He Koʼe ʼe Tou Matutuʼa Mo Mamate?
NEʼE MOLE ko te fakatuʼutuʼu ʼa te ʼAtua ke mate ia te tagata. Neʼe sino haohaoa ʼatatou ʼuluaki matuʼā, ia Atama mo Eva ʼo toe feia mo tanā fakakaukau. Neʼe tonu pe la ke nā maʼuʼuli ʼo kaku ki totatou temi. ʼE tou iloʼi te manatu ʼaia ʼi te palalau ʼae neʼe fai e Sehova kia Atama ʼo ʼuhiga mo te fuʼu ʼakau ʼae neʼe tuʼu ʼi te ʼoloto ʼo Eteni.
Neʼe ui e te ʼAtua kia Atama: “Ko te aho ae e ke kai ai anai ki te akau aena, e ke mate anai.” (Senesi 2:17) ʼE mole anai he ʼuhiga ʼo te palalau ʼaia mo kapau neʼe kua iloʼi e Atama ʼe liliu pe anai ʼo matuʼa mo mate. Neʼe mahino ia Atama ʼe mole feala ia ke mate mo kapau ʼe mole ina kai te fuaʼi ʼakau.
NEʼE MOLE KO TE FAKATUʼUTUʼU ʼA TE ʼATUA KE MATE IA TE TAGATA
Neʼe mole halofia ia Atama mo Eva, neʼe feala pe ke nā kakai ki te ʼu faʼahiga fuaʼi ʼakau kehekehe ʼae neʼe homo ʼi te ʼoloto. (Senesi 2:9) Pea kapau ʼe mole nā kai te fuaʼi ʼakau ʼae neʼe tapuʼi age, ʼe nā fakaha anai ʼe nā fakalogo mo fakaʼapaʼapa ki tonā Tupuʼaga. Pea ʼe nā fakaha anai ʼe ko te ʼAtua tokotahi pe ʼae ʼe feala ke ina taki naua.
HE KOʼE NEʼE MAMATE TOKOLUA IA ATAMA MO EVA?
Tou vakaʼi age muʼa te faipalalau ʼae neʼe ina fetogi katoa ai te maʼuli ʼo Atama mo Eva ʼo kaku kia tatou ia ʼaho nei. Neʼe faʼu e Satana te Tevolo ia he loi pea neʼe ina fakapalalauʼi he gata. ʼE tou lau fenei ʼi te Tohi-Tapu: ‘Nee poto lahi age te gata i te u manu fuli o te vao ae nee fakatupu e Sehova Atua. Nee ina ui leva ki te fafine: Pe nee ui mooni atu e te Atua: E mole kolua kai anai ki te u akau fuli o te oloto?’—Senesi 3:1.
Koʼeni leva ia te tali ʼa Eva: “E ma kai ki te u fua o te u akau o te oloto. Kae ki te fua o te akau ae e tuu i lotomalie o te oloto, nee ui e te Atua: E mole kolua kai anai ki ai pea e mole kolua fafa anai ki ai, koteuhi e kolua mamate anai.” Neʼe lea age leva ia te gata ʼo ui fenei maʼa ia: “E mole kolua mamate anai. Kae e iloi e te Atua, i te aho ae e kolua kai anai ki ai, e ava anai okolua mata, pea e kolua tatau anai mo te Atua, o kolua iloi anai te lelei mo te kovi.” Neʼe patapata ia Satana ki te ʼAtua ʼi tana ui ʼae ʼe haga ia Sehova ʼo lohiʼi ia Atama mo Eva pea ʼe mole ina fia vaevae mo naua ia he meʼa ʼe lelei.—Senesi 3:2-5.
Neʼe tui ia Eva ki te loi ʼa Satana. Neʼe tuʼu ai ʼo sioʼi te fuʼu ʼakau. Pea neʼe haʼu ai tona fia kai ki ai. Neʼe ina faoʼi leva tona nima mo ina toliʼi te fuaʼi ʼakau ʼo kai. ʼOsi ʼaia pea “nee ina toe foaki foki ki tona ohoana, ae nee tuu i ona tafa, pea nee kai leva ia ia ki ai.”—Senesi 3:6.
Neʼe ui e te ʼAtua kia Atama: “Ko te aho ae e ke kai ai anai ki te akau aena, e ke mate anai.”—SENESI 2:17
Tou fakafuafua age muʼa te lotomamahi ʼa te ʼAtua ʼi tana sio ifo ki te talagataʼa ʼo ʼana fanau ʼofaina. Kotea ʼae neʼe ina fai? Neʼe ina ui fenei kia Atama: “E ke liliu ai anai ki te kele, ae nee too mai ai ia koe. Koteuhi ko te efu ia koe, pea e ke liliu anai ki te efu.” (Senesi 3:17-19) Neʼe mate ia Atama ʼi tona taʼu 930. (Senesi 5:5) Neʼe mole toe hake ia ki selo pea neʼe mole toe maʼuli ake hona laumalie. Kae neʼe mate noa ohage ko te efu ʼae neʼe tupu mai ai. ʼE mole koa la fakaʼofaʼofa?
HE KOʼE ʼE MOLE KEI TOU HAOHAOA?
Neʼe mole kei maʼuli haohaoa mo maʼuli heʼe gata ia Atama mo Eva ʼuhi ko tanā talagataʼa ʼae ki te ʼAtua. Neʼe kamata fetogi ai ʼonā sino he neʼe kua nā agahala pea neʼe mole fua kovi pe kia naua. Neʼe nā tuku holo ai te agahala ki tonā hologa. ʼE ui fenei ia Loma 5:12: “ ʼAki te tagata pe ʼe tahi neʼe hu ai te agahala ki te malamanei, pea ʼaki te agahala ia te mate, ʼo mafola ai te mate ki te tagata fuli pe he neʼe natou agahala fuli.”
ʼI te Tohi-Tapu ʼe fakatatau ai te agahala mo te mate ki he “kie ae e ina puloui te u hahai fuli, te kie kafu ae e ina uufi te atu puleaga fuli.” (Esaia 25:7) ʼE hage te kie ʼaia ko he ʼaele kovi ʼe manava ki ai te hahaʼi ʼo natou mamate fuli ai. ʼEi ʼe mamate “te hahaʼi fuli ʼuhi ko Atama.” (1 Kolonito 15:22) Koia ʼae ʼe feala ke tou fai fuli te fehuʼi ʼaeni ʼa te apositolo ko Paulo: “Ko ai ʼae ka ina haofaki anai au mai te sino ʼaeni ʼe ina taki au ki te mate?” Kae ʼe feala moʼoni koa ke haofaki tatou e he tahi?—Loma 7:24.