ʼAki pe te ʼu alatike ʼae kua ʼosi atu, kua feala leva hatatou tali ki te fehuʼi ʼaeni: Ko ai koa ia te ʼAtua? ʼE tou iloʼi ko tona huafa ko Sehova pea ko tona kalitate ʼae ʼe maʼuhiga ʼaupito ʼe ko te ʼofa. Neʼe tou toe vakaʼi mo te ʼu gaue fuli neʼe ina fakahoko pea mo ʼana fakatuʼutuʼu ke maʼuli fiafia ai te tagata. Kae ʼe mole heʼeki katoa tatatou mahino ʼo ʼuhiga mo te ʼAtua. Koia, ʼe feala ai ke ke feʼekeʼaki pe koʼe koa ʼe ʼaoga ke fakaloloto atu tau mahino ʼo ʼuhiga mo te ʼAtua.

Koʼeni te fakapapau neʼe fai e Sehova: “Kapau e ke kumi ia ia, e ina tuku anai ke ke mau ia ia.” (1 Koloniko 28:9) Ka ke fakaovi ki te ʼAtua ʼe feala ke ke kaumeʼa mo ia. ʼE ko he toe pilivilesio taulekaleka ia! (Pesalemo 25:14) Kae kotea te ʼu fua ʼo tau fakakaumeʼa mo Sehova?

ʼE ke fiafia moʼoni ai. Ko Sehova ʼe ko “te ʼAtua fiafia.” (1 Timoteo 1:11) Pea ʼe feala ke ke maʼu te fiafia moʼoni ʼi tau fakaovi mo faʼifaʼitakiʼi ia te ia, ʼo toe lelei ai anai mo tau fakakaukau. (Pesalemo 33:12) ʼE toe feala anai ke ke faʼufaʼu tou maʼuli mo ke fakapelepeleʼi, pea ke ke felogoi lelei mo te hahaʼi. ʼEi, ʼe ke manatu tahi anai mo te tagata faipesalemo ʼae neʼe ina ui fenei: “Ko taku fakaovi ki te Atua, koena toku koloa.”​—Pesalemo 73:28.

ʼE tokaga te ʼAtua kia koe. Neʼe fai e Sehova te fakapapau ʼaeni ki ʼana tisipulo: ‘E au tuku tuumau anai oku mata kia koutou.’ (Pesalemo 32:8) Ko tona fakaʼuhiga, ʼe tokaga ia Sehova kia tatou takitokotahi pea ʼe ina foaki ia meʼa fuli ʼe ʼaoga kia tatou. (Pesalemo 139:1, 2) Koia, ka malohi au felogoi mo te ʼAtua, ʼe ke tokagaʼi ai ʼe mole feala ia ke situʼa kia koe.

ʼE ke maʼu ai he ka haʼu taulekaleka. ʼE fakafealagia e Sehova ke ke maʼuli fiafia ʼi te temi nei, ʼo toe feia ʼi te ka haʼu. (Esaia 48:17, 18) ʼE ui fenei ʼi te Tohi-Tapu: “Koʼeni ia te fakaʼuhiga ʼo te maʼuli heʼe gata, ke natou ako ke natou iloʼi ia koe, te ʼAtua moʼoni pe ʼe tahi pea mo ia ʼae neʼe ke fekauʼi mai, ia Sesu Kilisito.” (Soane 17:3) Koia, ʼi te ʼu temi faigataʼa ʼaeni ʼe tou lolotoga ai, ʼe hage mai pe te ʼamanaki ʼaia kua tuku mai e te ʼAtua ko he foʼi tau “ ʼe tuha mo te falala pea mo tuʼu malohi.”​—Hepeleo 6:19.

Koia, ko ʼihi tupuʼaga maʼuhiga ʼaeni ʼo hau fakakaumeʼa mo te ʼAtua. Pea kapau ʼe ke fia fakaloloto atu tau mahino, ʼe feala ke ke faipalalau mo he Fakamoʼoni ʼa Sehova peʼe ke alu ki te tuʼasila ʼi te Neti jw.org.