Ka ke fia mahino lelei ki he tahi, ʼe ʼaoga ke ke iloʼi te ʼu gaue ʼae neʼe ina fai mo te ʼu fihifihia neʼe fakalaka ai. ʼE tatau pe mo te ʼAtua, ʼe tonu ke ke iloʼi te ʼu gaue ʼae neʼe kua ina fakahoko. Pea ʼe ke punamaʼuli anai ʼi tau sio ʼae ʼe fua lelei ai kia tatou ia ʼaho nei mo te temi ka haʼu.

Ko Sehova ʼAtua te Tupuʼaga, pea “logo la ko te ʼAtua ʼe fakapulipuli, kaʼe ʼe ha lelei ʼona kalitate talu mai te fakatupu ʼo te malamanei, he ʼe feala ke tou mahino ki ai ʼi te ʼu meʼa ʼae neʼe ina fai.” (Loma 1:20) “Nee ina fakatupu te kele i tona mafimafi, nee ina fakatuutuu te u fakatafito o te malamanei i tona poto, pea nee ina folahi te atu lagi i tona atamai.” (Selemia 10:12) ʼE ha ʼi te fakatupu te lototokaga ʼa te ʼAtua kia tatou.

ʼE makehe ʼosi te maʼuli ʼo te tagata koteʼuhi neʼe fakatupu ia e te ʼAtua “ ’o mulimuli ki tona pāki.” (Senesi 1:27, MN) Ko tona fakaʼuhiga, neʼe ina fakafealagia mai ke tou faʼifaʼitakiʼi ʼona kalitate fakaofoofo pea ke tou mahino ki ʼana faʼahiga manatu. ʼE tou fiafia mo tou maʼu ai he ʼuhiga moʼoni ʼo ʼotatou maʼuli. Ko he tahi faʼahi ʼe maʼuhiga, ko te fakafealagia mai e te ʼAtua ke tou kaumeʼa mo ia.

Ka tou sisio ki te kele ʼe tou mahino ai pe kotea ʼae neʼe logoʼi e te ʼAtua ʼo ʼuhiga mo tatou. Neʼe ui e te apositolo ko Paulo: “Neʼe ina foaki he fakamoʼoni ʼo ʼuhiga mo ia, ʼi tana fai he ʼu meʼa ʼe lelei, ʼi tana foaki kia koutou mai te lagi te ʼua mo te ʼu temi mahu, ʼo foaki atu te meʼa kai ke kotou makokona ai pea mo fakafiafiaʼi ʼokotou loto.” (Gaue 14:17) ʼE loto e te ʼAtua ke tou maʼuli fiafia, koia ʼae neʼe ina foaki mai ai te ʼu meʼa ʼe lahi mo kehekehe ʼe ʼaoga ki ʼotatou maʼuli. Kae ʼe mole ko te gataʼaga pe ʼaia ʼo te ʼu meʼa ʼae neʼe ina foaki mai.

Neʼe ina fakatupu te kele ke maʼuli ai te tagata, ʼo heʼe gata. ʼE tohi fenei ʼi te Tohi-Tapu: “Nee ina foaki  te kele ki te u foha o te tagata,” neʼe ina faʼu ia ia ke ʼaua naʼa lavaki kae “ke nofoi.” (Pesalemo 115:16; Esaia 45:18) Ke nofoʼi e ai? ʼO kaku ki ʼafea? “ ’E ma’u anai e te kau agatonu te kele, pea ’e natou nonofo anai ʼi ai ’o talu ai.”​—Pesalemo 37:29, MN.

Koia ʼae neʼe fakatupu ai e Sehova ia Atama mo Eva, te ʼuluaki tagata mo fafine. Neʼe ina fakanofo naua ʼi te palatiso fakakelekele ‘ke nā tauhi mo leʼoleʼo ki ai.’ (Senesi 2:8, 15) Pea neʼe ina foaki age te ʼu gaue makehe ʼe lua: “Kolua fanaunau, kolua liuliuga, kolua fakahahai te kele, pea kolua pulei ia ia.” (Senesi 1:28) Neʼe tonu ke maʼuli fiafia ia Atama mo Eva ʼi te kele, ʼo heʼe gata. Kae, ʼi meʼa fakaʼofaʼofa foki ko tanā filifili ke nā agatuʼu ki te ʼAtua, ʼo mole kei feala leva ke nā kau ki “te kau agatonu” ʼae ka natou maʼu te kele. Kae logo pe la tanā gaue kovi ʼaia, neʼe mole holoʼi e Sehova ʼana fakatuʼutuʼu ki te tagata mo te kele. ʼE tou vakaʼi nei he tahi fakatuʼutuʼu neʼe ina fai.

