1-3. (1) Neʼe fakaha feafeaʼi e te kau Kilisitiano ʼe natou fakaʼamu ke natou fakatahitahi? (Vakaʼi te ʼuluaki pāki.) (2) Kotea ʼae ka tou talanoa anai ki ai ʼi te alatike ʼaeni?

KO CORINNA neʼe kei taʼu 17 ʼi te temi ʼae neʼe ʼave ai tana faʼe ki te lotoʼa fakamamahi. Ki muli age, neʼe ʼave ia Corinna ki Sibérie ʼae neʼe vaha mo tona ʼapi ia kilometa ʼe lauʼi afe. ʼI te fenua ʼaia, neʼe gaue ʼi te fale gaue kele pea neʼe hage pe ko he sinifu. ʼI ʼihi temi, neʼe fakakinauʼi ke alu ʼo gaue ʼi tuʼa ʼi te momoko kaʼe neʼe mole hona ʼu mutuʼi meʼa mafana. Koia neʼe faigaʼi ai e Corinna mo te tahi tuagaʼane ke nā mavae mai te fale gaue kele ʼaia ke tupu ai hanā olo ʼo fono.

² Neʼe ui fenei e Corinna: “Neʼe ma mavae ʼi te afiafi pea neʼe ma haʼele ia kilometa ʼe 25 ki te taulaga saliote afi. Neʼe mavae te saliote afi ʼi te hola lua mafoata, pea neʼe hola ono tamā faifagona. Pea ʼi tamā hihifo ʼi te saliote afi, neʼe tonu ke ma toe haʼele ia kilometa ʼe hogofulu ki te koga meʼa ʼae ʼe fai ai te fono.” Neʼe fiafia ʼaupito ia Corinna ʼi tana faifagona ʼaia. Neʼe ina ui fenei: “Neʼe matou ako Te Tule Leʼo, pea neʼe matou hiva katiko ʼi te fono. Neʼe ko he aluʼaga fakalotomalohi pea neʼe toe  malohi ai tamā tui.” Neʼe toe liliu te ʼu tuagaʼane ki te fale gaue kele hili ʼaho ʼe tolu, kaʼe neʼe mole tokagaʼi pe la e he tahi tanā pupuli.

³ Ko te hahaʼi ʼa Sehova, ʼe natou fiafia tuʼumaʼu moka natou fakatahitahi. Ohage la, ko te ʼu ʼuluaki Kilisitiano neʼe natou fiafia moka natou fakatahitahi ʼo atolasio kia Sehova pea mo ako tona ʼuhiga moʼoni. (Gaue 2:42, MN) ʼE mahino ia, ʼe toe feia pe mo koe. Kaʼe ohage pe ko ʼou tehina mo tuagaʼane, ʼe lagi faigataʼa hau kau tuʼumaʼu ki te ʼu fono. ʼE lagi ʼaoga ke ke fai ni hola fakalaka ʼi tau gaue, peʼe lahi fau tou maʼumaʼua peʼe ke gaʼegaʼe tuʼumaʼu. Koia, kotea ka tokoni mai anai ke tou faiga malohi ke tou kau ki ʼatatou fono? ^[1] (Vakaʼi te nota ʼi te fakaʼosi ʼo te alatike.) ʼE feafeaʼi hatatou fakalotomalohiʼi ʼatatou ako Tohi-Tapu pea mo ʼihi ke natou kau tuʼumaʼu ki te ʼu fono? ʼE fakamahino anai ʼi te alatike ʼaeni, pe ʼe koʼe ko tatatou kau ki te ʼu fono (1) ʼe lelei kia tatou, (2) ʼe tokoni ki ʼihi, pea (3) ʼe fiafia ai ia Sehova. ^[2]—Vakaʼi te nota ʼi te fakaʼosi ʼo te alatike.

4. ʼE tokoni feafeaʼi mai tatatou kau ki te ʼu fono ke tou ako pe ʼe ko ai ia Sehova?

