1. ʼE feafeaʼi hatatou fakalogo ki te ʼAtua mo te ʼu puleʼaga fakatagata?

ʼE AKOʼI mai ʼi te Tohi-Tapu ke tou fakalogo ki te ʼu puleʼaga fakatagata. Kaʼe ʼe toe ui mai ai ke tou fakalogo tuʼumaʼu ki te ʼAtua. (Gaue 5:29; Tito 3:1) ʼO feafeaʼi? Neʼe fakamahino e Sesu ia te pelesepeto ʼe tokoni mai ke tou iloʼi pe ʼe ko ai ʼae ʼe tonu ke tou fakalogo ki ai. Neʼe ina ui ʼe tonu ke tou tuku kia “Sesale te mea a Sesale, pea ki te Atua te mea a te Atua.” ^[1] (Vakaʼi te nota ʼi te fakaʼosi ʼo te alatike.) (Mateo 22:21) ʼE tou tuku kia “Sesale te mea a Sesale” moka tou fakalogo ki te ʼu lao ʼa te puleʼaga, mo tou fakaʼapaʼapa ki te ʼu pule taki ʼo te puleʼaga pea mo tou totogi ʼatatou tukuhau. (Loma 13:7) Kaʼe kapau ʼe fakamaʼua mai e te puleʼaga ke tou fai he meʼa ʼe mole alu tahi mo te finegalo ʼo te ʼAtua, ʼe tou fakafisi anai ki ai ʼaki he agafakaʼapaʼapa.

2. ʼE feafeaʼi hatatou fakaha ʼe mole tou kau ki te ʼu meʼa fakapolitike?

² Ko hatatou faʼahiga tuku ki te “Atua te mea a te Atua,” ko tatatou mole kau ki te ʼu faʼahi fakapolitike ʼo te malama ʼaeni. (Esaia 2:4) ʼE fakagafua e Sehova ke tuʼu te ʼu puleʼaga fakatagata, koia ʼae ʼe mole tou fakafeagai ai kia natou. ʼE mole tou lagolago foki ki he ʼu aluʼaga ʼe fakamaʼuhigaʼi ai totatou fenua  peʼe ko totatou lanu. (Loma 13:1, 2) ʼE mole tou faigaʼi ke tou fetogi te ʼu puleʼaga peʼe ke natou fakahoko he faʼahiga gaue. ʼE mole tou vote pea ʼe mole tou liliu ko he ʼu tagata faipolitike.

3. He koʼe ʼe mole tonu ke tou kau ki te ʼu meʼa fakapolitike pea mo te ʼu tau?

³ ʼE lahi te ʼu tupuʼaga ʼae ʼe ui mai ai e te ʼAtua ke mole tou kau ki te ʼu meʼa fakapolitike peʼe ki te ʼu tau. ʼE tou faʼifaʼitakiʼi ai ia Sesu, ʼae neʼe mole “kau i te malamanei.” Neʼe mole kau ki te ʼu meʼa fakapolitike peʼe ko te ʼu tau. (Soane 6:15; 17:16) Ko te tahi tupuʼaga, ʼe tou lagolago ki te Puleʼaga ʼo te ʼAtua. Pea ʼuhi ʼae ʼe mole tou lagolago ki te ʼu puleʼaga fakatagata, ʼe tou maʼu ai he leʼo ʼo loto ʼe maʼa moka tou fakamafola, ko te Puleʼaga pe ʼo te ʼAtua ʼae ka ina fakatokatoka anai te ʼu fihifihia fuli ʼo te tagata. Ko te ʼu lotu hala, ʼe natou kau ki te ʼu meʼa fakapolitike, pea ʼe fakatupu maveuveu ki te hahaʼi. Kaʼe ʼe tou logo tahi mo ʼotatou tehina mo tuagaʼane ʼi te malamanei katoa, koteʼuhi ʼe mole tou kau ki te ʼu meʼa fakapolitike pea mo te ʼu tau.—1 Petelo 2:17.

4. (1) ʼE feafeaʼi hatatou iloʼi ʼe faigataʼa anai tatatou ʼateaina mai te ʼu meʼa fakapolitike mo te ʼu tau? (2) He koʼe ʼe tonu ke tou teuteu ʼi te temi nei ke tou ʼateaina mai te ʼu fihi ʼo te malama?

