1. Kotea ʼae neʼe ha ʼi te ʼu gaue ʼa te ʼAtua talu mai te kamataʼaga?

 KO SEHOVA mo Sesu ʼe nā logotahi talu mai te kamataʼaga ʼo te fakatupu. Neʼe ʼuluaki fakatupu e Sehova ia Sesu, ʼo gaue ai ia Sesu ‘ ʼi ʼona tafa ohage ko he tufuga faiva.’ (Taaga Lea 8:30) Ko te ʼu kaugana ʼa Sehova neʼe natou felagolagoʼaki foki ʼi te ʼu gaue ʼae neʼe tonu ke natou fai. Ohage la, ko Noe mo tona kiʼi famili neʼe natou faʼu fakatahi te aleka. Ki muli age, neʼe gaue fakatahi te kau Iselaele ki te faʼu ʼo te tapenakulo, mo tona vete pea mo tona feʼaveʼaki. ʼI te fale lotu, neʼe natou hiva pea mo natou faimaholo fakatahi moʼo fakavikiviki kia Sehova. Neʼe feala ke fakahoko e te hahaʼi ʼa Sehova ia te ʼu gaue fuli ʼaia, koteʼuhi neʼe natou felagolagoʼaki.—Senesi 6:14-16, 22; Numelo 4:4-32; 1 Koloniko 25:1-8.

2. (1) He koʼe neʼe makehe te ʼuluaki kokelekasio Fakakilisitiano? (2) Kotea te ʼu fehuʼi ʼe tou fai anai?

² Neʼe toe felagolagoʼaki te ʼu ʼuluaki Kilisitiano. Neʼe fakamahino e te apositolo ko Paulo neʼe kehekehe ʼonatou fealagia,  mo ʼanatou gaue, kaʼe neʼe natou logotahi. Koteʼuhi neʼe natou muliʼi tonatou Pule, ia Sesu Kilisito. Pea neʼe fakatatau e Paulo ia te ʼu ʼuluaki Kilisitiano ki he sino mo ʼona koga kehekehe ʼae ʼe gaue fakatahi. (Lau ia 1 Kolinito 12:4-6, 12.) Kaʼe ʼe feafeaʼi kia tatou ia ʼaho nei? ʼE feafeaʼi hatatou felagolagoʼaki ʼi te gaue faifakamafola, ʼi te kokelekasio pea mo te famili?

3. Kotea te aluʼaga ʼae neʼe ha ki te apositolo ko Soane?

³ Neʼe ʼi ai te aluʼaga neʼe ha ki te apositolo ko Soane. Neʼe ko te ʼu ʼaselo ʼe toko fitu neʼe natou pupuhi fakatagi. ʼI te temi ʼae neʼe pupuhi fakatagi ai te nima ʼaselo, neʼe sio ia Soane ki te fetuʼu ‘neʼe to mai te lagi ki te kele.’ Neʼe fakaʼaogaʼi e te “fetuu” ʼaia ia te kalavi moʼo avahi te matapa ʼo te luo ʼe loloto mo fakapoʼuli gaogao. ʼUluaki, neʼe hake ake mai ai te kohu pea mo te faga heʼe. Neʼe mole natou fai he meʼa ʼe kovi ki te vao ʼakau, kaʼe neʼe natou ʼohofiʼi ia natou ʼae “e mole natou mau te fakailoga o te Atua i onatou lae.” (Apokalipisi 9:1-4) Neʼe iloʼi e Soane ʼe feala ki he faga heʼe ke natou fakahoko he toe maumau, ohage pe ko tona hoko ʼi Esipito ʼi te temi ʼo Moisese. (Ekesote 10:12-15) Ko te faga heʼe ʼae neʼe sio ki ai Soane, ʼe natou fakata ia te kau Kilisitiano fakanofo ʼae ʼe natou fakamafola ia he logo ʼo te fakamau ki te lotu hala. Pea ko te toko lauʼi miliona hahaʼi ʼae ʼe ʼamanaki ki te maʼuli ʼi te kele, kua natou fakatahi kia natou. ʼE natou gaue fakatahi ʼi te faifakamafola pea ʼe natou logotahi. Pea ʼuhi ko te gaue faifakamafola ʼaia, tokolahi te hahaʼi kua natou ʼateaina mai te lotu hala mo te pule ʼa Satana.

