1-3. (1) Kotea te ʼu fetogi ʼe feala ke faigataʼa kia tatou hili totatou papitema? (2) Ka faigataʼa hatatou fai he ʼu fetogi, ko te ʼu fehuʼi fea ʼae ʼe feala ke tou fai? (Vakaʼi te ʼuluaki pāki.)

 LOLOTOGA ni taʼu, ko Kevin neʼe gaoʼi paʼaga, neʼe suluka, neʼe inu kava pea neʼe ina fakaʼaogaʼi te toloke. ^[1] (Vakaʼi te nota ʼi te fakaʼosi ʼo te alatike.) Pea neʼe ina ako leva pe ʼe ko ai ia Sehova ʼo fia liliu ai ko hona kaumeʼa. Kaʼe neʼe tonu muʼa foki ke ina fai he ʼu fetogi ʼi tona maʼuli. Neʼe ina lavaʼi te ʼu fetogi ʼaia ʼaki te tokoni ʼa Sehova pea mo te malohi ʼo Tana Folafola, ia te Tohi-Tapu.—Hepeleo 4:12.

² Hili te papitema ʼo Kevin, neʼe kei tonu pe ke ina fai he ʼu fetogi ʼi tona ʼuluagaaga ke feala hana hikihiki ʼona kalitate. (Efeso 4:31, 32) Ohage la, neʼe hoko ita. Pea neʼe punamaʼuli, koteʼuhi neʼe faigataʼa kia ia tana ako te lolomi ʼo tana aga itaʼia. Neʼe ui e Kevin, ʼi tona fakahagatonu, neʼe faigataʼa ʼaupito age tana lolomi tana aga itaʼia ʼi tana tuku te ʼu aga kovi mahani ʼae  neʼe ina fai ʼi muʼa ʼo tona papitema. Kaʼe ʼi tana kole mamahi ia te tokoni ʼa Sehova pea mo tana ako fakamalotoloto ia te Tohi-Tapu, neʼe feala ai ke ina fai he ʼu fetogi.

³ ʼI muʼa ʼo totatou papitema, tokolahi ia tatou neʼe tonu ke tou fai he ʼu toe fetogi ke tou fakaalu tahi totatou maʼuli mo te ʼu fakatotonu ʼae ʼe tuʼu ʼi te Tohi-Tapu. Kaʼe maʼia pe la ʼi te temi nei, ʼe tou tokagaʼi ʼe ʼi ai te ʼu kiʼi fetogi ʼe ʼaoga ke tou fai ke tou faʼifaʼitakiʼi lelei ai ia te ʼAtua pea mo Kilisito. (Efeso 5:1, 2; 1 Petelo 2:21) Ohage la, ʼe lagi tou tokagaʼi ʼe tou munamuna fau peʼe tou gutu fatufatu pea mo tou fai ni palalau ʼe mole lelei ʼo ʼuhiga mo ʼihi. Peʼe ʼi ʼihi temi, ʼe lagi tou tuʼania te manatu ʼa ʼihi pe naʼa natou ui ʼe mole lelei te meʼa ʼae ʼe tou fai. Peʼe kua fualoa tatatou faigaʼi ke tou fetogi, kaʼe ʼe kei hoko atu pe ʼotatou vaivaiʼaga. Koia ʼe lagi tou feʼekeʼaki fenei: ‘He koʼe koa ʼe faigataʼa kia au te ʼu kiʼi fetogi ʼaia? Kotea ʼe tonu ke au fai ke au maʼuliʼi te ʼu pelesepeto Fakatohi-tapu, ke lelei age toku ʼuluagaaga?’

4. He koʼe ʼe mole feala ke tou fakafiafiaʼi ia Sehova ʼi te ʼu aluʼaga fuli?

⁴ ʼE tou ʼoʼofa ia Sehova pea ʼe tou fia fakafiafiaʼi fakamalotoloto ia ia. Kaʼe meʼa fakaʼofaʼofa foki, ʼe mole feala hatatou fakafiafiaʼi ia ia ʼi te temi fuli ʼuhi ko totatou ʼuhiga agahala. Koia ʼae ʼe tou tau maʼu ai te manatu ʼaeni ʼa te apositolo ko Paulo: “I toku kakano: e kau mau te finegalo, kae kailoa te mafai o te lelei.”—Loma 7:18; Sakopo 3:2.