⁴ ʼE lagi tou maʼuʼuli ʼi he fenua ʼe mole fakakinauʼi ai tatou ke tou kau ki te ʼu meʼa fakapolitike. Kaʼe ʼi te kua ovi mai ʼo te fakaʼosi ʼo te malama ʼa Satana, ʼe faigataʼa ai anai tatatou ʼateaina mai te ʼu meʼa fakapolitike mo te ʼu tau. Ia ʼaho nei, ʼe mole kei “maʼuli felogoʼi” te hahaʼi, pea ʼe natou “logogataʼa” ʼo natou ʼaʼasili maveuveu ai. (2 Timoteo 3:3, 4, MN) Ko ʼihi tehina mo tuagaʼane kua natou tau mo te ʼu aluʼaga ʼaia, ʼuhi ko te ʼu fetogi fakapunamaʼuli fakapolitike ʼo tonatou fenua. Koia ʼae ʼe ʼaoga ai ʼi te temi nei ke tou nonofo teuteu ke tou ʼateaina mai te ʼu fihi ʼo te malama ʼi te ʼu temi faigataʼa. Tou vakaʼi ia aluʼaga ʼe fa ʼe tokoni mai anai ke iku lelei tatatou nonofo teuteu.

5. Kotea te manatu ʼa Sehova ʼo ʼuhiga mo te ʼu puleʼaga fakatagata?

⁵ Ko te ʼuluaki aluʼaga ʼae ʼe feala ai hatatou teuteuʼi ʼi te temi nei tatatou mole kau ki te ʼu meʼa fakapolitike mo te ʼu tau, ko tatatou maʼu te manatu ʼa Sehova ʼo ʼuhiga mo te ʼu puleʼaga. ʼI te temi ʼae neʼe fakatupu ai e Sehova te tagata, neʼe mole ina foaki ki ai te fealagia ʼae ke ina puleʼi ʼihi hahaʼi. (Selemia 10:23) ʼE hage pe kia ia te hahaʼi fuli ko he foʼi famili ʼe tahi. Kaʼe ʼe mole logo tahi te hahaʼi ʼo te ʼu puleʼaga fakatagata, koteʼuhi ʼe natou tahi ui pe ʼe lelei age tona puleʼaga. Tatau aipe pe ʼe hage mai ʼe lelei te ʼu fakaʼamu ʼa te ʼu puleʼaga, kaʼe ʼe mole feala ke natou fakatokatoka te ʼu fihifihia fuli. Pea tahi, kua natou liliu ko he ʼu fili ʼo te Puleʼaga ʼo te ʼAtua, ʼae neʼe kamata ʼafio ʼi te taʼu 1914. Kua vave pulihi pe anai e te Puleʼaga ʼaia ia te ʼu puleʼaga fakatagata fuli.—Lau ia Pesalemo 2:2, 7-9.

6. ʼE tonu ke feafeaʼi tatatou aga ki te ʼu pule taki ʼo te puleʼaga?

⁶ ʼE fakagafua e te ʼAtua ke tuʼu te ʼu puleʼaga fakatagata, koteʼuhi ʼe feala ai ke maʼu e te malama he faʼahiga tokalelei. Pea ʼe tokoni mai ke tou fakamafola te logo lelei ʼo te Puleʼaga ʼo te ʼAtua. (Loma 13:3, 4) ʼE toe ui  mai e te ʼAtua ke tou faikole ʼo ʼuhiga mo te ʼu pule taki ke feala ai hatatou tauhi age kia te ia ʼi te tokalelei. (1 Timoteo 2:1, 2) Ka gaohi koviʼi tatou ʼuhi ko tatatou lotu, ʼe feala hatatou kole tokoni ki te ʼu pule taki ʼo te puleʼaga, ohage ko tona fai e te apositolo ko Paulo. (Gaue 25:11) ʼE moʼoni ʼe ui ʼi te Tohi-Tapu ko Satana ʼae ʼe ina puleʼi te ʼu puleʼaga fakatagata, kaʼe ʼaua naʼa tou ui ʼe puleʼi e Satana ia te ʼu pule taki takitokotahi. (Luka 4:5, 6) Koia ʼe mole tonu ke tou ui ki he tahi, ko te Tevolo ʼe ina puleʼi ia he puleʼaga. ʼE fakamahino ʼi te Tohi-Tapu ʼe mole tonu ke tou lau kovi ki niʼihi.—Tito 3:1, 2.

