Tou Gāue ʼi Te “Gāueʼaga” ʼi Muʼa ʼo Te Taʼukai

KO TE ʼu tisipulo ʼo te Faiako Lahi neʼe nātou punamaʼuli. Neʼe fakamatala e Sesu te hisitolia nounou ʼo ʼuhiga mo te pulapula lelei pea mo te vao kovi. ʼE kau te lea fakatātā ʼaia ʼi te ʼu lea fakatātā ʼaē neʼe ina fai ʼi te ʼaho ʼaia. ʼI te ʼosi ʼo tana fai fakamatala ʼaia, tokolahi ia nātou ʼaē neʼe fagono neʼe nātou mavae. Kae neʼe ʼiloʼi e tana ʼu tisipulo ʼe ʼi ai te faka ʼuhiga makehe ʼo tana ʼu lea fakatātā​—⁠tāfito te lea fakatātā ʼo ʼuhiga mo te pulapula lelei pea mo te vao kovi. Neʼe nātou ʼiloʼi ko Sesu neʼe mole ko he tagata ʼe ina fakamatala pe he ʼu hisitolia ʼe lelei.

ʼE fakahā mai e Mateo te fehuʼi ʼaē neʼe nātou fai: “Fakamahino mai kia mātou te lea fakatātā ʼaē ʼo te vao kovi ʼi te gāueʼaga.” Moʼo tali kiai, neʼe fakamahino age e Sesu te lea fakatātā, ʼo ina fakakikite ʼe tuputupu anai he ʼapositasia lahi ʼi te lotolotoiga ʼo te hahaʼi ʼaē ka nātou lau ko ʼana ʼu tisipulo. (Mateo 13⁠:​24-30, 36-38, 43, MN ) Neʼe hoko te meʼa ʼaia, pea neʼe mafola  vave te ʼapositasia ʼi te ʼosi mate ʼa te ʼapositolo ko Soane. (Gaue 20⁠:​29, 30; 2 Tesalonika 2⁠:​6-12) Neʼe lahi ʼaupito te hahaʼi ʼaē neʼe nātou tō ki te ʼapositasia, koia neʼe tō lelei ai te fehuʼi ʼaenī ʼa Sesu, ia Luka 18⁠:8: “Ka haele mai anai te Foha o te tagata, pe mau anai e ia te tui i te kelekele?”

Ka haʼele mai anai Sesu pea ʼe ko te fakaʼiloga anai ʼo te kamata ʼo “te taukai” ʼa te kau Kilisitiano ʼaē ʼe nātou hage ko te ʼu pulapula lelei. ʼE ko te fakaʼiloga ʼaia ʼo te ‘fakaʼosi ʼo te tuʼu ʼo te ʼu faʼahiga meʼa ʼaenī,’ ʼaē neʼe kamata ʼi te taʼu 1914. Koia ʼe mole tou punamaʼuli ai ki te fia ʼiloʼi e ʼihi hahaʼi te moʼoni ʼo te Tohi-Tapu ʼi te temi ʼaē neʼe iku ai ki te kamata ʼo te taʼukai.​—⁠Mateo 13⁠:⁠39.

Kapau ʼe tou fakasiosio te fakamatala ʼo te hisitolia, pea ʼe hā lelei ai, tāfito talu mai te 15 sēkulō, neʼe hoha te fakakaukau ʼa te hahaʼi, māʼia mo te hahaʼi tokolahi ʼi te Keletiate ʼaē neʼe nātou hage ko he ʼu “pulapula lelei,” peʼe nātou hage ko he kau Kilisitiano. Neʼe kua maʼu gafua te Tohi-Tapu pea mo te ʼu Tohi-Tapu ʼaē ʼe ʼi ai te ʼu tānakiʼaga ʼo te ʼu kupu, pea ko te hahaʼi ʼaē ʼe totonu tonatou loto, neʼe nātou kamata vakavakaʼi fakalelei ia te Tohi-Tapu.