4. Kotea te gaue ʼae ʼe tonu ke fakahoko e te hahaʼi ʼa te ʼAtua? Pea ʼe feafeaʼi tona fakahoko?

⁴ Ko totatou maʼua ko te fakamafola ʼo te “logo lelei” ki te hahaʼi ʼi te malamanei katoa ʼi muʼa ʼo te fakaʼosi. Ko te toe gaue fakamataku. (Mateo 24:14; 28:19, 20) ʼE tonu ke tou fakaafe ia natou ʼae “e fia inu” ke natou iinu ki te “vai o te mauli,” ko tona fakaʼuhiga, ʼe tonu ke tou akoʼi te ʼu moʼoni ʼo te Tohi-Tapu kia natou ʼe fia mahino ki ai. (Apokalipisi 22:17) Kaʼe ke feala hatatou fakahoko te gaue ʼaia, ʼe ʼaoga ke tou ‘faʼufaʼu fakatahi’ pea mo felagolagoʼaki ʼi te kokelekasio.—Efeso 4:16.

5, 6. ʼE ha feafeaʼi tatatou logotahi ʼi te faifakamafola?

⁵ Ke kaku te logo lelei ki te tokolahi, ʼe tonu ke fakatuʼutuʼu lelei tatatou gaue faifakamafola. Koia ʼe ʼaoga kia tatou te takitaki ʼae ʼe tou maʼu mai totatou kokelekasio. Hili te vahe gaue, ʼe tou olo ai ʼo palalau ki te hahaʼi ʼo ʼuhiga mo te logo lelei ʼo te Puleʼaga. ʼE tou toe tufa foki mo ʼatatou tohi Fakatohi-tapu ki te hahaʼi. Pea ʼi tona fakahagatonu, ko ʼatatou tohi ʼe lauʼi miliona kua tufa ʼi te malamanei katoa. ʼI ʼihi temi, ʼe fakaui mai ke tou kau ki te tufa makehe. ʼI tatatou kau ki te tufa makehe ʼaia, ʼe tou fakatahi ai ki ʼihi toko lauʼi miliona ʼi te kele katoa ʼe natou toe fakamafola te logo lelei. ʼE tou gaue fakatahi foki mo te ʼu ʼaselo, ʼae ʼe tokoni ki te  hahaʼi ʼa te ʼAtua ke natou fakamafola te logo lelei.—Apokalipisi 14:6.

⁶ ʼE tou fiafia moka tou lau te Annuaire ʼo ʼuhiga mo te ʼu fua lelei ʼo te gaue faifakamafola ʼi te malamanei katoa. Tou toe fakakaukauʼi age muʼa tatatou logotahi fakamalamanei moka tou fakaafe te hahaʼi ki ʼatatou fakatahi lalahi. ʼI te ʼu fakatahi ʼaia ʼae ʼe hoko ʼi te kele katoa, ʼe mole he kehekehe ʼo te ʼu akonaki ʼae ʼe tou fagono ki ai. Ko te ʼu akonaki, mo te ʼu kiʼi gaoʼi pea mo te ʼu faʼifaʼitaki ʼe fakalotomalohiʼi ai tatou ke tou foaki kia Sehova te ʼu meʼa ʼae ʼe lelei tukupau. ʼE tou toe fakatahi mo ʼotatou tehina mo tuagaʼane ʼi te malamanei katoa ʼi te temi ʼae ʼe tou kau ai ki te ʼAho Fakamanatu ʼi te taʼu fuli. (1 Kolinito 11:23-26) ʼE tou fakatahi ai hili te to ʼo te laʼa, ʼi te ʼaho 14 ʼo Nisani, ke tou fakaha totatou lotofakafetaʼi ki te ʼofa ʼae ʼo Sehova kia tatou pea ʼe tou fakalogo ki te fakatotonu ʼa Sesu. Pea ʼi ni vahaʼa ʼi muʼa ʼo te ʼAho Fakamanatu, ʼe tou gaue fakatahi moʼo fakaafe te tokolahi ke natou kau fakatahi mo tatou ki te toʼotoʼoga maʼuhiga ʼaia.

7. Kapau ʼe tou gaue fakatahi, kotea ʼae ʼe feala ke tou fakahoko?

⁷ ʼE mole feala ke fakahoko e te heʼe pe ʼe tahi he toe gaue. ʼO toe feia pe, ʼe mole feala hatatou faifakamafola tokotahi ki te hahaʼi fuli. Kaʼe kapau ʼe tou gaue fakatahi, ʼe feala hatatou tala ki te toko lauʼi miliona hahaʼi te ʼuhiga moʼoni ʼo Sehova pea mo tou tokoni ki ʼihi ke natou fakavikiviki mo fakamaʼuhigaʼi ia ia.

