Neʼe mavae taku tamai mai Siamani ʼo alu ʼo maʼuli ʼi ʼOsitalalia ʼi te taʼu 1949. Neʼe alu ʼo kumi gaue ʼi te ʼu matani gaue ʼo te lameni pea neʼe maʼuli ʼi te kolo ko Victoria. Pea neʼe ʼohoana ai mo taku faʼe pea neʼe au tupu ʼi te taʼu 1953.

Hili ki ai ni taʼu, neʼe kamata ako e taku faʼe te Tohi-Tapu mo te kau Fakamoʼoni ʼa Sehova. Koia ʼae neʼe au manatuʼi tuʼumaʼu ai te ʼu akonaki Fakatohi-tapu. Kaʼe, neʼe mole tali e taku tamai he tahi age lotu. Neʼe agamalohi mo agakovi pea neʼe mataku taku faʼe ia ia. Kaʼe, neʼe hoko atu pe e mama tana ako fakafufu te Tohi-Tapu pea neʼe ina leleiʼia te ʼu faʼahi ʼae neʼe ina ako. Ka puli taku Tamai ʼi fale, ʼe ina akoʼi mai te ʼu faʼahi ʼae neʼe ina ako ki toku kiʼi tokolua pea mo au. Neʼe palalau mai ʼo ʼuhiga mo te palatiso ʼi te kele ʼi te ka haʼu. Pea neʼe ina toe fakaha mai pe ʼe feafeaʼi anai hatatou maʼuʼuli fiafia mo kapau ʼe tou fakalogo ki te ʼu lekula ʼo te Tohi-Tapu ʼi totatou maʼuli.—Pesalemo 37:10, 29; Esaia 48:17.

ʼI toku taʼu 18, neʼe tonu ke au mavae ʼi toku loto fale ʼuhi ko te agamalohi ʼo taku Tamai. Logo la neʼe au tui ki te ʼu faʼahi ʼae neʼe akoʼi mai e taku Faʼe ʼo ʼuhiga mo te Tohi-Tapu kaʼe neʼe hage kia au ʼe mole maʼuhiga. Koia ʼae neʼe mole au maʼuliʼi ai ʼi toku maʼuli. Neʼe au kamata gaue faihila ʼi te ʼu lameni mamala. ʼI toku taʼu 20, neʼe au ʼohoana. Hili ki ai taʼu ʼe tolu pea tupu toku ʼuluaki ʼofafine. Neʼe au toe kamata vakavakaʼi leva te ʼu faʼahi ʼae neʼe maʼuhiga ʼi toku maʼuli. Neʼe au iloʼi ʼe feala ke tokoni mai te Tohi-Tapu ki tomatou famili. Koia ʼae neʼe au kamata ako ai te Tohi-Tapu mo te Fakamoʼoni ʼa Sehova. Kaʼe, neʼe fakafeagai toku ʼohoana ki te kau Fakamoʼoni ʼa Sehova. Moka au alu ki he fono, ʼe ina ui tuʼumaʼu mai ke au filifili peʼe ko te ako ʼo te Tohi-Tapu peʼe ko te famili. Neʼe au lotovaivai ai pea neʼe au fai te ʼu meʼa ʼae neʼe ina ui mai ʼo tupu ai taku fakagata ʼaku felogoʼi mo te kau Fakamoʼoni ʼa Sehova. Ki muli age, neʼe au fakahemala ʼi te mole fai ʼo te meʼa ʼae ʼe totonu.

ʼI te tahi ʼaho, neʼe fakaha mai e ʼoku kaugā gaue te ʼu pāki ʼe ʼasi ai he ʼu felaveʼi fakasino heʼe ʼaoga. Neʼe au leleiʼia pea neʼe au toe fakalialia ki ai. Pea neʼe au tukugakoviʼi ia au totonu. Neʼe au manatuʼi te ʼu faʼahi ʼae neʼe au ako ʼi te Tohi-Tapu pea neʼe au tui papau ʼe fakatuʼā anai au e te ʼAtua. Kaʼe, ʼi taku sioʼi tuʼumaʼu te ʼu pāki fakalialia, neʼe au leleiʼia. ʼAki te alu ʼo te temi, neʼe ko haku agamahani ia te sioʼi ʼo te ʼu pāki ʼe ʼasi ai te ʼu felaveʼi fakasino heʼe ʼaoga.

