NEʼE au tupu ʼi te taʼu 1926, ʼi te kolo ko Crooksville, ʼi Ohio, ʼi Amelika. Ko taku tamai mo taku faʼe neʼe mole hanā lotu. Kaʼe neʼe nā fakatotonu mai kia matou ko ʼanā fanau ʼe toko valu ke matou olo ki te ʼekelesia. Neʼe au kau ki te ʼu faikole ʼo te Lotu Méthodiste. ʼI toku taʼu 14, neʼe fakapale au e te pasitea koteʼuhi neʼe au alu ki te ʼekelesia ʼi te ʼAhotapu fuli ʼi te taʼu katoa.

ʼI te temi ʼaia, neʼe kamata ʼaʼahi taku faʼe e te fafine ʼo tomatou vahaʼa fale ke nā faipalalau ki te Tohi-Tapu. Neʼe higoa ko Margaret Walker pea neʼe ko te Fakamoʼoni ʼa Sehova. ʼI te tahi ʼaho, neʼe au kau ʼi tana ako. Neʼe manatu e taku faʼe ʼe au fakaleluʼi anai tana ako, ʼo ina fekauʼi au ke au alu ki tuʼa. Kaʼe neʼe au faigaʼi aipe ke au fakalogo ki ʼanā faipalalau. ʼI te tahi ʼaʼahi e Margaret ia taku faʼe neʼe ina fehuʼi mai, “ ʼE ke iloʼi koa te huafa ʼo te ʼAtua?” Neʼe au tali age ki ai, “ ʼE iloʼi e te hahaʼi fuli, ko te ʼAtua.” Pea neʼe ina ui fenei mai: “Toʼo tau Tohi-Tapu pea ke vakaʼi te vaega ʼo Pesalemo 83:19.” Neʼe au fai te faʼahi ʼaia, pea neʼe au iloʼi ai te huafa ʼo te ʼAtua ko Sehova. Neʼe au lele ai ki ʼoku kaumeʼa pea mo au ui age, “Ka kotou toe liliu ki ʼokotou ʼapi afiafi, kotou kumi te vaega ʼo Pesalemo 83:19 ʼi te Tohi-Tapu pea kotou vakaʼi pe ʼe ko ai te huafa ʼo te ʼAtua.” ʼE lagi kotou manatu neʼe au kamata atu aipe taku faifakamafola.

Neʼe au ako te Tohi-Tapu pea au papitema ʼi te taʼu 1941. Mole faʼa fualoa ki ai, pea neʼe hinoʼi au ke au fai te ako tohi ʼo te kokelekasio. Neʼe au fakalotomalohiʼi taku faʼe mo ʼoku tehina mo tuagaʼane ke natou ʼomai ʼo kau ki ai. Pea neʼe natou kamata ʼomai fuli ki te ako tohi. Kaʼe ko taku tamai neʼe mole loto ki ai.

Neʼe lahi te ʼu gaue neʼe hinoʼi au ki ai ʼi te kokelekasio. Pea neʼe lahi te ʼu tohi neʼe ta e te kau Fakamoʼoni ʼa Sehova neʼe au tanaki. ʼI te tahi ʼaho, neʼe tuhiʼi mai e taku Tamai ʼaku tohi mo ina ui fenei mai: “Sio mai ki te ʼu meʼa fuli ʼaeni? Toʼo kehe nei pea mo ke alu ʼo puli.” Neʼe au mavae ʼi toku ʼapi pea neʼe au alu ʼo nofo ovi ki te kolo ko Zanesville, ʼi Ohio. Kaʼe neʼe au tau haʼu pe ki fale ʼo fakalotomalohiʼi toku famili.

