ʼE lagi kotou manatu ki tokotou aluʼaga peʼe ki he tahi ʼo tokotou famili moka kotou lau te ʼu talamanatu ʼo natou ʼaia neʼe natou tauʼi he faʼahiga mahaki ʼulu.

Kapau koia, ʼe mole ko koutou pe ʼe tau mo te faʼahi ʼaia. Ia ʼaho nei, tokolahi te hahaʼi ʼe natou felaveʼi mo he mahaki feia, tatau aipe pe ko natou totonu peʼe ko he tahi ʼo tonatou famili.

ʼE mahino ia ʼe tou maʼuʼuli ʼi “he ʼu temi makehe pea mo faigataʼa” ʼae tupu ai he ʼu faʼahiga hoha kehekehe. (2 Timoteo 3:1) Neʼe fakaha ʼi he sivi ʼi te malamanei ʼe fakafuafua ko he foʼi tokotahi ʼi he toko valu ʼe tau mo he faʼahiga mahaki ʼulu. ʼUhi ko te taʼi mahaki Covid-19, ʼi te 2020, neʼe hake te kaugamalie ʼo natou ʼe hoha ʼi te 26 ki te teau pea ko natou neʼe tau mo ni manatu fakalotomamahi neʼe hake ʼi te 28 ki te teau.

ʼE maʼuhiga ke tou iloʼi ʼe ko te tokolahi ʼi te temi nei ʼe natou lotohoha mo maʼu he ʼu manatu fakalotomamahi. Kae ʼe toe maʼuhiga age la ia ke tou iloʼi pe ʼe feafeaʼi hakotou logo lelei ʼo feia pe mo ʼokotou famili.

Ka mole kotou mahaki ʼulu, pea ʼi te agamahani ʼe kotou lelei pe koutou feia pe mo tokotou maʼuli. Pea ʼe kotou lava tauʼi te ʼu hoha ʼo te maʼuli, mo fakahoko he gaue ʼe lelei, pea mo logoʼi he fiafia.

• ʼE MOLE tupu ko hokita vaivaiʼaga.

• ʼE ko he mahaki ʼe tupu ai te lotohoha, mo fakatupu kovi ki te fakakaukau, pea mole kei kita lava lolomi te ʼu meʼa ʼe kita logoʼi mo takita aga.

• ʼI ʼihi temi ʼe faigataʼa te maʼu ʼo he ʼu felogoi lelei mo ʼihi pea mo te maʼuli ohage ko te hahaʼi mahani.

• ʼE feala ke kau ki ai te hahaʼi fuli, tatau aipe pe ʼe natou taʼu fia, peʼe natou ʼomai maifea, peʼe kotea tanatou lotu mo tonatou faʼahiga maʼuli.

ʼE kotou tokagaʼi koa ia koutou peʼe ko he tahi ʼo tokotou famili kua fetogi takotou aga, peʼe mole kotou moe lelei, peʼe mole lelei takotou kai, peʼe kotou mataku, peʼe hoha peʼe lotomamahi tuʼumaʼu? Kapau koia, ʼe lagi lelei age ke kotou olo ki he toketa ke iloʼi ai te ʼu tupuʼaga ʼo takotou feia, pea ke fai hona faitoʼo. Kae kofea ʼe feala ke kotou maʼu ai he tokoni?

Neʼe ui fenei e Sesu Kilisito, te tagata ʼae ʼe poto tokotahi: “ ʼE mole ko te hahaʼi malolohi ʼae ʼe ʼaoga ki ai he toketa, kae ko natou ʼae ʼe mahahaki.” (Mateo 9:12) Ka kotou toʼo he ʼu faitoʼo ʼo mulimuli ki tokotou mahaki pea ʼe feala ke tokoni atu ke siʼisiʼi ai tokotou mahaki pea mo kotou maʼuli fiafia. Kae ka ʼasili kovi tokotou mahaki, ʼaua naʼa kotou fakatuatuai te kumi hona faitoʼo. ʼE ko he manatu fakapotopoto ia. a

Logo la ko te Tohi-Tapu ʼe mole ko he tohi fakatoketa, kae ʼe tou maʼu ai he ʼu tokoni ʼaoga ʼo ʼuhiga mo te mahaki ʼulu. ʼE matou fakaafe koutou ke kotou lau te ʼu alatike ʼae ʼe hoa mai he ʼe fakaha ai ʼe feala ke tokoni mai te Tohi-Tapu ke tou tauʼi te mahaki ʼulu.