ʼE MAHINO ia ʼe ke leleiʼia te ʼu meʼa ʼofa ʼae ʼe foaki atu e Sehova, ohage la ko te fealagia ʼae ke ke filifili pe ʼe feafeaʼi hau fakaʼaogaʼi te ʼu meʼa ʼofa ʼaia. ʼE feala ke tou tokagaʼi, ʼe ui ʼi te Tohi-Tapu ko te vino ʼe ko he meʼa ʼofa mai te ʼAtua. ʼE tou lau fenei: “ ʼE fai te pane ke tupu ai te kata, pea ʼe fai te vino ke lelei ai te maʼuli.” (Ekl. 10:19; Pes. 104:15) Kae lagi ke sio ʼe tau ʼihi mo ni fihifihia ʼuhi ko te kava. Pea ʼe tahi alu te fenua mo tana manatu pea mo ʼana lekula ʼo ʼuhiga mo te inu kava. Koia, kotea la ka tokoni ki te kau Kilisitiano ke natou fai ni tonu fakapotopoto huʼu mo te inu kava?

Kotea pe te agaʼi fenua neʼe tou lahilahi ake ai, kae kapau ʼe mulimuli ʼatatou manatu mo ʼatatou tonu ki te manatu ʼa te ʼAtua, ʼe fua lelei anai kia tatou pea ʼe tou maʼuli fiafia anai.

Neʼe lagi ke tokagaʼi kua lahi te inu kava mo tuʼumaʼu ʼa te hahaʼi. ʼE inu ʼihi he ʼe natou logo fimalie ai. ʼE inu kava ʼihi moʼo tauʼi ʼonatou fihifihia. Pea ʼe inu leva ʼihi ke ui e te hahaʼi ʼe natou malolohi.

Kae ʼe maʼu e te kau Kilisitiano te takitaki poto mai tonatou Tupuʼaga ʼofa. Ohage la, ʼe ina fakatokaga mai te ʼu fua kovi ʼo te inu kava fakavale. Neʼe lagi kua tou lau ia Taʼaga 23:​29-35 ʼae ʼe fakamatala ai he tahi ʼe inu kava pea mo te ʼu nunuʼa kovi ʼo tana aga ʼaia. a Ko te tehina ko Daniel, ʼae ʼe tagata ʼafea ʼi Eulopa, ʼe ina manatuʼi pe neʼe feafeaʼi tona maʼuli ʼi muʼa ʼo tana iloʼi ia Sehova pea mo mulimuli ki ʼana tokoni. ʼE ina ui fenei: “Ka ke inu kava fakavalevale, ʼe ke fai ai he ʼu tonu ʼe mole fakapotopoto pea hoko ai ni aluʼaga fakaʼofaʼofa. ʼE kei au lotomamahi moka au manatuʼi te temi ʼaia.”

ʼE feafeaʼi hatatou fai ni tonu fakapotopoto huʼu mo te kava pea mo tou tekeʼi te ʼu fihifihia ʼae ʼe tupu mai te inu kava fakavalevale? ʼE tonu ki ʼatatou manatu mo te ʼu meʼa ʼae ʼe tou fai ke alu tahi pea mo te manatu ʼa te ʼAtua.

Tou vakaʼi pe kotea ʼae ʼe ui ʼi te Tohi-Tapu ʼo ʼuhiga mo te kava pea kotea ʼae ʼe ina uga ai ʼihi ke natou inu kava.

ʼE mole tapuʼi ʼi te Folafola ʼa te ʼAtua te inu kava fakapotopoto. ʼE ui lelei ʼi te Tohi-Tapu ʼe fakafiafia te inu ʼo te vino. ʼE tou lau fenei: “Alu ʼo kai fakafiafia tau meʼa kai, mo inu tau vino mo he lotofiafia.” (Ekl. 9:7) Neʼe inu vino pe la ia Sesu ʼo feia mo ʼihi atu kaugana agatonu ʼa Sehova.—Mat. 26:​27-29; Luka 7:34; 1 Tim. 5:23.