5. Kotea te ʼu fetogi neʼe tou fai ʼi muʼa ʼo totatou papitema? Kaʼe kotea te ʼu vaivaiʼaga ʼae ʼe lagi kei tou tauʼi?

⁵ ʼI muʼa ʼo tatatou kau ki te kokelekasio, neʼe tou fakagata ʼatatou agamahani ʼae ʼe fehiʼa ki ai ia Sehova. (1 Kolinito 6:9, 10) Kaʼe ʼe kei tou agahala pe. (Kolose 3:9, 10) Koia, tatau aipe pe ʼe kua tou papitema talu mai ni taʼu, kaʼe ʼe kei hoko atu ʼatatou lakahala. ʼI ʼihi temi, ʼe feala ke tou maʼu ni holi mo ni manatu ʼe kovi, peʼe faigataʼa hatatou lolomi ia hotatou vaivaiʼaga. Pea ʼe lagi ko he vaivaiʼaga ʼe tou tauʼi talu mai fualoa.

6, 7. (1) Kotea ʼae ʼe ina fakafealagia ke tou liliu ko he ʼu kaumeʼa ʼo Sehova logo la totatou ʼuhiga agahala? (2) He koʼe ʼe tonu ke tou faikole tuʼumaʼu kia Sehova ke fakamolemole mai?

⁶ Logo la ʼe tou agahala, kaʼe ʼe feala ke tou liliu ko he kaumeʼa ʼo Sehova pea mo tou tauhi kia te ia. Ke ke manatuʼi tuʼumaʼu te temi ʼae neʼe ke liliu ai ko he kaumeʼa ʼo Sehova. Neʼe ina tokagaʼi te meʼa ʼae ʼe lelei ʼi tou loto pea neʼe ina loto ke ke iloʼi ia ia. (Soane 6:44) Neʼe ina toe iloʼi ʼau lakahala, mo ʼou vaivaiʼaga. Pea neʼe mahino ia ʼe ke toe fakahoko pe anai ʼihi atu lakahala. Kaʼe logo la te ʼu faʼahi ʼaia, neʼe loto aipe e Sehova ke ke liliu ko hona kaumeʼa.

⁷ ʼI te lahi ʼae ʼo te ʼofa ʼo Sehova kia tatou, neʼe ina foaki mai ai he meʼa ʼofa maʼuhiga. Neʼe ina fekauʼi mai ki te kele ia tona ʼAlo ke feala ai hana foaki tona maʼuli ko he sakilifisio ki ʼatatou agahala. (Soane 3:16) Koia ka tou agahala, ʼe feala hatatou kole kia Sehova ke fakamolemole mai. Pea ʼaki te sakilifisio, ʼe feala ke tou tui papau ʼe ina fakamolemole mai anai kia tatou mo tou haga nonofo aipe ko ʼona kaumeʼa. (Loma 7:24, 25; 1 Soane 2:1, 2) Ke ke manatuʼi, neʼe mate ia Sesu ki te kau agahala ʼae ʼe fakahemala. Koia tatau aipe pe ʼe tou manatu ʼe mamafa te agahala ʼae neʼe tou fai, kaʼe ʼe tonu ke tou faikole tuʼumaʼu kia Sehova ke fakamolemole mai.  Kapau ʼe mole tou kole ia tana fakamolemole, ʼe hage pe ia ʼe tou fakafisi ke tou fufulu ʼotatou nima moka ʼuli. Pea ʼe ko he toe lotofakafetaʼi ʼe tou logoʼi ʼi te fakafealagia ʼae e Sehova ke tou liliu ko ʼona kaumeʼa, logo la totatou ʼuhiga agahala.—Lau ia 1 Timoteo 1:15.

8. He koʼe ʼe tonu ke mole tou meʼa noaʼi ʼotatou vaivaiʼaga?

⁸ ʼE moʼoni, ʼe mole feala hatatou meʼa noaʼi ʼotatou vaivaiʼaga peʼe ke tou maʼu takuʼaki ki ai. Koteʼuhi neʼe fakaha mai e Sehova pe ʼe ko te faʼahiga hahaʼi feafeaʼi ʼae ʼe ina loto ke liliu ko ʼona kaumeʼa. (Pesalemo 15:1-5) Koia kapau ʼe tou fia fakaovi kia te ia, ʼe tonu ke tou faigaʼi tuʼumaʼu ke tou faʼifaʼitakiʼi ia ia mo tona ʼAlo. ʼE tonu foki ke tou toe faigaʼi ke tou lolomi ʼotatou holi ʼae ʼe kovi, pea ʼe lagi feala pe hatatou liaki. Tatau aipe pe ʼe kua fualoa hatatou papitema, kaʼe ʼe tonu ke tou faigaʼi ke lelei age totatou ʼuluagaaga.—2 Kolinito 13:11.

