Tupulaga—ʼE Feafeaʼi Hau Teuteu Ki Te Papitema?
“E au loto ke fai tou finegalo, sioku Atua!”—PESALEMO 40:9.
KATIKO: 51, 58
1, 2. (1) Fakamahino pe ʼe koʼe ko te papitema ʼe ko he tonu maʼuhiga. (2) Kotea ʼae ʼe tonu ke mahino ki ai he tahi ʼi muʼa ʼo tana papitema?
TUPULAGA, ʼe ke fia papitema koa? Kapau koia, ʼe ko he pilivilesio lahi ʼae ʼe ke maʼu. Ohage ko tatatou vakaʼi ʼi te alatike ʼae kua ʼosi, ko te papitema ʼe ko he tonu maʼuhiga. Pea ʼe ke fakaha ai ki te hahaʼi kua ke foaki totonu pe tou maʼuli kia Sehova. Ko tona fakaʼuhiga, neʼe ke fakapapau ʼe ke tauhi anai kia te ia mo fai tona finegalo ʼae ʼe maʼuhiga tokotahi ʼi tou maʼuli. Pea ʼe toe maʼuhiga tau fakapapau ʼaia kia Sehova. Koia, ʼe hoki ke papitema mo kapau kua ke fakapotopoto, mo loto moʼoni ki ai pea mo mahino ki te fakaʼuhiga ʼo te foaki ʼo tou maʼuli ki te ʼAtua.
2 Kaʼe, ʼe lagi ke logoʼi ʼe heʼeki ke tokalelei ki te papitema. Peʼe lagi kua ke tokalelei ki ai, kaʼe ki te manatu ʼo ʼau matuʼā ʼe tonu ke ke atalitali muʼa ke ke lahi pea mo mahino ki te aluʼaga ʼo te maʼuli. Kotea ʼae ʼe tonu ke ke fai? ʼAua naʼa ke lotovaivai. Kaʼe, fakaʼaogaʼi te temi ʼaia ke ke tuputupu ʼi te faʼahi fakalaumalie ke feala ai hau tokalelei ki te papitema. ʼI tau taupau maʼu te manatu ʼaia ʼi tou ʼatamai, ʼe feala ke ke fai he ʼu fakatuʼutuʼu ia aluʼaga ʼe tolu. ʼUluaki, ko te ʼu akonaki ʼae ʼe ke tui ki ai. Lua, ko ʼau gaue. Pea tolu leva, ko tau lotofakafetaʼi kia Sehova.
TE ʼU AKONAKI ʼAE ʼE KE TUI KI AI
3, 4. Kotea te ako ʼe taʼofi e te kau tupulaga mai te faʼifaʼitaki ʼo Timoteo?
3 Ke ke fakakaukauʼi age muʼa pe ʼe feafeaʼi hau tali ki te ʼu fehuʼi ʼaeni: He koʼe ʼe au tui ko te ʼAtua ʼe maʼuli moʼoni? He koʼe ʼe au tui papau ko te Tohi-Tapu ʼe hau mai te ʼAtua? He koʼe ʼe au fakalogo ki te ʼu lao ʼa te ʼAtua kaʼe mole au faʼifaʼitakiʼi te aga ʼo te malamanei? ʼE feala ki te ʼu fehuʼi ʼaia ke tokoni atu ke ke mulimuli ki te tokoni ʼaeni ʼa te apositolo ko Paulo: “Ke kotou iloʼi papau pe ʼe kotea te finegalo ʼo te ʼAtua, tona lelei, tona tali lelei, pea mo tona haohaoa.” (Loma 12:2, MN) He koʼe ʼe tonu ke ke iloʼi te finegalo ʼo te ʼAtua?
