Ko He Kalitate Fakaʼatua ʼe Maʼuhiga Age ʼi Te ʼu Taimani
Ko te ʼu taimani, ʼe ko he ʼu maka maʼuhiga ʼaupito ki te hahaʼi. Pea ko te totogi ʼo te tahi ʼu taimani, ko te ʼu lauʼi miliona tola. Kaʼe ʼe ʼi ai koa he meʼa ʼi tuʼa atu ʼo te ʼu taimani ʼe laka age tona maʼuhiga ki te ʼAtua?
ʼI Arménie, ko te kaugā fagona heʼeki papitema ʼe higoa ko Haykanush, neʼe ina maʼu te pasipo ʼi tona vaʼe ʼapi. Neʼe tuku ʼi ai te ʼu kate toho falā pea mo te foʼi falā lahi. Neʼe ina fakaha te aluʼaga ʼaia ki tona ʼohoana ʼae neʼe hage pe ko ia, ʼe kei kaugā fagona pe.
Neʼe lahi ʼonā fihifihia fakapaʼaga pea neʼe toe lahi mo ʼonā maʼua. Kaʼe neʼe nā fakatotonu ke nā ʼave ia te falā ki te tuʼasila ʼae neʼe nā maʼu ʼi te pasipo. Neʼe punamaʼuli ai te tagata ʼae ʼaʼana te pasipo ʼo toe feia mo tona famili. Ko Haykanush mo tona ʼohoana neʼe nā fakamahino ki te kiʼi famili, ʼe nā agafakahagatonu, koteʼuhi ʼe nā ako ia te Tohi-Tapu. Neʼe nā toʼo ai te faigamalie ʼaia ke nā palalau ʼo ʼuhiga mo te kau Fakamoʼoni ʼa Sehova pea ke nā foaki he ʼu tohi kia natou.
Neʼe fia foaki e te kiʼi famili he foʼi falā kia Haykanush, kaʼe neʼe fakafisi ki ai. ʼI te ʼaho ake, neʼe alu te fafine ki te ʼapi ʼo Haykanush mo tona ʼohoana ʼo toe fai he fakamalō, pea neʼe ina fakakinauʼi ia Haykanush ke ina tali te foʼi mama taimani.
Ohage pe ko te kiʼi famili ʼaia, ʼe punamaʼuli anai te tokolahi ki te agafakahagatonu ʼa Haykanush pea mo tona ʼohoana. Kaʼe neʼe punamaʼuli koa ia Sehova? Kotea tana manatu ʼo ʼuhiga mo tanā agafakahagatonu? Neʼe ʼaoga koa ia tanā agafakahagatonu?
TE ʼU KALITATE ʼAE ʼE MAʼUHIGA AGE ʼI TE MAʼU KOLOA
ʼE mole faigataʼa te maʼu te ʼu tali ʼo te ʼu fehuʼi ʼaia. Kotea tona tupuʼaga? Koteʼuhi ʼe iloʼi e te ʼu kaugana ʼa te ʼAtua, ʼe maʼuhiga age kia te ia tanatou faʼifaʼitakiʼi te ʼu kalitate ʼo Sehova ʼi te ʼu taimani, te aulo, peʼe ko he tahi atu ʼu meʼa. ʼEi, ʼe kehekehe te manatu ʼa Sehova pea mo te manatu ʼa te hahaʼi ʼo ʼuhiga mo te ʼu meʼa ʼae ʼe maʼuhiga. (Esaia 55:8, 9) Pea ʼe maʼuhiga ʼaupito ki ʼana kaugana ʼanatou faiga ʼae ke natou faʼifaʼitakiʼi ai te ʼu kalitate ʼo Sehova.
ʼE feala hatatou mahino ki te aluʼaga ʼaia ʼaki te ʼu manatu ʼae ʼe maʼu ʼi te Tohi-Tapu ʼo ʼuhiga mo te fakasiosio tonu pea mo te poto. ʼE ui fenei ia Taaga Lea 3:13-15: “Manuia te tagata ae kua ina mau te poto, mo te tagata ae e ina mau te atamai! Koteuhi e mauhiga age ia i te paaga, pea e lelei age ia i te aulo. E mauhiga age te poto i te u fuai kahoa, e mauhiga lahi age ia ia mea fuli e totogi kovi.” ʼE ha lelei mai, ʼe fakamaʼuhigaʼi e Sehova te ʼu kalitate ʼaia ʼo laka age ia ʼi te ʼu koloa fuli.
Kaʼe ʼe feafeaʼi koa ki te agafakahagatonu?