9. ʼE tou iloʼi feafeaʼi ʼe feala hatatou kofuʼi tuʼumaʼu te ʼuluagaaga foʼou?

⁹ Neʼe fakatotonu fenei e te apositolo ko Paulo ki te kau Kilisitiano: “Ke kotou liaki tokotou ʼuluagaaga ʼafeā ʼae ʼe alu tahi mo takotou aga ʼafeā pea ʼe fakahehema ʼo fai pe ki tona ʼu holi kakā. Kaʼe ʼe tonu ke kotou haga fakafoʼou ia koutou ʼi te malohi ʼae ʼe ina uga tokotou ʼatamai pea mo kotou kofuʼi te ʼuluagaaga foʼou ʼae neʼe fakatupu ʼo mulimuli ki te finegalo ʼo te ʼAtua ʼi he faitotonu pea mo he agatonu moʼoni.” (Efeso 4:22-24, MN) Ko tona fakaʼuhiga, ʼe tonu ke tou haga fai he ʼu faiga ke tou fetogi pea ke tou “kofuʼi te ʼuluagaaga foʼou.” Koia tatau aipe pe ʼe kua fualoa tatatou tauhi kia Sehova, kaʼe ʼe feala hatatou ako tuʼumaʼu ʼona kalitate. Pea ʼe tokoni mai anai te Tohi-Tapu ke tou fai he ʼu fetogi ʼi totatou ʼuluagaaga ke toe lelei age tatatou faʼifaʼitakiʼi ia ia.

10. Kotea ʼe tonu ke tou fai ke hoko atu ʼatatou fetogi ʼaki te tokoni ʼa te Tohi-Tapu? Pea ko te ʼu fehuʼi fea ʼae ʼe feala ke tou fai?

¹⁰ ʼE tou fia mulimuli fuli ki te ʼu fakatotonu ʼae ʼe tuʼu ʼi te Tohi-Tapu. Kaʼe ʼe tonu ke tou faiga malohi mo kapau ʼe tou loto ke tou haga fai he ʼu fetogi. He koʼe ʼe tonu ke tou faiga? ʼE mole feala pe koa kia Sehova ke ina fakafaigafua ia tatatou fai te meʼa ʼae ʼe lelei?

11-13. He koʼe ʼe loto e Sehova ke tou faigaʼi totonu pe te tauʼi ʼo ʼotatou vaivaiʼaga?

¹¹ Ka tou fakakaukauʼi ia te ʼatulaulau mo ʼona ogaoga fuli, ʼe tou mahino ai, ʼe mafimafi ia Sehova pea ʼe feala ke ina fai ia meʼa fuli. Ohage la, neʼe ina fakatupu te laʼa. Pea ʼi te sekonita fuli pe, ʼe ko he toe matapuna ia ʼo te malama mo te mafana. Kaʼe ʼe ko te kiʼi koga veliveli pe ʼo te malohi ʼo te laʼa ʼe ʼaoga ki te maʼuli ʼi te kele. (Pesalemo 74:16; Esaia 40:26) ʼE toe foaki e Sehova ia te malohi ki ʼana kaugana ʼi te temi ʼae ʼe ʼaoga ai kia natou. (Esaia 40:29) ʼO ha lelei ai, mo ka na pau la neʼe loto ki ai ia Sehova, neʼe feala pe ke ina fakafaigafua tatatou tauʼi ʼotatou vaivaiʼaga pea  ke mole tou toe maʼu he ʼu holi ʼe kovi. Kaʼe he koʼe koa ʼe mole ina fakahoko te faʼahi ʼaia?