⁴ ʼI te ʼu fono ʼe akoʼi ai tatou. Ko te ʼu fono fuli, ʼe tokoni mai ke tou iloʼi pe ʼe ko ai ia Sehova. Ohage la, ʼe lahi te ʼu kokelekasio neʼe natou ako te tohi Approchez-vous de Jéhovah ʼi te Ako Tohi-Tapu ʼo Te Kokelekasio. Kotea ʼae ʼe ke logoʼi moka tou talanoa ki te ʼu kalitate ʼo Sehova pea moka ke iloʼi te manatu ʼo ʼou tehina mo tuagaʼane ʼo ʼuhiga mo Sehova? ʼE mahino ia, ʼe toe tuputupu ai tou ʼofa ʼae kia Sehova. ʼE lahi te ʼu manatu Fakatohi-tapu ʼe tou toe ako ʼi te ʼu fono, ʼaki tatatou fakalogo lelei ki te ʼu akonaki, mo te ʼu faʼifaʼitaki pea mo te lau ʼo te Tohi-Tapu. (Neemia 8:8) Fakakaukauʼi age muʼa te ʼu manatu ʼae ʼe tou maʼu ʼi tatatou teuteuʼi te koga Tohi-Tapu ʼae ʼe tonu ke tou lau ʼi te vahaʼa fuli, pea mai te ʼu tali ʼa ʼihi.

5. ʼE tokoni feafeaʼi atu te ʼu fono ke ke maʼuliʼi te ʼu ako ʼe ke taʼofi mai te Tohi-Tapu, ke ke hikihiki ai tau faʼahiga faifakamafola?

⁵ ʼE tokoni mai te ʼu fono ke tou maʼuliʼi te ʼu ako ʼe tou taʼofi mai te Tohi-Tapu. (1 Tesalonika 4:9, 10) Ohage la, neʼe kua ke kau koa ʼi he Ako ʼo Te Tule Leʼo neʼe tupu ai hau fia hikihiki ʼau faikole, pea mo ke fakamolemole ki hou tehina peʼe ki hou tuagaʼane, pea ke lahi age tau tauhi ʼae kia Sehova? ʼI te fono ʼo te vahaʼa, ʼe feala ke tou ako ai pe ʼe feafeaʼi te fakamafola ʼo te logo lelei pea mo tou tokoni ki te hahaʼi ke natou mahino ki te ʼu moʼoni Fakatohi-tapu.—Mateo 28:19, 20.

6. ʼE fakalotomalohiʼi feafeaʼi tatou ʼi te ʼu fono?

⁶ ʼI te ʼu fono ʼe fakalotomalohiʼi ai tatou. ʼE faigaʼi e te malama ʼa Satana ke vaivai tatatou tui pea ke tou loto hoha mo lotovaivai. Kaʼe ʼe tou maʼu ʼi te ʼu fono he ʼu fakalotomalohi pea mo te malohi, ke tou haga tauhi kia Sehova. (Lau ia Gaue 15:30-32.) ʼE tou tau talanoa ai pe neʼe hoko moʼoni feafeaʼi te ʼu lea fakapolofeta Fakatohi-tapu. Pea ʼe tokoni mai ke  tou tui papau ʼe fakahoko moʼoni anai e Sehova ʼana fakapapau ʼi te ka haʼu. ʼE tou maʼu he ʼu fakalotomalohi mai ʼotatou tehina mo tuagaʼane ʼi ʼanatou akonaki, mo ʼanatou tali pea mo ʼanatou fakavikiviki fakamalotoloto kia Sehova ʼaki tanatou hiva te ʼu katiko. (1 Kolinito 14:26) Pea ka tou faipalalau mo natou, ʼi muʼa peʼe ʼi te hili ʼo te ʼu fono, ʼe tou lotofimalie ai koteʼuhi ʼe lahi ʼotatou kaumeʼa ʼe ʼoʼofa moʼoni ia tatou.—1 Kolinito 16:17, 18.

7. He koʼe ʼe maʼuhiga ʼaupito ia tatatou kau ki te ʼu fono?

⁷ ʼI te ʼu fono ʼe tokoni mai te laumalie maʼoniʼoni ʼo te ʼAtua. ʼE fakaʼaogaʼi e Sesu te laumalie maʼoniʼoni ʼaia ke ina takitaki te ʼu kokelekasio. ʼE ui mai e Sesu ʼe tonu ke tou fagono “ki te mea ae e fakaha e te Laumalie ki te atu Ekelesia” peʼe ki te atu kokelekasio. (Apokalipisi 2:7) ʼE lava tokoni mai te laumalie maʼoniʼoni ke tou tekeʼi te fakahala pea ke tou faifakamafola ʼaki he lototoʼa. ʼE feala ke toe tokoni mai ke tou toʼo he ʼu tonu ʼe lelei. Koia ʼae ʼe tonu ai ke tou faiga malohi ke tou kau ki ʼatatou fono pea ke tou maʼu ai te tokoni ʼa te laumalie maʼoniʼoni ʼo te ʼAtua.

