1. Kotea ʼihi lao ʼe tou maʼu ʼi te Tohi-Tapu? Pea kapau ʼe tou fakalogo ki te ʼu lao ʼaia, he koʼe ʼe fua lelei kia tatou?

 ʼI TE Tohi-Tapu, neʼe foaki mai e Sehova ia he ʼu lao. ʼE fakaha lelei mai ʼi te ʼu lao ʼaia pe ʼe kotea ʼae ʼe ina loto ke tou fai. Ohage la, ʼe ina fakaha mai ʼe mole tonu ke tou tauhi ki te ʼu taula ʼatuā, mo kaihaʼa, mo inu kava fakavale, peʼe ko te fai he ʼu aga heʼe ʼaoga. (1 Kolinito 6:9, 10) Pea ko Sesu, te ʼAlo ʼo Sehova, neʼe ina fai te fakatotonu ʼaeni ki ʼana tisipulo: “Kotou fai ni tisipulo i te u puleaga fuli, pea kotou papitemai natou i te huafa o te Tamai, mo te Alo pea mo te Laumalie Maonioni, pea kotou ako natou ki te taupau o te u mea fuli nee au fakatotonu atu kia koutou. Pea koeni, e au fakatahi mo koutou i te aho fuli, o kaku ki te fakaosi o te malamanei.” (Mateo 28:19, 20) Ko te ʼu meʼa fuli ʼe kole mai e Sehova mo Sesu ke tou fai, ʼe fua lelei anai kia tatou. ʼE akoʼi tatou e te ʼu lao ʼa Sehova pe ʼe feafeaʼi hatatou tokakaga kia tatou mo ʼotatou famili. Pea ʼe tokoni mai ke tou maʼu he malolō fakasino ʼe lelei pea ke tou fiafia. Kaʼe, ko te faʼahi ʼae ʼe maʼuhiga, kapau ʼe  tou fakalogo ki te ʼu fakatotonu ʼa Sehova, ʼo kau ki ai te faifakamafola, ʼe fiafia anai tona loto pea ʼe ina tapuakinaʼi anai tatou.

2, 3. (1) He koʼe ʼe mole tou maʼu ʼi te Tohi-Tapu he ʼu lekula ʼo ʼuhiga mo te ʼu aluʼaga fuli ʼo ʼotatou maʼuli? (2) Kotea te ʼu fehuʼi ka tou vakaʼi anai ʼi te alatike ʼaeni? (Vakaʼi te ʼuluaki pāki.)

² Kaʼe, ʼe mole foaki mai ʼi te Tohi-Tapu he ʼu lao ʼo ʼuhiga mo te ʼu aluʼaga fuli ʼo te maʼuli. Ohage la, ʼe mole tou maʼu he lao ʼo ʼuhiga mo tatatou faʼahiga teuteu. ʼE ha ʼaki mai ai te lahi ʼo te poto ʼo Sehova. Tatau aipe pe ʼe fetogi tuʼumaʼu e te hahaʼi ʼo te malama ʼaeni tanatou faʼahiga teuteu pea mo tui he ʼu faʼahiga teu kehekehe, kaʼe ko te Tohi-Tapu ʼe moʼoni tuʼumaʼu pe ia. Pea tahi, ʼe mole maʼu ʼi te Tohi-Tapu he ʼu lao ʼo ʼuhiga mo te ʼu gaue ʼe tonu ke tou kumi, peʼe ko te ʼu fakafiafia ʼae ʼe tonu ke tou filifili peʼe kotea ʼe tonu ke tou fai ke mole tou mahahaki. ʼE tuku e Sehova ki te hahaʼi fuli pea mo te ʼu pule famili ke natou toʼo ʼanatou tonu ʼo ʼuhiga mo te ʼu aluʼaga ʼaia.

