ʼI te ʼu faʼahi ʼe lua ʼo te Arc de Titus ʼe togi ai te toʼotoʼoga maʼuhiga ʼo te hisitolia. ʼE ʼi ai te pikipikiga ʼo te arc mo te Tohi-Tapu kae ʼe mole iloʼi lelei e te hahaʼi. Ko te Arc de Titus ʼe ko he fakamoʼoni ʼo te totonu fakaofoofo ʼo te ʼu lea fakapolofeta ʼo te Tohi-Tapu.

ʼI te kamata ʼo te ʼuluaki sekulo H.T.S., a neʼe mafola te Pule ʼo Loma mai Pilitania mo Gaule (Falani) ki Esipito. Pea neʼe maʼu ai te tokalelei mo te fimalie. Kae, neʼe ʼi ai te koga meʼa mamaʼo neʼe hoko tuʼumaʼu ai pe te ʼu fihifihia. Neʼe ko te potu ʼo Sutea.

ʼE ui fenei ʼi te Encyclopedia of Ancient Rome: “Neʼe ʼi ai ʼihi telituale neʼe puleʼi e Loma, neʼe iloa ʼuhi ko tanatou fefehiʼaʼaki mo Loma, ohage ko Sutea. Neʼe fehiʼa te kau Sutea ki te ʼu pule Loma he neʼe natou meʼa noaʼi tanatou agaʼi fenua. Pea neʼe ui e te kau Loma neʼe agatuʼu te kau Sutea kia natou.” Neʼe fakaʼamu te tokolahi ʼo te kau Sutea ke haʼu he mesia fakapolitike ʼo fakaʼateainaʼi natou mai te kau Loma pea mo toe fakatuʼu te Iselaele ʼafeā. Kae, ʼi te taʼu 33 H.T.S., neʼe ui e Sesu ʼe felaveʼi anai ia Selusalemi mo he malaʼia.

Neʼe ui e Sesu: “ ʼE hoko mai anai te ʼu ʼaho ʼae ka laga ai e ʼokotou fili he ʼa ʼaki he ʼu pou masila, mo natou takatakai koutou pea mo ʼohofi koutou mai te ʼu faʼahi fuli pe. ʼE natou peʼehi anai koutou mo ʼakotou fanau ki te kele, pea ʼe natou holoʼi katoa anai te ʼu maka ʼaeni.”—Luka 19:43, 44.

Neʼe mole mahino lelei te ʼu tisipulo ki te ʼu palalau ʼaia ʼa Sesu. Hili ki ai ni ʼaho ʼe lua, ʼi tanatou sisio ki te fale lotu ʼo Selusalemi, ko he tahi ia natou neʼe kalaga fenei: “Sio ʼAliki! ʼi taulekaleka leva ʼo te ʼu maka mo te ʼu fale!” Koia, ko ʼihi maka ʼo te ʼu fale lotu neʼe meta 11 tona loa, meta 5 tona laulahi pea meta 3 tona maʼoluga. Kae, neʼe tali fenei e Sesu: “ ʼO ʼuhiga mo te ʼu meʼa ʼaeni ʼe kotou sisio ki ai, ʼe hoko mai anai te ʼu ʼaho ʼae ʼe holoʼi katoa anai te ʼu maka ʼaeni.”—Maleko 13:1; Luka 21:6.

Pea neʼe toe ui age e Sesu kia natou: “Ka kotou sisio anai ki te ʼa takatakai ʼo Selusalemi e te ʼu kautau, pea ke kotou iloʼi kua ovi mai tona maumauʼi. Pea ke kamata feholaki ia natou ʼae ʼi Sutea ki te ʼu moʼuga, ke mavae mai ai ia natou ʼae ʼe maʼuʼuli ai pea ke ʼaua naʼa hu ki ai ia natou ʼae ʼi te tuʼa kolo.” (Luka 21:20, 21) Neʼe hoko moʼoni koa te ʼu palalau ʼaia ʼa Sesu?

Hili ki ai taʼu ʼe tolugofulu ma tolu, neʼe kei fehihiʼa pe te kau Sutea ki te pule ʼo Loma. Kae, ʼi te taʼu 66 H.T.S., neʼe toʼo e te ofisie Loma ko Gessius Florus te ʼu koloa mai te tanakiʼaga koloa ʼo te fale lotu, ʼo iita ai te kau Sutea. Koia, neʼe fakatahitahi ai he kutuga Sutea ki Selusalemi, pea neʼe  natou matematehi te kau solia Loma. Neʼe natou fakaha ai ʼe natou fia puleʼaga faʼitaliha.

