Neʼe felogoʼi lelei ia Rébecca mo tana tamai. Neʼe ko he kaumeʼa ʼo te famili ʼae neʼe ina fai kia Rébecca te ʼu palalau ʼaia. Kaʼe, neʼe tokagaʼi e Rébecca neʼe ko he ʼu palalau fakalotomamahi. Neʼe ina tau ui fenei: “ ʼE mole he ʼuhiga ʼo tana mate.” Hili ni taʼu ki muli age, ka fakamatala e Rébecca te hisitolia ʼaia ʼi he tohi, ʼe kei ina logoʼi tuʼumaʼu pe tona lotomamahi.

Ohage ko te aluʼaga ʼae neʼe hoko kia Rébecca, ʼe mole feala ke puli vave totatou lotomamahi, tafitō la moka neʼe tou felogoʼi lelei mo ia ʼae neʼe mate. ʼI te Tohi-Tapu, ʼe ui ai ko te mate ʼe ko “te fili fakamuli.” (1 Kolinito 15:26) ʼE mole feala ke tou tekeʼi pea mo tou hao mai te mate. Ko he aluʼaga ʼe tau hoko fakapunamaʼuli kia tatou pea ʼe feala ke hoko kia natou ʼe tou ʼoʼofa mamahi ai. Koia, ʼe mole tou punamaʼuli anai pe koʼe ʼe mole tou iloʼi pe ʼe feafeaʼi hatatou tauʼi te mate mo ʼona nunuʼa.

ʼE lagi kua ke fai pe te ʼu fehuʼi ʼaeni: ‘Ko temi ʼe fia ʼe tonu ai ke au katakiʼi toku lotomamahi? ʼE feafeaʼi haku tauʼi toku lotomamahi? ʼE feafeaʼi haku fakalotofimalieʼi ia natou ʼae ʼe putu? ʼE ʼi ai koa he ʼamanaki kia natou ʼae kua mamate pea neʼe au ʼofa mamahi ai?’