7. Kotea te faʼahiga manatu ʼae ʼe tonu ke tou tekeʼi?

⁷ ʼE tou fakalogo ki te ʼAtua ʼaki tatatou mole lagolago ki he tagata peʼe ki he kutuga faipolitike, tatau aipe pe ʼe feala ke fua lelei mai ʼanatou manatu. ʼI ʼihi temi, ʼe mole faigafua kia tatou. Ohage la, tou fakakaukauʼi age muʼa, ko he hahaʼi ʼe fakafeagai ki he puleʼaga neʼe tupu mai ai tonatou maʼuli mamahi maʼia mo te kau Fakamoʼoni ʼa Sehova. ʼE moʼoni, ʼe mole ke kau anai mo te kau agatuʼu ʼaia, kaʼe ʼe ke fakalakatonuʼi anai koa ia natou pea mo ke fakaʼamu ke iku lelei ʼanatou fakatuʼutuʼu? (Efeso 2:2) Kapau ʼe tou fia ʼateaina mai te ʼu meʼa fakapolitike mo te ʼu tau, ʼe mole tonu ke tou manatu ʼe ʼi ai he kutuga faipolitike ʼe lelei. ʼE feala ke ha ʼatatou manatu ʼi ʼatatou palalau mo te ʼu meʼa ʼae ʼe tou fai.

8. Moka faigataʼa tatatou ʼateaina mai te ʼu fihi ʼo te malama ʼaeni, ʼe feafeaʼi hatatou fakaha ʼe tou ‘agafakapotopoto mo maʼa’?

⁸ Ko te lua aluʼaga ʼae ʼe feala ai hatatou ʼateaina mai te ʼu meʼa fakapolitike mo te ʼu tau, ko tatatou ‘agafakapotopoto ohage ko ni gata mo tou maʼa ohage ko ni lupe.’ (Lau ia Mateo 10:16, 17.) ʼE tou agafakapotopoto moka tou fakakaukauʼi fakatomuʼa te ʼu fihifihia ʼae ʼe feala ke hoko. ʼE tou nonofo ‘maʼa’ moka ʼe mole tou kau ki te ʼu meʼa fakapolitike mo te ʼu tau ʼi te ʼu aluʼaga faigataʼa ʼaia. Tou vakaʼi te ʼu aluʼaga ʼaia pea mo te ʼu koga ʼae ʼe feala ke tou fai ke tou ʼateaina mai te ʼu meʼa fakapolitike mo te ʼu tau.

9. Kotea ʼae ʼe tonu ke tou tokakaga ki ai ʼi ʼatatou faipalalau?

⁹ ʼAtatou faipalalau. ʼE tonu ke tou tokakaga moka faipalalau te hahaʼi ʼo ʼuhiga mo te ʼu meʼa fakapolitike. Ohage la, ka tou tala te logo lelei ʼo te Puleʼaga ʼo te ʼAtua ki te hahaʼi, ʼe mole tou vikiʼi peʼe tou valoki anai te ʼu manatu ʼa he kutuga peʼe ʼa he tagata faipolitike. Kaʼe tou fakaha ʼaki te Tohi-Tapu pe ʼe pulihi feafeaʼi anai e te ʼAtua te ʼu fihifihia ʼo te malamanei ʼo talu ai. Pea ʼe mole tou faipalalau anai pe ʼe kotea ʼae ʼe fia fakahoko e te tagata moʼo fakatokatoka te ʼu fihifihia ʼaia. Kapau ʼe fia faipalalau te hahaʼi ki te ʼohoana ʼa te tagata mo te tagata peʼe ki te fakato fatu, tou fakaha age te ʼu pelesepeto Fakatohi-tapu pea tou fakamahino age pe koʼe ʼe tou faiga ke tou maʼuliʼi ʼi te ʼaho fuli. Pea kapau ʼe ui mai e he tahi ʼe tonu ke fetogi peʼe ke molehi he ʼu lao ʼo te puleʼaga, ʼe mole tou manatu tahi mo ia pea ʼe mole tou fakakinauʼi anai ke fetogi tana faʼahiga manatu.

10. ʼE tou fakaha feafeaʼi ʼe tou ʼateaina mai te ʼu fihi ʼo te malama ʼaeni moka ʼi ai he ʼu meʼa ʼe tou logo ki ai?