Hili ki ai teitei mahina ʼe tolu, neʼe takatakai ia Selusalemi e te kau solia Loma ʼe toko 30 000 ʼae neʼe takitaki e Cestius Gallus. Neʼe natou faiga ke fakagata te agatuʼu ʼa te kau Sutea. Neʼe natou foimo ulufi te kolo pea natou maumauʼi te kaupa tuʼa ʼae neʼe tuʼu ʼi te faʼahi ʼo te fale lotu. Kae, neʼe mavae fakafokifa leva te kautau Loma. Neʼe fiafia ai te kau Sutea agatuʼu pea neʼe natou tuli te kau Loma. ʼI te kua mavae ʼa te foʼi solia Loma mo te kau Sutea agatuʼu, neʼe feholaki ai te kau Kilisitiano, ʼae neʼe fakalogo ki te fakatokaga ʼa Sesu, mai Selusalemi ki te ʼu moʼuga ʼae ʼe mamaʼo atu ʼi Solotane.—Mateo 24:15, 16.

ʼI te taʼu ki muli age, neʼe toe fakatuʼutuʼu e te senelale Vespasien ʼo Loma mo tona foha ko Titus ke nā toe olo ʼo tauʼi ia Sutea. Kae neʼe mole faʼa fualoa ki ai pea mate te Hau ko Néron ʼi te taʼu 68 H.T.S., ʼo tupu ai te toe liliu mai ʼa Vespasien ki Loma ʼo toe toʼo te tuʼulaga hau. Kae neʼe nofo pe leva tona foha ko Titus ʼi Sutea mo tagata solia ʼe toko 60 000 tupu.

ʼI Sunio, ʼi te taʼu 70 H.T.S., neʼe fakatotonu e Titus ki te kau solia ke natou tuʼusi te vao ʼakau ʼo Sutea ke faʼu ʼaki he kaupa ʼakau mata masila ʼe kilometa 7 moʼo ʼa takai ʼo Selusalemi. ʼI Sepetepeli, neʼe maumauʼi pea tutu e te kau Loma te kolo mo te fale lotu pea natou holoʼi katoa ai, ohage pe ko tona fakakikite fakatomuʼa e Sesu. (Luka 19:43, 44) Neʼe fakafuafua ko te teitei toko nimageau afe tupu hahaʼi neʼe mamate ai ʼi Selusalemi.

ʼI te taʼu 71 H.T.S., neʼe toe liliu ia Titus ki Italia, pea neʼe fakatalitali fakaʼaliʼaliki e te hahaʼi ʼo Loma. ʼI te polosesio maʼuhiga ʼo te malo ʼaia, neʼe fakafiafia te kolo katoa.

Neʼe ʼofolele te hahaʼi ki te ʼu toe koloa ʼae neʼe fakahaha ʼi te ʼu ʼala ʼo Loma. Neʼe natou sisio ai ki te ʼu vaka, mo te ʼu saliote neʼe pena ai te ʼu aluʼaga ʼae neʼe hoko ʼi te tau, pea feia ki te ʼu koloa ʼo te fale lotu ʼo Selusalemi ʼae neʼe natou toʼo.

Neʼe toʼo leva e Titus te tuʼulaga hau ʼo Vespasien tana tamai, ʼi te taʼu 79 H.T.S. Kae, neʼe ʼosi pe ki ai taʼu ʼe lua pea mate fakafokifa. Pea neʼe ʼafio leva tona tehina ko Domitien, ʼo ina fakatuʼu ai te arc moʼo tauhi ʼofa ki tona tehina.

Ia ʼaho nei, ko te toko teau afe tupu hahaʼi ʼe olo ʼi te taʼu fuli ʼo mamata te Arc de Titus ʼi Loma. ʼE manatu ʼihi ʼe ko he foʼi monimo maʼuhiga, peʼe ko he tauhi ʼofa ki te pule malohi ʼo Loma peʼe ko he fakamanatu ʼo te to ʼa Selusalemi mo tona fale lotu.

Kae kia natou ʼae ʼe natou lau fakamalotoloto te Tohi-Tapu, ʼe maʼuhiga ʼaupito age te Arc de Titus. ʼE ko he fakamoʼoni ʼe totonu te ʼu lea fakapolofeta ʼo te Tohi-Tapu, pea ʼe haʼu ia mai te ʼAtua.—2 Petelo 1:19-21.