Kae ʼe fakaha lelei ʼi te Folafola ʼa te ʼAtua te kehekehe ʼo te inu ʼo he moʼi kava pea mo te konahia. ʼE ui fakahagatonu ai: “ ʼAua naʼa kotou konahihia ʼi te vino.” (Efe. 5:18) Pea ʼe toe ui ai ko “te kau inu kava fakavalevale, . . . ʼe mole natou maʼu anai ia te Puleʼaga ʼo te ʼAtua.” (1 Ko. 6:10) ʼEi, ʼe tauteaʼi e Sehova te konahia pea mo te inu kava fakavalevale. Koia, ko te tonu ʼae ʼe tou fai huʼu mo te inu kava ʼe mole mulimuli anai ki tatatou agaʼi fenua kae ki tatatou fia fakafiafiaʼi totatou ʼAtua.

ʼE ui e ʼihi ʼe mole natou konahihia moka natou inu lahi te kava. Kae ʼe fakatupu tuʼutamaki te faʼahi ʼaia. ʼE fakaha lelei mai ʼi te Tohi-Tapu ka “popula [he tahi] ki te vino” ʼe feala ke ina fai he hala ʼe mamafa pea ke agahala ai ki te ʼAtua. (Tito 2:3; Taag. 20:1) Neʼe toe ui pe la e Sesu ʼe feala ke mole hu he tahi ki te malama foʼou ʼa te ʼAtua ʼuhi ko “te inu fakavale.”  (Luka 21:​34-36) Kotea ʼae ʼe feala ke fai e he Kilisitiano ke mole hoko kia ia te ʼu fihifihia ʼae ʼe tupu mai te inu kava?

ʼE fakatupu tuʼutamaki moka inu kava he tahi he ʼe mulimuli ki tana agaʼi fenua. ʼE maʼu e te kau Kilisitiano te poto ʼo natou faiga ke fakafiafiaʼi ia Sehova ʼi te ʼu faʼahi ʼo te meʼa kai mo te inu. ʼE fakamanatuʼi fenei mai ʼi te Tohi-Tapu: “Pe ʼe kotou kakai, peʼe kotou iinu, peʼe kotou fai he tahi age meʼa, kotou fai ia meʼa fuli moʼo fakakololiaʼi ia te ʼAtua.” (1 Ko. 10:31) Koʼeni he ʼu fehuʼi mo he ʼu tokoni ʼi te Tohi-Tapu ʼe lelei ke ke tokagaʼi:

ʼE au inu koa ke leleiʼia au e ʼihi? ʼE ui ia Ekesote 23:2: “ ʼE mole tonu ke ke muli ʼi he hahaʼi kaugamalie.” Neʼe fakatokaga ʼi heni e Sehova ia te kau Iselaele ke ʼaua naʼa natou muliʼi te hahaʼi ʼae neʼe mole ʼoʼofa kia te ia. ʼE toe ʼaoga te tokoni ʼaia ki te kau Kilisitiano ia ʼaho nei. Kapau ʼe mulimuli ʼatatou manatu mo te ʼu tonu ʼae ʼe tou fai huʼu mo te kava ki te manatu ʼa te hahaʼi, ʼe feala ki muli age ke mole kei tou fakalogo ki te ʼu lekula ʼa Sehova pea mo puli ai ʼatatou felogoi mo ia.—Loma 12:2.

ʼE au inu koa moʼo fakaha ki ʼihi ʼe au malohi? ʼI ʼihi agaʼi fenua, ʼe ko he meʼa mahani pea ʼe mole koviʼia te inu lahi mo tuʼumaʼu ʼo te kava. (1 Pet. 4:3) Kae tokagaʼi te tokoni poto ʼaeni ʼe tou maʼu ia 1 Kolonito 16:13: “Kotou nonofo ʼalaʼala, mo kotou tutuʼu malohi ʼi te tui, mo kotou lototoʼa pea mo kotou liliu ʼo malolohi.” ʼE feala moʼoni koa ke ui ʼe malohi he tahi ʼe inu kava? Kailoa ia. Ka inu lahi e he tahi te kava ʼe feala ke mole kei fakakaukau mo fai ni tonu ʼe lelei. Koia ʼe mole fakaha ai ʼe malohi, kae fakamoʼoni ai ko he tahi ʼe vaivai. ʼE talanoa ia Esaia 28:7 ki he tahi ʼe hehe ʼuhi ko te vino, ʼo ui ʼe siʼia pea ʼe faihala ʼi te ʼu tonu ʼae ʼe ina fai.