³ Koia, kapau ʼe ke toʼo he tonu maʼuhiga ʼi tou maʼuli pea ʼe mole ke maʼu he lao ʼi te Tohi-Tapu ʼe talanoa ki te faʼahi ʼaia, fai kia koe te ʼu fehuʼi ʼaeni: ʼE maʼuhiga koa kia Sehova ia te tonu ʼae ʼe au toʼo? ʼE au fakafiafiaʼi anai koa tona loto moka au toʼo pe he tonu, logo la ʼe mole au maumauʼi he lao ʼi te Tohi-Tapu? ʼE au iloʼi feafeaʼi ʼe fiafia anai tona loto ʼi te ʼu tonu ʼe au toʼo?

4, 5. ʼE malave feafeaʼi kia tatou pea mo ʼihi te ʼu tonu ʼae ʼe tou toʼo?

⁴ Ko ʼihi ʼe natou manatu ʼe feala ke natou fai te meʼa ʼae ʼe natou loto ki ai. Kaʼe, ko tatou ʼe tou fia fakafiafiaʼi te loto ʼo Sehova. Koia, ʼi muʼa ʼo hatatou toʼo he tonu, ʼe tonu muʼa ke tou fakakaukauʼi pe ʼe kotea ʼae ʼe ui ʼi te Tohi-Tapu pea tou fakalogo ki ai. Ohage la, ʼe fakaha mai ʼi te Tohi-Tapu pe ʼe kotea te manatu ʼa te ʼAtua ʼo ʼuhiga mo te fakaʼaogaʼi ʼo te toto. Koia, ʼe tou fakalogo anai ki te faʼahi ʼae ʼe ui mai ʼi te Tohi-Tapu. (Senesi 9:4; Gaue 15:28, 29) ʼE feala ke tou kole tokoni kia Sehova ke tou toʼo he ʼu tonu ʼe fiafia ai tona loto.

⁵ ʼE malave kia tatou te ʼu tonu ʼae ʼe tou toʼo. Ka tou toʼo he tonu ʼe lelei, ʼe tou fakaovi ai kia Sehova. Kaʼe, ka tou toʼo he tonu ʼe kovi, ʼe feala ke fakatupu kovi ki ʼatatou felogoʼi mo Sehova. Pea tahi, ʼe feala ke toe malave te ʼu tonu ʼae ʼe tou toʼo ki niʼihi. ʼE mole tou fia fai anai he meʼa, ʼe feala ai ke mamahi ai ʼotatou tehina mo tuagaʼane peʼe ke vaivai ai tanatou tui. Pea ʼe mole tou fia fakatupu he ʼu fihifihia ʼi ʼotatou tehina mo tuagaʼane ʼo te kokelekasio. Koia, ʼe maʼuhiga ai ke tou toʼo he ʼu tonu ʼe lelei.—Lau ia Loma 14:19; Kalate 6:7.

6. Kotea ʼae ʼe tonu ke tou fai ke tou toʼo ai he ʼu tonu ʼe lelei?

⁶ Ka mole ui fakahagatonu mai ʼi te Tohi-Tapu te meʼa ʼae ʼe tonu ke tou fai, ʼe feafeaʼi hatatou toʼo he ʼu tonu ʼe lelei? ʼE tonu ke tou fakakaukauʼi lelei totatou aluʼaga pea mo toʼo he tonu ʼe fiafia ai te loto ʼo Sehova, ʼi hatatou fai pe te meʼa ʼae ʼe tou leleiʼia. Pea ʼe mahino papau ia, ʼe tokoni mai anai Sehova ke tou maʼu he ʼu fua lelei.—Lau ia Pesalemo 37:5.

7. Ka mole ʼi ai he lao ʼi te Tohi-Tapu, ʼe feafeaʼi hatatou iloʼi te meʼa ʼae ʼe loto anai e Sehova ke tou fai?

⁷ Kaʼe, ʼe feafeaʼi hatatou iloʼi te meʼa ʼae  ʼe fiafia ai anai te loto ʼo Sehova? ʼE ui fenei ia Efeso 5:17: “Ke koutou mahino ki te finegalo o [Sehova].” Koia, ka mole ʼi ai he lao ʼi te Tohi-Tapu, ʼe tonu ke tou mahino ki te meʼa ʼae ʼe loto e Sehova ke tou fai ʼi he aluʼaga ʼe tou tau mo ia. ʼO feafeaʼi? ʼE tonu ke tou faikole kia te ia pea mo tuku ke takitaki tatou e tona laumalie maʼoniʼoni.