ʼE Gigila Te Mālama

ʼI te ʼu hahaʼi ʼaia, neʼe ʼi ai te tagata ʼi te kamata ʼo te 19 sēkulō, neʼe ko Henry Grew (1781-1862), mai Birmingham, ʼi Pilitania. ʼI tona taʼu 13, neʼe folau mo tona famili ʼo fakalaka ʼi te tai ʼo Atlantique ʼo nātou ʼolo ki Amelika, pea nātou tau kiai ʼi te ʼaho 8 ʼo Sūlio 1795. Neʼe nātou nonofo ʼi Providence, ʼi Rhode Island. Neʼe fakahū e tana ʼu mātuʼa ki tona loto te ʼofa ʼaē ki te Tohi-Tapu. ʼI te taʼu 1807, ʼi tona taʼu 25, neʼe kole age kia Grew ke pasitea ʼi te ’Ēkelesia ʼo te kau Baptistes ʼi Hartford, ʼi Connecticut.

Neʼe ina fakahoko fakalelei tona ʼu maʼua ʼaē ko te faiako, pea neʼe faiga ke tokoni ki te hahaʼi ke nātou mulimuli ki te Tohi-Tapu. Kae neʼe tui papau ia ʼe tonu ke taupau ia te kokelekasio ke maʼa mai te hahaʼi agahala. ʼI ʼihi temi, ko ia mo te tahi ʼu tagata pule ʼo te lotu neʼe nātou fakamavae te hahaʼi ʼaē neʼe fai folonikasio peʼe nātou fai he ʼu aga ʼe mole maʼa.

Neʼe ʼi ai te tahi ʼu fihifihia ʼi te lotu neʼe lotohoha ai. Neʼe ʼi ai te ʼu tagata neʼe mole kau ki te lotu kae neʼe nātou fai ʼihi gāue ʼo te lotu pea mo nātou takitaki te ʼu kauhiva. Neʼe toe vote mo te  ʼu tagata ʼaia ʼo ʼuhiga mo te ʼu meʼa ʼo te kokelekasio, pea neʼe nātou takitaki te tahi ʼu faʼahi ʼo te lotu. ʼO fakatafito ki te pelesepeto ʼaē ʼe mole tonu ke nātou kau ki te mālama, neʼe faka tui mālohi ia Grew ʼe gata pe ki te ʼu tagata agatonu ʼaē ʼe tonu ke nātou fakahoko te ʼu gāue ʼaia. (2 Kolonito 6⁠:​14-18; Sakopo 1⁠:27) ʼI tana manatu, neʼe mole ko he aga fakaʼapaʼapa ke hiva he ʼu hahaʼi heʼe tui he ʼu fakavikiviki ki te ʼAtua. ʼUhi ko te faʼahi ʼaia, ʼi te taʼu 1811, neʼe mole kei tali e te lotu ia Henry Grew. Ko te tahi ʼu hahaʼi ʼaē neʼe manatu ohage ko ia neʼe nātou mavae ʼi te lotu ʼi te temi ʼaia.

ʼE Mole Kau ʼi Te Keletiate

Ko te kūtuga ʼaia, ʼo kau ai mo Henry Grew, neʼe nātou kamata ako te Tohi-Tapu ʼaki te fakatuʼutuʼu ʼaē ke nātou fakaʼalu tahi tonatou maʼuli pea mo tanatou ʼu gāue mo te ʼu tokoni ʼaē ʼe maʼu ai. ʼI tanatou ako ʼaia, neʼe nātou mahino vave ai ki te moʼoni ʼaē ʼe tuʼu ʼi te Tohi-Tapu pea neʼe nātou fakahā ai te ʼu hala ʼo te Keletiate. Ohage la, ʼi te taʼu 1824, neʼe fai e Grew tana tohi neʼe ina fakafihiʼi ai te Tahitolu. Koutou fakatokagaʼi te lelei ʼo tana fakakaukau, ʼi te ʼu palalau ʼaenī ʼo tana tohi: “ ‘ ʼO ʼuhiga mo te ʼaho ʼaia, pea mo te hola ʼaia ʼe mole ʼiloʼi e he tagata, mo te kau ʼaselo ʼaē ʼi te lagi, pea mo te ʼAlo, gata pe ki te TĀMAI.’ [Maleko 13⁠:32] Koutou fakatokagaʼi te fakahoahoa ʼaē ʼe tou sio ʼi henī. Te tagata, te kau ʼAselo, te ʼAlo, te Tāmai. . . . ʼE akoʼi mai e totatou ʼAliki ʼe ko te Tāmai tokotahi pe ʼaē ʼe ina ʼiloʼi te ʼaho ʼaia. Kae ʼe mole feala ke moʼoni te faʼahi ʼaia, mo kapau ohage ko tona ʼui e ʼihi, ko te Tāmai, mo te Folafola, pea mo te Laumālie Maʼoniʼoni ʼe ko he ʼu ʼipotasi e tolu kae ko he ʼAtua e tahi; koteʼuhi kapau ʼe tou mulimuli ki te [akonaki ʼaia, ʼaē ko te Tahitolu,] pea ko te . . . ʼAlo ʼe ina toe ʼiloʼi mo ia te ʼaho ohage ko te Tāmai.”

