ʼE tou feiloʼiʼaki lelei mo he tahi moka ʼe tou mahino ki ʼona kalitate, pea ʼe toe malohi ai ʼatatou fakakaumeʼa mo ia. ʼE tatau pe mo tatatou mahino ki te ʼu kalitate ʼo Sehova. ʼE hoki tou iloʼi lelei ai ia te ia mo tou fakamalohiʼi ʼatatou felogoi mo ia. ʼE lahi ʼaupito te ʼu kalitate fakaofoofo ʼo te ʼAtua. Kae ko kalitate ʼe fa ʼe makehe age: tona malohi, tona poto, tana faitotonu pea mo tona ʼofa.

“Oi Sehova ʼAliki, koʼeni, neʼe ke fakatupu te ʼatu lagi mo te kele ʼaki tou mafimafi lahi.” ​—SELEMIA 32:17, MN.

ʼE tou mamata ki te mafimafi ʼo te ʼAtua ʼi ʼana fakatupu. Fakakaukauʼi age muʼa ʼe ke tuʼu ʼi tuʼa kae laʼa. Kotea ʼae ʼe ke logoʼi? Te mafana ʼo te laʼa. ʼE ke lolotoga logoʼi nei te mafimafi ʼo Sehova. ʼE vela feafeaʼi ia te laʼa? ʼI tona lotomalie, ʼe aʼu tona vela ki te 15 000 000. ʼI te sekonita fuli, ʼe hage te malohi ʼo te laʼa ko te paʼulu ʼo ni foʼi pulu fakanukeleʼea ʼe teau miliona tupu.

Kae ʼe ʼi ai te ʼu fetuʼu ʼe lauʼi miliona ʼe lahi age ʼi te laʼa, ohage la ko te fetuʼu UY Scuti. ʼE fakafuafua e te kau faisienesia ʼe laulahi age ʼi te laʼa ʼo tuʼa 1 700 tupu. Kapau la ʼe tuʼu te fetuʼu ʼaia ʼi te tuʼuʼaga ʼo te laʼa, ʼe feala ke ina ʼaofi te kele ʼo aʼu ki te fetuʼu Jupiter. Kua tou mahino leva ki te ui ʼa Selemia  neʼe fakatupu e Sehova ʼAtua te ʼatulaulau ʼaki tona mafimafi lahi.

He koʼe ʼe ʼaoga mai te malohi ʼo te ʼAtua? ʼE fakalogo totatou maʼuli ki te ʼu fakatupu ʼa te ʼAtua, ohage ko te laʼa mo meʼa fuli ʼe maʼu ʼi te fuga kele. ʼE fakaʼaogaʼi e te ʼAtua tona malohi ke fua lelei ki te takitokotahi. ʼO feafeaʼi? ʼI te ʼuluaki sekulo, neʼe ina foaki kia Sesu te malohi ke ina fakahoko he ʼu milakulo. ʼE tou lau ia Mateo 11:5: “Kua sisio te kau kivi, kua haʼele te kau ketu, kua fakamaʼa te kau kilia, kua logo te kau tuli, kua fakatuʼuake te kau mate.” Kae ʼe feafeaʼi ia ʼaho nei? ʼE ui ʼi te Tohi-Tapu: “ ʼE ina foaki te malohi ki ʼae ʼe gaʼegaʼe” pea “ko natou ʼae ’e falala kia Sehova ’e natou toe malolohi anai.” (Esaia 40:29, 31, MN) ʼE feala ke tuku mai e te ʼAtua “te malohi makehe” ke tou katakiʼi te ʼu ʼahiʼahi faigataʼa ʼo te maʼuli. (2 Kolonito 4:7) ʼE mole he tuʼakoi ʼo tona malohi pea ʼe ina fakaʼaogaʼi moʼo fakalotofimalieʼi ʼo tatou. ʼE ke fia fakaovi la ki he ʼAtua ʼofa feia?

“ ʼE lahi tau ʼu gaue oi Sehova! Neʼe ke fai tau ’u gaue fuli ʼaia ʼaki te poto.”​—PESALEMO 104:24, MN.

Ka tou sivisivi lelei ia meʼa fuli neʼe fakatupu ʼe te ʼAtua ʼe tou ʼofolele ai ʼuhi ko tona poto. ʼE ʼi ai te vaega ako ʼo te sienesia ʼe higoa ko te biomimétisme. ʼE sivi ai e te kau poto te fakatupu ʼa Sehova pea natou faʼifaʼitakiʼi moʼo faʼu ʼaki he ʼu meʼa gaue, ohage la ko te vakalele.