8. Neʼe mahino feafeaʼi ia Sesu ki te meʼa ʼae neʼe loto e Sehova ke ina fai? Tuku mai he faʼifaʼitaki.

⁸ Neʼe mahino tuʼumaʼu ia Sesu ki te meʼa ʼae neʼe loto e Sehova ke ina fai. Ohage la, ʼi te fia kakai ʼa he hahaʼi kaugā malie, neʼe faikole ia Sesu pea neʼe tuʼa lua tana fafaga fakamilakulo natou. (Mateo 14:17-20; 15:34-37) Kaʼe, ʼi tana fia kai ʼi te toafa pea mo te ui age e Satana ke ina fakaliliu te ʼu foʼi maka ko he pane, neʼe fakafisi ki ai. (Lau ia Mateo 4:2-4.) Neʼe ina iloʼi lelei tana Tamai. Neʼe mahino kia ia ʼe mole loto e Sehova ke ina fakaʼaogaʼi te laumalie maʼoniʼoni ki te ʼu meʼa ʼae ʼe ʼaoga kia ia totonu. Neʼe falala ʼe takitaki anai ia ia e tana Tamai pea ʼe ina foaki age anai te meʼa kai ʼae ʼe ʼaoga ki ai.

9, 10. Kotea ʼae ʼe tokoni mai anai ke tou toʼo he ʼu tonu fakapotopoto? Tuku mai he faʼifaʼitaki.

⁹ Ohage ko Sesu, ʼe feala ke tou toʼo he ʼu tonu ʼe lelei mo kapau ʼe tou falala ki te takitaki ʼa Sehova. ʼE ui fenei ʼi te Tohi-Tapu: “Falala [kia Sehova] i tou loto katoa, kae aua naa ke falala ki tou poto, ke ke falala kia ia i ou ala fuli, pea e ina fakatokatoka anai ou ala. Aua naa ke poto i ou mata totonu, [“manavasiʼi kia Sehova,” MN] pea ke tafoki mai te kovi.” (Taaga Lea 3:5-7) Kapau ʼe tou ako te Tohi-Tapu pea mo te ʼu faʼahiga manatu ʼa Sehova, ʼe tou mahino anai ki te meʼa ʼae ʼe ina loto ke tou fai moka tou tau mo he aluʼaga. Pea ka lahi age tatatou ako ʼo ʼuhiga mo te ʼu manatu ʼa Sehova, ʼe faigafua anai hatatou toʼo he ʼu tonu ʼe fiafia ai tona loto. ʼI tatatou fai te faʼahi ʼaia, ʼe tou ‘tokagaʼi anai te takitaki ʼa te ʼAtua.’—Esekiele 11:19.

¹⁰ Fakakaukauʼi age muʼa, ko he fafine ʼohoana ʼe alu ʼo faifakatau tokotahi. ʼE sio ki he ʼu sulie matalelei. Kaʼe ko te ʼu sulie ʼaia, ʼe totogi kovi. ʼE ina iloʼi te manatu ʼo tona ʼohoana mo kapau ʼe ina fakaʼaogaʼi tanā foʼi falā moʼo totogi te ʼu sulie ʼaia. He koʼe ʼe ina iloʼi te faʼahi ʼaia? He ʼe kua fualoa tanā ʼohoana pea ʼe ina iloʼi te loto ʼo tona ʼohoana ʼo ʼuhiga mo te fakaʼaogaʼi ʼo tanā foʼi falā. ʼO toe feia pe, ka tou ako ʼo ʼuhiga mo te ʼu manatu ʼa Sehova mo te ʼu gaue neʼe ina fai ki muʼa atu, ʼe tou iloʼi anai te meʼa ʼae ʼe ina loto ke tou fai ia aluʼaga kehekehe.