¹² Neʼe foaki mai e Sehova ia te loto faʼitaliha. Pea ʼe ina fakagafua mai ke tou filifili pe ʼe tou fakalogo anai kia te ia peʼe kailoa. Koia, moka tou filifili ke tou fakalogo kia te ia mo tou faiga malohi ʼo fai tona finegalo, ʼe tou fakaha ai ʼe tou ʼoʼofa kia te ia pea ʼe tou fia fakafiafiaʼi. Ko Satana ʼe ina ui ʼe mole matatonu mo Sehova ke ina maʼu te pule faʼitaliha. Kaʼe ʼe tou fakaha ʼaki tatatou fakalogo kia Sehova, ʼe tou loto ke liliu ko totatou Pule. Pea ʼe feala ke tou tui papau, ʼe maʼuhiga ki tatatou Tamai ʼofa tatatou faiga ʼae ke tou fakalogo age kia te ia. (Sopo 2:3-5; Taaga Lea 27:11) Koia, moka tou gaue kinakina ʼo tou lolomi ʼotatou vaivaiʼaga logo la tona faigataʼa, ʼe tou agatonu ai kia Sehova pea ʼe tou fakaha ai ʼe tou loto ke liliu ko totatou Pule.

¹³ ʼE ui mai e Sehova, ʼe tonu ke tou gaue kinakina ke tou faʼifaʼitakiʼi ʼona kalitate. (Kolose 3:12; lau ia 2 Petelo 1:5-7.) Pea ʼe toe fakaʼamu ke tou faigaʼi ʼo lolomi ʼatatou manatu mo te ʼu meʼa ʼae ʼi ʼotatou loto. (Loma 8:5; 12:9) Pea ʼi te temi fuli pe ʼae ʼe fua lelei ai ʼatatou faiga ke tou fai he ʼu fetogi, ʼe lahi ai totatou fiafia.

14, 15. Kotea ʼae ʼe feala ke tou fai ke tou maʼu te ʼu kalitate ʼae ʼe leleiʼia e te ʼAtua? (Vakaʼi te fakamatala ʼae ʼi te ʼa takai “ Neʼe Fetogi Tonatou Maʼuli ʼAki Te Tohi-Tapu Mo Te Faikole.”)

¹⁴ Kotea ʼae ʼe tonu ke tou fai ke tou gaueʼi ai te ʼu kalitate ʼae ʼe leleiʼia e Sehova? ʼE mole tonu pe ke tou filifili pe ʼe kotea ʼae ʼe maʼua ke tou fetogi, kaʼe ʼe toe  ʼaoga foki ke tou tuku ke takitaki tatou e te ʼAtua. ʼE ui fenei ia Loma 12:2, MN: “Kotou fakagata takotou muliʼi te tuʼu ʼo te ’u faʼahiga meʼa ʼaeni, kaʼe ke kotou fetogi ia koutou ʼo fakafoʼou tokotou ʼatamai, ke kotou iloʼi papau pe ʼe kotea te finegalo ʼo te ʼAtua, tona lelei, tona tali lelei, pea mo tona haohaoa.” Koia ke tou iloʼi pe ʼe kotea ʼae ʼe loto ki ai ia Sehova, ʼe tonu ke tou falala ki tana tokoni. ʼE maʼua ke tou lau te Tohi-Tapu ʼi te ʼaho fuli, ke tou metitasio ki ai pea ke tou kole kia Sehova ke ina foaki mai tona laumalie maʼoniʼoni. (Luka 11:13; Kalate 5:22, 23) Kapau ʼe tou fai feia, ʼe tokoni mai anai ia Sehova ke tou mahino pe ʼe kotea ʼae ʼe ina leleiʼia, pea ʼe feala ai ke tou ako ke tou maʼu tana faʼahiga manatu. Koia, ʼe toe lahi age ai anai te leleiʼia e Sehova tatatou faʼahiga manatu, tatatou faʼahiga palalau, pea mo ʼatatou gaue. Pea ʼe tou ako ai anai pe ʼe feafeaʼi hatatou puleʼi ʼotatou vaivaiʼaga. Kaʼe maʼia pe la tatatou fai te ʼu faʼahi ʼaia, ʼe toe ʼaoga pe anai ke tou haga tauʼi ʼotatou vaivaiʼaga.—Taaga Lea 4:23.