Ko Sehova ʼae ʼe ina foaki te malohi moʼoni, ke tou nonofo ʼalaʼala pea mo tutuʼu malohi ʼi te tui. (Pes. 18:32) Pea ʼe feala anai mo kapau ʼe tou tokakaga ʼo tekeʼi te ʼu hele pea mo fai ni tonu ʼe mole fua kovi ai ki ʼatatou felogoi mo Sehova. Neʼe fakaha e Sesu te malohi ʼaia ʼi tana ʼi te kele, pea tokolahi neʼe natou  fakaʼapaʼapaʼi ia ia he neʼe lotomalohi ʼo fai te meʼa ʼae ʼe totonu.

ʼE au inu kava koa ke siʼisiʼi ai taku hoha ʼuhi ko ʼoku fihifihia? ʼAki te takitaki ʼa te ʼAtua, neʼe tohi fenei e te tagata faipesalemo: “ ʼI te lahi ʼo ʼoku tuʼania, neʼe ke [ia Sehova] fakapelepeleʼi mo fakafimalieʼi au.” (Pes. 94:19) Ka ke tuʼania, haga kia Sehova ke tokoni atu kae mole ki te kava. Ke fakasiʼisiʼi tau hoha, ʼe lelei age ke lahi age tau faikole kia te ia. Tokolahi neʼe natou sio ki te ʼaoga ʼae ke kumi tokoni ki honatou kaumeʼa kua fotufotuʼa ʼi te kokelekasio. Kapau ʼe inu kava he tahi moʼo tauʼi ʼona fihifihia, ʼe feala anai ki muli age ke puli tana fia fai te meʼa ʼae ʼe lelei. (Oseo 4:11) Neʼe ui e Daniel ʼae neʼe tou palalau ki ai ʼi muʼa atu: “Neʼe au tuʼania fau pea mo au tukugakoviʼi pe ia au totonu. Moʼo tauʼi te aluʼaga ʼaia, neʼe au inu. Kae neʼe ʼasili age ʼoku fihifihia. Neʼe mole kei hoku ʼu kaumeʼa, pea neʼe au meʼa noaʼi ia au totonu.” Kae kotea ʼae neʼe tokoni kia Daniel? ʼE ina ui: “Neʼe au mahino leva neʼe tonu ke au falala kia Sehova, kae mole ki te kava. Neʼe feala ai leva ke au tauʼi ʼoku fihifihia.” ʼEi, ʼe loto tuʼumaʼu pe ia Sehova ke tokoni mai tatau aipe pe ʼe tou manatu ʼe mole he puleʼaki ki totatou aluʼaga.—Flp. 4:​6, 7; 1 Pet. 5:7.

Kapau ʼi ʼihi temi ʼe ke inu kava, ʼe lelei ke ke fai te ʼu fehuʼi ʼaeni ke ke iloʼi ai pe ʼe ʼi ai ni fetogi ʼe tonu ke ke fai: “Kua palalau mai koa he tahi ʼo toku famili peʼe ko hoku kaumeʼa lelei he ʼe tuʼania ʼo ʼuhiga mo taku inu?” Kapau koia, ʼe lagi heʼeki ke iloʼi, kae kua ke fakatuputupu he agamahani ʼe fua kovi anai kia koe. “Kua lahi age koa taku inu kava ʼi taku inu mahani?” Ko te aluʼaga ʼaia ʼe hoko ki he tahi ʼe lagi manatu ʼe mole popula ia ki te kava, kae ʼe liliu pe anai ʼo popula ki ai. “ ʼE faigataʼa koa haku mole inu lolotoga ni ʼaho peʼe fualoa age la?” Kapau ko ia, ʼe ha ai kua ke mahani ʼi te inu kava, peʼe kua ke popula ki ai. ʼE lagi ʼaoga anai ke tokoni atu he toketa ke ke tauʼi te fihifihia ʼaia.

