Neʼe ui e te apositolo ko Paulo ko Sehova * ʼe ko te “Atua o te fakafimalie fuli, ia ia e ina fakafimaliei [“tatou ʼi ʼotatou,” MN] mamahi fuli.” (2 Kolinito 1:3, 4) Pea ʼe ui ʼi te Tohi-Tapu ʼe mole he tahi ʼe tatau tana tokoni mo te tokoni ʼa te ʼAtua. Pea ʼe lava fakalotofimalieʼi tatou e tatatou Tamai ʼae ʼe ʼi selo tatau aipe pe ʼe lahi ʼotatou fihifihia.

ʼE mahino ia, ʼe tonu ke tou fai he meʼa mo kapau ʼe tou loto ke fakalotofimalieʼi tatou e te ʼAtua. Ohage la, ʼe feala koa ke tokoni mai he toketa mo kapau ʼe mole tou olo ki ai? ʼE ui fenei e te polofeta ko Amosi: “Pe e haele fakatahi ni tagata e toko lua kae e heeki na tonu tahi?” (Amosi 3:3) Koia, ʼe toe fakalotomalohiʼi fenei tatou ʼi te Tohi-Tapu: “Kotou fakaoviovi ki te Atua, pea e fakaoviovi atu anai ia kia koutou.”—Sakopo 4:8.

ʼE tou tui papau feafeaʼi ʼe fakaovi mai anai te ʼAtua kia tatou? ʼUluaki, ʼe fia tokoni mai kia tatou koteʼuhi neʼe ina fakaha tuʼumaʼu mai kia tatou. (Vakaʼi te fakamatala ʼae ʼi te ʼa takai.) Pea lua, ʼe tou maʼu ia he ʼu fakamoʼoni neʼe fakalotofiamalieʼi e te ʼAtua ni hahaʼi. ʼE ko he hahaʼi neʼe ina fakalotofimalieʼi moʼoni natou, tatau aipe ʼi totatou temi pea mo te temi muʼa.

Neʼe toe tau ia te Hau ko Tavite mo te ʼu fihifihia, ohage pe ko te tokolahi ia ʼaho nei ʼe natou kumi tokoni ki te ʼAtua. ʼI te tahi ʼaho, neʼe kole fenei e Tavite ki te ʼAtua: “Fakalogo mai ki te leo o aku kole, moka au tagi atu kia koe.” Neʼe tali koa te ʼAtua ki tana kole? ʼEi. Neʼe hoko fenei atu e Tavite: “Nee ina fakamauli au; koia e fiafia lahi osi toku loto.”—Pesalemo 28:2, 7.

Neʼe fakatuʼutuʼu e te ʼAtua ke fakalotofimalieʼi tatou e Sesu. ʼI te ʼu gaue ʼae neʼe hinoʼi e te ʼAtua kia ia, neʼe tonu kia Sesu ke ina “fakamauli natou ae e loto fasifasi” pea mo “fakapelepelei natou fuli ae e mamahi.” (Esaia 61:1, 2) Ohage ko tona fakakikite, neʼe makehe te tokaga ʼa Sesu ki te hahaʼi ʼae neʼe “vaivai mo mafasia.”—Mateo 11:28-30.

Neʼe fakalotofimalieʼi e Sesu ia te hahaʼi ʼaki tana foaki kia natou ia he ʼu tokoni fakapotopoto. Pea neʼe tokaga ia kia natou ʼaki he agalelei pea ʼi ʼihi temi neʼe ina fakamalolo ʼonatou mahaki. ʼI te tahi ʼaho, neʼe kole fenei  age e he tagata kilia kia Sesu: “Kapau e ke loto ki ai, pea e ke fealagia toku fakamaa.” ʼI te ʼofa mamahi ʼa Sesu ki ai, neʼe ina tali fenei age: “E au loto ki ai, ke ke maa.” (Maleko 1:40, 41) Pea neʼe fakamalolo ai te tagata kilia.

Ia ʼaho nei, ʼe mole nofo te ʼAlo ʼo te ʼAtua ʼi te kele ke ina fakalotofimalieʼi ia tatou takitokotahi. Kaʼe, ʼe hoko atu pe e tana Tamai ia te tokoni kia natou ʼae ʼe ʼaoga ki ai he tokoni. Koteʼuhi ko Sehova ʼe ko te “Atua o te fakafimalie fuli.” (2 Kolinito 1:3) Tou vakaʼi te ʼu puani ʼe fa ʼe fakaʼaogaʼi e te ʼAtua moʼo fakalotofimalieʼi te hahaʼi.

• Te Tohi-Tapu. “Ko te u mea fuli nee tohi fakatomua, nee tohi natou ki totatou akoi, ke tou mau ai te amanaki lelei, i te kataki fualoa pea mo te fakapelepele ae e foaki e te Tohi.”—Loma 15:4.

• Te Laumalie Maʼoniʼoni ʼo Te ʼAtua. Mole faʼa fualoa ki te ʼosi mate ʼo Sesu, neʼe hoko ai he temi tokalelei ʼi te kokelekasio Fakakilisitiano katoa. Kotea tona tupuʼaga? “Neʼe haʼele ʼi te manavasiʼi kia Sehova pea mo te fakafimalie mai te laumalie maʼoniʼoni.” (Gaue 9:31, MN) Ko te laumalie maʼoniʼoni, ia te malohi gaue ʼo te ʼAtua ʼe malohi ʼaupito. Koia, ʼe fakaʼaogaʼi e te ʼAtua ia tona laumalie maʼoniʼoni moʼo fakalotofimalieʼi he tahi ʼi he faʼahiga aluʼaga pe.

• Te Faikole. ʼE ui fenei mai ʼi te Tohi-Tapu: “Aua naa koutou tuania o uhiga mo he mea e tahi.” Pea mo hoko atu fenei: “Koutou fakaha ki te Atua te u mea ae e aoga kia koutou aki ni kole . . . pea ko te tokalelei o te Atua, ae e fakalaka age i te u atamai fuli, e ina taupau anai okotou loto mo akotou manatu.”—Filipe 4:6, 7.

• Ko ʼOtatou Tehina Mo Tuagaʼane ʼe feala ke natou liliu ko he ʼu kaumeʼa moʼoni ʼae ʼe feala ke tou falala kia natou moka tou tau mo he aluʼaga faigataʼa. Neʼe ui e Paulo ko tona kaumeʼa ʼe ina ‘fakapelepeleʼi tona loto’ ʼi te ʼu temi ʼo te “fitaa” mo te “mamahi.”—Kolose 4:11; 1 Tesalonika 3:7.

Kaʼe ʼe feala ke ke feʼekeʼaki pe ʼe hoko moʼoni te aluʼaga ʼaia, ia ʼaho nei. Tou vakaʼi he ʼu faʼifaʼitaki ʼo ni hahaʼi neʼe natou tau mo te ʼu fihifihia ʼae neʼe tou talanoa ki ai ʼi te ʼuluaki alatike. Ohage pe ko natou ʼaia, ʼe ke iloʼi ai anai ko te ʼAtua ʼe kei hoko atu pe tana fakahoko ia te fakapapau fakalotomalohi ʼaeni: “O hage ko he tagata ae e fakapelepelei e tana fae, e au fakapelepelei feia anai koutou.”—Esaia 66:13.