ʼE manatuʼi fenei e Seth: * “Neʼe fakamavae maua mo toku ʼohoana ʼi ʼama gaue ʼi te moʼi temi pe ʼe tahi. Lolotoga taʼu ʼe lua, neʼe ma maʼuʼuli ʼaki pe te ʼu meʼa ʼofa mai ʼoma famili. Pea neʼe ma fakahoko te ʼu kiʼi gaue fakatemi. Ki muli age, neʼe mahaki toku ʼohoana ko Priscilla pea neʼe au logoʼi ʼe mole kei ai hoku ʼuhiga.”

“Neʼe ma katakiʼi feafeaʼi te fihifihia ʼaia? Neʼe manatuʼi tuʼumaʼu e Priscilla te ʼu palalau ʼa Sesu ʼae ʼe tuʼu ia Mateo 6:34. Neʼe ui ai ʼe mole tonu ke ma tuʼania te apogipogi koteʼuhi ʼe takitahi pe te ʼaho mo ʼona tuʼania. Pea ko ʼanā faikole fakamalotoloto neʼe tokoni ki ai ke lotomalohi tuʼumaʼu. Ki toku ia faʼahi, neʼe au maʼu ia he fakalotofimalieʼi ʼi te Pesalemo 55:23. Ohage pe ko te tagata faipesalemo, neʼe au tuku taku kavega kia Sehova pea neʼe au logoʼi neʼe tokoni mai kia au. Logo la kua au maʼu taku gaue ia ʼaho nei, kaʼe ʼe ma hoko atu pe tamā fakafaigafua ʼoma maʼuli ʼo mulimuli ki te tokoni ʼa Sesu ʼae ʼe tou maʼu ia Mateo 6:20-22. Ko te meʼa ʼae ʼe maʼuhiga, neʼe ma fakaovi ki te ʼAtua pea mo malohi ai tamā feʼofaʼofani.”

ʼE ui fenei e Jonathan: “Neʼe au tuʼania tomatou apogipogi ʼi te temi ʼae neʼe pupunu ai tomatou matani gaue fakafamili. ʼUhi ʼae ko te ʼu fihifihia fakaekonomika, neʼe mole kei he fua ʼo te ʼu taʼu ʼae ʼe 20 neʼe matou gaue kinakina ai. Neʼe mole kei lahi tamā kiʼi foʼi falā. Neʼe mole feala ke ma fakaʼaogaʼi tamā kate ʼae ʼo te fale paʼaga koteʼuhi naʼa mole ma lava huʼi te ʼu meʼa ʼae neʼe ma totogi.”

“Kaʼe ko te Folafola ʼa Te ʼAtua pea mo tona laumalie maʼoniʼoni neʼe nā tokoni mai ke au toʼo he ʼu tonu fakapotopoto. Neʼe au tali he faʼahiga gaue pe pea neʼe au fakasiʼisiʼi taku fakaʼaogaʼi taku foʼi falā. ʼI toku ʼuhiga Fakamoʼoni ʼa Sehova, neʼe lahi te tokoni mai ʼo ʼoku tehina mo tuagaʼane. Neʼe natou fakalotomalohiʼi au pea mo natou tokoni mai ʼi te ʼu temi faigataʼa.”

ʼE fakamatala fenei e Raquel: “ ʼI te kua mavae ʼo toku ʼohoana, neʼe au logoʼi ai toku ita, pea neʼe au lotomamahi ʼaupito. Kaʼe ʼi taku fakaovi ki te ʼAtua, neʼe au maʼu ai toku fimalie. ʼI taku faikole ʼi te ʼaho fuli ki te ʼAtua, neʼe ina foaki mai te tokalelei ʼo ina fakafimalieʼi toku loto. Neʼe hage pe kua ina fakatokatoka toku loto.”