¹⁰ Te televisio, te latio, te sulunale, te Neti. ʼI ʼihi temi, ko te ʼu fakamatala ʼi te ʼu tala logo, ʼe lagolago malohi ki he faʼahiga manatu. Kaʼe tafitō ʼi te ʼu fenua ʼae ʼe puleʼi ai te ʼu tala logo e te puleʼaga. Kapau ko te ʼu kautahi ʼo te ʼu tala logo ʼe lagolago ki he kutuga faipolitike, ʼe tonu ke tou tokakaga naʼa tou maʼu tanatou faʼahiga manatu. Ohage la, tou fai te fehuʼi ʼaeni: ‘ ʼE au fia fagono koa ki he tagata tala logo,  koteʼuhi ʼe au manatu tahi mo ia ʼo ʼuhiga mo he aluʼaga fakapolitike?’ Ke feala hatatou ʼateaina mai te ʼu meʼa fakapolitike, ʼe mole tonu ke tou sioʼi peʼe ke tou lau te ʼu logo ʼae ʼe lagolago ki ni aluʼaga fakapolitike. Kaʼe ʼe tou faiga ʼo kumi te ʼu logo ʼae ʼe ʼateaina mai te ʼu meʼa fakapolitike. Pea tou vakaʼi tuʼumaʼu te ʼu meʼa ʼae ʼe tou fakalogo pe ʼe alu tahi mo te “faifaitaki o te u palalau mooni” ʼae ʼe tou maʼu ʼi te Tohi-Tapu.—2 Timoteo 1:13.

11. He koʼe ʼe faigataʼa hatatou nonofo agatonu moka maʼuhiga fau kia tatou ʼotatou koloa?

¹¹ Te fia maʼu koloa. Ka maʼuhiga fau kia tatou te falā mo ʼotatou koloa, ʼe feala ke faigataʼa tatatou ʼateaina mai te ʼu meʼa fakapolitike. Hili te taʼu 1970, tokolahi te kau Fakamoʼoni ʼi Malawi neʼe tonu ke natou tuku ʼonatou koloa fuli koteʼuhi neʼe mole natou fia fakatahi ki he kutuga faipolitike. Kaʼe meʼa fakaʼofaʼofa foki, he neʼe fia hoko atu pe e ʼihi tonatou maʼuli fimalie. Ko te tuagaʼane ʼe higoa ko Ruth ʼe ina manatuʼi “Ko ʼihi neʼe mavae mo matou kaʼe ki muli age, neʼe natou fakatahi ki te kutuga faipolitike pea natou toe liliu ki ʼonatou ʼapi. Neʼe mole natou fia maʼuʼuli ʼi te nofoʼaga fakaʼofaʼofa ʼae neʼe matou feholaki ki ai.” Kaʼe ko te tokolahi ʼi te hahaʼi ʼa te ʼAtua neʼe natou nonofo agatonu. Tatau aipe pe neʼe mole kei lahi tanatou foʼi falā pea mo puli fuli ʼonatou koloa, kaʼe neʼe mole natou kau ki te ʼu meʼa fakapolitike.—Hepeleo 10:34.

12, 13. (1) Kotea te manatu ʼa Sehova ʼo ʼuhiga mo te hahaʼi? (2) ʼE tou fakaha feafeaʼi ʼe tou fiameʼameʼa fau ʼo ʼuhiga mo totatou fenua?

¹² Te fialahi. Ko he agamahani ki te hahaʼi hanatou fialahi pea mo fiameʼameʼa ʼo ʼuhiga mo tonatou lanu, telepi, agaʼi fenua, kolo peʼe ko tonatou fenua. Kaʼe kia mata ʼo Sehova, ʼe tatau fuli pe te hahaʼi. ʼE moʼoni, neʼe kehekehe totatou fakatupu e Sehova, pea ʼe tou fiafia ʼi tatatou sisio ʼae ki totatou kehekehe ʼaia. Pea ʼe mole ina loto ke tou liaki tatatou agaʼi fenua. Kaʼe ʼe mole loto e Sehova ke tou manatu ʼe tou lelei age ʼi ʼihi.—Loma 10:12.

