1, 2. (1) Kotea te manatu ʼa te kau Fakamoʼoni ʼa Sehova ʼo ʼuhiga mo te Tohi-Tapu? (2) Kotea te koga Tohi-Tapu ʼae ʼe ke leleiʼia tafitō?

 ʼI TOTATOU ʼuhiga Fakamoʼoni ʼa Sehova, ʼe tou leleiʼia te Tohi-Tapu. Koteʼuhi ʼe tou maʼu ai he fakalotofimalie, mo he ʼamanaki pea mo he ako ʼe tuha mo te falala. (Loma 15:4) ʼE mole ko he tohi ʼe maʼu ai te ʼu manatu fakatagata, kaʼe ʼe ko “te folafola . . . a te Atua.”—1 Tesalonika 2:13.

² ʼE mahino ia, ʼe ʼi ai he ʼu koga Tohi-Tapu ʼe tou leleiʼia tafitō. Ko ʼihi ʼe natou leleiʼia te ʼu Evaselio, koteʼuhi ʼe natou iloʼi ai te ʼuluagaaga fakaofoofo ʼo Sehova ʼaki ia Sesu. (Soane 14:9) Ko ʼihi ʼe natou leleiʼia ia te ʼu tohi fakapolofeta ohage ko te tohi ʼo Apokalipisi ʼae ʼe fakaha ai “te u mea ae e tonu ke hoko vave” mai. (Apokalipisi 1:1) Ko ʼihi ʼe natou maʼu he lotofimalie moka natou lau te ʼu Pesalemo, pea ko ʼihi leva, ʼe natou leleiʼia tanatou lau te ʼu tokoni ʼaoga ʼo te tohi ʼo Taaga Lea. Koia ʼo ha mai ai, ko te Tohi-Tapu ʼe feala ke lau e te hahaʼi fuli.

3, 4. (1) Kotea ʼae ʼe tou logoʼi ʼo ʼuhiga mo ʼatatou tohi? (2) Ko te ʼu tohi fea ʼae neʼe ta tafitō ki he faʼahiga hahaʼi?

³ ʼE tou leleiʼia ia te Tohi-Tapu, koia ʼae ʼe tou toe leleiʼia mo ʼatatou tohi ʼae ʼe fakatafito ki te Folafola ʼa Te ʼAtua. Ko te ʼu  tohi, mo te ʼu kaupepa, mo te ʼu nusipepa pea mo ʼihi atu tohi ʼae neʼe tou maʼu, ʼe haʼu fuli mai ia Sehova. Pea ʼe tokoniʼi ai tatou ke tou nonofo ovi kia te ia pea ke tou taupau ke malohi tatatou tui.—Tito 2:2.

⁴ ʼI te agamahani, neʼe ta ʼatatou tohi ki te kau Fakamoʼoni ʼa Sehova. Kaʼe, ko ʼihi tohi neʼe ta tafitō ki te kau tupulaga peʼe ki te ʼu matuʼā. ʼE lahi te ʼu alatike mo te ʼu kiʼi ʼata ʼi tatatou tuʼasila ʼi te Neti, neʼe teuteuʼi tafitō ki te hahaʼi ʼae ʼe mole ko he kau Fakamoʼoni ʼa Sehova. ʼE ha ʼi te lahi ʼo te meʼa kai fakalaumalie ʼaia, ko Sehova ʼe ina fakahoko ʼana fakapapau, pea “kua [ina] teuteui . . . ki te u hahai fuli, . . . he kaitahi o ni meakai lelei.”—Esaia 25:6.

5. Kotea ʼae ʼe feala ke tou tui papau ki ai?

⁵ Tokolahi ia tatou ʼe tou fakaʼamu ke lahi age totatou temi ke tou lau ai te Tohi-Tapu mo ʼatatou tohi. ʼE lagi mole tou fakaʼaogaʼi tatau te temi ʼi tatatou ako te ʼu tohi kehekehe ʼae ʼe tou maʼu. Pea ʼe tou tui papau ʼe fiafia ia Sehova moka tou fakaʼaogaʼi fakapotopoto totatou temi ke tou lau mo ako ia te Tohi-Tapu pea mo ʼatatou tohi. (Efeso 5:15, 16) Kaʼe, ʼe ʼi ai te aluʼaga ʼe tonu ke tou tokakaga ki ai. Tou vakaʼi te aluʼaga ʼaia.