11. Ka ke lau peʼe ke ako te Tohi-Tapu, kotea te ʼu fehuʼi ʼe feala ke ke fai? (Vakaʼi te fakamatala ʼae ʼi te ʼa takai “Ka Ke Ako Te Tohi-Tapu, Fai Te ʼu Fehuʼi ʼAeni.”)

¹¹ ʼE feafeaʼi hau iloʼi te manatu ʼa Sehova? ʼAki tau lau mo ako tuʼumaʼu te Tohi-Tapu he ʼe ko he faʼahi ʼe maʼuhiga. ʼI tau fai te faʼahi ʼaia, ʼe feala ke ke fai te ʼu  fehuʼi ʼaeni: ‘Kotea ʼae ʼe au ako ʼo ʼuhiga mo Sehova? He koʼe neʼe ina fai te faʼahi ʼaia?’ Pea ohage ko Tavite, ʼe tonu ke ke kole kia Sehova ke tokoni atu ke ke iloʼi lelei age ia ia. Neʼe tohi fenei e Tavite: “[Sehova], ke ke fakaha mai kia au ou ala, ke ke ako mai kia au ou ala veliveli. Ke ke taki au i tou mooni, pea ke ke akoi au; koteuhi ko te Atua ia koe o toku fakamauli, ko taku amanaki lelei ia koe o heegata.” (Pesalemo 25:4, 5) Ka ke ako he meʼa ʼo ʼuhiga mo Sehova, fakakaukauʼi pe ʼe feafeaʼi hau maʼuliʼi ʼi he aluʼaga ʼe tau mo koe. Ko te ʼu faʼahi ʼae neʼe ke ako, ʼe feala koa ke ke fakaʼaogaʼi ʼi tou famili, mo te fale gaue, mo te fale ako peʼe ko te faifakamafola? Ka ke tau mo he aluʼaga, ʼe faigafua anai hau iloʼi te meʼa ʼae ʼe loto anai e Sehova ke ke fai.

12. ʼE tokoni feafeaʼi mai ʼatatou tohi mo ʼatatou fono ke tou iloʼi lelei age te manatu ʼa Sehova?

¹² ʼE ʼi ai te tahi faʼahi ke tou iloʼi ai te manatu ʼa Sehova, ʼe ko te fakaʼaogaʼi ʼo te ʼu moʼoni ʼae ʼe akoʼi mai ʼi tana kautahi ʼaki te Tohi-Tapu. Ohage la, ka tou toʼo he tonu, ʼe feala ke tou iloʼi te manatu ʼa Sehova ʼi te ʼu tohi Index des publications des Témoins de Jéhovah pea mo te Kumiʼaga Tohi maʼa te kau Fakamoʼoni ʼa Sehova. ʼE  feala ke toe tokoni mai ʼatatou fono Fakakilisitiano mo kapau ʼe tou fakalogo lelei, mo fai he ʼu tali pea mo metitasio ki te ʼu moʼoni ʼae ʼe akoʼi mai. ʼI tatatou fai te faʼahi ʼaia, ʼe tou maʼu anai te faʼahiga manatu ʼa Sehova. Pea ʼe tou lava toʼo anai he tonu ʼe fiafia ai tona loto pea ʼe ina tapuakinaʼi anai.

13. Tuku mai he faʼifaʼitaki pe ʼe tokoni feafeaʼi mai tatatou vakaʼi te manatu ʼa Sehova ke tou toʼo he ʼu tonu ʼe fakapotopoto.