Neʼe faigaʼi e taku tamai ke mole alu taku Faʼe ki te ʼu fono. ʼI ʼihi temi, ka alu ʼo fono, ʼe ina muliʼi pea ʼe ina taki fakakinau mai ki fale. Kaʼe neʼe hola ʼi te tahi matapa  pea alu ai ki tana fono. Neʼe au ui fenei ki taku Faʼe: “ ʼAua tau tuʼania. He ʼe ka fiu pe anai pea manavā.” ʼAki te temi, neʼe mole kei faigaʼi e taku Tamai ke ina taʼofi taku faʼe. Pea neʼe alu faʼifaʼitaliha ai ki te ʼu fono.

ʼI te taʼu 1943 ʼae neʼe kamata ai te Ako Fakateokalatike, neʼe au kamata fai ai ʼaku kiʼi akonaki ʼi taku kokelekasio. ʼAki te ʼu tokoni ʼae neʼe au maʼu ʼi te ako fakateokalatike neʼe au liliu ai ʼo faiva ʼi te faiakonaki.

ʼI te lolotoga ʼo te Lua Tau Fakamalamanei ʼi te taʼu 1944, neʼe pauʼi au ki te solia. Neʼe au alu ki te fale solia ko Fort Hayes ʼi Columbus, ʼi Ohio, ʼo sivi ai au pe ʼe feala haku kau ki te solia, pea mo fai pepa. Kaʼe neʼe au toe ui age ki te ʼu ofisie ʼe mole au liliu anai ko he tagata solia. Neʼe natou fakagafua ai ke au toe liliu ki toku ʼapi. Kaʼe hili ki ai ni ʼaho, neʼe tuʼu te ofisie ʼi toku ʼapi ʼo ina ui mai, “Corwin Robison, neʼe au haʼu mo te pepa fakamoʼoni ʼe tonu ke au ʼave koe.”

Hili ki ai vahaʼa ʼe lua, neʼe ui fenei e te tuʼi fakamau ʼo te telepinale: “Ka na pau la neʼe fakalogo kia au, ʼe ke nofo ʼi te pilisoni ʼo aʼu ki tou mate. ʼE ʼi ai hau manatu?” Neʼe au tali fenei age ki ai: “Neʼe tonu ke kotou tokagaʼi ko au ko te minisi lotu. Pea ko taku gaue ko te fakamafola ʼo te logo lelei ʼo te Puleʼaga ki te hahaʼi ʼi te ʼu ʼapi.” Neʼe ui fenei e te tuʼi fakamau ki te kau faifakamau: “ ʼE mole fakamaʼua atu ke kotou toʼo te tonu pe ʼe ko he minisi ʼo te lotu peʼe kailoa. Kaʼe ʼe fakamaʼua atu ke kotou toʼo te tonu ʼae pe ʼe tonu ke alu ʼo solia peʼe kailoa.” Heʼeki fakalaka he vaeluaʼi hola, neʼe fakatotonu e te kau faifakamau ko au ʼae neʼe lakahala. Pea neʼe tauteaʼi au e te tuʼi fakamau kia taʼu pilisoni ʼe nima ʼi Ashland, ʼi Kentucky.

ʼI te ʼu ʼuluaki vahaʼa ʼe lua neʼe au nofo ʼi te pilisoni ʼi Columbus, ʼi Ohio, pea ʼi te ʼuluaki ʼaho neʼe au nofo ʼaho katoa ʼi toku koga fale. Neʼe au faikole fenei ai kia Sehova: “ ʼE mole feala ke pilisoniʼi au ʼi he koga fale lolotoga taʼu ʼe nima. ʼE mole au iloʼi pe ʼe kotea ʼae ka au fai.”

ʼI te ʼaho ake, neʼe fakagafua e te ʼu tagata leʼo ke au hu mai muʼa ki tuʼa mai toku koga fale. Pea neʼe au felaveʼi mo te tahi tagata pilisoni ʼe lahi pea mo mamalu, ʼo ma tutuʼu fakatahi ʼi te matapa fakamalama. Neʼe ina fehuʼi mai, “Kotea te tupuʼaga ʼo tau ʼi heni?” Neʼe au tali age, “Ko au ko te Fakamoʼoni ʼa Sehova.” Neʼe ina ui mai, “ ʼIo, kaʼe kotea foki ʼae ʼe ke fai ʼi heni?” Neʼe au ui age, “Ko te kau Fakamoʼoni ʼa Sehova ʼe mole natou kau ki te tau pea ʼe mole natou matematehi te hahaʼi.” Pea neʼe ina ui mai, “Neʼe natou pilisoniʼi koe he ʼe mole ke fia matehi he tahi. Pea ʼe natou pilisoniʼi ʼihi koteʼuhi ʼe natou matematehi te hahaʼi. Kotea koa te taʼi meʼa feia?” Pea neʼe au ui age, “Koia pe ia.”

