Neʼe ke lau fakalelei koa te ʼu Tule Leʼo ʼo te taʼu ʼaeni? Kapau koia, ʼahiʼahi tali ki te ʼu fehuʼi ʼaeni:

Kotea ʼae ʼe tonu ke tou fai ke tou ‘fakafoʼou ai totatou ʼatamai’? (Loma 12:2)

ʼE mole fakaʼuhiga pe ki hatatou fai he ʼu gaue lelei ʼi totatou maʼuli. ʼE toe tonu foki ke tou sivisivi totatou ʼuhiga totonu, pea ke tou fai he ʼu fetogi ke alu tahi totatou maʼuli mo te ʼu lao ʼa te ʼAtua.—w23.01, p. 8-9.

ʼE feafeaʼi hatatou fakapotopoto moka tou sisio ki te ʼu aluʼaga ʼae ʼe hoko ʼi te malamanei?

ʼE tou fia iloʼi pe ʼe fakahoko feafeaʼi e te ʼu aluʼaga ʼae ʼe hoko ʼi te malamanei ia te ʼu lea fakapolofeta. Kae ʼe tou tokakaga ke mole tou fakaha ʼatatou manatu huʼu mo te ʼu meʼa ʼae ka hoko, he ʼe feala ke logo kehekehe ai te kokelekasio. ʼE lelei age ke tou talanoa ki te fakamahino fakamuli ʼae neʼe fakaha mai e te kautahi ʼa Sehova. (1 Ko. 1:10)—w23.02, p. 16.

Kotea te kehekehe ʼo te papitema ʼo Sesu mo ʼae ʼo ʼana tisipulo?

Neʼe tupu Sesu ʼi he puleʼaga neʼe kua foaki ki te ʼAtua, koia neʼe mole ʼaoga ai ke ina foaki tona maʼuli. Pea neʼe mole ʼaoga kia Sesu ke fakahemala he neʼe ko te tagata haohaoa, neʼe mole hana ʼu agahala.—w23.03, p. 5.

ʼE feafeaʼi hau tuku he faigamalie ki ʼihi ke fai hanatou tali?

ʼE feala ke tou fai he ʼu tali ʼe nounou, ke feala ai ke fai e ʼihi hanatou tali. ʼE feala ke tou tokaga naʼa lahi fau te ʼu manatu. ʼE feala anai ki ʼihi ke natou palalau ki he tahi manatu.—w23.04, p. 23.

Kotea “te Ala ʼo Te Maʼoniʼoni” ʼae ʼe talanoa ki ai ia Esaia 35:8?

Ko te ala lahi fakata ʼaia ʼe fakaʼuhiga ki te ala ʼae neʼe faifagona ai te kau Sutea mai Papiloni ki tonatou fenua. ʼE feafeaʼi ʼi totatou temi? ʼI ni taʼu ʼe lauʼi teau ʼi muʼa ʼo te taʼu 1919, neʼe fakahoko ai te ʼu gaue moʼo teuteu te ala, pea neʼe kau ki ai te gaue ta tohi pea mo te faifakaliliu. Kua haʼele te hahaʼi ʼa te ʼAtua ʼi “te Ala ʼo Te Maʼoniʼoni” ʼo natou hu ki te palatiso fakalaumalie, ʼae ʼe kaku leva ki te ʼu tapuakina mai te Puleʼaga.—w23.05, p. 15-​19.

ʼE fai mai ia Taʼaga Lea kapite 9 he fakatokaga ʼaki te fakaafe ʼae ʼe fai e te ʼu fafine fakata ʼe lua. Ko ai te ʼu fafine ʼaia?

ʼE palalau ia Taʼaga Lea ki “te fafine agavale” ʼe ina fakaafe te hahaʼi, pea ko natou ʼae ʼe tali ki tana fakaafe ʼe taki natou ki “te Faitoka.” ʼI te tahi age faʼahi, ko “te poto moʼoni” ʼe fakata e he fafine ʼe ina fakaafe te hahaʼi, pea ko natou ʼae ʼe tali ki tana fakaafe ʼe natou “mulimuli ki te ʼatamai” pea natou maʼuli ai. (Taag. 9:​1, 6, 13, 18)—w23.06, p. 22-24.

ʼE ha feafeaʼi te agavaivai mo te fakapotopoto ʼo te ʼAtua ʼi tana felogoi mo Lote?

Neʼe fakatotonu e Sehova kia Lote ke mavae ʼi Sotoma ʼo hola ki te potu moʼugaʼia. Kae neʼe kole e Lote ke ina fakagafua age ke alu ia ki te kolo ko Tesoa, pea neʼe tali e te ʼAtua tana kole.—w23.07, p. 21.

Kotea ʼae ʼe feala ke fai e he fafine mo kapau ʼe sioʼi e tona ʼohoana he ʼu ʼata ʼe kovi?

ʼE mole tonu ke ina ui ʼe ko tana hala mo kapau ʼe sioʼi e tona ʼohoana te ʼu ʼata kovi. ʼE tonu ke ina tokagaʼi tafito ʼana felogoi mo te ʼAtua pea ke metitasio ki he ʼu fakamatala ʼi te Tohi-Tapu ʼo he ʼu fafine neʼe lotohoha, pea neʼe fakalotofimalieʼi natou e Sehova. ʼE feala ke tokoni ki tona ʼohoana ke ina tekeʼi he ʼu aluʼaga ʼe feala ai ke to ki te fakahala.—w23.08, p. 14-17.

Ka fakafihiʼi e he tahi te ʼu akonaki ʼae ʼe tou tui ki ai, ʼe tokoni feafeaʼi mai te fakasiosio poto ke tou agamalū?

Tou manatu ʼe ko he faigamalie ʼaia ke tou iloʼi ai tana manatu peʼe kotea ʼae ʼe tuʼania ki ai. ʼE feala ai anai ke tou tali age ʼaki he agamalū.—w23.09, p. 17.

Kotea ʼae ʼe feala ke tou ako mai ia Malia ʼi tana tali te tokoni ʼa ʼihi?

ʼI tana iloʼi ʼae ʼe liliu anai ko te faʼe ʼa te Mesia, neʼe ina tali ke tokoni age ʼihi. Neʼe fakalotomalohiʼi ia ia e Kapeliele mo Elisapeta ʼaki he ʼu manatu fakalaumalie. ʼE feala mo tatou ke tou maʼu te malohi mai ʼotatou tehina mo tuagaʼane.—w23.10, p. 15.

ʼE tali feafeaʼi mai e Sehova ki ʼatatou faikole?

ʼE ina fakapapau ʼe fagono ki ʼatatou faikole pea ʼe ina vakaʼi pe ʼe alu tahi mo tona finegalo. (Sel. 29:12) ʼE feala ke mole tatau tana tali ʼae ki ʼatatou faikole, kae ʼe lagolago tuʼumaʼu mai pe.—w23.11, p. 21-22.

He koʼe ʼe toe palalau ia Loma 5:4 ki te “ ʼamanaki” kae kua ʼosi palalau ki ai ʼi te vaega 2?

Ka logo he tahi ki te logo lelei, ʼe feala ke ina maʼu te ʼamanaki ʼae ke maʼuli fiafia ʼi te palatiso ʼi te kele. Kae ʼi tana felaveʼi leva mo ni faigataʼaʼia, mo katakiʼi pea mo ina logoʼi ai te ʼofa ʼo te ʼAtua ia ia, ʼe hage ʼe toe malohi age ai tana ʼamanaki pea mo moʼoni age.—w23.12, p. 12-13.