“Kaʼe ʼaki tana Folafola, ia te Tohi-Tapu, neʼe au lolomi ai toku ita pea mo toku lotomamahi. Neʼe au toʼo fakamalotoloto te ʼu palalau ʼaeni ʼa te apositolo ko Paulo ia Loma 12:21: ‘Ke aua naa ke tuku ke malo te kovi ia koe, kae ke ke malo i te kovi aki te lelei.’

“Neʼe ʼi ai toku kaumeʼa lelei neʼe tokoni mai, ke au tauʼi toku lotovaivai. Neʼe ina lau mai te vaega ʼo Ekelesiasi 3:6 pea neʼe ina ui mai ʼaki he agalelei, ʼi ʼihi temi ʼe tonu ai ke tou ‘liaki te meʼa ʼae kua puli.’ Neʼe ko he tokoni faigataʼa kia au, kaʼe neʼe ʼaoga moʼoni ia kia au. ʼI te temi nei, kua ʼi ai ʼaku fakatuʼutuʼu maʼuhiga.”

ʼE fakamatala fenei e Elizabeth: “Ka ke mavete mo tou ʼohoana, pea ʼe ʼaoga ke tokoni atu he tahi. Neʼe ʼi ai toku kaumeʼa lelei neʼe tokoni tuʼumaʼu mai kia au. Neʼe ma faifetagihi fakatahi, mo ina fakapelepeleʼi au. Neʼe au logoʼi toku ʼofainaʼi. Neʼe au tui papau ai, neʼe fakaʼaogaʼi ia ia e Sehova mo ʼoku fakafimalieʼi.”

Ko Luis neʼe tau mo te mahaki faigataʼa. Neʼe kua tuʼa lua tana meihiʼi mate. Kua maʼua ʼi te temi nei ke manavā ki te kasa, ia hola ʼe 16 ʼi te ʼaho. ʼE ina ui fenei: “ ʼE au faikole ʼi te temi fuli kia Sehova, pea ʼi taku ʼosi faikole, ʼe au maʼu te fakalotofimalie mai tona laumalie maʼoniʼoni. ʼAki te faikole ʼe au maʼu ai te lotomalohi, koteʼuhi ʼe au tui kia te ia, pea ʼe au iloʼi ʼe tokaga ia kia au.”

ʼE fakamahino fenei e Petra, ʼae kua taʼu 80 tupu: “Neʼe lahi te ʼu meʼa neʼe au fia fai, kaʼe neʼe mole au lava fakahoko. Neʼe au lotovaivai ʼi taku sio ki te hifo ʼo toku malohi. Neʼe kua au gaʼegaʼe pea neʼe au toʼo tuʼumaʼu ʼaku faitoʼo. Neʼe au manatuʼi tuʼumaʼu te faikole ʼa Sesu ki tana Tamai ke ina tuku ke fakalaka te ʼahiʼahi, mo kapau neʼe feala. Kaʼe neʼe foaki e Sehova te malohi kia Sesu. Pea neʼe ina fakamalohiʼi ai mo au. Neʼe liliu te faikole ko toku faitoʼo ʼi te ʼaho fuli. Pea ʼi taku ʼosi faikole ki te ʼAtua, neʼe au logoʼi ai toku fimalie.”—Mateo 26:39.

 Kua taʼu 30 nei te maʼu e Julian ia te mahaki kovi. Neʼe ina ui fenei: “Kua au fetogi toku hekaʼaga pule ʼaki he hekaʼaga toho mahaki. Kaʼe ʼe ʼi ai te ʼaoga ʼo toku maʼuli, heʼe au tokoni ki niʼihi. ʼI taku tokoni lahi ki te hahaʼi neʼe maʼamaʼa ai toku mamahi. Neʼe fakahoko e Sehova tana fakapapau ʼae, ʼe tokoni mai anai kia tatou ʼi te ʼu temi faigataʼa. Ohage pe ko te apositolo ko Paulo, e feala ke au ui fenei: ‘E au fealagia te u mea fuli i ae e ina fakamalohii au.’ ”—Filipe 4:13.