¹³ Tou vakaʼi he faʼifaʼitaki pe ʼe feafeaʼi hatatou toʼo he tonu fakapotopoto moka tou vakaʼi te manatu ʼa Sehova. Ohage la, ʼe lagi ke fia pionie. Pea ʼe ke fai he ʼu fetogi ʼi tou maʼuli ke feala hau fakaʼaogaʼi lahi tou temi ki te faifakamafola. Kaʼe, ʼe heʼeki ke iloʼi papau pe ʼe ke fiafia moʼoni anai mo kapau ʼe ke fakafaigafua tou maʼuli. ʼE mahino ia, ʼe mole ui ʼi te Tohi-Tapu, ʼe tonu ke tou pionie ke tou tauhi ai kia Sehova. ʼE feala ke ke tauhi agatonu kia te ia tatau aipe pe ʼe mole ke pionie. Kaʼe, neʼe ui e Sesu ʼe tapuakinaʼi e Sehova ia natou ʼae ʼe natou fai he ʼu sakilifisio ki te Puleʼaga. (Lau ia Luka 18:29, 30.) ʼE toe ui ʼi te Tohi-Tapu ko Sehova ʼe fiafia moka tou fai ia meʼa fuli ʼe tou lavaʼi mo fakavikiviki kia te ia. Pea ʼe ina loto ke tou tauhi kia te ia ʼaki te fiafia. (Pesalemo 119:108; 2 Kolinito 9:7) Ka tou faikole mo metitasio ki te ʼu aluʼaga ʼaia, ʼe tou toʼo anai he tonu ʼe alu tahi mo te aluʼaga ʼe tou tau mo ia pea ʼe tapuakinaʼi anai e Sehova.

14. ʼE feala ke tou mahino feafeaʼi ki te manatu ʼa Sehova ʼo ʼuhiga mo he faʼahiga teu?

¹⁴ Koʼeni te tahi faʼifaʼitaki: ʼE ke leleiʼia ia he faʼahiga teu. Kaʼe, ʼe ke iloʼi kapau ʼe ke tui te ʼu mutuʼi meʼa ʼaia, ʼe feala ke fakatupu tukia ki te ʼu tehina mo tuagaʼane. ʼE mole ui ʼi te Tohi-Tapu te faʼahiga teu ʼae ʼe tonu ke tou tui. Koia, ʼe feafeaʼi hau iloʼi te manatu ʼa Sehova? ʼE ui fenei ʼi te Tohi-Tapu: “Ke teu te u fafine ki ni kofu e tuha mo natou, mo mata fakaapaapa pea mo mata fiamalalo, kae aua naa natou teuteu aki ni kaui fi, mo ni aulo, mo ni fuai kahoa, pea mo ni teu totogi kovi, kae ke natou teu aki ni gaue lelei, o hage ko he u fafine e natou fakaha e natou tauhi ki te Atua.” (1 Timoteo 2:9, 10) ʼE mahino ia, ko te tokoni ʼaia ʼe fai maʼa te ʼu kaugana fuli ʼa Sehova, maʼia mo te hahaʼi tagata. Kapau ʼe tou agavaivai, ʼe tou fakakaukauʼi anai pe ʼe kotea ʼe feala ke logoʼi e ʼihi moka tou filifili ke tou tui he ʼu mutuʼi meʼa. Pea ʼe mole tou fia fakamamahiʼi peʼe fakatupu tukia ʼotatou tehina mo tuagaʼane koteʼuhi ʼe tou ʼoʼofa ia natou. (1 Kolinito 10:23, 24; Filipe 3:17) Kapau ʼe tou fakakaukauʼi pe ʼe kotea ʼae ʼe ui ʼi te Tohi-Tapu mo te manatu ʼa Sehova, ʼe feala ke tou toʼo he ʼu tonu ʼe fakafiafiaʼi ai anai tona loto.

15, 16. (1) Kotea te manatu ʼa Sehova moka tou haga fakakaukauʼi he ʼu aga heʼe ʼaoga? (2) Ka tou filifili he fakafiafia, ʼe feafeaʼi hatatou iloʼi te meʼa ʼae ʼe leleiʼia e Sehova? (3) ʼE feafeaʼi hatatou toʼo he ʼu tonu maʼuhiga?