4 Tou vakaʼi te faʼifaʼitaki ʼi te Tohi-Tapu. Ko Timoteo neʼe ina iloʼi lelei te Tohi-Tapu he neʼe akoʼi age e tana faʼe mo tana kui fafine. Koia, neʼe ui fenei e Paulo kia Timoteo: “Haga nofo ʼi te ʼu meʼa ʼae neʼe ke ako pea neʼe fakalotoʼi koe ke ke tui ki ai.” (2 Timoteo 3:14, 15, MN) ʼI heni ko te kupuʼi palalau “fakalotoʼi” ʼe fakaʼuhiga “ki he meʼa ʼe tou tui papau ki ai ʼe moʼoni.” Koia, neʼe tui papau ai ia Timoteo neʼe ina maʼu te moʼoni ʼi te Tohi-Tapu. Neʼe ina tali te moʼoni he neʼe ina fakakaukauʼi te ʼu faʼahi ʼae neʼe ina ako pea neʼe tui papau ki ai. Kaʼe, neʼe mole ina tali te moʼoni ʼuhi pe he neʼe ui age e tana faʼe mo tana kui ke ina fai te faʼahi ʼaia.—Lau ia Loma 12:1. [1] (Vakaʼi te nota ʼi te fakaʼosi ʼo te alatike.)
5, 6. He koʼe ʼe maʼuhiga ke ke fakaʼaogaʼi tou “ ʼatamai”?
5 ʼE feafeaʼi ʼo ʼuhiga mo koe? Kua lagi fualoa tau iloʼi te moʼoni. Kapau koia, fakatuʼutuʼu ke ke fakakaukauʼi te ʼu tupuʼaga ʼo tau tui. ʼE tokoni atu anai ke ke fakamalohiʼi tau tui mo tekeʼi te ʼu tonu ʼae ʼe kovi ʼuhi ko te fakaneke, mo te manatu ʼo te malamanei peʼe ko te ʼu meʼa ʼae ʼe ke loto ki ai.
6 Kapau ʼe ke fakaʼaogaʼi tou “ ʼatamai” ʼi tau kei tupulaga, ʼe ke lava tali anai ki te ʼu fehuʼi ʼo ʼou kaugā ako. Ohage la, ko te ʼu fehuʼi ʼaeni: ‘ ʼE ke iloʼi feafeaʼi ʼe ʼi ai te ʼAtua? Kapau ʼe ʼofa te ʼAtua ia tatou, he koʼe ʼe ina fakagafua ke hoko he ʼu aluʼaga fakalotomamahi? He koʼe ʼe ui ko te ʼAtua neʼe maʼuli talu mai fualoa?’ Ka kua ke tokalelei, ʼe mole ke lotolotolua anai ʼo ʼuhiga mo te ʼu fehuʼi ʼaia. Kaʼe ʼe ʼekenaki anai koe ke ke ako te Tohi-Tapu.
7-9. Fakaha pe ʼe tokoni feafeaʼi atu te ʼu alatike ʼae ʼe tou maʼu ʼi te Neti ʼi te kupu tafitō “Kotea ʼAe ʼe Akoʼi Moʼoni Mai ʼi Te Tohi-Tapu?” ke malohi tau tui.
7 Ko te ako takitokotahi ʼe tokoni atu anai ke ke tali ki te ʼu fehuʼi, ke mole ke lotolotolua pea ke ke fakamalohiʼi ai tau tui. (Gaue 17:11) ʼE lahi te ʼu tohi ʼe tou maʼu pea ʼe feala ke tokoni atu ke ke fai te faʼahi ʼaia. Tokolahi ʼe natou maʼu tokoni ʼi ʼatatou tohi ʼae ʼe talanoa ai ki totatou Tupuʼaga Lahi pea mo tana fakatupu. Pea tokolahi te kau tupulaga ʼe natou toe leleiʼia mo maʼu he ʼu lelei mai te ʼu alatike ʼae ʼe tou maʼu ʼi totatou tuʼasila ʼi te Neti jw.org ʼi te kupu tafitō ʼaeni “Kotea ʼAe ʼe Akoʼi Moʼoni Mai ʼi Te Tohi-Tapu?” ʼE feala ke ke alu ʼo vakaʼi ʼi te LA BIBLE ET VOUS. Ko te ʼu alatike takitahi ʼaia ʼe tokoni atu anai ke ke fakamalohiʼi tau tui ʼo ʼuhiga mo he manatu ʼi te Tohi-Tapu.