¹³ ʼAua naʼa tou fiameʼameʼa fau ʼuhi ko totatou fenua peʼe ko totatou puleʼaga ʼo tou manatu ʼe mole hona fakatatau. Kapau ʼe tou manatu feia, ʼe feala ke faigataʼa tatatou ʼateaina mai te ʼu manatu fakapalatahi. Ko he aluʼaga ia neʼe hoko ʼi te temi muʼa. Ko ʼihi tehina Hepeleo neʼe mole natou tokakaga lelei ki te ʼu fafine vitua Keleka. (Gaue 6:1) ʼE feafeaʼi hatatou iloʼi kua kamata tuputupu te taʼi fialahi ʼaia ia tatou? Kapau ʼe fia tokoni atu he tehina mai he tahi fenua ʼo ina ui ‘ ʼE lelei ke ke fai feia,’ ʼe ke foimo manatu atu aipe koa ‘ ʼE lelei age tona faʼahiga fai ʼi heni,’ pea mo ke fakafisi ki tana tokoni? Kapau ko ia, ʼe lelei ke tou manatuʼi te tokoni maʼuhiga ʼaeni: “I te agavaivai ke kotou sio kia natou ake ae o hage e natou maoluga age ia koutou totonu.”—Filipe 2:3.

14. ʼE lava tokoni feafeaʼi mai te faikole? Kotea te faʼifaʼitaki Fakatohi-tapu ʼae ʼe fakamoʼoni ki ai?

¹⁴ Ko te tolu aluʼaga ʼae ke feala ai hatatou ʼateaina mai te ʼu fihi ʼo te malama ʼaeni, ko tatatou falala kia Sehova. Tou kole tona laumalie  maʼoniʼoni, koteʼuhi ʼe feala ai ke tou maʼu te kataki fualoa mo te lotololomi. Ko te ʼu kalitate ʼaia, ʼe tokoni mai anai mo kapau ʼe agafakakakā te puleʼaga peʼe mole faitotonu. Tou kole kia Sehova ia tona poto ke tou iloʼi te aluʼaga ʼae ʼe feala ai ke faigataʼa tatatou mole kau ki te ʼu meʼa fakapolitike. Pea tou kole kia te ia ke tokoni mai ke tou nonofo agatonu ʼi te aluʼaga ʼaia. (Sakopo 1:5) ʼE lagi pilisoniʼi anai tatou peʼe tou tau anai mo he tahi age tautea, ʼuhi pe ko tatatou nonofo agatonu kia Sehova. Kapau ko ia, tou faikole ke tou maʼu te lototoʼa ke feala hatatou fakamahino lelei ki te hahaʼi ia te tupuʼaga ʼae ʼo tatatou mole kau ki te ʼu fihi ʼo te malama ʼaeni. Koia tou tui papau ʼe tokoni mai anai ia Sehova ke tou katakiʼi te aluʼaga ʼaia.—Lau ia Gaue 4:27-31.

15. ʼE lava tokoni feafeaʼi mai te Tohi-Tapu ke tou ʼateaina mai te ʼu fihi ʼo te malamanei? (Vakaʼi mo te fakamatala ʼae ʼi te ʼa takai “  ʼAki Te Folafola ʼa Te ʼAtua Neʼe Malohi Ai Tanatou Tui.”)

¹⁵ Neʼe foaki mai e Sehova tana Folafola moʼo fakamalohiʼi ʼo tatou. Koia tou metitasio ki te ʼu vaega ʼae ʼe tokoni mai anai ke tou ʼateaina mai te ʼu fihi ʼo te malama ʼaeni. Tou faigaʼi ke tou ako mo tou fakamaʼumaʼu te ʼu vaega ʼaia, koteʼuhi ʼe tokoni mai anai ʼi te temi ʼae ʼe mole ʼi ai hatatou Tohi-Tapu. ʼAki te Tohi-Tapu, ʼe toe feala ai ke malohi tatatou ʼamanaki ki te ʼu fakapapau ʼa te ʼAtua ki te ka haʼu. ʼE ʼaoga kia tatou ia te ʼamanaki ʼaia ke tou katakiʼi ia te fakataga. (Loma 8:25) Tou filifili te ʼu vaega ʼae ʼe fakamatala ai te ʼu tapuakina ʼae ʼe tou fakaʼamu ki ai ʼi te malama foʼou pea mo tou fakakaukauʼi totatou maʼuli ʼi te temi ʼaia.

16, 17. Kotea te ako ʼe tou taʼofi mai te ʼu kaugana agatonu ʼa te ʼAtua? (Vakaʼi te ʼuluaki pāki.)