Neʼe fakahā e Grew te malualoi ʼa te kau takitaki lotu, pea mo te kau ofisie, ʼaē neʼe nātou lau ʼe nātou tauhi kia Kilisito. ʼI te taʼu 1828, neʼe ina tala fēnei: “ ʼE mole koa la faikehe, ki he Kilisitiano ʼe mavae mai tona kogafale neʼe ina hūfakiʼi ai tona ʼu fili, ʼosi ʼaia pea ʼe ina fakatotonu leva ki tana kau solia ke nātou hukiʼi ʼaki he fehiʼa lahi te ʼu mafu ʼo tonatou ʼu fili? ʼI te tahi faʼahi, ʼe lelei heʼe tatau tanatou mate mo te mate ʼo tonatou ʼAliki, kae ʼi te tahi faʼahi, ʼe nātou hoko kia ai? Neʼe hūfakiʼi e Sesu te hahaʼi ʼaē neʼe nātou matehi ia ia. Kae ko te kau Kilisitiano ʼe nātou matehi te hahaʼi ʼaē neʼe nātou hūfakiʼi.”

Neʼe toe tohi e Grew te ʼu palalau mālohi ʼaenī: “Ko ʼafea koa ʼaē ka tou tui ai ki te Māfimāfi, ki tana ʼui ʼaē ʼe mole lava ‘kākāʼi’ ia ia? Ko ʼafea koa ʼaē ka tou mahino ai ki te natula, mo te lelei ʼo te lotu maʼoniʼoni ʼaē ʼe ina fakamaʼua mai ke mole tou fai māʼia mo te ‘meʼa ʼaē ʼe hage ʼe kovi?’ . . . ʼE mole ko he laukovi koa ki te ʼAlo ʼo te tapuakina, ke ʼui e he tahi ʼe fakamaʼua e tana lotu ke hage ko he ʼaselo ʼi he tahi ʼaluʼaga, kae ʼi te tahi age ʼaluʼaga ʼe ina fakagafua ke hage ko he temonio?”

ʼE Mole Tou Maʼuʼuli Tuputupua

ʼI te ʼu taʼu ʼaia kae heʼeki maʼu te lātio pea mo te televisio, ko te meʼa tāfito ʼaē neʼe fakaʼaogaʼi e he tahi moʼo fakahā tana manatu, neʼe ko te tohi pea mo te tufa ʼo te ʼu nusipepa. ʼI te lagi taʼu 1835, neʼe fai e Grew te tohi maʼuhiga neʼe ina fakahā ai ko te ʼu akonaki ʼo te nefesi tuputupua pea mo te ʼifeli ʼe mole tuʼu ʼi te Tohi-Tapu. Maʼa ia ko te ʼu akonaki ʼaia ʼe nātou laukovi ki te ʼAtua.

Neʼe lahi te ʼu meʼa ʼaē neʼe hoko ʼaki te tohi ʼaia. ʼI te taʼu 1837, ʼi tona taʼu 40 ko George Storrs neʼe ina maʼu te tohi ʼaia ʼi te saliote afi. Neʼe tupu ia Storrs ʼi Lebanon, ʼi New Hampshire, pea neʼe nofo ʼi te temi ʼaia ʼi Utica, ʼi New York.

Neʼe ko he minisi neʼe lahi tona fakaʼapaʼapaʼi ʼi te lotu Méthodiste-Épiscopale. ʼI tana lau te tohi, neʼe punamaʼuli ʼaupito ʼi te lava fai ʼo he ʼu palalau mālohi feiā ʼo ʼuhiga mo te ʼu akonaki ʼo te Keletiate, ʼaē neʼe faka tui mālohi kiai ʼi muʼa atu. Neʼe mole ina ʼiloʼi pe ko ai ʼaē neʼe ina fai te tohi, pea hili kiai ni ʼu taʼu, ʼi te lagi 1844, neʼe felāveʼi ai mo Henry Grew he neʼe nā nonofo toko lua ʼi Philadelphie, ʼi Pennsylvanie. Kae neʼe vakavakaʼi e Storrs te faʼahi ʼaia lolotoga taʼu e tolu, pea neʼe palalau pe mo te hahaʼi lotu ki te faʼahi ʼaia.