Ko te Tohi-Tapu ʼe ko te Folafola ia ʼa te ʼAtua. Kae he koʼe koa neʼe ina foaki mai ia te Tohi-Tapu? Ke tou iloʼi ia te ia. (Taaga Lea 2:1-5) ʼE moʼoni, ʼe mole tali fuli mai te Tohi-Tapu ki te ʼu fehuʼi fuli ʼo ʼuhiga mo te ʼAtua. ʼE mole he tohi ʼe feala ke ina tali ki ai. (Ekelesiasi 3:11) Kae ko meʼa fuli pe ʼe tohi ʼi te Tohi-Tapu ʼe tokoni mai ke tou iloʼi ai ia te ʼAtua. ʼE tou mahino ki tona ʼuluagaaga ʼi tana faʼahiga felogoi mo te hahaʼi. ʼE tou toe iloʼi mo te faʼahiga aga ʼe ina leleiʼia mo ʼae ʼe fehiʼa ki ai. (Pesalemo 15:1-5) Pea ʼe tou maʼu ai tana faʼahiga manatu ʼo ʼuhiga mo te tauhi, te ʼu aga ʼae ʼe tonu ke fai pea mo te ʼu koloa fakamalama. Kae ʼe tou mahino lelei age ki te ʼuluagaaga ʼo Sehova ʼaki te ʼu palalau mo te ʼu gaue fuli neʼe fai e tona ʼAlo, ia Sesu Kilisito.​—Soane 14:9.

Neʼe toe foaki mai e Sehova ia tana Folafola ke tou lava takitaki ʼaki ʼotatou maʼuli pea ke tou fiafia ai. ʼI te Tohi-Tapu ʼe maʼu ai ni tokoni ke lelei ai te maʼuli fakafamili, ke tou maʼuli fakafeʼauga pea ke tou tekeʼi te lotohoha. Pea ʼe tali ki te ʼu fehuʼi maʼuhiga ʼaeni ʼe feala ke tou fai: He koʼe koa ʼe lahi te ʼu mamahi? Kotea anai totatou ka haʼu? ʼE toe fakamahino ai te ʼu gaue neʼe fai e te ʼAtua ke hoko moʼoni tana ʼuluaki fakatuʼutuʼu ʼo ʼuhiga mo te tagata.

ʼE moʼoni ʼe makehe ʼaupito te Tohi-Tapu. Neʼe ko te toko 40 tagata ʼae neʼe natou tohi, lolotoga taʼu ʼe 1 600 tupu. Pea ʼe alu tahi te ʼu manatu fuli ʼe tuʼu ai koteʼuhi ʼe ko te ʼAtua ʼae neʼe ina tohi. (2 Timoteo 3:16) ʼE kei maʼu pe te ʼu Tohi-Tapu kua fualoa tona tohi koteʼuhi neʼe puipui lelei ʼo aʼu mai ki totatou temi. Pea neʼe mole he fua ʼo te ʼu faiga ʼae ke fakagata tona fakaliliu, tona tufa pea mo tona lau. Kae kua liliu ʼi te ʼaho nei, ko te tohi ʼae ʼe lahi age tona tufa mo tona ʼu fakaliliu. Koia, ʼe tou tui papau “e tuu te folafola o totatou Atua o heegata.”​—Esaia 40:8.

Neʼe fai e te ʼAtua he fakatuʼutuʼu makehe ke hoko moʼoni ʼana fakapapau ʼae ke maʼuli heʼe gata te tagata ʼi te kele. Ko te faʼahiga maʼuli ʼaia neʼe pulihi e Atama ʼi tana agatuʼu ki te ʼAtua. Koia, “ ʼaki te tagata pe ʼe tahi neʼe hu ai te agahala ki te malamanei, pea ʼaki te agahala ia te mate, ʼo mafola ai te mate ki te tagata fuli pe he neʼe natou agahala fuli.” (Loma 5:12) Koia, neʼe mole hoko ai te fakatuʼutuʼu ʼa te ʼAtua. Kae kotea koa ʼae neʼe fai e Sehova?

