ʼI te tahi ʼaho neʼe sioʼi e he tuagaʼane ʼe maʼuli ʼi Niusila, te viteo ʼe fakamahino ai ʼe manavaʼofa ia Sehova pea ʼe ina toe fakaha ia tona manavaʼofa. (Esa. 63:​7-9) Pea neʼe fai leva e te tuagaʼane te tonu ʼae ke ina maʼuliʼi te ʼu meʼa ʼae neʼe ina ako. Ki muli age ʼi te ʼaho pe ʼaia, neʼe alu ʼo faifakatau pea neʼe felaveʼi mo he fafine ʼe mole hona nofoʼaga, ʼe maʼuli ʼi te ʼala. Neʼe fehuʼi age e te tuagaʼane pe ʼe loto ke ina toʼo hana meʼa kai. Neʼe tali lelei e te fafine. ʼI te toe liliu mai ʼa te tuagaʼane neʼe ina ʼavage ki te fafine tana meʼa kai pea neʼe ina toʼo te faigamalie ʼae ke palalau ki ai ʼo ʼuhiga mo Sehova, ʼo ina fakaha age te kiʼi pepa lotu ko tona kupu taki “ ʼE Gata Anai Koa Te Mamahi?”

Neʼe fakamahino age e te fafine mo tagi, neʼe lahilahi ake ʼi te moʼoni kae kua lauʼi taʼu tana kua mavae. Kae heʼeki faʼa fualoa, neʼe faikole kia Sehova ʼo kole age tana tokoni ke feala ai hana toe liliu kia te ia. Neʼe foaki age e te tuagaʼane hana Tohi-Tapu pea neʼe nā fakatuʼutuʼu ai ke fai hana ako Tohi-Tapu. a

Ohage ko Sehova, ʼe feala ke tou fakaha te manavaʼofa ki totatou famili, ʼotatou kaumeʼa, peʼe ko ʼotatou tehina mo tuagaʼane. Pea ʼe toe feala ke tou toʼo te ʼu faigamalie fuli ke tou palalau ai mo te hahaʼi ʼo ʼuhiga mo te Tohi-Tapu.