Hili ia, pea neʼe ina ui mai, “ ʼI taku nofo ʼi te tahi pilisoni lolotoga taʼu ʼe 15, neʼe au lau ʼakotou tohi.” ʼI taku logo ki ʼana palalau ʼaia, neʼe au faikole fenei: “Sehova, ʼofa age la ke tokoni mai te tagata ʼaeni kia au.” ʼI te  temi ʼaia, neʼe ui fenei mai e te tagata pilisoni ʼaia ʼae neʼe higoa ko Paul: “Ka gaohi koviʼi koe e he tahi, pea ke kalaga. Ke au ala atu muʼa kia natou.” Koia, lolotoga taku nofo pilisoni, neʼe mole hoku fihifihia mo te toko 50 pilisoni ʼo te potu ʼae neʼe au nofo ai.

ʼI te temi leva ʼae neʼe ʼave ai au ki te pilisoni ʼo Ashland, neʼe au felaveʼi mo ʼihi tehina kua fotufotuʼa ʼe pilisoniʼi ai. Neʼe natou tokoni mai kia au pea mo ʼihi ke matou nonofo ovi kia Sehova. Neʼe natou tuku mai kia matou te lau ʼo te koga Tohi-Tapu ʼo te vahaʼa, pea mo teuteuʼi te ʼu fehuʼi mo te ʼu tali ki te ʼu fono ʼae neʼe fakatuʼutuʼu e te ʼu tehina. Neʼe matou nonofo ʼi te foʼi koga fale ʼe fakaʼatuʼatu ai ʼomatou palepale ʼo tafa ki te kaupa. Neʼe ʼi ai te tehina neʼe ina vaevae tomatou telituale. Neʼe ina ui fenei mai: “Robison, tokaga la koe kia natou ʼae ʼe momoe ʼi te ʼu palepale ʼae. Faigaʼi ke natou logo ki te logo lelei ʼi muʼa ʼo tonatou fakaʼateaina.” Pea neʼe feia tamatou fakatuʼutuʼu ki te faifakamafola.

Neʼe ʼosi te Lua Tau Fakamalamanei ʼi te taʼu 1945, kaʼe neʼe kei au nofo ʼi te pilisoni ʼi te temi ʼaia. Neʼe au tuʼania ʼo ʼuhiga mo toku famili ʼuhi ko te ui mai ʼae e taku Tamai, “Ka na feala la ke au liakī koe, pea ʼe au toe liakī mo natou ʼae.” Hili toku fakaʼateaina, neʼe au punamaʼuli. Koteʼuhi logo la te fakafeagai ʼo taku Tamai, kaʼe ko te toko fitu ʼo toku famili neʼe natou kau ki te ʼu fono pea ko toku kiʼi tokolua neʼe papitema.

ʼI te temi ʼae neʼe hoko ai te Tau ʼi Kolea ʼi te taʼu 1950, neʼe fakatotonu mai ke au alu ʼo solia, neʼe ko tona tuʼa lua ʼaia. Neʼe ui mai ke au alu ki te fale solia ko Fort Hayes. ʼI te ʼosi ʼahiʼahiʼi ʼoku fealagia, neʼe ui mai e te ofisie, “Neʼe ko koe ʼae neʼe nota lelei ʼi tou kiʼi kutuga.” Pea neʼe au ui age, “ ʼE lelei, kaʼe ʼe mole au alu ʼo solia.” Neʼe au palalau ai ki te vaega ʼo 2 Timoteo 2:3 pea au ui age, “Ko au ko te tagata solia ʼa Kilisito.” Neʼe mole kei gu, pea neʼe ina ui mai, “Alu la.”