Lolotoga te ʼu taʼu ʼe 20 ki muli age, neʼe kua au fakamamaʼo mai te ʼu lekula ʼae neʼe akoʼi mai e taku faʼe. Neʼe ha ʼi taku aga te ʼu manatu ʼae neʼe au nofo mo ia ʼi taku fakakaukau. Neʼe au gutu tauvele pea neʼe  au fai he ʼu fakahuahua kovi. Pea neʼe au maʼu ia he ʼu faʼahiga manatu ʼe kovi ʼo ʼuhiga mo te ʼu felaveʼi fakasino. Logo la neʼe au maʼuli pe mo toku ʼohoana kaʼe neʼe au fai ʼakau mo ʼihi fafine. ʼI te tahi ʼaho, neʼe au sio kia au ʼi te sioʼata pea mo ui fenei: “Kua au fehiʼa ʼosi ʼi toku maʼuli.” Neʼe mole kei au fakaʼapaʼapa kia au totonu pea neʼe mole kei au leleiʼia toku maʼuli.

Neʼe au mavete mo toku ʼohoana pea neʼe mole kei lelei he meʼa ʼi toku maʼuli. Koia, neʼe au faikole ai kia Sehova mo toku loto katoa. Pea neʼe au toe toʼo taku ako te Tohi-Tapu, logo la neʼe au taʼofi talu mai taʼu ʼe ʼuafulu. ʼI te temi ʼaia, neʼe mate taku tamai pea neʼe papitema taku faʼe ʼo liliu ai ko te Fakamoʼoni ʼa Sehova.

Neʼe ʼi ai he toe kehekehe ʼo toku faʼahiga maʼuli mo te ʼu lekula maʼoluga ʼo te Tohi-Tapu. Kaʼe, ʼi te temi ʼaia neʼe au fakatotonu ai ke au maʼu he fakakaukau ʼe tokalelei ʼae ʼe fakapapauʼi mai ʼi te Tohi-Tapu. Neʼe au kamata fetogi taku faʼahiga palalau pea mo lolomi toku ita. Neʼe au toe fakatuʼutuʼu ke au liaki toku maʼuli heʼe ʼaoga, mo taʼofi taku gaoʼi paʼaga, mo taku inu kava fakavale pea mo taku agafakakakā ki toku patolo.

Neʼe mole mahino ʼoku kaugā gaue pe koʼe neʼe au fia fai te ʼu fetogi fuli ʼaia ʼi toku maʼuli. Lolotoga taʼu ʼe tolu, neʼe natou fakaneke tuʼumaʼu au ke au toe liliu ki toku maʼuli ʼafeā. Kapau ʼi ʼihi temi ʼe au fai ni kiʼi lakahala, ohage la neʼe au ita peʼe au tauvele pea ʼe natou kalaga leʼo lahi mo he fiafia ʼo natou ui fenei: “Aha! Heʼeki fetogi te Joe ʼae neʼe tou iloʼi.” Neʼe au lotomamahi ʼaupito ʼuhi ko te ʼu palalau ʼaia. Neʼe hage kia au neʼe mole he fua ʼo ʼaku faiga.