¹⁵ ʼE mole gata pe ki tona lau ʼi te ʼaho fuli, kaʼe ʼe toe ʼaoga ke tou ako te Tohi-Tapu ʼaki Te Tule Leʼo pea mo te Réveillez-vous ! ʼE lahi te ʼu alatike ʼi te ʼu nusipepa ʼaia, ʼe akoʼi ai tatou ke tou faʼifaʼitakiʼi te ʼu kalitate ʼo Sehova pea ke tou tauʼi ʼotatou vaivaiʼaga. Pea ʼe feala ke tou maʼu ʼihi alatike peʼe ko he ʼu vaega ʼe ʼaoga tafitō kia tatou. ʼE lelei hatatou tanaki te ʼu vaega mo te ʼu alatike ʼaia, ke feala ʼi ʼihi temi ke tou toe lau.

16. He koʼe ʼe mole tonu ke tou lotovaivai mo kapau ʼe mole feala ke tou foimo fai he ʼu fetogi?

 ¹⁶ ʼE ʼaoga he temi ki tatatou ako ʼae ke tou faʼifaʼitakiʼi te ʼu kalitate ʼo Sehova. Koia, kapau ʼe ke manatu neʼe mole ke fai he ʼu fetogi ohage pe ko tau loto ki ai, ʼe tonu ke ke faʼa kataki. ʼI te kamata, ʼe lagi ʼaoga ke ke faiga malohi ʼo maʼuliʼi te ʼu pelesepeto Fakatohi-tapu. Pea kapau ʼe alu tahi tau faʼahiga manatu mo tau faʼahiga aga mo te ʼu pelesepeto ʼa Sehova, ʼe faigafua anai tau maʼu tana manatu mo tau fai te meʼa ʼae ʼe lelei.—Pesalemo 37:31; Taaga Lea 23:12; Kalate 5:16, 17.

17. Kapau ʼe tou nonofo agatonu kia Sehova, kotea totatou ka haʼu fakafiafia ʼae ʼe tou fakaʼamu ki ai?

¹⁷ ʼE tou fakaʼamu ke hoko mai la te temi ʼae ka tou haohaoa ai pea mo tou tauhi kia Sehova ʼo talu ai. ʼI te temi ʼaia, ʼe mole kei ʼi ai anai hotatou vaivaiʼaga ke tou tauʼi, pea ʼe faigafua anai tatatou faʼifaʼitakiʼi ia Sehova. Kaʼe ʼe feala ʼi te temi nei ke tou tauhi kia Sehova ʼuhi ko te sakilifisio, ia te meʼa ʼofa ʼae neʼe ina foaki mai. Logo la totatou ʼuhiga agahala, kaʼe ʼe feala ke tou fakafiafiaʼi ia ia mo kapau ʼe tou haga faiga malohi ʼo fai he ʼu fetogi pea mo tou mulimuli ki tana akoʼi tatou ʼaki te Tohi-Tapu.

18, 19. He koʼe ʼe tou tui papau ʼe feala ke tou haga fai he ʼu fetogi ʼi totatou maʼuli ʼaki te Tohi-Tapu?

¹⁸ Ko Kevin, neʼe ina fai he ʼu faiga ke ina lolomi tana aga itaʼia. Neʼe metitasio ki te ʼu manatu ʼae ʼe ina lau ʼi te Tohi-Tapu pea neʼe ina faigaʼi ke ina fai he ʼu fetogi ʼi tona maʼuli. Pea neʼe mulimuli ki te ʼu tokoni ʼae neʼe fai age e ʼona tehina mo tuagaʼane. Logo la neʼe ʼaoga kia Kevin ni taʼu ke feala ai hana fetogi tona ʼuluagaaga, kaʼe ʼaki te temi, neʼe feala ke liliu ko he faifekau fakaminisitelio. Pea ʼi te ʼu taʼu ʼe 20 ki muli mai, neʼe ko he tagata ʼafeā. Kaʼe maʼia pe la ʼi te temi nei, ʼe ina iloʼi ʼe kei tonu aipe ke ina tauʼi ʼona vaivaiʼaga.

¹⁹ Ohage pe ko Kevin, ʼe feala ke tou fai tuʼumaʼu he ʼu fetogi ke lelei age totatou ʼuluagaaga. Kapau ʼe tou fai feia, ʼe tou haga fakaovi pe anai kia Sehova. (Pesalemo 25:14) Pea moka tou faiga ʼo fai he ʼu fetogi ke leleiʼia tatou e Sehova, ʼe tokoni mai anai kia tatou. ʼE feala ke tou tui papau ʼe tou fai tuʼumaʼu pe anai he ʼu fetogi ʼi totatou maʼuli ʼaki te tokoni ʼa te Tohi-Tapu.—Pesalemo 34:9.