ʼE tui te kau faifakakikite ʼe ʼi ai te pikipikiga ʼo te maʼuli ʼo te hahaʼi ʼae ʼi te kele mo te ʼu fetuʼu, te mahina pea mo te ʼu palanete. ʼE natou ui ʼe fakalogo te agaaga mo te ka haʼu ʼo he tahi, ʼi te temi ʼae ʼe tupu ai, ki te tuʼuʼaga ʼo te ʼu fetuʼu.

Logo la ko Papiloni ʼafeā te haʼuʼaga ʼo te faʼahiga faifakakikite ʼaia, kae ʼe kei fai pe ʼi te temi nei. ʼO mulimuli ki te sivi neʼe fai ʼi Amelika ʼi te taʼu 2012, ʼe manatu te tokolahi ko te faifakakikite ʼaki te sivi ʼo te ʼu fetuʼu ʼe kau ki te “sienesia.” Pea ko ʼihi ʼe tui malohi ʼe moʼoni. Kae, ko te ʼu manatu koa ʼaia ʼe moʼoni? Kailoa. Kotea tona tupuʼaga?

• ʼE mole he malohi mai te ʼu fetuʼu mo te ʼu palanete ke malave ki te hahaʼi, ohage ko tona ui e te kau faifakakikite.

• ʼE fai mahani te ʼu fakakikite ki te hahaʼi fuli kae mole ki he tokotahi.

• ʼE fakatafito te ʼu fakafuafua ʼa te kau faifakakikite ki te manatu ʼafeā ʼae ʼe takafoli te ʼu palanete ʼi te kele. Kae, ʼi tona fakahagatonu, ko te ʼu palanete ʼae ʼe takafoli ʼi te laʼa.

• Ko te ʼu fakakikite ʼae ʼe fai e te kau faifakakikite kehekehe ki he tahi, ʼe mole alu tahi.

• ʼE ui, ʼaki te ʼu fakailoga ʼo te zodiaque, ʼe tou lava iloʼi ai te ʼuluagaaga ʼo he tahi. Kae, ʼi tona fakahagatonu, ko natou ʼae neʼe tutupu tahi ʼe mole tatau ʼonatou ʼuluagaaga.

Koia, ko te ʼuluagaaga ʼo he tahi ʼe mole hona pikipikiga mo te ʼaho tupu. ʼE mole iloʼi e te kau faifakakikite te ʼuluagaaga moʼoni ʼo he tahi kae ʼe natou fai pe he ʼu fakamatala ʼe fakamahalo. ʼE mole koa la ko he faʼahiga loi ʼaia?

Talu mai te temi muʼa, mo te olo ʼa te hahaʼi ki te kau faifakakikite. Pea neʼe fai ai e te kau faifakakikite ni fekumi ʼi te ʼu gakāu ʼo te ʼu manu mo te hahaʼi peʼe ʼi te faʼahiga togi e te moa tagata tana meʼa kai. Ko ʼihi neʼe natou fakatafito ʼanatou fakakikite ki te ʼu lau ti peʼe ko te kafe. Ia ʼaho nei, ʼe fakaʼaogaʼi te ʼu kate, te ʼu sioʼata takafuafua, te ʼu foʼi dés mo ʼihi atu meʼa. ʼE tonu koa ke tou falala ki te faifakakikite ke tou iloʼi ai te ka haʼu? Kailoa. Tou vakaʼi tona tupuʼaga.

ʼE mole alu tahi te ʼu fakakikite ʼae ʼe fai e te kau faifakakikite kehekehe. Tatau aipe pe ʼe natou fakaʼaogaʼi he faʼahiga faifakakikite ʼe tahi, kae ʼe mole tatau ʼanatou fakamatala. Ohage la, kapau ʼe fakafehuʼi he ʼu tagata faifakakikite ʼe tokolua ʼo ʼuhiga mo te fakakikite ʼo te ka haʼu ʼaki te ʼu kate, ʼe tonu foki anai ke tatau ʼana tali. Kae, ʼe mole hoko tuʼumaʼu feia.

Ko te ʼu faʼahiga faifakakikite ʼe kaka. Ko ʼihi ʼe natou ui ko te ʼu kate mo te ʼu sioʼata takafuafua ʼe ko he ʼu meʼa noa ia. Koteʼuhi ʼe mole fakaʼaogaʼi e he tahi faifakakikite te ʼu meʼa ʼaia kae ʼe ina sioʼi pe te agaaga ʼo he tahi. Ohage la, ʼe ina fai anai ni fehuʼi ki he tahi ʼe haʼu kia ia. ʼI te faʼahiga tali mo te agaaga ʼo ia ʼae ʼe haʼu, ʼe feala ai kia ia ʼae ʼe faifakakikite ke ina fai ni fakamatala. Pea ʼe ina ui fenei age leva ʼe ina iloʼi te ʼu aluʼaga ʼo tona maʼuli. Kae kapau ʼe ina iloʼi, ʼuhi pe foki ko te ʼu tali ʼae neʼe kua foaki age. Koia, kua paʼagaʼia te kau faifakakikite ʼuhi ko te falala vale ʼa te hahaʼi kia natou.

ʼE ui e te kau faifakakikite kua ʼosi fakatuʼutuʼu fakatomuʼa totatou ka haʼu. Kae, ʼe moʼoni koa? ʼE ui ʼi te Tohi-Tapu ʼe tou maʼu te fealagia ʼae ke tou filifili te meʼa ʼae ka tou tui ki ai peʼe ko te meʼa ʼae ʼe tou loto ke tou fai. Pea ko te ʼu tonu ʼae ka tou fai ʼe fakalogo anai ki ai totatou ka haʼu.—Sosue 24:15.

ʼE ʼi ai te tahi tupuʼaga ʼo te liʼaki e te ʼu kaugana ʼa te ʼAtua te faifakakikite. ʼE tautea e te ʼAtua te ʼu faʼahiga faifakakikite fuli. ʼE ui fenei ʼi te Tohi-Tapu: “Ke aua naa mau ia koe he tahi . . . ae e faikikite, he tahi ae e gaohi mea fakaofoofo loi, he tahi ae e gaohi mea fakatemonio, he tahi ae e faitutuku, he tahi ae e ina kumi ki te u laumalie kovi, pea mo ina fakaha te mea ae ka hoko, he tahi ae e faifehui ki te kau mate. Koteuhi ko ia ae e ina fai te u mea aena, e fakalialia [ki ai ia Sehova, MN].” a—Tetelonome 18:10-12.