ʼE KOTOU manatu koa ʼe kotou kau ki he lotu Fakakilisitiano? Kapau koia, ʼe kotou kau ki te toko lua miliale tupu hahaʼi ʼi te kele ʼae ʼe natou ui ʼe natou mulimuli ia Kilisito. Ia ʼaho nei, ʼe ʼi ai te ʼu lotu ʼe lauʼi afe ʼe natou lau ʼe natou Kilisitiano. Kaʼe, ʼe fefakafeagaiʼaki te ʼu akonaki ʼae ʼe natou tui ki ai pea ʼe kehekehe ʼanatou faʼahiga manatu. Koia ʼae ʼe lagi kehekehe ʼaupito te ʼu akonaki ʼe kotou tui ki ai mo natou ʼae ʼe natou ui ʼe natou Kilisitiano. ʼE maʼuhiga koa te ʼu akonaki ʼae ʼe kotou tui ki ai? ʼEi, mo kapau ʼe kotou fia mulimuli ki te lotu Fakakilisitiano moʼoni ʼae ʼe akoʼi mai ʼi te Tohi-Tapu.

Neʼe iloa te ʼu ʼuluaki tisipulo ʼa Sesu Kilisito ʼuhi ko tonatou ʼuhiga “kilisitiano.” (Gaue 11:26) Neʼe mole ʼaoga ke ʼi ai he tahi age higoa ke iloʼi ai natou koteʼuhi ʼi te temi ʼaia neʼe ko te tui Fakakilisitiano pe ʼe tahi. Neʼe mulimuli lelei te kau Kilisitiano ki te ʼu akonaki pea mo te ʼu fakatotonu ʼa Sesu Kilisito, ia ia ʼae neʼe ina Fakatuʼu ia te kokelekasio Fakakilisitiano. Kaʼe, feafeaʼi ʼo ʼuhiga mo takotou lotu? ʼE kotou manatu koa ko te ʼu akonaki ʼo takotou lotu ʼe ko te ʼu faʼahi ʼae neʼe akoʼi e Kilisito peʼe ko te ʼu akonaki ʼae neʼe tui ki ai te ʼu ʼuluaki tisipulo ʼa Sesu? ʼE kotou tui papau feafeaʼi ki te faʼahi ʼaia? ʼE ko te aluʼaga pe ʼe tahi ʼe feala ke kotou fai. Kotou tuku ke fakaha mai ʼi te Tohi-Tapu pe kotea ia te lotu Fakakilisitiano ʼae ʼe moʼoni.

 Tou vakaʼi te aluʼaga ʼaeni: Neʼe fakaʼapaʼapa ia Sesu Kilisito ki te Tohi-Tapu he neʼe ko te Folafola ʼa Te ʼAtua. Neʼe mole ina leleiʼia ia natou ʼae neʼe natou fetogi te ʼu akonaki ʼo te Tohi-Tapu ʼaki tanatou fakamuʼamuʼa te ʼu talatisio fakatagata. (Maleko 7:9-13) ʼE feala ke tou ui ʼaki he loto falala ko te ʼu tisipulo moʼoni ʼa Sesu neʼe natou fakatafito te ʼu akonaki ʼae ʼe natou tui ki ai ki te Tohi-Tapu. Koia, ʼe tonu ki te kau Kilisitiano fuli ke natou fai te fehuʼi ʼaeni: “ ʼE alu tahi koa te ʼu akonaki ʼo taku lotu mo te Tohi-Tapu?” Moʼo tali ki te fehuʼi ʼaia, he koʼe ʼe mole kotou fakatatau te ʼu akonaki ʼo takotou lotu mo te ʼu faʼahi ʼae ʼe akoʼi moʼoni mai ʼi te Tohi-Tapu?

Neʼe ui e Sesu ʼe tonu ke fakatafito tatatou tauhi ki te ʼAtua ki te moʼoni ʼae ʼe tou maʼu ʼi te Tohi-Tapu. (Soane 4:24; 17:17) Pea neʼe ui e te apositolo ko Paulo ʼe fakalogo totatou haofaki ki tatatou “iloi katoa . . . te mooni.” (1 Timoteo 2:4) Koia ʼae ʼe maʼuhiga ai ke tou fakatafito ʼatatou akonaki ki te moʼoni ʼo te Tohi-Tapu. Koteʼuhi ʼe fakalogo ki ai totatou haofaki.

ʼE matou fakaafe atu koutou ke kotou lau te ʼu fehuʼi ʼae ka hoa mai pea mo te ʼu tali ʼe tuʼu ʼi te Tohi-Tapu ʼo ʼuhiga mo te ʼu fehuʼi ʼaia. Kotou vakaʼi te ʼu vaega Tohi-Tapu ʼe tuʼu ai pea mo kotou fakakaukauʼi te ʼu tali ki te ʼu fehuʼi. Pea kotou fai kia koutou te fehuʼi ʼaeni: “ ʼE feafeaʼi haku fakatatau te ʼu akonaki ʼo taku lotu mo te ʼu faʼahi ʼae ʼe ui ʼi te Tohi-Tapu?”

ʼE feala ke tokoni atu te ʼu fehuʼi ʼae ʼe tuʼu ʼi lalo ke kotou fai he fakatatau maʼuhiga. ʼE kotou lotolelei koa ʼo fakatatau ʼihi akonaki ʼo takotou lotu mo te ʼu faʼahi ʼae ʼe ui ʼi te Tohi-Tapu? ʼE fiafia anai te kau Fakamoʼoni ʼa Sehova ʼi te tokoni atu ke kotou vakaʼi te moʼoni ʼae ʼe fakaha lelei ʼi te Tohi-Tapu. He koʼe ʼe mole kotou kole ki he Fakamoʼoni ʼa Sehova ke ina fai hakotou ako Tohi-Tapu? Pea ʼe feala ke kotou olo ʼo vakaʼi tamatou tuʼasila ʼi te Neti, jw.org.