¹⁵ ʼE tou ako ʼi te Tohi-Tapu, ʼe lotomamahi ia Sehova moka fai e te hahaʼi he ʼu aga mo he ʼu fakakaukau ʼe kovi. (Lau ia Senesi 6:5, 6.) ʼE mahino ia, ʼe mole loto e Sehova ke tou fakakaukauʼi ʼe tou lolotoga fai he aga heʼe ʼaoga. ʼI tona fakahagatonu, kapau ʼe tou haga fakakaukauʼi te ʼu aga ʼaia, ʼe feala ke tou fakahoko moʼoni. Kaʼe, ʼe loto e Sehova ke tou manatu  ki te ʼu meʼa ʼae ʼe maʼa mo lelei. Neʼe ui e te tisipulo ko Sakopo ko te poto ʼo Sehova, “ ʼuluaki ʼe maʼa ia, pea ʼe tokalelei, ʼe fakapotopoto, pea ʼe fia fakalogo, fonu ia ʼi te manavaʼofa pea mo te ’u fua lelei, ʼo mole fakapalatahi ia, pea ʼe mole malualoi.” (Sakopo 3:17, MN) Koia ʼe akoʼi tatou ʼi te Tohi-Tapu, ʼe tonu ke tou tekeʼi te ʼu fakafiafia ʼae ʼe feala ke ina fakatupu ia tatou te holi ki he ʼu meʼa ʼe mole maʼa pea mo kovi. Pea kapau ʼe tou mahino lelei ki te ʼu meʼa ʼae ʼe leleiʼia mo fehiʼa ki ai ia Sehova, ʼe faigafua anai hatatou iloʼi pe ʼe kotea te ʼu tohi, peʼe ko te ʼu ʼata, peʼe ko te ʼu gaoʼi viteo ʼae ʼe tonu ke tou filifili. Koia, ʼe mole ʼaoga anai ke tou kole ki ʼihi te meʼa ʼae ʼe tonu ke tou fai.

¹⁶ Ka tou toʼo he tonu, ʼe lahi te ʼu tonu ʼe feala ke tou filifili moʼo fakafiafiaʼi te loto ʼo Sehova. Kaʼe, kapau ʼe ʼaoga ke tou toʼo he tonu maʼuhiga, ʼe lagi lelei anai ke tou kole tokoni ki he tagata ʼafeā, peʼe ko he tehina peʼe ko he tuagaʼane kua fakapotopoto. (Tito 2:3-5; Sakopo 5:13-15) ʼE mahino ia, ʼe mole tonu ke tou kole ki he tahi ke ina toʼo he tonu maʼa tatou. Kaʼe, ʼe tonu ke tou fakakaukauʼi lelei pe ʼe kotea kua tou iloʼi ʼi te Tohi-Tapu pea hoki tou toʼo leva he tonu. (Hepeleo 5:14) Neʼe ui fenei e te apositolo ko Paulo: “E tahi amo anai e te tagata tana kavega totonu.”—Kalate 6:5.

17. Ka tou toʼo he ʼu tonu pea mo kumi muʼa te manatu ʼa Sehova, kotea te ʼu lelei ʼe tou maʼu?

¹⁷ Ka tou toʼo he ʼu tonu ʼe fiafia ai te loto ʼo Sehova, ʼe tou fakaovi ai kia te ia pea mo maʼu tona ʼofa mo tana tapuakina. (Sakopo 4:8) Pea ʼe malohi anai tatatou tui kia Sehova. Koia, tou metitasio ki te ʼu manatu ʼae ʼe tou lau ʼi te Tohi-Tapu ke feala ai hatatou mahino ki tana manatu. ʼE mahino ia, ʼe hoko atu pe anai tatatou ako ʼo ʼuhiga mo Sehova. (Sopo 26:14) Kaʼe, kapau ʼe tou faiga ke tou iloʼi lelei age ia ia, ʼe tou liliu anai ʼo fakapotopoto pea mo lava toʼo he ʼu tonu ʼe lelei. (Taaga Lea 2:1-5) ʼE fetogi te ʼu manatu mo te ʼu fakatuʼutuʼu ʼa te tagata, kaʼe ʼe mole fetogi ia Sehova ʼi he temi. Neʼe ui fenei e te tagata faipesalemo: “E tuu te fakatuutuu a [Sehova] o heegata, pea mo te u holi o tona loto i te taitupu mo te taitupu.” (Pesalemo 33:11) ʼE mahino ia, ʼe lelei te ʼu tonu ʼae ʼe tou toʼo moka tou mahino ki te manatu ʼa Sehova pea mo fai te meʼa ʼae ʼe fiafia ai tona loto.