8, 9. (1) Kotea te faʼifaʼitaki ʼae neʼe fakaʼaogaʼi e Paulo moʼo akoʼi te kau Kilisitiano ke natou logotahi? (2) ʼE feafeaʼi hatatou felagolagoʼaki ʼi te kokelekasio?

⁸ Neʼe fakamahino e te apositolo ko Paulo ki te kau Efeso pe ʼe fakatuʼutuʼu feafeaʼi te kokelekasio. Pea neʼe ina ui age kia natou ʼe tonu ki te kokelekasio katoa ‘ke tuputupu ʼi te ʼu aluʼaga fuli.’ (Lau ia Efeso 4:15, 16.) ^[1] (Vakaʼi te nota ʼi te fakaʼosi ʼo te alatike.) Neʼe fakamahino ai e Paulo ʼaki te faʼifaʼitaki ʼo te sino, ko te Kilisitiano takitokotahi ʼe feala ke tokoni ki te taupau ʼo te logotahi ʼi te kokelekasio pea mo mulimuli ia Sesu, ia te Takitaki ʼo te kokelekasio. Neʼe ina ui ko te ʼu koga fuli ʼo te sino ʼe hohoko “ʼaki te ʼu hokoga hui ʼae ʼe natou foaki ia meʼa ʼae ʼe ʼaoga.” Koia, tatau aipe pe ʼe kei tou tupulaga peʼe kua tou matutuʼa, mo maʼuli malolō peʼe kailoa, kaʼe kotea ʼae ʼe tonu ke tou fai takitokotahi?

⁹ Neʼe hinoʼi e Sesu ia te kau tagata ʼafeā ke natou takitaki te kokelekasio, pea ʼe ina loto ke tou fakaʼapaʼapaʼi natou mo tou mulimuli ki tanatou takitaki. (Hepeleo 13:7, 17) ʼE mole faigafua tuʼumaʼu te faʼahi ʼaia kia tatou. Kaʼe ʼe feala ke tou kole tokoni kia Sehova. ʼE feala ke tokoni mai tona laumalie maʼoniʼoni ke tou fakalogo ki te takitaki ʼa te kau tagata ʼafeā ʼi te ʼu aluʼaga fuli. Tou fakafuafua age muʼa te tokoni ʼae ʼe feala ke tou foaki ki totatou kokelekasio mo kapau ʼe tou agavaivai pea mo tou lagolago ki te kau tagata ʼafeā. Ko totatou kokelekasio ʼe logotahi anai pea ʼe tuputupu anai tatatou feʼofaʼofani.

10. ʼE tokoni feafeaʼi te ʼu tehina faifekau fakaminisitelio ki te logotahi ʼo te kokelekasio? (Vakaʼi te ʼuluaki paki.)

 ¹⁰ ʼE toe tokoni mo te ʼu tehina faifekau fakaminisitelio ki te taupau ʼo te logotahi ʼi te kokelekasio. ʼE natou gaue kinakina moʼo tokoni ki te kau tagata ʼafeā pea ʼe tou lotofakafetaʼi ki ʼanatou gaue fuli ʼaia. Ohage la, ʼe tokakaga te ʼu tehina faifekau fakaminisitelio ke feʼauga te ʼu tohi ʼae ʼe tou fakaʼaogaʼi ʼi te minisitelio. ʼE natou toe fakatalitali natou ʼae ʼe ʼomai ki ʼatatou fono. Pea ʼe natou gaue kinakina ki te toe faʼu ʼo te Fale Fono mo tona fakamaʼa. Kapau ʼe tou gaue fakatahi mo te ʼu tehina ʼaia, ʼe tou logotahi ai mo tou tauhi kia Sehova ʼi te tokalelei.—Vakaʼi ia Gaue 6:3-6.

11. ʼE feala ke lagolago feafeaʼi te kau tupulaga ki te logotahi ʼi te kokelekasio?