ʼE toe ha te poto ʼa te ʼAtua ʼi te sino ʼo te tagata. Tou toʼo te faʼifaʼitaki ʼo he kiʼi toe meamea. ʼE kamata tuputupu ʼi te fatu ʼo tana faʼe, ko he kiʼi eveeve. Pea ʼe kamata mavetevete te kiʼi eveeve ʼaia ʼo tupu ai te ʼu eveeve ʼo te toto, ʼo te ʼuto pea mo ʼae ʼo te ʼu hui. Hili ia pea tuputupu mamalie leva te ʼu koga ʼo te sino. Lolotoga mahina ʼe hiva, neʼe liliu te ʼu kiʼi eveeve ko he kiʼi sino. ʼE ha mai ai te poto maʼoluga ʼo te ʼAtua. Pea ʼe manatu tahi te tokolahi mo te tagata faipesalemo ʼae neʼe ina ui: “E au fakavikiviki kia koe ki tau gauei toku sino o matalelei aupito.”​—Pesalemo 139:14.

He koʼe ʼe ʼaoga mai te poto ʼo te ʼAtua? ʼE iloʼi e te Tupuʼaga ia meʼa fuli ʼe ʼaoga mai ke tou fiafia ai. Pea ʼe ina foaki mai he ʼu tokoni ʼe fakapotopoto ʼi tana Folafola, te Tohi-Tapu koteʼuhi ʼe ina maʼu te ʼatamai malama. Koʼeni he faʼifaʼitaki: “Kotou . . . fefakamolemoleʼaki ʼaki he lotolelei.” (Kolose 3:13) Ko he tokoni koa ʼe fakapotopoto? ʼEi. Neʼe fai e te ʼu toketa te ʼu fekumi ʼo ʼuhiga mo te lotofakamolemole pea mo ʼona fua lelei ki te sino. ʼE lelei ai te moe mo veliveli ai te tosio mo te lotohoha. ʼE lahi te ʼu fua lelei ʼo te lotofakamolemole ki te maʼuli malolo. Koia, ʼe hage te ʼAtua ko he kaumeʼa ʼofa ʼe ina tokoniʼi tuʼumaʼu tatou. (2 Timoteo 3:16, 17) ʼE ke fia maʼu koa hou kaumeʼa feia?

“E ofa [ia Sehova, MN ] ki te faitotonu.” ​—PESALEMO 37:28.

ʼE faitotonu tuʼumaʼu pe ia te ʼAtua. Koia, “e mamao osi i te Atua te mea ae e hala, e mamao osi i te Mafimafi te agakovi!” (Sopo 34:10) ʼE faitotonu mo ʼana fakamau, ohage pe ko tona ui e te tagata faipesalemo: “E ke fakamaaui te hahai i te mooni.” (Pesalemo 67:5) ʼE mole feala ke kakaʼi ia Sehova koteʼuhi ʼe sio ia ki te loto, koia ʼae ʼe tonu ai ʼana fakamau. (1 Samuele 16:7) Pea tahi ʼe mole puli ki te ʼAtua te ʼu aga heʼe faitotonu mo te ʼu aga kaka fuli ʼae ʼe fai ʼi te kele. Koia ʼe ina fakapapau mai: “E taaki anai te kau agakovi mai ai.”​—Taaga Lea 2:22.

Kae ʼe mole agafefeka fau ia te ʼAtua. ʼE manavaʼofa moka ʼe ʼaoga. ʼE ui ʼi te Tohi-Tapu ‘e lototokaga ia Sehova mo manavaofa,’ ʼo feia ki te hahaʼi agakovi ʼae kua fakahemala. ʼE mole faitotonu koa la?​—Pesalemo 103:8; 2 Petelo 3:9.

He koʼe ʼe ʼaoga mai te faitotonu ʼa te ʼAtua? Neʼe tohi fenei e te apositolo ko Petelo: “ ʼE mole fakapalatahi te ʼAtua, kaʼe ʼi te ʼu puleʼaga fuli pe, ko te tagata ʼae ʼe manavasiʼi kia te ia pea mo ina maʼuliʼi te faitotonu, ʼe ina tali leleiʼi ia ia.” (Gaue 10:34, 35) ʼE tou leleiʼia te faitotonu ʼa te ʼAtua koteʼuhi ʼe mole fakapalatahi. ʼE feala ke ina tali te hahaʼi fuli, tatau aipe pe kotea tonatou lanu, ʼanatou agaʼi fenua mo tonatou faʼahiga akoʼi pea mo ʼonatou faʼahiga maʼuli.