6. Kotea ʼe feala ke ina taʼofi tatou ke mole tou maʼu te ʼu lelei ʼo te ʼu fakatuʼutuʼu fuli mai ia Sehova?

⁶ Ko te aluʼaga ʼae ʼe tonu ke tou tokakaga ki ai, ko tatatou lagi manatu ʼae, ko ʼihi koga Tohi-Tapu peʼe ko ʼihi tohi ʼe mole ʼaoga kia tatou. Ohage la, ʼe feafeaʼi mo kapau ʼe ʼi ai he koga Tohi-Tapu ʼe mole ʼaoga ki totatou aluʼaga? Peʼe ko he tohi neʼe ta ki he tahi faʼahiga hahaʼi? ʼE tou lau fakavilivili pe koa anai te tohi ʼaia peʼe tou lituʼa pe anai koa ki ai? Kapau ko ia, pea ʼe mole tou maʼu anai te ʼu fua lelei ʼo te tohi ʼaia. Kotea ʼe tonu ke tou fai ke mole hoko te aluʼaga ʼaia? ʼE tonu ke tou manatuʼi ko te ʼu ako fuli ʼe tou maʼu ʼi te ʼu tohi, ʼe haʼu mai ia Sehova. ʼE tou lau fenei ʼi te Tohi-Tapu: “Ko au, [Sehova], tou Atua, e au ako ia koe ke ke manuia.” (Esaia 48:17) ʼI te alatike ʼaeni ʼe tou talanoa anai ki te ʼu tokoni ʼaoga ʼe tolu, ʼe feala ai ke tou maʼu te ʼu lelei mai te ʼu fakatuʼutuʼu fakalaumalie fuli mai ia Sehova.

7. He koʼe ʼe tonu ke tou avahi totatou ʼatamai moka tou lau te Tohi-Tapu?

⁷ Tou avahi totatou ʼatamai moka tou lau te Tohi-Tapu. ʼE moʼoni, ko ʼihi koga Tohi-Tapu neʼe fakahagahaga ki he faʼahiga hahaʼi. Kaʼe, ʼe ui lelei ʼi te Tohi-Tapu, “e hau te Tohi tapu katoa mai te tuku manava a te Atua, pea e aoga.” (2 Timoteo 3:16) Koia ʼae ʼe tonu ai ke tou avahi totatou ʼatamai moka tou lau te Tohi-Tapu. Ohage la, ko te tehina ʼe ina faigaʼi ke ina manatuʼi, ʼe feala ke ina taʼofi he ʼu ako kehekehe mai te fakamatala pe ʼe tahi. Pea ʼe tokoni ai kia ia ke mahino ki te ʼu ako ʼae neʼe mole ina tokagaʼi ʼi te kamata. Koia, ʼi muʼa ʼo tatatou lau te Tohi-Tapu, ʼe tonu ke tou faikole kia Sehova ʼo tou avahi totatou ʼatamai. Pea ke tou maʼu te poto ke tou mahino ki te ʼu ako ʼae ʼe ina fia akoʼi mai.—Esetalasi 7:10; lau ia Sakopo 1:5.

8, 9. (1) Ka tou lau te Tohi-Tapu, kotea te ʼu fehuʼi ʼe feala ke tou fai? (2) Kotea ʼe tou ako ʼo ʼuhiga mo Sehova ʼi te ʼu fakamaʼua fakalaumalie ʼae ʼe tonu ke mulimuli ki ai te kau tagata ʼafeā?