¹¹ Ko ʼihi tagata ʼafeā neʼe natou gaue malohi ʼi te kokelekasio lolotoga ni taʼu. Kaʼe ʼi tanatou kua vaivai matuʼa, ʼe lagi mole kei feala ke natou gaue ohage ko te temi muʼa. ʼE feala ki te kau tupulaga ke liliu ko he ʼu tokoni. Kapau ʼe akoʼi natou, pea ʼe feala ke lahi te ʼu gaue ʼe hinoʼi natou ki ai ʼi te kokelekasio. Pea ka gaue kinakina te ʼu tehina faifekau fakaminisitelio, ʼe feala ke natou liliu ko he ʼu tagata ʼafeā ki ʼamuli. (1 Timoteo 3:1, 10) Ko ʼihi tagata ʼafeā tupulaga, ʼe kei hoko atu pe tanatou tuputupu ʼi te faʼahi fakalaumalie. Koia kua natou liliu ko he ʼu tehina taupau ʼo te siliko pea ʼe natou tokoni ki te ʼu tehina mo tuagaʼane ʼi te ʼu kokelekasio kehekehe. ʼE tou lotofakafetaʼi ki te kau tupulaga moka natou lotolelei ke natou tokoni ki ʼonatou tehina mo tuagaʼane.—Lau ia Pesalemo 110:3; Ekelesiasi 12:3.

12, 13. Kotea ʼae ʼe feala ke tokoni ki te felagolagoʼaki ʼa he famili?

¹² ʼE feafeaʼi hatatou tokoni ki totatou famili ke natou felagolagoʼaki? ʼE feala ke tokoni mai tatatou ako fakafamili ʼae ʼe fai ʼi te vahaʼa fuli. Ka ako fakatahi te ʼu matuʼā mo te fanau pe ʼe ko ai ia Sehova, ʼe tuputupu ai tanatou feʼofaʼofani. Lolotoga te temi ʼaia, ʼe feala ke natou akoako ai ni manatu ʼaoga ki te minisitelio ʼo natou teuteuʼi lelei ai tanatou faifakamafola. Pea ka natou fevaevaeʼaki ʼanatou manatu ki te moʼoni, mo natou sisio ai ʼe natou ʼoʼofa mo fia fakafiafiaʼi ia Sehova, ʼe malohi ai tanatou fefakaoviʼaki.

¹³ ʼE feala ke felagolagoʼaki feafeaʼi ia he taumatuʼa? (Mateo 19:6) Ka nā ʼoʼofa kia Sehova mo nā tauhi fakatahi kia te ia, ʼe nā fiafia anai mo felogoʼi tahi ʼi tonā maʼuli fakataumatuʼa. ʼE tonu foki ke nā fefakahaʼaki tonā ʼofa, ohage ko tona fai e Apalahamo mo Sala, e Isaake mo Lepeka pea mo Elekana mo Ana. (Senesi 26:8; 1 Samuele 1:5, 8; 1 Petelo 3:5, 6) Ka fakahoko e he taumatuʼa te faʼahi ʼaia, ʼe nā felogoʼi lelei pea mo nā fakaovi ai kia Sehova.—Lau ia Ekelesiasi 4:12.

14. Kapau ko tou ʼohoana ʼe mole tauhi kia Sehova, kotea ʼae ʼe feala ke ke fai ke tologa ai tokolua maʼuli fakataumatuʼa?

¹⁴ ʼE ui lelei mai ʼi te Tohi-Tapu ke ʼaua naʼa tou ʼohoana mo he tahi ʼe mole tauhi kia Sehova. (2 Kolinito 6:14) Kaʼe ʼe ʼi ai te  ʼu tehina mo tuagaʼane ko tonatou ʼohoana ʼe mole ko he Fakamoʼoni ʼa Sehova. Ko ʼihi neʼe natou iloʼi te moʼoni kaʼe kua natou ʼohoana pea ko tonatou ʼohoana neʼe mole liliu ko he Fakamoʼoni. Pea ko ʼihi atu, neʼe ʼohoana mo he kaugana ʼa Sehova, kaʼe neʼe lagi mavae ʼi te kokelekasio ki ʼamuli. ʼI te ʼu aluʼaga ʼaia, ʼe faigaʼi fakamalotoloto e te kau Kilisitiano ke tologa tonatou maʼuli fakataumatuʼa ʼaki tanatou fakalogo ki te ʼu tokoni Fakatohi-tapu. Kaʼe ʼe mole faigafua tuʼumaʼu anai. Ohage la ko Mary mo tona ʼohoana ko David. Neʼe nā tauhi kia Sehova kaʼe neʼe mole kei alu leva ia David ki te ʼu fono. Kaʼe neʼe faigaʼi tuʼumaʼu pe e Mary ke ina fakahoko ʼona maʼua pea mo fakaha te ʼu kalitate Fakakilisitiano. Neʼe ina toe akoʼi ki tana fanau ʼe toko ono pe ko ai ia Sehova pea mo hoko atu tana kau ki te ʼu fono mo te ʼu fakatahi lalahi. ʼI ni taʼu ki muli age, ʼi te kua lalahi ʼo tana fanau mo natou mavae ʼi te loto fale, neʼe tauhi aipe ia Mary kia Sehova logo la neʼe mole faigafua. Pea neʼe toe kamata lau e David te ʼu nusipepa ʼae neʼe tuku e Mary maʼa ia. ʼAki te temi, neʼe toe kau ki te ʼu fono. Ko tona mokopuna ʼe taʼu ono neʼe ina taupau tuʼumaʼu tona hekaʼaga, pea kapau neʼe mole haʼu ia David, ʼe ui fenei age e tona mokopuna: “Papi, neʼe au lotomamahi he neʼe mole au sio kia koe ʼi te fono.” Neʼe toe liliu ia David kia Sehova hili taʼu ʼe 25, pea ʼi te temi nei ʼe fiafia ia ia mo tona ʼohoana koteʼuhi kua nā toe tauhi fakatahi kia Sehova.