Ki muli age, ʼi te mole lava fakafeagai he tahi ki te ʼu meʼa ʼaē neʼe ina ako, neʼe manatu ai e George Storrs neʼe mole feala ke agatonu ki te ʼAtua mo kapau ʼe haga nofo ʼi te Lotu Méthodiste. Neʼe mavae ʼi te taʼu 1840 pea neʼe ʼalu ki Albany, ʼi New York.

ʼI te kamata ʼo te fasiga taʼu mātala ʼo te taʼu 1842, lolotoga vāhaʼa e ono neʼe foaki e Storrs he ʼu alatike e ono neʼe ko tona kupu tāfito “ ʼE Mātou Fia ʼIloʼi​—⁠ʼE Maʼuʼuli Tuputupua Koa Te Kau  Agakovi?” Neʼe lahi ʼaupito te hahaʼi ʼaē neʼe nātou fia lau te tohi ʼaia, pea neʼe ina toe vakaʼi te ʼu alatike ʼaia ke feala hana toe tā, pea hili taʼu e 40, neʼe tufa ia tohi e 200 000 ʼi Amelika pea mo Pilitania. Neʼe gāue fakatahi ia Storrs pea mo Grew ʼi te ʼu fai palalau ʼaē neʼe fai ʼo ʼuhiga mo te akonaki ʼo te nefesi tuputupua. Neʼe hoko atu te faka mafola lahi ʼa Grew ʼo aʼu ki tona mate ʼi te ʼaho 8 ʼo ʼAukusito 1862, ʼi Philadelphie.

Mole fualoa ʼi te ʼosi tā e Storrs te ʼu tohi e ono ʼaē neʼe tou talanoa kiai ʼi muʼa atu, neʼe ina fia ʼiloʼi te ʼu meʼa ʼaē neʼe faka mafola e William Miller, ʼaē neʼe fakatalitali ke sio mata ki te toe liliu mai ʼa Kilisito ʼi te taʼu 1843. Ia teitei taʼu e lua, neʼe faka mafola mālohi e Storrs te logo ʼaia ʼi te potu noleto-uesite ʼo Amelika. Hili te taʼu 1844, neʼe mole kei fai faka mafola ʼo ʼuhiga mo te ʼaho ʼo te toe liliu mai ʼa Kilisito, kae neʼe mole fakafisi ia mo kapau neʼe loto e ʼihi ke nātou fai he ʼu kumi ʼo ʼuhiga mo te ʼaho ʼaia. Neʼe tui Storrs kua vave hoko te toe liliu mai ʼa Kilisito, pea neʼe maʼuhiga ki te kau Kilisitiano ke nātou nonofo ʼalaʼala pea mo tokakaga ʼi te faʼahi fakalaumālie, ke nātou nofo teuteu ki te ʼaho ʼo te ʼaʼahi. Kae neʼe mavae ʼi te kūtuga ʼo Miller he neʼe nātou tali te ʼu akonaki ʼaē ʼe mole tuʼu ʼi te Tohi-Tapu, ohage ko te nefesi tuputupua, te fakaʼauha ʼo te mālama ʼi te afi, pea mo te mole he ʼamanaki ki te maʼuli heʼegata kia nātou ʼaē neʼe mamate kae neʼe mole nātou mālama lelei ki te ʼAtua.

Ko Te ʼOfa Ki Te ʼAtua ʼe Ina Uga Tatou Kiteā?

Neʼe mole leleiʼia e Storrs te manatu ʼa te kau Adventistes, he neʼe nātou ʼui ʼe fakatuʼuake anai e te ʼAtua te hahaʼi agakovi ke ina toe matehi nātou. Neʼe mole ina maʼu he fakamoʼoni e tahi ʼi te Tohi-Tapu ʼo ʼuhiga mo te manatu ʼaia pea mo he lagavaka feiā mai te ʼAtua. Ko Storrs pea mo tana ʼu kaugā gāue neʼe kehe ʼaupito tanatou ia manatu, pea neʼe nātou ʼui ʼe mole toe fakatuʼuake anai te kau mate. Logola neʼe faigataʼa tanatou fakamahino ʼihi vaega neʼe talanoa ki te fakatuʼuake ʼo te kau heʼe faitotonu, kae kia nātou neʼe ʼalutahi tanatou manatu mo te ʼofa ʼa te ʼAtua. Mole fualoa, pea nātou mahino lahi age leva ʼo ʼuhiga mo te fakatuʼutuʼu ʼa te ʼAtua.