⁸ Tou fai he ʼu fehuʼi. Ka tou lau te Tohi-Tapu, tou ʼai muʼa he kiʼi tuʼu pea mo tou fai te ʼu fehuʼi ʼaeni: ‘Kotea ʼe au ako ʼo ʼuhiga mo Sehova? ʼE feafeaʼi haku maʼuliʼi te ʼu ako ʼaeni? ʼE feafeaʼi haku fakaʼaogaʼi te ʼu ako ʼaeni ke au tokoni ki ʼihi?’ Kapau ʼe tou metitasio ki te ʼu fehuʼi ʼaeni, ʼe fua lelei  anai kia tatou te lau ʼo te Tohi-Tapu. Tou vakaʼi muʼa he faʼifaʼitaki. ʼE fakaha ʼi te Tohi-Tapu ʼihi fakamaʼua ke mulimuli ki ai te kau tagata ʼafeā. (Lau ia 1 Timoteo 3:2-7.) ʼE mole tou tagata ʼafeā fuli, koia ʼae ʼe lagi tou manatu ai ʼe mole feala ke tou maʼu he ʼu tokoni ʼaki te ʼu vaega ʼaia. Kaʼe, tou fakaʼaogaʼi te ʼu fehuʼi ʼe tolu ʼae ʼe tou talanoa ki ai ʼi te palakalafe pe ʼaeni. Pea tou vakaʼi ʼaki te ʼu fehuʼi ʼaia pe ʼe lava tokoni feafeaʼi mai te ʼu fakamaʼua ʼae ʼe fakaha ʼi te Tohi-Tapu.

⁹ “Kotea ʼe au ako ʼo ʼuhiga mo Sehova?” Neʼe foaki mai e Sehova ia he lisi ʼe tuʼu ai te ʼu fakamaʼua ki te kau tagata ʼafeā. ʼE ina fakaha ʼana lekula ki te ʼu tagata ʼae ʼe tokakaga ki te kokelekasio. Pea ʼe ha ai, ʼe maʼuhiga te kokelekasio kia Sehova. ʼE ui ʼi te Tohi-Tapu, neʼe ina totogi te kokelekasio ‘ ʼaki te taʼataʼa ʼo tona ʼAlo totonu.’ (Gaue 20:28) Koia ʼe fakaʼamu ai e Sehova ke tuku e te kau tagata ʼafeā ia he faʼifaʼitaki lelei. Pea ʼe natou huʼi maʼua anai ki te ʼAtua ʼo mulimuli ki tanatou faʼahiga tokakaga ʼae ki te kokelekasio. ʼE ina loto ke tou maʼu he lotofimalie ʼi tanatou tokakaga ʼae kia tatou. (Esaia 32:1, 2) Ka tou lau te ʼu fakamaʼua fakalaumalie ʼaia, ʼe tou iloʼi ai ʼe tokaga moʼoni ia Sehova kia tatou.

10, 11. (1) Ka tou lau te ʼu fakamaʼua ʼae maʼa te kau tagata ʼafeā, ʼe feafeaʼi hatatou maʼuliʼi te ʼu ako ʼe tou maʼu mai ai? (2) ʼE feafeaʼi hatatou fakaʼaogaʼi te ʼu ako ʼaeni ke tou tokoni ki ʼihi?

¹⁰ “ ʼE feafeaʼi haku maʼuliʼi te ʼu ako  ʼaeni?” Kapau kua ke tagata ʼafeā, ʼe tonu ke ke vakaʼi tuʼumaʼu te ʼu fakamaʼua fakalaumalie pea mo ke faiga ke toe lelei age tau mulimuli ki ai. Kapau ʼe ke “fakaʼamu . . . ki he gaue fakataupau,” ʼe tonu ke ke faiga malohi ʼo mulimuli ki te ʼu fakamaʼua fakalaumalie ʼaia. (1 Timoteo 3:1, MN) Kaʼe ʼe feala ki te kau Kilisitiano fuli ke natou taʼofi he ʼu ako mai te ʼu fakamaʼua fakalaumalie ʼaia. Ohage la, ʼe loto e Sehova ke tou maʼu e tatou takitokotahi ia te agafakapotopoto mo te fakasiosio tonu. (Filipe 4:5; 1 Petelo 4:7) Pea moka liliu te kau tagata ʼafeā ko he ʼu “faifaitakiaga ki te faga ovi,” ʼe feala ai ke tou maʼu he ʼu ako mai ia natou, mo tou ‘faʼifaʼitakiʼi tanatou tui.’—1 Petelo 5:3; Hepeleo 13:7.