¹⁶ Ko te fa aluʼaga ʼae ka tokoni mai anai ke mole tou kau ki te ʼu fihi ʼo te malama ʼaeni, ko tatatou fakakaukauʼi te faʼifaʼitaki ʼa te ʼu kaugana ʼa Sehova. Tokolahi ʼi te temi muʼa, neʼe natou lototoʼa, pea neʼe natou toʼo he ʼu tonu fakapotopoto ʼo feala ai tanatou mole kau ki te ʼu fihi ʼo te malama ʼaeni. Ohage la, ko Satalake, mo Mesake, mo Apeteneko, neʼe natou fakafisi ke mole natou atolasio ki te fakatata ʼae neʼe ina fakata te puleʼaga ʼo  Papilone. (Lau ia Taniela 3:16-18.) ʼE tokoni te fakamatala ʼaia ki te ʼu Fakamoʼoni ia ʼaho nei ke natou lototoʼa pea ke mole natou fakaʼapaʼapa ki te fuka ʼo tonatou fenua. Neʼe mole kau Sesu ʼi te ʼu fihi fakapolitike peʼe ko ʼihi atu fihi ʼae ʼe mavetevete ai te hahaʼi. Neʼe mahino ia, ʼe tokoni anai tana faʼifaʼitaki lelei ki ʼana tisipulo. Koia ʼae neʼe ina ui fenei ai: “Koutou kataki, kua au malo i te malamanei.”—Soane 16:33.

¹⁷ ʼE kaugā malie te kau Fakamoʼoni ia ʼaho nei, ʼe mole natou kau ki te ʼu fihi ʼo te malamanei. Ko ʼihi neʼe fakamamahiʼi, pilisoniʼi pe neʼe matehi ʼuhi ko tanatou nonofo agatonu ʼae kia Sehova. Ko tanatou faʼifaʼitaki ʼe lava tokoni mai ke tou lototoʼa. Neʼe fakamatala fenei e te tehina mai Turquie: “Ko te tehina tupulaga neʼe higoa ko Franz Reiter, neʼe matehi koteʼuhi neʼe fakafisi ke mole kau ki te foʼi kautau ʼa Itilele. ʼI te po ʼi muʼa ʼo tona matehi, neʼe faitohi ki tana faʼe. Pea neʼe ha ʼi tana tohi ʼaia, te malohi ʼo tana tui mo tana falala kia Sehova pea ʼe au fia faʼifaʼitakiʼi mo kapau ʼe au tau mo he ʼahiʼahi feia.” ^[2]—Vakaʼi te nota ʼi te fakaʼosi ʼo te alatike.

18, 19. (1) ʼE tokoni feafeaʼi mai te ʼu tehina mo tuagaʼane ʼo totatou kokelekasio ke tou nonofo agatonu? (2) Kotea ʼae ʼe tou fakatotonu ke tou fai?

¹⁸ ʼE feala ke tokoni mai te ʼu tehina mo tuagaʼane ʼo totatou kokelekasio ke tou ʼateaina mai te ʼu fihi ʼo te malama ʼaeni. Kapau ʼe tou tau mo he faigataʼaia, tou fakaha ki te ʼu tagata ʼafeā. ʼE feala ke natou foaki mai he ʼu tokoni Fakatohi-tapu. Pea tahi, kapau ʼe iloʼi e te kokelekasio totatou aluʼaga, ʼe feala ke natou fakalotomalohiʼi tatou. Koia tou kole kia natou ke natou faikole maʼa tatou. Kaʼe ʼe tonu foki ke tou lagolago mo faikole maʼa natou. (Mateo 7:12) Ke tou maʼu te ʼu lisi ʼo te ʼu higoa ʼo te ʼu tehina ʼae ʼe pilisoniʼi, vakaʼi ʼi te alatike ʼo tatatou tuʼasila Fakafalani ʼi te Neti “Témoins de Jéhovah emprisonnés en raison de leur foi (par pays).” ʼE feala ke tou olo ʼo vakaʼi ʼi te SALLE DE PRESSE > VEILLE JURIDIQUE. Tou filifili he ʼu higoa pea mo kole kia Sehova ke tokoni ki te ʼu tehina mo tuagaʼane ʼaia ke natou maʼu te lototoʼa pea mo nonofo agatonu kia te ia.—Efeso 6:19, 20.

¹⁹ ʼI te kua ovi mai ʼo te fakaʼosi, ʼe feala ke fakakinauʼi tatou e te ʼu puleʼaga ke tou kau ki te ʼu meʼa fakapolitike mo te ʼu tau. Koia, ʼe maʼuhiga ai ke tou kamata atu ʼi te temi nei tatatou ʼateaina mai te ʼu fihi ʼo te malama maveuveu ʼaeni.