KE KE manatuʼi te ʼaho ʼae neʼe lahi ʼaupito ai tou fiafia. Neʼe ko te ʼaho koa ʼae neʼe ke ʼohoana ai peʼe ko te ʼaho ʼae neʼe tupu ai tau ʼuluaki tamasiʼi? Peʼe ko te ʼaho koa ʼae neʼe ke papitema ai? ʼE mahino ia, neʼe ko te ʼaho maʼuhiga pea mo fakafiafia ki tou maʼuli. Pea ʼi te ʼaho ʼaia, neʼe lagi fiafia ʼou tehina mo tuagaʼane ʼi tau fakaha tou ʼofa ʼae ki te ʼAtua ʼaki tou loto katoa, mo tou maʼuli katoa, mo tou ʼatamai katoa pea mo tou malohi katoa.—Maleko 12:30.

Talu mai te ʼaho ʼae neʼe ke papitema ai, ʼe ke logoʼi he toe fiafia lahi ʼi tau tauhi ʼae kia Sehova. Kaʼe, tokolahi te kau faifakamafola ʼe mole kei natou maʼu te fiafia ʼae neʼe natou maʼu ʼi muʼa atu. Kotea koa ʼae neʼe hoko? Pea kotea he ʼu tupuʼaga ke hoko atu ai tatatou tauhi kia Sehova ʼi te fiafia?

ʼE tou maʼu te fiafia ʼi te logo ʼo te Puleʼaga. Kotea tona tupuʼaga? Koteʼuhi ʼe fakapapauʼi mai e Sehova kua ina vave pulihi pe te malama agakovi ʼaeni pea mo ina fakatuʼu te malama foʼou. ʼE ui fenei mai ia Sofoni 1:14: “Kua ovi te aho lahi o [Sehova], kua ovi mai ia ia, pea e hau fakavilivili.” Kaʼe kapau ʼe tou manatu ʼe kei loaloaga atu tatatou fakaatalitali ki te ʼaho ʼaia, ʼe feala ke puli ai totatou fiafia. Pea ʼe toe feala ai foki ke mole kei tou faʼafai ʼi tatatou tauhi ʼae ki te ʼAtua.—Taaga Lea 13:12.

Ka tou fakatahi mo ʼotatou tehina mo tuagaʼane, ʼe tou lotomalohi ai ʼo hoko atu tatatou tauhi kia Sehova ʼi te fiafia. Neʼe lagi ko tatatou tokagaʼi te aga ʼa te hahaʼi ʼa Sehova ʼae neʼe tupu ai tatatou ʼomai ki te moʼoni pea mo uga ai tatou ke tou tauhi ki te ʼAtua ʼi te fiafia. (1 Petelo 2:12) Kaʼe, kotea ʼae ʼe feala ke hoko moka fakatonutonuʼi ai he tehina peʼe ko he tuagaʼane neʼe mole fakalogo ki te ʼu fakatotonu ʼa te ʼAtua? ʼE feala ke tou lotovaivai ai pea puli ai totatou fiafia.

Ko te manumanū koloa ʼe feala pe ke toe puli ai totatou fiafia. ʼO feafeaʼi? Ko te malama ʼa Satana ʼe faiga ke tou manatu ʼe lahi te ʼu meʼa ʼe tonu ke tou totogi kaʼe ʼe mole ʼaoga kia tatou. Koia, tou manatuʼi te ʼu palalau ʼaeni ʼa Sesu: “E mole feala ki he tahi ke tauhi ki ni pule e toko lua. Koteuhi, e fehia anai ia ia ki te tahi, kae e ofa anai ia ia ki te tahi; pe e pipiki anai ia ia ki te tahi, kae e ina siaki anai te tahi. E mole feala ke kotou tauhi ki te Atua mo Mamone [peʼe ko te ʼu koloa].” (Mateo 6:24) Koia ʼe mole feala ke tou tauhi fakafiafia kia Sehova pea mo tou toe faiga ke tou maʼu koloa ʼi te malama ʼaeni.