¹¹ “ ʼE feafeaʼi haku fakaʼaogaʼi te ʼu ako ʼaeni ke au tokoni ki ʼihi?” ʼE feala ke tou fakaʼaogaʼi te ʼu fakamaʼua fakalaumalie ki te kau tagata ʼafeā, moʼo tokoni ki te kau ako Tohi-Tapu pea mo natou ʼae ʼe natou tali leleiʼi te moʼoni. Koteʼuhi ʼe feala ai ke natou mahino ki te kehekehe ʼa te kau tagata ʼafeā mai te kau takitaki lotu. ʼE toe feala ʼaki te ʼu fakamaʼua fakalaumalie ʼaia ke tou manatuʼi te gaue kinakina ʼa te kau tagata ʼafeā ʼi tonatou kokelekasio. Pea ʼe toe tokoni mai kia tatou ke tou fakaʼapaʼapa ki te ʼu tehina ʼaia. (1 Tesalonika 5:12) Koia ka lahi tatatou fakaʼapaʼapa kia natou, pea ʼe toe lahi age anai mo tonatou fiafia ʼi te ʼu gaue ʼae ʼe natou fakahoko.—Hepeleo 13:17.

12, 13. (1) ʼAki te ʼu meʼa gaue ʼae kua tou maʼu, kotea te ʼu fekumi ʼe feala ke tou fai? (2) Kotou tuku mai he faʼifaʼitaki ʼe ha ai te maʼuhiga ʼo te fai ʼo he ʼu fekumi moka tou ako te Tohi-Tapu.

¹² Tou fai he ʼu fekumi. Ka tou ako ia te Tohi-Tapu, tou faiga ke tou tali ki te ʼu fehuʼi ʼaeni:

•   Ko ai ʼae neʼe ina tohi te koga Tohi-Tapu ʼaeni?

•   Ko ʼanafea pea ʼi te koga meʼa fea ʼae neʼe tohi ai?

•   Ko te ʼu aluʼaga maʼuhiga fea ʼae neʼe hoko ʼi te temi ʼae neʼe tohi ai te tohi ʼaeni?

 ʼE feala ʼaki te ʼu tali ʼae ka tou maʼu ke tou mahino ki te ʼu ako ʼae neʼe mole tou tokagaʼi ʼi tatatou kamata lau te Tohi-Tapu.

¹³ Ohage la, ʼe ui fenei ia Esekiele 14:13, 14: “Kapau kua agahala mai kia au he fenua, o tauhi ki te u taulaatua, pea kapau nee au faoi toku nima kia ia, pea kapau nee au fasii te akau o te pane kia ia, pea kapau nee au fekaui te hoge kia ia, pea kapau nee au tuusi ia ia te u tagata mo te u manu, kae e mau anai i lotomalie o te fenua aia te u tagata aeni e toko tolu, ko Noe, mo Taniela, mo Sopo, e natou haofaki anai onatou laumalie ki tanatou faitotonu, e ui e te Aliki [ko Sehova].” Kapau ʼe tou fai he ʼu fekumi, ʼe tou ako ai neʼe tohi e Esekiele te ʼu palalau ʼaia ia teitei taʼu ʼe 612 ʼi muʼa ʼo te temi ʼo Kilisito. Neʼe kua mamate ia Noe mo Sopo kua hili ki ai te ʼu taʼu ʼe lauʼi teau, kaʼe neʼe kei manatuʼi pe e Sehova ia tanā nonofo agatonu. Kaʼe neʼe kei maʼuli pe ia Taniela. Neʼe lagi taʼu 20 ia Taniela ʼi te temi ʼae neʼe ui ai e Sehova, neʼe faitotonu ia ia ohage pe ko Noe pea mo Sopo. Kotea te ako ʼe tou taʼofi mai ai? Kia mata ʼo Sehova,  ʼe maʼuhiga ʼana kaugana agatonu fuli maʼia pe la mo te kau tupulaga.—Pesalemo 148:12-14.