ʼE ha lelei ʼi te ʼu gaue ʼae neʼe fai e Sehova ʼona kalitate. Neʼe ina fakamauʼi ʼaki he faitotonu ia Atama mo Eva. Pea neʼe ina fai ni puleʼaki ki tonā hakoga he neʼe ʼofa ia ʼi ai. Neʼe ina toe fakaha mo tona poto ʼi tana maʼu atu aipe he puleʼaki ki te aluʼaga ʼae neʼe hoki hoko. (Senesi 3:15) Ko te puleʼaki ʼaia ʼe ko Sesu Kilisito, te ʼAlo ʼo te ʼAtua. Kotea tona fakaʼuhiga?

Neʼe fekauʼi e Sehova ia Sesu ki te kele ke ina akoʼi ki te hahaʼi te ʼala ʼae ʼe taki ki te maʼuli pea mo “foaki tona maʼuli ko he totogi maʼa te tokolahi.” a  (Mateo 20:28; Soane 14:6) Neʼe haohaoa ia Sesu ohage pe ko Atama, koia ʼae neʼe feala ke ina foaki tona maʼuli ko he totogi. Neʼe mole agatuʼu ia ohage ko Atama, kae neʼe fakalogo tuʼumaʼu pe ʼo kaku ki tona mate. Pea neʼe toe fakatuʼuake e Sehova ki te maʼuli ʼi selo. Kua feala leva ke fai e Sesu te gaue ʼae neʼe mole lavaʼi e Atama, ʼae ke ina foaki ki te hahaʼi fakalogo te ʼamanaki ki te maʼuli heʼe gata. “Koteʼuhi ʼaki te talagataʼa ʼa te tagata pe ʼe tahi kua agahala ai te hahaʼi tokolahi, ʼo toe feia aipe, ʼaki te fakalogo ʼa te tagata pe ʼe tahi ʼe faitotonu anai te hahaʼi tokolahi ia muʼa ʼo te ʼAtua.” (Loma 5:19) Koia, ʼaki te sakilifisio faitotogi ʼa Sesu ʼe fakahoko anai e te ʼAtua tana fakapapau ki te tagata, ke maʼuli ʼi te kele ʼo heʼe gata.

Neʼe tou vakaʼi te faʼahiga puleʼakiʼi e Sehova te ʼu fihifihia ʼae neʼe tupu mai te agatuʼu ʼa Atama. Pea neʼe lahi te ʼu aluʼaga neʼe tou ako ai ʼo ʼuhiga mo te ʼAtua. Koia, ʼe mole feala ki he meʼa ke ina taʼofi te ʼu gaue ʼa Sehova, koteʼuhi ʼe ina “fakahoko” ʼana fakatuʼutuʼu fuli. (Esaia 55:11) Neʼe tou toe ako mo te lahi ʼo te ʼofa ʼae ʼe maʼu e Sehova kia tatou. “Neʼe fakaha mai e te ʼAtua tona ʼofa kia tatou ʼi te aluʼaga ʼaeni: Neʼe ina fekauʼi mai tona ʼAlo ʼulu tokotahi ki te malamanei ke feala ai hatatou maʼu te maʼuli ʼaki ia ia. Ko te fakaʼuhiga ʼaeni ʼo te ʼofa: Neʼe mole ko tatou ʼae neʼe ʼoʼofa ki te ʼAtua, kaʼe neʼe ko ia ʼae neʼe ʼofa kia tatou pea neʼe ina fekauʼi mai tona ʼAlo ko he sakilifisio faifakalelei maʼa ʼatatou agahala.”​—1 Soane 4:9, 10.

Neʼe mole ‘fakahao e te ʼAtua tona ʼAlo totonu kae neʼe ina tuku ia ke mate maʼa tatou fuli’ pea ʼe tou tui papau ai e foaki anai e te ʼAtua ia “meʼa fuli” neʼe ina fakapapau mai. (Loma 8:32) Kae kotea koa ʼae neʼe ina fakapapauʼi mai? Ko te faʼahi ʼaia ʼae ka tou vakaʼi anai.