Ko Sehova ʼe agafakahagatonu. ʼE mole feala ia ke loi. (Tito 1:2) Pea neʼe ina takitaki ia te apositolo ko Paulo ʼaki tona laumalie maʼoniʼoni ke faitohi fenei ki te kau Kilisitiano Hepeleo: “Koutou hufaki matou; koteuhi e matou iloi e matou mau he atamai lelei, pea e matou loto ke lelei tuumau te u mea fuli e matou fai.”—Hepeleo 13:18.
Neʼe tuku mai e Sesu Kilisito ia he faʼifaʼitaki lelei ʼo ʼuhiga mo te agafakahagatonu. Ohage la, ʼi te temi ʼae neʼe ui ai e te Pelepitelo Lahi ko Kaifa kia Sesu, “E au kole atu kia koe ia mua o te Atua mauli, kapau ko Kilisito ia koe, te Alo o te Atua, fakaha mai kia matou,” neʼe mole loi ia Sesu, neʼe ina fakaha totonu ko ia ko te Mesia. Neʼe iloʼi e Sesu ʼe natou ui anai ko ia ko he tahi ʼe lau kovi ki te ʼAtua, kaʼe neʼe ina fakaha pe ia te moʼoni pea neʼe iku ai ki tona matehi.—Mateo 26:63-67.
Kaʼe ʼe feafeaʼi kia tatou? Kapau ʼe tou tau mo he aluʼaga ʼe feala ke tou maʼu koloa ai, kaʼe ʼe mole tou fakaha te moʼoni peʼe mole tou fakaha te moʼoni katoa, ʼe kei tou agafakahagatonu koa?
TE FAIGATAʼA ʼO TE AGAFAKAHAGATONU
ʼE feala ke faigataʼa ia te maʼu ʼo te agafakahagatonu ʼi te ʼu ʼaho fakamuli ʼaeni, koteʼuhi kua liliu te u tagata “o tahi ofa pe kia ia, o kaumea mo te paaga.” (2 Timoteo 3:2) Ka hoko he ʼu fihifihia fakaekonomika peʼe ka faigataʼa te maʼu ʼo he gaue, ko te tokolahi ʼe natou kaihaʼa, agakakā peʼe natou fai he tahi ʼu meʼa agafakakakā. Pea ʼi te kua mafola ʼo te faʼahiga manatu ʼaia, kua ui pe e ʼihi ʼe ko te puleʼaki pe ʼaia ʼe tahi ke natou maʼu ai hanatou foʼi falā. Maʼia pe la mo ʼihi Kilisitiano, neʼe kua puli tonatou mata gafua ʼi te kokelekasio, koteʼuhi neʼe mole lelei ʼanatou tonu pea ʼuhi ko te ʼu koloa ʼae neʼe natou maʼu ʼaki he agakakā.—1 Timoteo 3:8; Tito 1:7.
Kaʼe tokolahi ʼi te kau Kilisitiano ʼe natou faʼifaʼitakiʼi ia Sesu. ʼE natou mahino ko te maʼu ʼo he ʼu kalitate ohage ko te ʼAtua ʼe maʼuhiga age ʼi te ʼu koloa fuli peʼe ko he ʼu tapuakina. Koia la ʼae, ʼe mole kakā ai te kau tupulaga Kilisitiano ʼi te fale ako ke natou maʼu he ʼu nota ʼe lelei. Taaga Lea 20:23) Ko te agafakahagatonu ʼe mole ina tali tuʼumaʼu he fakapale ohage la ko te aluʼaga neʼe hoko kia Haykanush. Kaʼe, ko te agafakahagatonu ʼe leleiʼia e te ʼAtua, pea ʼe ina fakafealagia ke tou maʼu he leʼo ʼo loto ʼe maʼa pea mo maʼuhiga age.
(ʼE fakamoʼoni ki ai te faʼifaʼitaki ʼo Gagik. ʼE ina ui fenei: “ʼI muʼa ʼo taku liliu ko he fakamoʼoni ʼa Sehova, neʼe au gaue ki he sosiete lahi. Pea ko te patolo neʼe mole ina totogi katoa te ʼu tukuhau kaʼe ko he kiʼi koga veliveli pe. Pea ʼi toku ʼuhiga takitaki ʼi te sosiete, neʼe au totogi te tagata ʼae neʼe gaue ʼi te pilo ʼo te ʼu tukuhau ke ina tohi kakāʼi te ʼu pepa ʼo te sosiete. Pea ki muli age neʼe fua kovi pe kia au te aluʼaga ʼaia. Neʼe ui ʼo ʼuhiga mo au, neʼe au agakakā. Pea ʼi taku iloʼi te moʼoni, neʼe au fakafisi ki te toe hoko atu ʼo te fai te agakakā tatau aipe pe neʼe lelei toku totogi. Neʼe au laga leva taku sosiete. Ia ʼaho nei, kua au faifakahagatonu taku gaue pea mo totogi katoa ʼaku tukuhau.”—2 Kolinito 8:21.