15. ʼE feala ke tokoni feafeaʼi he taumatuʼa kua vaivavai ki he taumatuʼa ʼe kei tupulaga?

¹⁵ Ia ʼaho nei, ʼe fakatagaʼi e Satana ia te ʼu famili. Koia ʼae ʼe tonu ai ki te taumatuʼa ʼae ʼe tauhi kia Sehova, ke nā felagolagoʼaki. Tatau aipe pe ʼe kua fualoa takolua ʼohoana, kaʼe kolua fakakaukauʼi age muʼa te ʼu palalau mo te ʼu aga ʼae ʼe tonu ke kolua maʼu ke malohi ai tokolua maʼuli fakataumatuʼa. Kapau ko koulua ko he taumatuʼa kua vaivavai, ʼe feala ke kolua tuku he faʼifaʼitaki lelei ki te ʼu taumatuʼa ʼae ʼe kei tupulaga. Lagi ʼe feala ke kolua fakaafe he taumatuʼa ʼe kei tupulaga ki takolua ako fakafamili. Koteʼuhi ʼe nā  mahino anai ʼe tonu ke nā fefakahaʼaki tonā ʼofa mo logotahi, tatau aipe pe ʼe kua fualoa tonā maʼuli fakataumatuʼa.—Tito 2:3-7.

16, 17. Kotea ʼae ʼe fakaatalitali ki ai te ʼu kaugana logotahi ʼa te ʼAtua?

¹⁶ ʼI te temi ʼae neʼe olo ai te kau Iselaele ki ʼonatou ʼaho lalahi ʼi Selusalemi, neʼe natou felagolagoʼaki. Neʼe natou teuteuʼi ia meʼa fuli neʼe ʼaoga ki tonatou fagona. Pea neʼe natou faifagona fakatahi mo fetokoniʼaki. ʼI te fale lotu, neʼe natou fakavikiviki mo atolasio fakatahi fuli kia Sehova. (Luka 2:41-44) Ia ʼaho nei, ʼi tatatou teuteuʼi totatou maʼuli ki te malama foʼou, ʼe ʼaoga ke tou logotahi mo tou faiga malohi ke tou felagolagoʼaki. ʼE feala koa ke toe lahi age tau lagolago ki te logotahi Fakakilisitiano?

¹⁷ ʼE maveuveu te malama ʼaeni pea ʼe mole maʼu ai te logotahi. Kaʼe ʼe tou lotofakafetaʼi kia Sehova, koteʼuhi neʼe tokoni mai ke tou maʼu te tokalelei pea ke tou mahino ki te moʼoni. Ko te hahaʼi ʼa Sehova ʼi te malamanei katoa ʼe natou fai te tauhi ʼae ʼe loto ki ai. Pea kua natou logotahi tafitō ʼi te ʼu ʼaho fakamuli ʼaeni. Ohage pe ko tona fakakikite e Esaia mo Mikea, ʼe ‘tou hake fakatahi ki te moʼuga ʼo Sehova.’ (Esaia 2:2-4; lau ia Mikea 4:2-4.) Ko he toe fiafia ka tou maʼu anai ʼi te ka haʼu, ʼi te temi ʼae kua logotahi ai te hahaʼi fuli ʼi te kele pea mo natou felagolagoʼaki ʼi te tauhi kia Sehova.