14. ʼE tokoni feafeaʼi ki te kau tupulaga ia te ʼu tohi ʼae neʼe ta maʼa natou? Kotea te ʼu fua lelei ʼe feala ke toe maʼu e ʼihi ʼaki te ʼu tohi ʼaia? (Vakaʼi te ʼuluaki pāki.)

¹⁴ Te ʼu tohi ʼae ki te kau tupulaga. Neʼe tou ako ʼe feala ke fua lelei kia tatou te ʼu koga Tohi-Tapu fuli. ʼO toe feia pe, ʼe feala ke tou maʼu he ʼu lelei mai ʼatatou tohi fuli. Tou vakaʼi he ʼu faʼifaʼitaki. ʼI te ʼu taʼu pe ʼaeni kua hili, neʼe lahi te ʼu tohi neʼe fakatuʼutuʼu e Sehova ki te kau tupulaga. ^[1] (Vakaʼi te nota ʼi te fakaʼosi ʼo te alatike.) ʼAki te ʼu tohi ʼaia, ʼe maʼu ai e te kau tupulaga ni tokoni ke natou tauʼi tonatou fakaneke ʼae ʼi te fale ako pea mo te ʼu fihifihia fakatupulaga. Kaʼe kotea te ʼu fua lelei ʼe tou maʼu moka tou lau te ʼu alatike pea mo te ʼu tohi ʼaia? ʼE tou iloʼi ai te ʼu fihifihia ʼae ʼe felaveʼi mo te kau tupulaga pea ʼe toe lelei age ai tatatou tokoni mo fakalotomalohiʼi ai natou.

15. He koʼe ʼe ʼaoga ke lau e te kau Kilisitiano kua fotufotuʼa te ʼu tohi ʼae neʼe ta maʼa te kau tupulaga?

¹⁵ ʼE mole tonu ki te kau Kilisitiano kua fotufotuʼa ke natou ui ʼe mole ʼaoga kia natou te ʼu tohi ki te kau tupulaga. Pea ʼe lahi te ʼu fihifihia ʼe talanoa ʼi te ʼu alatike, ʼe tau mo te kau Kilisitiano fuli. Ohage la, ʼe tonu ke tou fakaha te ʼu akonaki ʼe tou tui ki ai, mo tou lolomi te ʼu meʼa ʼae ʼi totatou loto, mo tou tauʼi te ʼu fakaneke pea mo tou teteke te ʼu fakakaugā kovi mo te ʼu fakafiafia kovi. Koia tatau aipe pe neʼe ta te ʼu tohi ʼaia ki te kau tupulaga, kaʼe ko te ʼu ako ʼae ʼe tou maʼu mai ai ʼe haʼu mai te Tohi-Tapu pea ʼe fua lelei ki te kau Kilisitiano fuli.

16. Kotea te tahi ʼu tokoni ʼe feala ke maʼu e te kau tupulaga ʼi ʼatatou tohi?

¹⁶ ʼE feala ʼaki te ʼu tohi ʼae neʼe ta ki te kau tupulaga, ke natou fakamalohiʼi ʼanatou felogoʼi ʼae mo Sehova. (Lau ia Ekelesiasi 12:3, 15.) Pea ʼe toe fua lelei kia natou ʼae kua lalahi. Ohage la, ʼe tou maʼu ʼi te Réveillez-vous ! ʼo Apelili 2009 ia te alatike “Les jeunes s’interrogent . . . Comment trouver du plaisir à lire la Bible ?” ʼE lahi te ʼu tokoni ʼaoga ʼe tou maʼu ʼi te alatike ʼaia pea ʼe ʼi ai te fakamatala ʼi te ʼa takai ʼe feala ke tou sipi, mo taupau ke tou fakaʼaogaʼi moka tou ako te Tohi-Tapu. Kaʼe ʼe fua lelei koa te ʼu alatike ʼaia kia natou ʼae kua lalahi? Neʼe ui e te faʼe, ko te lau ʼo te Tohi-Tapu neʼe faigataʼa tuʼumaʼu kia ia. Kaʼe neʼe ina fakaʼaogaʼi te ʼu tokoni ʼo te alatike pea ʼi te temi nei, ʼe ina fakaʼamu ke ina lau tuʼumaʼu ia te Tohi-Tapu. ʼE ina ui ʼe fiafia ʼi tana kua mahino ʼae ki te alu tahi ʼo te ʼu tohi ʼo te Tohi-Tapu pea ʼe ko he meʼa fakaofoofo. Pea ʼe ina toe ui fenei: “ ʼI muʼa atu, neʼe heʼeki au fia lau feia te Tohi-Tapu.”