Ko te tauhi ʼae kia Sehova, ʼe mole ko he kavega kia natou ʼae ʼe ʼoʼofa kia te ia. (1 Soane 5:3) Ke ke manatuʼi te ʼu palalau ʼaeni ʼa Sesu: “Kotou omai kia au, koutou fuli ae e vaivai mo mafasia, pea e au foaki atu anai kia koutou he malolo. Kotou too kia koutou taku amo taki, pea kotou tali aku akonaki, koteuhi e au agamalu mo agavaivai; pea e kotou mau anai te malolo ki okotou laumalie. Koteuhi e malu taku amo taki, pea e maamaa taku kavega.” (Mateo 11:28-30) Ko he meʼa fakalotofimalie hatatou liliu ko he Kilisitiano moʼoni pea ʼe tou fiafia ai. Pea ʼe mahino papau ia, ʼe  lahi te ʼu tupuʼaga ke tou fiafia ai ʼi tatatou tauhi ʼae kia Sehova. Koia tou vakaʼi ia tupuʼaga ʼe tolu.—Hapakuke 3:18.

ʼE tou tauhi ki totatou Tupuʼaga, te ʼAtua fiafia. (Gaue 17:28; 1 Timoteo 1:11) ʼE tou iloʼi kapau ʼe tou maʼuʼuli he neʼe ina fakatupu tatou. Koia tatau aipe pe ʼe kua fualoa hatatou papitema, kaʼe tou haga tauhi kia te ia ʼi te fiafia.

Tou vakaʼi te faʼifaʼitaki ʼa Héctor, neʼe ko he taupau feʼaluʼaki lolotoga taʼu ʼe 40. ʼE fia tauhi tuʼumaʼu pe kia Sehova, logo la tona kua “matua.” (Pesalemo 92:13-15) ʼUhi ko te mahaki ʼo tona ʼohoana, neʼe mole kei tatau tana fakahoko ʼana gaue fakalaumalie, kaʼe neʼe mole puli ai tona fiafia. ʼE ina ui fenei: “ ʼE moʼoni ʼe au lotomamahi koteʼuhi ʼe fakahaʼuhaʼu pe te kovi ʼo te mahaki ʼo toku ʼohoana pea mo te faigataʼa ʼo taku tokaga ki ai, kaʼe neʼe mole au tuku te aluʼaga ʼaia ke ina kaihaʼa ia toku fiafia ʼi te tauhi ki te ʼAtua moʼoni. ʼE au iloʼi ko Sehova ʼae neʼe ina foaki mai toku maʼuli, pea neʼe ina fakatupu te tagata he neʼe ʼi ai tana fakatuʼutuʼu kia ia. Ko te tupuʼaga la ʼaia ʼo taku ʼofa mamahi pea mo taku tauhi fakamalotoloto kia te ia. ʼE au faigaʼi ke au maʼumaʼua ʼi te gaue faifakamafola mo au manatuʼi tuʼumaʼu te ʼamanaki ki te Puleʼaga pea ke au taupau maʼu toku fiafia.”

ʼAki te sakilifisio ʼae neʼe foaki mai e Sehova, ʼe feala ai hatatou maʼuʼuli fiafia. ʼEi, “nee ofa lahi osi te Atua ki te malamanei nee ina foaki ai tona Alo ulutokotahi, o tupu ko he tahi pe e tui kia ia ke aua naa mate ia, kae ke ina mau te mauli heegata.” (Soane 3:16) Kapau ʼe tou tui ki te sakilifisio, ia te meʼa ʼofa ʼo te ʼAtua, ʼe feala ai ke fakamolemole ʼatatou agahala pea mo tou maʼu te maʼuli heʼe gata. Koia ʼe maʼua ai ke tou lotofakafetaʼi. Pea ko tatatou lotofakafetaʼi ki te sakilifisio ʼaia, ʼe ina uga anai tatou ke tou tauhi kia Sehova mo he lotofiafia.

Ko te tehina ʼe higoa ko Jesús ʼae neʼe maʼuli ʼi Mexique, neʼe ina ui fenei: “Neʼe au popula ki taku gaue pea ʼi ʼihi temi, neʼe au gaue hoholo ia hola ʼe 40 kaʼe neʼe mole fakamaʼua mai. Neʼe au fia gaue pe au ke lahi taku foʼi falā. Ki muli age, neʼe au ako pe ʼe ko ai ia Sehova pea mo tana foaki ia tona ʼAlo ʼofaina ki te malamanei. Pea neʼe au fia tauhi ai kia te ia. Koia neʼe au foaki leva toku maʼuli kia Sehova, ʼo au fakatotonu ke au mavae ʼi te sosiete ʼae neʼe au gaue ai lolotoga taʼu ʼe 28. Neʼe au liliu ai ʼo pionie katoa.” Lolotoga ni taʼu ʼo kaku mai ki te temi ʼaeni, ʼe au tauhi fakafiafia ki te ʼAtua. Koia neʼe feia te kamata tauhi ʼa Jesús kia Sehova ʼaki he lotofiafia.