8 ʼI tau ako te Tohi-Tapu, ʼe feala ke ke iloʼi ai te ʼu tali ki ʼihi fehuʼi ʼe ke maʼu ʼi te ʼu alatike. Kaʼe, ʼe ke tui moʼoni koa ki ʼau tali? ʼE tokoni atu anai te ʼu alatike ke ke fakakaukauʼi leleiʼi te ʼu vaega Tohi-Tapu kehekehe pea mo ke tohi te ʼu tupuʼaga ʼo tau tui. ʼE toe tokoni atu anai ke ke iloʼi pe ʼe feafeaʼi hau fakamahino tau tui ki ʼihi. Kapau ʼe ke alu ki te Neti ʼo vakaʼi te ʼu alatike “Kotea ʼAe ʼe Akoʼi Moʼoni Mai ʼi Te Tohi-Tapu?” pea mo fakaʼaogaʼi ʼi tau ako tokotahi, ʼe tokoni atu anai ke ke fakamalohiʼi tau tui.
9 ʼE tonu ke ke iloʼi papau ʼe ko te moʼoni ʼaia. Pea ʼe tokoni atu anai ke ke tokalelei ki te papitema. Neʼe ui fenei e he tuagaʼane finemui: “ ʼI muʼa ʼo taku papitema, neʼe au ako te Tohi-Tapu mo iloʼi ai ko te lotu moʼoni ʼaia. Pea ʼi te ʼaho fuli ʼo toku maʼuli, neʼe liliu taku tui ʼo malohi.”
ʼAU GAUE
10. He koʼe ʼe tonu ki he Kilisitiano kua papitema ke ina fakaalu tahi ʼana gaue mo tana tui?
10 ʼE ui fenei ʼi te Tohi-Tapu: “Ko te tui, kapau ʼe mole fai ʼaki he ʼu gaue, pea ʼe mate ia.” (Sakopo 2:17, MN) Kapau ʼe malohi tau tui, ʼe ke fakaha anai ʼaki ʼau gaue. ʼE ui fenei ia 2 Petelo 3:11, MN: “Mai tona ʼuhiga ʼae ʼe tonu ki te ’u meʼa fuli ʼaia ke mavetevete, ko te ’u faʼahiga tagata feafeaʼi anai ia koutou ʼi te agafakamaʼoniʼoni pea mo he ’u gaue ʼe fakaʼiloga ʼaki ai takotou pipiki ki te ʼAtua.” Koia, ʼe ke fai anai he ʼu ‘agafakamaʼoniʼoni pea mo he ’u gaue ʼe fakaʼiloga ʼaki tau pipiki ki te ʼAtua.’
11. Fakamahino te ʼu kupuʼi palalau te ʼu “agafakamaʼoniʼoni.”
11 Kotea ia te ʼu “agafakamaʼoniʼoni”? Kapau ʼe maʼa ʼau gaue, ʼe ke maʼa anai ʼi te aga ʼae ʼe tonu ke fai. Ohage la, fakakaukauʼi age muʼa te ʼu mahina ʼe ono kua hili. ʼI te temi ʼae neʼe fakaneke ai koe ke ke fai he meʼa ʼe kovi, neʼe ke fakakehekeheʼi koa te meʼa ʼae lelei mo ʼae ʼe kovi? (Hepeleo 5:14) ʼE kei ke manatuʼi koa te ʼu temi ʼae neʼe mole ke tuku ai ke fakahalaʼi koe? ʼI te fale ako, ʼe ke tuku koa he faʼifaʼitakiʼaga lelei? ʼE ke nofo agatonu koa kia Sehova? Peʼe ke faiga ke ke tatau mo ʼou kaugā ako ke mole vaʼi ai koe? (1 Petelo 4:3, 4) ʼE mahino ia, ʼe mole he tahi kua haohaoa. ʼI ʼihi temi, ko natou ʼae kua fualoa tanatou tauhi kia Sehova, ʼe natou ufiufi pea ʼe natou manatu ʼe faigataʼa te faifakamafola ki ʼihi. Kaʼe ko he tahi kua ina foaki tona maʼuli ki te ʼAtua, ʼe fiameʼameʼa anai ʼi te liliu ko he Fakamoʼoni ʼa Sehova. Pea ʼe ina fakaha anai ʼaki tana agamaʼa.