Neʼe fakatupu tatou e te ʼAtua mo he leʼo ʼo loto ke tou mahino ki tana faitotonu. ʼI te Tohi-Tapu ʼe ui ai ʼe “fakatokaga” tatou e te leʼo ʼo loto moka ʼe kovi peʼe lelei hatatou aga. (Loma 2:15) ʼE fua lelei koa kia tatou? Kapau ʼe akoʼi lelei te leʼo ʼo loto ʼe tokoni mai anai ke tou tekeʼi te ʼu aga ʼae ʼe kovi. Kae kapau kua tauhala ia, ʼe ʼekenaki ai tatou ke tou fakahemala mo fai te ʼu aga ʼae ʼe lelei. Koia, ʼe lelei ke tou mahino ki te faitotonu ʼa te ʼAtua he ʼe ko he tokoni maʼa tatou pea ʼe tou fia fakaovi ai kia te ia.

“Ko te ʼAtua ʼe ko te ʼofa.”​—1 SOANE 4:8.

ʼI te Tohi-Tapu ʼe ui ai, ʼe maʼu e te ʼAtua te malohi, te poto mo te faitotonu. Kae ʼe mole ko ia tonu te malohi, te poto mo te faitotonu. Kae ʼe ko ia te ʼofa. Kotea tona tupuʼaga? ʼE moʼoni, ʼe ko tona malohi ʼae ʼe ina fakafealagia ke ina fai ni gaue. Pea ʼe ko te poto mo te faitotonu ʼae ka nā takitaki ia ia ki te ʼu faʼahiga gaue ʼae ʼe tonu ke ina fakahoko. Kae ʼe ko tona ʼofa ʼae ʼe ina ʼekenaki ia ia ke ina fakahoko te ʼu gaue ʼaia. Ko te ʼofa ʼae ʼe ina fai ai ia meʼa fuli.

Logo la ʼe mole he meʼa ʼe ʼaoga kia Sehova, kae neʼe ko tona ʼofa ʼae neʼe ina ʼekenaki ia ia ke ina fakatupu mo tokaga lelei ki he ʼu tagata mo he ʼu ʼaselo ʼe ʼatamai. Neʼe ina teuteuʼi te kele ke maʼuli fiafia ai te tagata. Pea ʼe kei ina fakaha pe tona ʼofa ki te ʼu tagata fuli ʼaki tana “fakahopo fakatatau ake tana laʼa ki te kau agakovi pea mo te kau agalelei pea ʼe ina fakato fakatatau ifo te ʼua ki te kau faitotonu pea mo te kau heʼe faitotonu.”​—Mateo 5:45.

ʼEi, ko “Sehova ʼe ʼofa mamahi pea mo manavaʼofa.” (Sakopo 5:11) ʼE ʼofa ia kia natou ʼae ʼe natou fia iloʼi mo fakaovi kia te ia. ʼE tokaga ia kia tatou takitokotahi. Ko tona ʼuhiga, ‘ ʼe tokaga ia kia koe.’​—1 Petelo 5:7.

He koʼe ʼe ʼaoga mai te ʼofa ʼo te ʼAtua? ʼE tou fiafia moka ʼe tou sisio ki te to ʼo te laʼa, moka ʼe tou logo ki te kata ʼa he kiʼi toe. ʼE tou leleiʼia tatatou feʼofaʼaki mo hotatou kaiga. ʼE logo pe la ʼe mole ko te ʼu faʼahi ʼaia ʼe ʼaoga ʼaupito mai ki totatou maʼuli kae ʼe tou logoʼi ai he toe fiafia lahi.

Ko he tahi fakamoʼoni ʼo te ʼofa ʼa te ʼAtua ʼe ko te faikole. ʼE ʼekenaki fenei mai ʼi te Tohi-Tapu: “ ʼAua naʼa kotou tuʼania ki he meʼa, kaʼe ʼi te temi fuli ʼaki te faikole mo te kole mamahi pea mo te fakafetaʼi, kotou fakaha ki te ʼAtua ʼakotou kole.” ʼE hage te ʼAtua ko he tamai ʼofa. ʼE loto ia ke tou kumi tokoni kia te ia ʼo ʼuhiga mo ʼotatou fihifihia fuli. Pea ʼe toe foaki mai e Sehova ‘te tokalelei ʼae ʼe maʼoluga age ʼi te ʼu ʼatamai fuli.’​—Filipe 4:6, 7.

Koia, neʼe tou vakavakaʼi kalitate ʼe fa ʼo te ʼAtua, te malohi, te poto, te faitotonu pea mo te ʼofa. Kua ke mahino lelei age koa ki te ʼuluagaaga ʼo te ʼAtua? Kapau ʼe ke fia fakaloloto tau mahino ki te ʼAtua, fuli age te pasina ki te ʼu gaue fuli neʼe ina fakahoko mo ʼae ka ina ʼamanaki fai ke fiafia ai ia te tagata.