8. Kotea ʼae ʼe logoʼi e ʼotatou tehina mo tuagaʼane moka natou sisio mai ʼe tou kau ki te ʼu fono, mo tou faitali, pea mo tatatou hiva? (Vakaʼi mo te fakamatala ʼae ʼi te ʼa takai “  ʼI Te Hili ʼo Te Fono ʼe Au Logoʼi Tuʼumaʼu Toku Fimalie.”)

⁸ ʼI te ʼu fono, ʼe tou maʼu ai te faigamalie ʼae ke tou fakaha ʼe tou ʼoʼofa ki ʼotatou tehina mo tuagaʼane. Tokolahi ʼi totatou kokelekasio ʼe natou tau mo he ʼu fihifihia. Neʼe tohi fenei e te apositolo ko Paulo: “Ke tou fetokagaaki ia tatou.” (Hepeleo 10:24, 25) ʼE feala hatatou fakaha ʼe tou tokakaga ki ʼotatou tehina mo tuagaʼane ʼi tatatou kau fakatahi mo natou ʼi te ʼu fono ke tou fefakalotomalohiʼaki. Ka tou kau ki te ʼu fono, ʼe tou fakaha ai ki ʼotatou tehina mo tuagaʼane ʼe tou fia fakatahi mo fia faipalalau mo natou, pea ʼe tou tokagaʼi te ʼu meʼa ʼae ʼi ʼonatou loto. ʼE tou toe fakalotomalohiʼi natou moka natou logo ki ʼatatou tali pea mo tatatou hiva fakamalotoloto.—Kolose 3:16.

9, 10. (1) Fakamahino pe ʼe fakaha feafeaʼi ʼi te ʼu palalau ʼa Sesu ia Soane 10:16, ʼe maʼuhiga tatatou fakatahi mo ʼotatou tehina mo tuagaʼane. (2) ʼE tou tokoni feafeaʼi ki he tahi neʼe liʼakina e tona famili, mo kapau ʼe tou kau tuʼumaʼu ki te ʼu fono?

⁹ Ka tou kau ki te ʼu fono, ʼe tou  tokoni ki te kokelekasio ke natou nonofo fakatahi. (Lau ia Soane 10:16.) Neʼe fakatatau e Sesu ia ia ki he tagata tauhi ovi pea ko ʼana tisipulo ki he faga ovi. Fakakaukauʼi age muʼa te faʼifaʼitaki ʼaeni: Kapau ʼe mavetevete he ʼu ovi, ko he ʼu ovi ʼe lua ʼi he moʼuga, ko te tahi ʼu ovi ʼe lua ʼi he mafa pea ko te tahi ovi ʼi he tahi age koga meʼa, ʼe feala koa ke tou ui ko te ʼu ovi ʼaia ʼe nima ʼe natou faʼufaʼu he faga ovi ʼe tahi? Kailoa, koteʼuhi ʼe nonofo fakatahi te faga ovi pea ʼe natou muliʼi tonatou tagata tauhi ovi. ʼO toe feia pe, ʼaua tatatou fakamamaʼo mai ʼotatou tehina mo tuagaʼane ʼaki tatatou mole kau ki te ʼu fono. ʼE tonu ke tou fakatahitahi ke feala ai hatatou liliu ko “he faga ovi e tahi” pea ke tou muliʼi te “tauhi ovi e tahi.”

¹⁰ ʼE tokoni mai te ʼu fono ke tou logo tahi ohage ko he famili ʼe maʼu ai te ʼofa. (Pesalemo 133:1) Ko ʼihi ʼi te kokelekasio, kua liʼakina natou e ʼanatou matuʼā peʼe ko ʼonatou tehina mo tokolua totonu. Kaʼe neʼe fakapapau e Sesu ʼe ina foaki kia natou honatou famili ʼe ʼoʼofa pea mo tokakaga anai kia natou. (Maleko 10:29, 30) Kapau ʼe ke kau tuʼumaʼu ki te ʼu fono, ʼe feala ke ke liliu ko he tamai, ko he faʼe, ko he tokolua peʼe ko he tehina maʼa he tahi ʼi te kokelekasio. Pea ka ke fakakaukauʼi te aluʼaga ʼaia, ʼe ke faiga malohi anai ke ke kau ki te ʼu fono fuli.