ʼE ui fenei e Gagik: “Ko toku totogi kua hifo ʼo vaelua, pea ʼe faigataʼa toku maʼuli mo toku kiʼi famili. Kaʼe, ʼe au fiafia ʼaupito he ʼe kua au maʼu he leʼo ʼo loto ʼe maʼa ia muʼa ʼo Sehova. ʼE au tuku he faʼifaʼitaki lelei ki ʼoku foha ʼe lua, pea ʼe au maʼu mo ʼoku pilivilesio ʼi te kokelekasio. Pea kia natou ʼae neʼe matou gaue fakatahi, kua au liliu nei ko he tagata agafakahagatonu.”
ʼE TOKONI MAI IA SEHOVA
Ko Sehova ʼe ʼofa kia natou ʼae ʼe fakavikiviki kia te ia ʼaki tanatou faʼifaʼitakiʼi ʼona kalitate ʼo kau ki ai te agafakahagatonu. (Tito 2:10) Pea ka tou fai feia, ʼe ina fakapapau ʼe tokoni mai anai. ʼAki te Hau ko Tavite, ʼe ina ui fenei: “Nee au tupulaga, pea kua au matua, kae e heeki au sio nee siaki te tagata agatonu, pe nee kai kolekole tona hakoga tana pane.”—Pesalemo 37:25.
ʼE fakamoʼoni ki ai te faʼifaʼitaki ʼo Lute. Neʼe nofo agatonu ki te faʼe ʼo tona ʼohoana koteʼuhi neʼe mole ina liaki ʼi tana kua vaivai matuʼa. Neʼe alu ia Lute ki Iselaele, ke feala ai hana tauhi ki te ʼAtua moʼoni. (Lute 1:16, 17) Neʼe agatonu pea neʼe gaue kinakina ʼi te tae ʼo te fulumeto, ʼae ko te fakatuʼutuʼu ʼo te Lao ʼo ʼuhiga mo te kau masisiva. Pea ohage pe ko te aluʼaga neʼe hoko kia Tavite ki muli age, neʼe mole siʼaki e Sehova ia Lute mo Naomi. (Lute 2:2-18) Pea neʼe toe lahi age tona tapuakina, koteʼuhi neʼe filifili e Sehova ke kau ki te hologa ʼo te Hau ko Tavite mo te Mesia ʼae neʼe fakapapauʼi mai.—Lute 4:13-17; Mateo 1:5, 16.
ʼE feala ke faigataʼa ki ʼihi fakamoʼoni ʼa Sehova te maʼu he foʼi falā ki tonatou maʼuli. Kaʼe ʼe natou gaue kinakina ʼo mole natou fakaʼaogaʼi ni agafakakakā. ʼI tanatou fai feia, ʼe natou fakaha ai te ʼu kalitate taulekaleka ʼo te ʼAtua, ʼo kau ki ai te agafakahagatonu. Pea ʼe maʼuhiga age te ʼu kalitate ʼaia ʼi te ʼu koloa fuli.—Taaga Lea 12:24; Efeso 4:28.
Ohage pe ko Lute, ko te kau Kilisitiano ʼi te malamanei ʼe natou fakaha tanatou falala ki te malohi ʼo te ʼAtua. ʼE natou falala katoa kia Sehova ʼae neʼe ina fakapapau fenei age: “E mole au tukunoa anai koe, pea e mole au siaki anai koe.” (Hepeleo 13:5) Neʼe fakaha liuliuga e Sehova ʼe ina maʼu te fealagia ke tokoni kia natou ʼae ʼe agafakahagatonu ʼi te temi fuli. ʼE ina fakahoko tuʼumaʼu tana fakapapau ʼae ke ina foaki te ʼu meʼa ʼae ʼaoga ki ʼana kaugana.—Mateo 6:33.
ʼE moʼoni, ko te tagata ʼe ina fakamaʼuhigaʼi te ʼu taimani pea mo ʼihi atu koloa. Kaʼe, ʼe tou tui papau ʼe maʼuhiga age ki tatatou Tamai ʼae ʼi selo, tatatou agafakahagatonu pea mo ʼihi atu kalitate ʼi te ʼu maka maʼuhiga fuli.