12. Kotea te ʼu ‘gaue ʼe fakaʼiloga ʼaki tau pipiki ki te ʼAtua’? Pea ʼe feafeaʼi kia koe te ʼu gaue ʼaia?
12 Kotea ia te ʼu ‘gaue ʼe fakaʼiloga ʼaki tau pipiki ki te ʼAtua’? ʼI te ʼu gaue ʼaia, ʼe kau ai ʼau gaue ʼi te kokelekasio, ohage la ko tau alu ki te ʼu fono pea mo tau faifakamafola. Kaʼe, ʼe toe kau ki ai te ʼu gaue ʼae ʼe mole sisio ki ai niʼihi. Ohage la, ko ʼau faikole kia Sehova pea mo tau ako tokotahi. Ko he tahi neʼe ina foaki tona maʼuli kia Sehova, ʼe mole manatu anai ko te ʼu gaue ʼaia ʼe ko he kavega. Kaʼe, ʼe manatu tahi anai mo te Hau ko Tavite, ʼae neʼe ina ui fenei: “E au loto ke fai tou finegalo, sioku Atua! Pea e tuu tau lao i te takele o toku loto.”—Pesalemo 40:9.
Neʼe tali e Timoteo te moʼoni he neʼe ina fakakaukauʼi te ʼu faʼahi ʼae neʼe ina ako pea neʼe tui papau ki ai
13, 14. ʼE tou maʼu ʼifea te ʼu manatu ʼae ʼe feala ke tokoni atu ke ke fai te ʼu ‘gaue ʼae ʼe fakaʼiloga ʼaki tau pipiki ki te ʼAtua’? Pea kotea te ʼu fua lelei neʼe maʼu e ʼihi tupulaga mai te ʼu manatu ʼaia?
13 Ke ke lava fakahoko ʼau fakatuʼutuʼu, ʼe tou maʼu he ʼu manatu ʼi te ʼu pasina 308 mo 309 ʼo te tohi Les jeunes s’interrogent. Réponses pratiques, volume 2. ʼI te ʼu pasina ʼaia, ʼe feala ke ke tohi ai ʼau tali ki te ʼu fehuʼi. Ohage la, ko te ʼu fehuʼi ʼaeni: “Kotea ʼae ʼe ke kole ʼi ʼau faikole, pea kotea ʼae ʼe ha ai tou ʼofa kia Sehova?” “Kotea ʼae ʼe ke ako lolotoga tau ako tokotahi?” “ ʼE ke alu koa ʼo faifakamafola logo la ʼe mole olo ʼau matuʼā?” ʼE feala ke ke toe tohi mo ʼau fakatuʼutuʼu ʼae ʼe ke fia fakahoko ʼo ʼuhiga mo ʼau faikole, mo tau ako tokotahi pea mo tau faifakamafola.
14 Tokolahi te kau tupulaga ʼae neʼe teuteu ki te papitema neʼe natou tokagaʼi ʼe ko he ʼu manatu ʼe maʼuhiga. Neʼe ui fenei e he tuagaʼane finemui ko Tilda: “Neʼe au fakaʼaogaʼi te ʼu manatu ʼaia moʼo fakahoko ʼaku fakatuʼutuʼu. Neʼe au fakahoko takitahi ʼaku fakatuʼutuʼu pea hili ki ai he taʼu katoa neʼe kua au tokalelei ki te papitema.” Neʼe toe fua lelei feia ki te tehina tupulaga ko Patrick. Neʼe ina ui fenei: “Neʼe kua au iloʼi pe ʼe kotea ʼaku fakatuʼutuʼu kaʼe ʼi taku tohi ʼaku fakatuʼutuʼu neʼe au faiga ke au fakahoko.”