Pea mole faʼa fualoa ki ai, neʼe au kau ki te fono ʼo ʼuhiga mo natou ʼae ʼe fia hu ki te Petele ʼi te fakatahi lahi ʼi Cincinnati, ʼi Ohio. Ko te tehina ko Milton Henschel neʼe ina ui mai kia matou, ʼe ʼaoga ki te Petele ni tehina ʼe natou fia gaue kinakina ki te Puleʼaga. Neʼe au fai ai taku kole ke au hu ki te Petele pea neʼe tali. Pea neʼe au kamata gaue ʼi te Petele ʼo Brooklyn ʼi ʼAukusito 1954, pea talu mai ai ʼe kei au nofo aipe.

Neʼe lahi tuʼumaʼu pe taku gaue ʼi te Petele. Lolotoga ni taʼu, neʼe au tokaga ki te ʼu masini ʼi te fale ta tohi pea mo te ʼu pilo, pea neʼe au toe faʼu mo te ʼu loka ʼo te ʼu matapa. Neʼe au toe gaue foki ʼi te ʼu Fale ʼo Te ʼu Fakatahi Lalahi ʼi New York City.

Neʼe au leleiʼia te ʼu fakatuʼutuʼu ʼi te Petele ʼae ko te lau ʼo te koga tohi ʼo te ʼaho, mo te ako ʼo Te Tule Leʼo pea mo te faifakamafola mo taku kokelekasio. Ko te ʼu aluʼaga ʼaia, ʼe tonu ke fakahoko tuʼumaʼu e te kau Fakamoʼoni ʼa Sehova. Ka vakaʼi fakatahi e te ʼu matuʼā mo te fanau te koga tohi ʼo te ʼaho, mo fai tuʼumaʼu te Ako  Fakafamili, mo tali ʼi te ʼu fono pea mo faʼafai ʼi te fakamafola ʼo te logo lelei, ko te famili katoa ʼe natou nonofo ovi anai kia Sehova.

Neʼe lahi ʼoku kaumeʼa ʼi te Petele pea mo te kokelekasio. Ko ʼihi neʼe ko te kau fakanofo pea kua natou hahake ki selo. Pea ko ʼihi neʼe mole ko he kau fakanofo. Kaʼe ko te ʼu kaugana fuli ʼa Sehova ʼe mole natou haohaoa, ʼo kau ai mo te kau Petelite. Kapau neʼe au fihi mo he tehina, ʼe au faiga tuʼumaʼu ke ma tokalelei. ʼE au manatuʼi ia te vaega ʼo Mateo 5:23, 24 pe ʼe feafeaʼi te faʼahiga fakatokatoka ʼo te ʼu fihi. ʼE mole faigafua hakita alu ʼo faifakalelei, kaʼe ʼe tonu ke feia.

ʼI te temi nei kua faigataʼa taku alu ʼo faifakamafola ʼi te ʼu ʼapi ʼuhi pe ko te kua vaivai matuʼa, kaʼe ʼe kei au hoko atu pe. Neʼe au ako ia te faʼahiga lea Fakasiaina ʼae ko te Mandarin pea neʼe au fiafia ʼi te felaveʼi mo te hahaʼi Siaina ʼi te ala. ʼI ʼihi uhu ʼe au tufa te ʼu nusipepa ʼe 30 peʼe 40 kia natou ʼae ʼe lotolelei ki ai.

