Tohi-Tapu ʼae neʼe natou tau mo he lotomamahi ʼaupito. Neʼe mahino ai neʼe ko he ʼu hahaʼi faikole. Neʼe ina toe ako “ ʼe feala pe ke ke maʼu te faʼa kataki ʼaki tau lau te Tohi-Tapu.”

ʼI tana ako te Tohi-Tapu neʼe iloʼi ai e Delphine ʼe tonu ke tokaga tafito ki te ka haʼu kae mole ki tona maʼuli ʼae ki muʼa atu. Ko te ʼamanaki ʼae ʼe talanoa ki ai ia Gaue 24:15 neʼe ina fakalotofimalieʼi ia ia: “ ʼE ʼi ai anai he fakatuʼuake ʼo te kau faitotonu pea mo te kau heʼe faitotonu.” He koʼe neʼe tui papau ia Delphine ʼe fakatuʼuake anai e Sehova tana kiʼi taʼahine? ʼE ina tali fenei: “ ʼE au sio ki taku kiʼi taʼahine ʼi te malama foʼou ʼi te temi ʼae kua fakatuʼutuʼu e Sehova. ʼE mā nonofo ʼi tomā kiʼi ʼoloto pea ʼe au fiafia ʼaupito ʼi taku sio kia ia.”