15. Fakamahino pe ʼe koʼe ko te foaki ʼo tokita maʼuli kia Sehova ʼe ko he tonu ʼe kita toʼo tokotahi.
15 ʼI te ʼu manatu ʼae ʼe tuʼu ʼi te ʼu pasina 308 mo 309, ʼe maʼu ai te fehuʼi ʼaeni: “Kapau ʼe fakagata e ʼau matuʼā mo ʼou kaumeʼa tanatou tauhi kia Sehova, ʼe ke hoko atu anai koa tau tauhi kia te ia?” Ka ke foaki tou maʼuli kia Sehova pea mo papitema, ʼe ke maʼu anai he ʼu felogoʼi lelei mo ia. Koia, ko te meʼa ʼae ʼe ke fai maʼa Sehova, ʼe mole tonu ke fakalogo ki ʼau matuʼā peʼe ko he tahi age. Ko ʼau agafakamaʼoniʼoni mo te ʼu gaue ʼae ʼe fakaʼiloga ʼaki tau pipiki ki te ʼAtua, ʼe ha ʼaki mai ai kua ke maʼu te moʼoni pea ʼe ke fia mulimuli ki te ʼu lao ʼa te ʼAtua. Pea kua ke tokalelei leva ke ke papitema.
KE KE LOTOFAKAFETAʼI KIA SEHOVA
16, 17. (1) Kotea ʼae ʼe ina uga he tahi ke liliu ko he Kilisitiano? (2) Tuku mai he faʼifaʼitaki ʼo ʼuhiga mo totatou lotofakafetaʼi ki te sakilifisio ʼo Sesu.
16 ʼI te tahi ʼaho, neʼe fehuʼi fenei e he tagata neʼe ina iloʼi lelei te Lao ʼa Moisese kia Sesu: “Kotea te fakatotonu . . . e lahi osi?” Neʼe tali fenei e Sesu: “E ke ofa anai [kia Sehova], tou Atua, i tou loto katoa, mo tou [“maʼuli,” MN] katoa, pea mo tau manatu katoa.” (Mateo 22:35-37) Neʼe fakamahino e Sesu, ʼe papitema he tahi pea mo liliu ko he Kilisitiano koteʼuhi ʼe ʼofa kia Sehova. Pea ko tau metitasio ki te sakilifisio ʼo Sesu, ia te meʼa ʼofa lahi ʼo te ʼAtua, ʼe feala ai hau fakamalohiʼi tou ʼofa kia Sehova. (Lau ia 2 Kolinito 5:14, 15; 1 Soane 4:9, 19.) Kapau ʼe ke fai feia, ʼe ke fakaha ai anai tau lotofakafetaʼi ki te meʼa ʼofa taulekaleka ʼaia.
17 ʼE feala ke tou toʼo he faʼifaʼitaki. Ohage la, fakakaukauʼi age muʼa neʼe ke malemo pea haʼu he tahi ʼo haofaki koe. ʼI tou ʼosi haofaki, ʼe ke alu anai koa ki tou ʼapi pea ke galoʼi tou haofaki e te kilisitiano ʼaia? Kailoa ia. ʼE ke lotofakafetaʼi tuʼumaʼu anai ki te kilisitiano ʼaia neʼe ina haofaki tou maʼuli. ʼO toe feia pe, ʼe tonu ke tou lotofakafetaʼi lahi kia Sehova mo Sesu ki te sakilifisio faitotogi. ʼE tou maʼuʼuli ʼuhi ko naua. Neʼe nā haofaki tatou mai te agahala mo te mate. Ia ʼaho nei, kua tou maʼu te ʼamanaki ʼae ke tou maʼuʼuli ʼo heʼe gata ʼi te Palatiso ʼi te kele ʼuhi ko tonā ʼofa kia tatou.
18, 19. (1) He koʼe ʼe mole tonu ke ke mataku ʼi te liliu ko he kaugana ʼa Sehova? (2) ʼE ke lava maʼuli fiafia feafeaʼi ʼi tau tauhi kia Sehova?