Kua tou maʼa ʼi te ʼu aga ʼae ʼe tonu ke tou fai, pea ʼe tou maʼuʼuli fiafia ai. ʼE kei ke manatuʼi koa pe neʼe feafeaʼi tou maʼuli ʼi muʼa atu ʼo tau iloʼi ia Sehova? Neʼe fakamanatuʼi age e te apositolo ko Paulo ki te kau Kilisitiano ʼo Loma ia tanatou “popula ki te agahala,” kaʼe kua natou liliu ʼo “popula ki te faitotonu.” Pea  kua feala ke natou ʼamanaki ki te maʼuli heʼe gata koteʼuhi kua fakamaʼa tonatou maʼuli. (Loma 6:17-22) ʼE tou toe mulimuli foki ki te ʼu lekula ʼa Sehova. Koia kua tou hao ai mai te lotomamahi ʼae ʼe tupu mai he aga heʼe ʼaoga peʼe mai te agamalohi. ʼE mole ko ni aluʼaga fakafiafia koa la ʼaia?

Tou vakaʼi te faʼifaʼitaki ʼa Jaime. Neʼe ko te tagata fuhu pea neʼe mole tui ki te ʼAtua kaʼe ki te manatu ʼae ʼe haʼu te tagata mai te manu. ʼI te kamata kau ʼa Jaime ki te ʼu fono, neʼe malave kia ia te ʼofa ʼae neʼe sio ki ai. Kaʼe ke feala hana liakī tona maʼuli ʼafeā, neʼe tonu ke ina kole kia Sehova ke tokoni age ke ina maʼu te tui. ʼE ui fenei e Jaime: “ ʼAki te temi, neʼe au iloʼi ʼe ʼi ai te ʼAtua ʼofa mo manavaʼofa ʼe maʼuli moʼoni pea ko tatatou Tamai. Pea ko taku mulimuli ki te ʼu lekula faitotonu ʼa Sehova, neʼe ko hoku puipui. Ka na pau la neʼe mole au fetogi toku maʼuli, neʼe lagi kua au mate ohage pe ko ʼihi ʼi ʼoku kaumeʼa fuhu ʼo te temi muʼa. Ko toku fiafia ʼe tupu mai taku tauhi ʼae kia Sehova.”

Kotea te faʼahiga manatu ʼe tonu ke ke maʼu lolotoga tau fakaatalitali ki te fakaʼosi ʼo te malama agakovi ʼaeni? Ke ke manatuʼi, ʼe ke fai te finegalo ʼo te ʼAtua pea ʼe ke fakaʼamu ki te maʼuli heʼe gata. Koia ‘ ʼaua naʼa ke fiu ʼi te fai ʼo te meʼa ʼae ʼe lelei, koteʼuhi ʼe ke utu anai ʼi tona temi totonu, mo kapau ʼe mole ke piko.’ (Kalate 6:8, 9) ʼAki te tokoni ʼa Sehova, kataki ʼo faiga ke ke maʼu te ʼu kalitate ʼae ʼe ʼaoga ke ke hao ai mai “te mamahi lahi,” pea mo ke hoko atu tau tauhi kia Sehova mo he lotofiafia.—Apokalipisi 7:9, 13, 14; Sakopo 1:2-4.

ʼE feala ke tou tui papau ʼe fakapale anai e Sehova tatatou faʼa kataki koteʼuhi ʼe mole puli kia te ia ʼatatou faiga mo totatou ʼofa ʼae kia te ia pea mo tona huafa. Kapau ʼe tou haga tauhi kia te ia ʼi te fiafia, pea ʼe tou maʼu anai te manatu ʼaeni ʼa te tagata faipesalemo: “E au mau tuumau [ia Sehova] i oku mua. Ka nofo ia ia i toku fahai matau, e mole au higa. Koia e fiafia ai toku loto, pea e nekenekea ai toku laumalie, pea e malolo ai toku sino i te fimalie.”—Pesalemo 16:8, 9.