ʼI te taʼu 1870, neʼe mahaki kovi ia Storrs pea neʼe mole gāue lolotoga ni ʼu māhina. Lolotoga te temi ʼaia, neʼe ina toe vakaʼi te ʼu meʼa fuli ʼaē neʼe ina ako ʼi tona ʼu taʼu e 74. Neʼe mahino ai kia ia, neʼe mole ina tokagaʼi te koga maʼuhiga ʼo te fakatuʼutuʼu ʼa te ʼAtua ki te malamanei, ohage ko tana hā ʼi te fuakava mo Apalahamo​—⁠‘ ʼe tapuakina anai te ʼatu famili fuli ʼo te kele koteʼuhi neʼe fakalogo Apalahamo ki te leʼo ʼo te ʼAtua.’​—⁠Senesi 22⁠:18; Gaue 3⁠:⁠25.

Neʼe ko he manatu foʼou ʼaia kia ia. Kapau neʼe tonu ke tapuakina ‘te ʼatu famili fuli pe,’ pea neʼe mole tonu koa ke logo te hahaʼi fuli ki te logo lelei? ʼE feafeaʼi anai hanatou logo kiai? Neʼe mole koa kua mamate te lauʼi miliona hahaʼi? ʼI tana  vakavakaʼi fakalelei te Tohi-Tapu, neʼe mahino ai kia ia ko kalasi e lua ʼo te hahaʼi “agakovi” ʼaē kua mamate: te hahaʼi ʼaē neʼe nātou fakafisi ki te ʼofa ʼo te ʼAtua, pea mo te hahaʼi ʼaē neʼe mamate kae neʼe mole nātou ʼiloʼi te ʼAtua.

Neʼe manatu Storrs, ko te kūtuga fakamuli ʼaia ʼe tonu anai ke fakatuʼuake, ke feala hanatou maʼu te ʼu lelei ʼo te sakilifisio faitotogi ʼa Kilisito Sesu. Ko nātou ʼaē ka nātou tali anai te faʼahi ʼaia ʼe nātou maʼuʼuli anai ʼo heʼegata ʼi te kele. Ko nātou ʼaē ka fakafisi kiai ʼe fakaʼauha anai nātou. Ei, neʼe tui ia Storrs ʼe fakatuʼuake anai e te ʼAtua te hahaʼi ʼo foaki kia nātou fuli he ʼamanaki. Pea ʼe mole mate anai he tahi ʼuhi ko te agahala ʼa Atama, gata pe kia Atama! Kae e feafeaʼi ʼo ʼuhiga mo nātou ʼaē ʼe maʼuʼuli lolotoga te toe liliu mai ʼa te ʼAliki ko Sesu Kilisito? Neʼe mahino leva kia Storrs ʼe tonu ke fakahoko he gāue fai faka mafola ʼi te malamanei katoa ke logo kiai te hahaʼi fuli. Neʼe mole ina ʼiloʼi lelei peʼe lava fakahoko feafeaʼi anai te gāue ʼaia, kae ʼaki tana tui, neʼe ina tohi fēnei: “Ko te tokolahi, ʼe mole nātou tui mo kapau ʼe mole nātou lava sio peʼe feafeaʼi te fakahoko ʼo he meʼa, ohage ʼe mole lava fakahoko e te ʼAtua te faʼahi ʼaia, heʼe mole nātou sio peʼe ina fai feafeaʼi.”

Neʼe mate ia George Storrs ʼi Tesepeli 1879, ʼi tona ʼapi ʼi Brooklyn, ʼi New York, neʼe mole tuʼu mamaʼo mo te koga meʼa ʼaē ka liliu ki muli age, ko te potu tāfito ʼaē ka fakatuʼutuʼu ai te fai faka mafola faka malamanei, ʼaē neʼe ina fakaʼamu fakatomuʼa kiai.