11. Ko tatatou kau ki te ʼu fono ʼe tokoni feafeaʼi mai ke tou foaki kia Sehova te meʼa ʼae ʼe tau mo feʼauga mo ia?

¹¹ ʼI te ʼu fono, ʼe tou foaki kia Sehova te meʼa ʼae ʼe tau mo feʼauga mo ia. Ko Sehova, ko totatou Tupuʼaga, koia ʼae ʼe tonu ai ke tou lotofakafetaʼi mo tou fakavikiviki kia te ia, pea mo tou fakamaʼuhigaʼi.  (Lau ia Apokalipisi 7:12.) ʼE tou fakahoko te faʼahi ʼaia ʼi te ʼu fono, moka tou faikole kia Sehova, mo tou hiva kia te ia pea mo tou palalau ʼo ʼuhiga mo ia. Ko he faigamalie taulekaleka ʼaia ʼe tou maʼu ʼi te vahaʼa fuli ke tou tauhi ai kia Sehova.

12. Kotea ʼae ʼe logoʼi e Sehova moka tou fakalogo ki tana fakatotonu ʼae ke tou kau ki te ʼu fono?

¹² Neʼe fakatupu tatou e Sehova, pea ʼe tonu ke tou fakalogo kia te ia. ʼE ina fakatotonu mai kia tatou ke tou fakatahitahi tuʼumaʼu, tafitō ʼo te kua ovi mai ʼo te fakaʼosi. Koia ka tou fakalogo ki te fakatotonu ʼaia, ʼe tou fakafiafiaʼi ai ia Sehova. (1 Soane 3:22) ʼE ina tokagaʼi tatatou faiga fakamalotoloto ʼae ke tou kau ki te ʼu fono pea ʼe maʼuhiga kia te ia ʼatatou faiga ʼaia.—Hepeleo 6:10.

13, 14. ʼE feafeaʼi hatatou fakaovi kia Sehova pea mo Sesu ʼi te ʼu fono?

¹³ Ka tou kau ki te ʼu fono, ʼe tou fakaha ai kia Sehova ʼe tou fia fakaovi kia te ia mo tona ʼAlo. ʼI te ʼu fono, ʼe tou ako ʼi te Tohi-Tapu pe ʼe kotea ʼae ʼe loto e Sehova ke tou fai pea mo te faʼahiga maʼuli ʼae ʼe tonu ke tou maʼu. (Esaia 30:20, 21) Maʼia mo natou ʼae ʼe kau ki te ʼu fono kaʼe ʼe mole tauhi kia Sehova, ʼe natou ui ʼe takitaki tatou e te ʼAtua. (1 Kolinito 14:23-25) Ko Sehova ʼae ʼe ina takitaki ʼatatou fono ʼaki tona laumalie maʼoniʼoni. Pea ko te ʼu faʼahi fuli ʼae ʼe tou ako ʼi te ʼu fono, ʼe haʼu mai ia te ia. Koia ka tou kau ki te ʼu fono, ʼe tou fagono ki te ʼu meʼa ʼae ʼe ui mai e Sehova, ʼe tou logoʼi tona ʼofa mamahi ʼae kia tatou, pea ʼe tou fakaovi ai kia te ia.

¹⁴ Ko Sesu, te Pule ʼo te kokelekasio, neʼe ina ui fenei: “Ko te kogamea ae e fakatahi ai i toku huafa he toko lua pee ko he toko tolu, e au nofo i te lotomalie o natou.” (Mateo 18:20) ʼE toe ui foki ʼi te Tohi-Tapu ko Sesu ʼe “haele i lotomalie” ʼo te ʼu kokelekasio. (Apokalipisi 1:20–2:1) ʼE ha lelei mai ai, ʼe nonofo ia Sehova mo Sesu mo tatou pea ʼe nā fakalotomalohiʼi tatou ʼi ʼatatou fono. ʼI tau manatu la, kotea ʼae ʼe logoʼi e Sehova ʼi tana sio ki ʼau faiga ʼae ke ke fakaovi age kia te ia mo tona ʼAlo?