Neʼe ʼi ai taku ʼaʼahi kaʼe ʼe maʼuli ia ʼi Siaina. ʼI te tahi ʼaho neʼe malimali mai te taʼahine ʼe ina lolotoga tufa te ʼu kiʼi pepa ʼe fakahaha ai te ʼu fuaʼi ʼakau. Neʼe au toe malimali age pea au foaki age Te Tule Leʼo pea mo te Réveillez-vous ! ʼi te lea Fakasiaina. Neʼe ina toʼo te ʼu nusipepa pea neʼe ina tala mai tona higoa ko Katie. Pea talu mai te ʼaho ʼaia, ka sio pe kia au pea haʼu ia Katie ʼo ma faipalalau. Neʼe au akoʼi age te ʼu higoa ʼo te ʼu fuaʼi ʼakau pea mo te ʼu lau ʼakau ʼi te lea Fakapilitania, pea neʼe au toe akoʼi age mo tona faʼahiga puʼaki. Neʼe au toe fakamahino ki ai te ʼu vaega Fakatohi-tapu ʼo ina tali te tohi Te Ako Mai Te Tohi-Tapu. Kaʼe hili ki ai ni vahaʼa, neʼe mole kei au sio ki ai.

Hili ki ai ni mahina, neʼe tali te ʼu nusipepa e te tahi taʼahine ʼe ina lolotoga tufa te ʼu kiʼi pepa ʼe fakahaha ai te ʼu meʼa ke fakatau. ʼI te vahaʼa ʼae neʼe hoa mai ki ai, neʼe ina fakatoʼo mai tana telefoni mo ina ui mai, “Ko te pauʼi mai Siaina.” Pea neʼe au ui age, “ ʼE mole au iloʼi he tahi ʼi Siaina.” Kaʼe neʼe ina fakakinauʼi au ʼo au tali ai ki te telefoni, “Alo, ko au Robison.” Pea neʼe tali mai, “Robby, ko au Katie. Neʼe au toe liliu ki Siaina.” Neʼe au ui ki ai, “Ki Siaina?” Pea tali mai e Katie, “ ʼEi. Robby, ʼe ke iloʼi te taʼahine ʼae neʼe ina fakatoʼo atu te telefoni? Ko toku tehina. Neʼe lahi te ʼu meʼa lelei neʼe au ako mai ia koe. Koia, fakalelei siʼou loto ʼe feala la ke ke toe akoʼi age ki ai te ʼu meʼa ʼae neʼe ke akoʼi mai.” Pea neʼe au tali age, “Katie, ʼe au fai pe anai te meʼa ʼae ʼe au fealagia. Pea ʼe au fakamalō atu ki tau fakaha mai pe ʼe ke nofo ʼifea.” Mole faʼa fualoa ki ai, neʼe au palalau fakaʼosi mo te tehina ʼo Katie. Kaʼe tatau aipe pe ʼe nonofo ʼifea te tau tehina ʼaia, ʼe au fakaʼamu ke hoko atu ia tanā fia iloʼi ia Sehova.

Neʼe au tauhi kia Sehova lolotoga taʼu ʼe 73, pea ʼe au fiafia ʼi tana tokoni mai ke mole au alu ʼo solia pea ke au nofo agatonu ʼi te pilisoni. Pea neʼe toe ui mai foki e ʼoku tehina mo tuagaʼane, neʼe natou lotomalohi ʼi tanatou sisio ʼae ki taku tauʼi tuʼumaʼu te fakafeagai ʼa tamatou tamai. Ki muli age, ko taku faʼe pea mo ʼoku tehina mo tuagaʼane ʼe toko ono neʼe natou papitema. ʼI te alu ʼo te temi, neʼe fetogi te aga ʼo taku tamai, pea neʼe kua kau pe ki ʼihi fono ʼi muʼa ʼo tona mate.

Kapau ko te finegalo ʼo te ʼAtua, ʼe ina fakatuʼuake anai ki te malama foʼou ia natou ʼo toku famili mo ʼoku kaumeʼa ʼae kua mamate. Tou fakakaukauʼi age muʼa te toe fiafia ʼae ka tou maʼu anai mo natou ʼae ʼe tou ʼoʼofa mamahi ai ʼi tatatou tauhi fakatahi ʼae kia Sehova ʼo talu ai. *—Vakaʼi te kiʼi nota.