Neʼe lahi te ʼu pāki ʼe ʼasi ai te ʼu felaveʼi fakasino ʼi toku fale gaue maʼia ʼi te olotinatea peʼe ko te ʼu tohi. Neʼe ko te agamahani ʼo ʼoku kaugā gaue ia te momoli ʼo he ʼu pāki ʼe ʼasi ai he ʼu felaveʼi fakasino ʼi ʼanatou olotinatea, ohage pe ko taku fai ki muʼa atu. Neʼe au faiga ke au ʼateaina mai taku agamahani ʼaia kaʼe neʼe natou faigaʼi ke mole au lava tekeʼi te faʼahi ʼaia. Neʼe au kole tokoni ki te tehina ʼae neʼe ina fai taku ako Tohi-Tapu ke au maʼu he ʼu fakalotomalohi. Neʼe fakalogo mai ʼaki he faʼa kataki ʼi taku fakaha ki ai te ʼu meʼa ʼae ʼi toku loto. Neʼe ina fakaʼaogaʼi he ʼu vaega Fakatohi-tapu ʼe alu tahi mo te aluʼaga ʼae neʼe au tau mo ia. Neʼe ina fakaha mai pe ʼe feafeaʼi haku mavae mai taku agamahani ʼaia. Pea neʼe ina fakalotomalohiʼi au ke au kumi tuʼumaʼu te tokoni ʼa Sehova ʼi te faikole.—Pesalemo 119:37.

ʼI te tahi ʼaho, neʼe au pauʼi ʼoku kaugā gaue ke matou fono. ʼI tanatou fakatahitahi mai, neʼe au ui age ke natou ʼavage he foʼi piele ʼe tahi ki he ʼu tagata ʼe toko lua neʼe inu kava fakavale. Neʼe iita ʼoku kaugā gaue pea natou ui fenei: “ ʼE mole feala ke ke fai te faʼahi ʼaia. Ko te ʼu tagata ʼaia ʼe nā faigaʼi ke tuku la tanā fakaʼaogaʼi fakavale te kava.” Neʼe au tali fenei: “ ʼO toe feia pe la mo au.” Talu mai te ʼaho ʼaia, neʼe natou iloʼi ʼaku faiga ʼae ke au tuku te sioʼi ʼo te ʼu pāki ʼae ʼe ʼasi ai he ʼu felaveʼi fakasino. Pea neʼe mole natou toe fakaneke au ke au toe liliu ki toku maʼuli ʼafeā.

ʼAki te alu ʼo te temi pea mo te tokoni lahi mai ʼa Sehova, neʼe au lava tauʼi taku agamahani ʼae ko te sioʼi ʼo te ʼu pāki ʼe ʼasi ai he ʼu felaveʼi fakasino. ʼI te taʼu 1999, neʼe au papitema ʼo liliu ai ko te Fakamoʼoni ʼa Sehova. Pea ʼe au lotofakafetaʼi ʼi taku toe maʼu he maʼuli ʼe lelei mo fiafia.

Kua au mahino ʼi te temi nei pe koʼe ʼe fehiʼa Sehova ki te ʼu meʼa ʼae neʼe au fia fai ki ai talu mai fualoa. ʼI tona ʼuhiga Tamai ʼofa, neʼe ina fia puipui au mai te ʼu nunuʼa ʼo te sioʼi te ʼu pāki ʼe ʼasi ai he ʼu felaveʼi fakasino. ʼI moʼoni leva te ʼu palalau ʼae ʼe tou maʼu ia Taaga Lea 3:5, 6. ʼE ui fenei ai: “Falala [kia Sehova] i tou loto katoa, kae aua naa ke falala ki tou poto, ke ke falala kia ia i ou ala fuli, pea e ina fakatokatoka anai ou ala.” Ko te ʼu lekula ʼo te Tohi-Tapu ʼe mole ko hotatou puipuiʼaga pe kaʼe ʼe tou tui papau ʼe fua lelei anai kia tatou.—Pesalemo 1:1-3.

ʼI te temi muʼa, neʼe au fehiʼa ki toku maʼuli kaʼe ʼi te temi nei, ʼe au fakaʼapaʼapa kia au totonu pea kua tokalelei toku loto. Kua lelei toku maʼuli pea ʼe au iloʼi ʼe lotofakamolemole mai ia Sehova pea ʼe tokoni mai. ʼI te taʼu 2000, neʼe au ʼohoana mo Karolin, ko he tuagaʼane finemui ʼe ʼofa kia Sehova ohage pe ko au. ʼE kua maʼu ʼi toma loto fale te tokalelei. ʼE ko he pilivilesio moʼoni tamā kau ki he fale tau tehina ʼi te malamanei katoa ʼe maʼa pea ʼe maʼu ai te ʼofa.