18 ʼE ke lotofakafetaʼi koa ki te aluʼaga ʼae neʼe fai e Sehova maʼa koe? Kapau koia, ko te foaki ʼo tou maʼuli kia Sehova pea mo papitema, ʼe ko he fakatuʼutuʼu lelei ʼaia. Ko tau foaki tou maʼuli kia Sehova, ʼe ke fakapapau ai ki te ʼAtua ʼe ke fai anai tona finegalo ʼo talu ai. ʼE tonu koa ke ke mataku ʼi te fakahoko ʼo he fakapapau? Kailoa. Ko Sehova ʼe ina iloʼi te meʼa ʼae ʼe lelei maʼa koe pea ʼe ina fakapale anai natou ʼae ʼe natou fai tona finegalo. (Hepeleo 11:6) Ka ke foaki tou maʼuli ki te ʼAtua pea mo papitema, ʼe ke maʼuli fiafia anai. Ko te tehina ʼe taʼu 24 neʼe papitema, kaʼe neʼe heʼeki taʼu 13. ʼE ina ui fenei: “Neʼe feala ke au maʼu ia he mahino loloto mo kapau la neʼe kua au lahi. Kaʼe, neʼe au toʼo te tonu ʼae ke au foaki toku maʼuli kia Sehova ke ina puipui au mai te ʼu fakafiafia ʼo te malama ʼaeni.”
Kotea ʼae ʼe ke kole ʼi au faikole, pea kotea ʼae ʼe ha ai tou ʼofa kia Sehova?
19 Ko Sehova ʼe ina iloʼi te meʼa ʼae ʼe lelei kia koe. Kaʼe, ko Satana ʼe manatu pe ia kia ia totonu pea ʼe mole ʼofa ia koe. Kapau ʼe ke mulimuli ia ia, ʼe mole ina foaki atu he meʼa ʼe lelei. ʼE feafeaʼi hana foaki atu he meʼa kaʼe mole ina maʼu? ʼE mole ina maʼu te ʼu logo lelei pea ʼe mole ʼi ai hona ka haʼu. Koia, ʼe mole feala ai hana foaki atu hou ka haʼu.—Apokalipisi 20:10.
20. Kotea ʼe feala ke fai e he tupulaga ke tupu ai hana foaki tona maʼuli kia Sehova pea mo papitema? (Vakaʼi mo te fakamatala ʼae ʼi te ʼa takai “Ko He ʼu Tokoni Ke Ke Tuputupu ʼi Te Faʼahi Fakalaumalie.”)
20 Ko tau foaki tou maʼuli kia Sehova ʼe ko he fakatuʼutuʼu maʼuhiga ʼaia neʼe ke fai. ʼE kua ke tokalelei koa ki te faʼahi ʼaia? Kapau koia, ʼaua naʼa ke tuʼania ʼi te fai ʼo te fakapapau ʼaia. Kaʼe, kapau heʼeki ke tokalelei ki ai, fakaʼaogaʼi te ʼu tokoni ʼo te alatike ʼaeni ke ke haga tuputupu ʼi te faʼahi fakalaumalie. Neʼe ui e Paulo ki te ʼu tehina ʼo Filipe ke natou haga tuputupu ʼi te faʼahi fakalaumalie. (Filipe 3:16) Koia, kapau ʼe ke mulimuli ki te tokoni ʼaia, ʼe ke fia foaki anai tou maʼuli kia Sehova pea mo papitema.
^ [1] (palakalafe 4) ʼE fakaliliu fenei ia Loma 12:1 ʼi te Tohi-Tapu fakafalani Les Saintes Écritures. Traduction du monde nouveau, (MN ): “Koia, ʼe au kole mamahi atu kia koutou, ’u tehina, ʼaki te ’u ʼofa mamahi ʼo te ʼAtua, ke kotou momoli ʼokotou sino ko he sakilifisio maʼuli, mo maʼoniʼoni, pea mo lelei ki te ʼAtua, ko he tauhi tapu ʼaki tokotou ʼatamai.”
Ko Satana ʼe manatu pe ia kia ia totonu pea ʼe mole ʼofa ia koe