Ka lotomahino he tahi “pea ʼe mahino ki te ʼu meʼa ʼae ʼe logoʼi e ʼihi pea ʼe ina fakakaukauʼi ohage pe ʼe ko ia ʼae ʼe tau mo te aluʼaga ʼaia.” ʼE ui e te toketa ʼulu ko Rick Hanson “neʼe tou tutupu ake mo te fealagia ʼae ke tou lotomahino.”

FAKAKAUKAUʼI AGE MUʼA: He koʼe koa ʼe tou maʼu te fealagia ʼaia kae ʼe mole maʼu ia e te ʼu manu? ʼE ui ʼi te Tohi-Tapu, neʼe fakatupu te tagata e te ʼAtua, ʼo mulimuli ki tona pāki. (Senesi 1:26) Koia, ko te tagata ʼe ina maʼu te agaaga mo te ʼu kalitate ʼo te ʼAtua. Pea kapau ʼe lotomahino te hahaʼi mo tokoni ki ʼihi, ʼe natou faʼifaʼitakiʼi ai te Tupuʼaga manavaʼofa ko Sehova ʼAtua.—Taaga Lea 14:31.

ʼE lotomahino ia te ʼAtua pea ʼe mole loto ia ke tou mamahi. ʼE ui fenei ʼi te Tohi-Tapu ʼo ʼuhiga mo te nonofo popula ʼa te kau Iselaele ʼi Esipito pea mo tanatou ʼaunofo ʼi te toafa ia taʼu ʼe 40: “Lolotoga tonatou ’u mamahi, ne’e toe mamahi ai mo ia.” (Esaia 63:9, MN) Neʼe mole gata pe ʼi te tokagaʼi e te ʼAtua ʼonatou mamahi, kae neʼe ina toe logoʼi foki. Neʼe ina “iloʼi lelei te ’u mamahi ’ae ’e tau mo natou.” (Ekesote 3:7, MN) Pea “ko ae e fafa kia koutou e fafa ki te kanoi mata o tona foi mata.” (Sakalia 2:8) Koia, ʼe toe mamahi foki mo te ʼAtua mo kapau ʼe fakamamahiʼi tatou e ni ʼihi.

Logo pe la ʼe tou ui ʼe mole tuha mo tatou te lotomahino ʼa te ʼAtua kae ʼe fakalotomalohiʼi fenei tatou ʼi te Tohi-Tapu: “ ʼE maʼoluga age te ʼAtua ʼi ʼotatou loto pea ʼe ina iloʼi ia meʼa fuli. “ (1 Soane 3:19, 20) ʼE iloʼi lelei e te ʼAtua te ʼu aluʼaga fuli ʼae ʼe hoko ʼi totatou maʼuli, mo ʼatatou manatu pea mo te ʼu meʼa ʼae ʼe tou logoʼi. ʼE lotomahino ia kia tatou.

ʼE fakalotomalohiʼi tatou ʼi te Tohi-Tapu

• “ ʼE ke pauʼi anai, pea ʼe tali atu anai e Sehova. ʼE ke kumi tokoni anai, pea ʼe ina ui atu anai: ‘Koʼeni au!’ ”—ESAIA 58:9, MN.

• “ ‘Kua au iloʼi lelei ʼaku manatu ʼo ʼuhiga mo kotou,’ ko te ui ʼaia ʼa Sehova, ‘ ʼe ko he ʼu manatu ʼo te tokalelei, kae mole ko he ʼu manatu ʼo te malaʼia, ke au foaki atu he ka haʼu pea mo he ʼamanaki. ʼE kotou pauʼi anai au, ʼe kotou ʼomai mo faikole anai kia au, pea ʼe au fakalogo atu anai.’ ”—SELEMIA 29:11, 12, MN.

• “Ke ke tanaki oku loimata i tau utele: pe e mole tohi natou i tau tohi?”—PESALEMO 56:9.

Kapau la ʼe lotomahino te ʼAtua, pea ʼe tokoni feafeaʼi mai ke tou haga tauʼi te ʼu faigataʼaʼia? Fakakaukauʼi age muʼa te aluʼaga ʼo Maria:

“Neʼe mate taku kiʼi tama ʼi te kosea ʼi tona taʼu 18. Neʼe taʼu lua tona mahaki. Pea neʼe faigataʼa ʼaupito kia au. Neʼe au toe ita kia Sehova ʼi tana mole fai he meʼa ke lelei ai te mahaki ʼo taku kiʼi tama.”

“Hili ki ai taʼu ʼe ono, neʼe au fakaha ki toku kaumeʼa lelei ʼi te kokelekasio taku manatu ʼae ʼe mole ʼofa ia Sehova ia au. Neʼe lauʼi hola tana fakalogo mai pea neʼe ina tuku pe ke au fakahaha fuli age. ʼOsi ʼaia pea neʼe ina lau mai ia 1 Soane 3:19, 20: ‘ ʼE maʼoluga age te ʼAtua ʼi ʼotatou loto pea ʼe ina iloʼi ia meʼa fuli.’ Neʼe malave ʼaupito te vaega ʼaia kia au. Pea neʼe ui mai leva e toku kaumeʼa ʼe mahino lelei ia Sehova ki ʼoku mamahi.”

“Logo pe la te ʼu tokoni ʼaia, kae neʼe kei au ita ai pe. Neʼe au lau leva ia te Pesalemo 94:19, MN: ‘’I te kua lahi fau ’o taku tuʼania, ne’e ke fakapelepele’i mo fakafimalieʼi au.’ Neʼe hage pe neʼe fakahagahaga mai ia te vaega kia au. Pea, neʼe hoki au maʼu ai leva te lotofimalie ʼi taku kua iloʼi ʼae ʼe feala haku palalau faʼitaliha kia Sehova ʼo ʼuhiga mo ʼoku mamahi pea ʼe mahino mo fakalogo mai kia au.”

ʼE fakalotofimalie tatatou iloʼi ʼae ʼe mahino lelei ia te ʼAtua kia tatou. Kae he koʼe koa ʼe lahi ai pe te ʼu mamahi? ʼE tauteaʼi koa tatou e te ʼAtua ʼuhi ko ʼatatou gaue kovi? ʼE ina fakagata anai koa ia te ʼu mamahi fuli? ʼE maʼu ʼona tali ʼi te ʼu alatike ʼae ka hoa mai.