Ko ʼihi Kilisitiano ʼe natou filifili ke mole natou inu he moʼi kava ʼuhi ko te ʼu fihifihia ʼae ʼe tupu mai ai. Ko ʼihi ʼe mole natou inu heʼe mole natou leleiʼia te huʼa kava. Kapau ʼe filifili  e hou kaumeʼa ke mole inu, ke ke agalelei ʼo fakaʼapaʼapa ki tana tonu pea ʼaua naʼa ke valoki ia ia.

Peʼe lagi ke fakapotopoto ʼo fakatuʼakoi tau inu. ʼE lagi fakatuʼakoi e he Kilisitiano te lahi ʼo te kava ʼae ka ina inu. Peʼe ko te ʼu lakaga ʼae ka inu ai anai, lagi tuʼa tahi ʼi te vahaʼa peʼe fakasiʼisiʼi tana inu ʼi te ʼu temi kai. ʼE filifili e ʼihi te faʼahiga kava ʼae ka natou inu. Ohage la ʼe natou inu fakapotopoto anai te vino mo te piele, kae fakafisi ki te ʼu kava malohi peʼe ko ʼae neʼe huʼi. Ka kua fakatuʼu e he tahi he ʼu tuʼakoi ʼo ʼuhiga mo tana inu kava, ʼe faigafua age leva kia ia hana mulimuli ki ai. Pea ʼe mole ufiufi anai he Kilisitiano kua fotufotuʼa fakalaumalie mo kapau ʼe ina fai te ʼu tonu ʼaia pea mo lotomalohi ʼo mulimuli ki ai.

ʼE toe maʼuhiga ke ke manatuʼi te aluʼaga ʼo ʼihi. ʼE ui ia Loma 14:21: “ ʼE lelei ke mole ke kai he kanoʼi manu peʼe ke inu he moʼi vino peʼe ke fai he meʼa ʼe feala ke tukia ai tou tehina.” ʼE feafeaʼi hau mulimuli ki te tokoni ʼaia? Fakaha te ʼofa fakatautehina. Kapau ʼe ke manatu ʼe feala ke tukia hou tehina ʼuhi ko te kava, pea ko tou ʼofa ʼae ia ia ʼe ina uga anai koe ke mole ke inu kava ʼi te temi ʼaia. ʼE ke fakaha ai tau tokaga pea mo fakaʼapaʼapa ki ʼou tehina he ʼe ke fakamuʼamuʼa te ʼu meʼa ʼae ʼe lelei kia natou, kae mole ko ʼae ʼa koe.—1 Ko. 10:24.

Pea neʼe lagi fakatuʼu e te puleʼaga ni lao pea ʼe fakalogo ki ai te kau Kilisitiano. Ohage la ko he lao ʼe fakaha ai te taʼu ʼae ʼe gafua ai ki he tahi ke inu kava. Peʼe ko he lao ʼe tapuʼi ai te uli motoka ʼa he tahi peʼe ke ina fakaʼaogaʼi he ʼu masini mo kapau neʼe inu kava.—Loma 13:​1-5.

Neʼe lahi te ʼu meʼa ʼofa taulekaleka neʼe foaki mai e Sehova. Pea ʼe kau ai te fealagia ʼae ke tou filifili pe ʼe tou fakaʼaogaʼi feafeaʼi anai te ʼu meʼa ʼofa ʼaia. Ohage la ko tatatou filifili te meʼa kai peʼe ko te meʼa inu. ʼOfa pe ke ha ʼi te ʼu tonu ʼae ʼe tou fai ʼe maʼuhiga kia tatou te fakaʼaogaʼi ʼo totatou loto faʼitaliha moʼo fakafiafiaʼi tatatou Tamai ʼae ʼi selo.