Neʼe ʼAoga He Mālama ʼe Lahi Age

Neʼe mahino lelei koa te ʼu tagata ʼaia ohage ko Henry Grew pea mo George Storrs ki te moʼoni ohage ko tatou ia ʼaho nei? Kailoa. Neʼe nā ʼiloʼi neʼe tonu ke nā faiga lahi, ohage ko tona ʼui fēnei e Storrs ʼi te taʼu 1847: “ ʼE lelei ke tou manatuʼi neʼe hoki tou mavae mai te ʼu temi ʼaē neʼe tou maʼuʼuli ai ʼi te fakapōʼuli faka lotu; pea ʼe mole tonu ke mata faikehe mo kapau ʼe tou fakatokagaʼi ʼe kei tou faka tui ki ʼihi ‘akonaki ʼo Papiloni’ ʼe ko te moʼoni.” Ohage la, neʼe loto fakafetaʼi ia Grew ki te totogi ʼaē neʼe foaki e Sesu, kae neʼe mole mahino kia ia neʼe ko he “totogi ʼe tatau,” ko tona faka ʼuhiga neʼe foaki te maʼuli haohaoa ʼo Sesu moʼo fetogi te maʼuli haohaoa ʼo Atama ʼaē neʼe ina pulihi. (1 Timoteo 2⁠:⁠6) Tahi ʼaē meʼa neʼe hala te manatu ʼa Henry Grew, he neʼe ina faka tui ʼe tou sio mata anai ki te toe liliu mai ʼa Sesu pea mo tana ʼafio ʼi te kele. Kae neʼe hoha ia Grew ʼo ʼuhiga mo te tāpuhā ʼo te huafa ʼo Sehova, kae neʼe tokosiʼi te hahaʼi ʼaē neʼe nātou tokaga ki te faʼahi ʼaia talu mai te lua sēkulō ʼo totatou temi.

ʼO toe feiā mo George Storrs, neʼe mole tonu tana mahino ki ʼihi puani maʼuhiga. Neʼe ina ʼiloʼi te ʼu loi ʼaē neʼe faka mafola e te lotu, kae ʼi ʼihi temi neʼe kehe ʼaupito tana ʼu manatu. Ohage la, ʼi tana lagi ʼita lahi ki te manatu ʼo te lotu orthodoxe ʼo ʼuhiga mo Satana, neʼe fakafisi Storrs ki te ʼui ʼaē ko te Tevolo ʼe maʼuli moʼoni. Neʼe fakafisi ki te Tahitolu; kae ʼo teitei aʼu ki tona mate, neʼe loto mahalohalo ʼo ʼuhiga mo te laumālie maʼoniʼoni peʼe ko he tahi peʼe kailoa. ʼI te kamata, neʼe ʼamanaki e George Storrs ʼe fakapulipuli anai te toe liliu mai ʼa Kilisito, kae ki muli age neʼe manatu ia ʼe hā mai anai. Kae ʼe tou tokagaʼi,  ko te ʼu tagata ʼaia e lua neʼe nā agatonu pea mo fakamalotoloto, pea neʼe nā ōvi ʼaupito ki te moʼoni.

Ko te “gāueʼaga” ʼaē neʼe talanoa kiai ia Sesu ʼi te lea fakatātā ʼo te vao kovi pea mo te pulapula lelei neʼe mole heʼeki tokalelei ki te taʼukai. (Mateo 13⁠:​38, MN ) Ko Grew, mo Storrs pea mo ʼihi atu neʼe nātou gāue ʼi te “gāueʼaga” moʼo teuteuʼi te taʼukai.

Ko Charles Taze Russell, ʼaē neʼe ina kamata tā te nusipepa ʼaenī ʼi te taʼu 1879, neʼe ina tohi fēnei ʼo ʼuhiga mo tana ʼu ʼuluaki taʼu: “Neʼe foaki mai e te ʼAliki kia tatou te ʼatu ʼu tokoni ke feala hatatou ako Tana folafola, ʼaē ʼe kau tāfito ai totatou tēhina ʼofaina mo matuʼa, ko George Storrs, ʼaē ʼaki tana ʼu palalau pea mo tana ʼu tohi neʼe tokoni lahi mai kia tatou; kae ʼaua naʼa tou kumi ʼi he ʼaho ke tou liliu ai ko he ʼu tisipulo ʼo ni ʼu tagata, logola tanatou agalelei pea mo tanatou popoto, kae tou liliu ko he ʼu ‘Tisipulo ʼo te ʼAtua ohage ko he ʼu fānau ʼofaina.’ ” Ei, neʼe lava maʼu e te kau ako fakamalotoloto ʼa te Tohi-Tapu te ʼu lelei mai te ʼu faiga ʼo te ʼu tagata ohage ko Grew pea mo Storrs, kae neʼe kei maʼuhiga ke vakavakaʼi te Folafola ʼa te ʼAtua, te Tohi-Tapu, ʼaē ko te matapuna totonu ʼaia ʼo te moʼoni.​—⁠Soane 17⁠:⁠17.