15. Kotea ʼae ʼe tou fakaha ki te ʼAtua moka tou olo ki te ʼu fono?

¹⁵ Ka tou kau ki te ʼu fono, ʼe tou fakaha ai kia Sehova ʼe tou fia fakalogo kia te ia. ʼE mole fakakinauʼi tatou e Sehova ke tou fai te meʼa ʼae ʼe loto ki ai. (Esaia 43:23) Koia ka tou filifili ke tou fakalogo ki tana fakatotonu ʼae ke tou kau ki te ʼu fono, ʼe tou fakaha ai ʼe tou ʼoʼofa ia te ia pea ʼe tou tui ʼe matatonu mo ia ke ina takitaki tatou. (Loma 6:17) Ohage la, kotea anai ka tou fai moka fakamaʼua mai e te patolo ke tou fai ni hola fakalaka ʼo tupu ai tatatou mole kau tuʼumaʼu ki te ʼu fono? Peʼe lagi tapuʼi e te puleʼaga ʼatatou fono, pea kapau ʼe mole tou mulimuli ki ai, ʼe tonu anai ke tou totogi he tuʼā, ke tou pilisoni peʼe ko he tahi age tautea. Peʼe lagi ʼi ʼihi temi ʼe mole tou kau ki te ʼu fono koteʼuhi ʼe tou fai he tahi age meʼa. ʼI te ʼu aluʼaga fuli ʼaia, ʼe tonu ke tou filifili pe ʼe tou fakalogo anai kia te ia peʼe kailoa.  (Gaue 5:29) Kaʼe ʼi te temi fuli pe ʼae ʼe tou fakalogo ai kia Sehova ʼe tou fakafiafiaʼi tona loto.—Taaga Lea 27:11.

16, 17. (1) ʼE tou iloʼi feafeaʼi neʼe maʼuhiga ʼaupito te ʼu fono ki te ʼu ʼuluaki Kilisitiano? (2) Neʼe kotea te manatu ʼa te tehina ko George Gangas ʼo ʼuhiga mo te ʼu fono?

¹⁶ Hili te fakatahitahi ʼa te kau Kilisitiano ʼi te Penikosite ʼo te taʼu 33 H.T.S., neʼe natou fakatahitahi tuʼumaʼu ai moʼo tauhi kia Sehova. ^[3] (Vakaʼi te nota ʼi te fakaʼosi ʼo te alatike.) Neʼe natou ‘mulimuli aipe ki te ʼu akonaki ʼa te kau apositolo pea mo natou fakatahitahi tuʼumaʼu.’ (Gaue 2:42, MN) Pea neʼe natou hoko atu pe tanatou fakatahitahi maʼia tonatou fakatagaʼi e te puleʼaga Loma pea mo te kau takitaki lotu. Logo la tona faigataʼa, kaʼe neʼe natou faiga fakamalotoloto aipe ke fakatahitahi.

¹⁷ ʼE toe feia pe ia ʼaho nei, ʼe lotofakafetaʼi te kau Fakamoʼoni ʼa Sehova ki te ʼu fono pea ʼe natou fiafia ʼi te kau ki te ʼu fono ʼaia. Ko te tehina ko George Gangas, ʼae neʼe kau lolotoga taʼu ʼe 20 tupu ʼi te Kolesi Pule, neʼe ina ui fenei: “Kia au, ʼe ko he fakafiafia lahi mo he fakalotomalohi ia taku fakatahi mo ʼoku tehina mo tuagaʼane. ʼE au fia alu fakatomuʼa ki te Fale Fono pea ʼe au fia mavae fakamuli ʼi te hili ʼo te fono. ʼE fiafia toku loto moka au faipalalau mo te hahaʼi ʼa te ʼAtua. Pea ka au fakatahi mo natou ʼe hage pe ʼe au nofo ʼi toku loto fale mo toku kiʼi famili, ʼi he palatiso fakalaumalie.” Pea neʼe ina toe ui fenei: “Ko siʼi ʼoku loto, ke au kau ki te ʼu fono.”

18. Kotea ʼae ʼe ke logoʼi ʼi tou loto ʼo ʼuhiga mo ʼatatou fono, pea kotea ʼae ʼe ke faiga anai ki ai?

¹⁸ ʼE ke manatu feia koa ʼo ʼuhiga mo te tauhi ʼae kia Sehova? Kapau ko ia, faiga fakamalotoloto ke ke kau ki te ʼu fono mo ʼou tehina mo tuagaʼane logo la te ʼu faigataʼaia. Fakaha kia Sehova ʼe ke logoʼi moʼoni ʼi tou loto te ʼu palalau ʼaeni ʼa te Hau ko Tavite: “[Sehova], e au ofa ki te fale ae e ke nofo ai, ki te kogamea ae e afio ai tou kololia.”—Pesalemo 26:8.