ʼE fakamatala fenei e Antonio: “Neʼe mate taku tamai he neʼe fakaʼi e te motoka. ʼI te kamata, neʼe mole au fia tui neʼe hoko moʼoni ia te aluʼaga ʼaia. Neʼe mole ina fai he meʼa ʼe kovi, he neʼe alu lalo pe ia. Neʼe mole au lava fai he meʼa. Neʼe nofo ʼi te koma ia ʼaho ʼe nima pea neʼe mate leva. ʼI ʼihi temi, ʼe au fia tagi, kaʼe ʼe au faiga ke ʼaua naʼa au tagi ʼi muʼa ʼo taku faʼe. Pea kau to tokotahi ʼe au tagi mamahi ai. Pea neʼe au feʼuiʼaki fenei: ‘He koʼe neʼe hoko te aluʼaga ʼaia? Kotea tona tupuʼaga?’ ”

“Lolotoga te ʼu temi faigataʼa ʼaia, neʼe au kole kia Sehova ke tokoni mai ke au lava katakiʼi toku lotomamahi pea mo foaki mai ia te tokalelei. Neʼe au logoʼi ai toku fimalie. Neʼe au manatuʼi ʼe ui ʼi te Tohi-Tapu ‘ko te ʼu temi pea mo te ʼu meʼa fakafokifa ʼe hoko kia natou fuli.’ ʼE mole feala ki te ʼAtua ke loi. Koia ʼe au tui papau ai, ʼe au toe felaveʼi anai mo taku tamai ʼi te fakatuʼuake.”—Tagata Tanaki 9:11, MN; Soane 11:25; Tito 1:2.

Ko Robert ʼae neʼe tou talanoa ki ai ʼi te ʼuluaki alatike, neʼe ina toe maʼu te ʼu manatu ʼaia. Neʼe ina ui fenei: “Ko au mo toku ʼohoana ʼe ma logoʼi te tokalelei ʼo te ʼAtua ʼae ʼe palalau ki ai ia Filipe 4:6, 7. ʼE ma maʼu te faʼahi ʼaia ʼuhi ko ʼama faikole kia Sehova. Ko te tokalelei ʼaia neʼe tokoni mai ke feala hamā palalau ki te ʼu tagata kumi logo ʼo te televisio, ʼo ʼuhiga mo te fakatuʼuake. Ko tamā tama neʼe mate tuʼutamaki ʼi te vakalele. Kaʼe logo la te aluʼaga ʼaia, neʼe ma manatuʼi te ʼu temi fiafia neʼe matou fakatahi ai. Pea neʼe ma faigaʼi ke ma taupau tuʼumaʼu ia te ʼu manatu ʼaia.”

“Neʼe ui mai e te ʼu tehina mo tuagaʼane neʼe natou sisio ʼi te televisio ki tamā palalau ʼo ʼuhiga mo tamā tui, ʼaki he agafakatokatoka. Neʼe ma tali age neʼe lava te faʼahi ʼaia ʼuhi ko ʼanatou faikole. Neʼe au tui papau neʼe tokoni mai ia Sehova, ʼo ina fakaʼaogaʼi natou ʼaki ʼanatou faikole.”

Ohage pe ko te ʼu faʼifaʼitaki ʼaeni neʼe tou vakaʼi, ʼe feala pe ki te ʼAtua ke ina fakafimalieʼi te hahaʼi ʼi he faʼahiga aluʼaga pe ʼe tau mo natou. Kaʼe ʼe feafeaʼi kia koutou? Tatau aipe pe ʼe kotea ia te faʼahiga fihifihia ʼe kotou tau mo ia, kaʼe ʼe feala ke kotou maʼu he fakalotofimalie ʼi te ʼu temi faigataʼa. * Kotou kumi tokoni mai ia Sehova, koteʼuhi ko ia “te Atua o te fakafimalie fuli.”—2 Kolinito 1:3.