[Talanoa ʼo te pasina 26]

Te Tui ʼa Henry Grew

Neʼe valokiʼi te huafa ʼo Sehova, pea ʼe tonu ke tāpuhā.

Ko te ʼu akonaki ʼo te Tahitolu, mo te nefesi tuputupua, pea mo te ʼifeli neʼe ko he ʼu akonaki loi.

ʼE mole tonu ke kau te kokelekasio faka Kilisitiano ʼi te mālama.

ʼE mole tonu ke kau te kau Kilisitiano ki te ʼu tau faka puleʼaga.

ʼE mole fakalogo te kau Kilisitiano ki te lao ʼo te Sapato ʼaē ʼe fai ʼi te Moeaki peʼe ko te ʼAhotapu.

ʼE mole tonu ke kau te kau Kilisitiano ki te ʼu sosiete ʼaē ʼe gāue fakafūfū, ohage ko te sosiete ʼo te kau Francs-maçons.

ʼE mole ʼi ai he ʼu kalasi takitaki lotu pea mo maʼu tuʼulaga ʼi te kau Kilisitiano.

Ko te ʼu higoa faka tuʼulaga ʼe ko he ʼu meʼa ʼe fakafeagai kia Kilisito.

ʼE tonu ke maʼu ʼi te ʼu kokelekasio fuli he ʼu kolesi ʼo te kau tagata ʼāfea.

ʼE tonu ke maʼa te kau tagata ʼāfea ʼi tanatou ʼu aga fuli, ke ʼaua naʼa valokiʼi nātou.

ʼE tonu ke faka mafola e te kau Kilisitiano fuli te logo lelei.

ʼE ʼi ai anai he ʼu hahaʼi ʼe nātou maʼuʼuli ʼo talu ai ʼi te Palatiso ʼi te kele.

Ko te ʼu hiva faka Kilisitiano ʼe tonu ke nātou fakavikiviki kia Sehova pea mo Kilisito.

[Haʼuʼaga ʼo te pasina]

Photo: Collection of The New-York Historical Society/69288

[Talanoa ʼo te pasina 28]

Te Tui ʼa George Storrs

Neʼe foaki e Sesu tona maʼuli ohage ko he totogi maʼa te malamanei.

Neʼe mole heʼeki fakahoko te faka mafola ʼo te logo lelei (ʼi te taʼu 1871).

ʼUhi ko te faʼahi ʼaia, neʼe mole feala ke hoko te fakaʼosi ʼi te temi ʼaia (ʼi te taʼu 1871). Neʼe tonu ke ʼi ai he temi ʼi te ka haʼu moʼo fakahoko ai te fai faka mafola.

ʼE ʼi ai te ʼu hahaʼi ʼe nātou maʼuʼuli anai ʼo heʼegata ʼi te kele.

ʼE ʼi ai anai he fakatuʼuake ʼo nātou ʼaē neʼe mamate kae neʼe mole nātou ʼiloʼi te ʼAtua. Ko nātou ʼaē ka nātou tali te sakilifisio faitotogi ʼa Kilisito, ʼe nātou maʼu anai te maʼuli heʼegata ʼi te kele. Ko te hahaʼi ʼaē ka fakafisi kiai, ʼe fakaʼauha anai nātou.

Ko te ʼu akonaki ʼo te nefesi tuputupua pea mo te ʼifeli, ʼe ko he ʼu akonaki loi ʼe nātou fakalainoaʼi te ʼAtua.

Ko te Taumafa ʼo te Afiafi ʼa te ʼAliki, ʼe tonu ke fai ʼi te taʼu fuli ʼi te ʼaho 14 ʼo Nisani.

[Haʼuʼaga ʼo te pasina]

Photo: SIX SERMONS, by George Storrs (1855)

[Paki ʼo te pasina 29]

ʼI te 1909, ko C. T. Russell, ʼaē neʼe ina tā “Te Tule Leʼo ʼo Sione,” neʼe ʼalu ki Brooklyn, ʼi New York, ʼi Amelika