17, 18. ʼE tou maʼu feafeaʼi te ʼu lelei ʼi tatatou lau te ʼu tohi ki te kaugā malie? Kotou tuku mai he faʼifaʼitaki.

¹⁷ Te ʼu tohi ki te kaugā malie. Talu mai te taʼu 2008, ʼe tou maʼu Te Tule Leʼo ki te ako. ʼI te agamahani, ko te nusipepa ʼaia neʼe ta ki te kau Fakamoʼoni ʼa Sehova, kaʼe  ʼe tou toe maʼu mo te ʼu nusipepa neʼe ta tafitō ki te kaugā malie. ʼE feafeaʼi hatatou maʼu te ʼu lelei mai te ʼu nusipepa ʼaia? Tou vakaʼi he faʼifaʼitaki. ʼE ke fiafia moka haʼu he tahi neʼe ke fakaafe ki te fono. Pea ʼi te lolotoga ʼo te fai ʼo te akonaki, ʼe ke manatu ki tau fakaafe. ʼE ke feʼekeʼaki pe ʼe kotea tana manatu ki te ʼu faʼahi ʼae ʼe fagono ki ai, peʼe feala ke fetogi feafeaʼi ai tona maʼuli. Koia, ʼe malave ki tou loto ia te aluʼaga ʼaia, pea ʼe toe lahi age ia tou lotofakafetaʼi ki te akonaki ʼaia.

¹⁸ ʼE feala ke toe hoko he aluʼaga feia moka tou lau te ʼu tohi ʼae neʼe ta ki te kaugā malie. Ohage la, ʼi te ʼu nusipepa ki te kaugā malie pea mo te ʼu alatike ʼi tatatou tuʼasila jw.org, ʼe fakamahino ai, ʼe fakaʼaogaʼi ʼi te Tohi-Tapu ia he ʼu kupu mo he ʼu kupusiga palalau ʼe mahino gafua. Pea moka tou lau te ʼu manatu ʼaia, ʼe toe loloto age tatatou mahino mo totatou ʼofa ki te ʼu moʼoni ʼae kua tou iloʼi. ʼE feala ke tou toe ako he tahi age ʼu faʼahiga fakamahino ʼo tatatou tui ʼi te faifakamafola. ʼO toe feia pe, ʼaki te Réveillez-vous !, ʼe toe malohi age ai tatatou tui ʼae ʼe maʼuli moʼoni totatou Tupuʼaga. Pea ʼe tou toe iloʼi ai pe ʼe feafeaʼi hatatou tauʼi tatatou tui.—Lau ia 1 Petelo 3:15.

19. ʼE feafeaʼi hatatou fakaha totatou lotofakafetaʼi kia Sehova ʼo ʼuhiga mo ʼana fakatuʼutuʼu?

¹⁹ ʼE ha lelei mai, ʼe mahu te meʼa kai fakalaumalie ʼae neʼe foaki mai e Sehova ke fua lelei kia tatou. (Mateo 5:3) Tou haga ʼo lau pea mo tou haga ʼo maʼuliʼi te ʼu ako fuli ʼae ʼe haʼu mai ia Sehova. Kapau ʼe tou fai feia, ʼe fua lelei pe anai kia tatou. Pea ʼe tou fakaha ai anai totatou lotofakafetaʼi ki te ʼu fakatuʼutuʼu fakalaumalie fuli ʼae neʼe fai e Sehova maʼa tatou.—Esaia 48:17.