ʼE Faigataʼa Fau Koa He Faifakalelei Ki He Tahi?

ʼI TE māhina ʼo Sūlio ʼo te taʼu 2000, neʼe fai te lao e te Puleʼaga ʼo Californie ʼi Amelika moʼo fakamaʼamaʼa ki te hahaʼi tonatou ʼu maʼua, mo kapau ʼe nātou faifakalelei ki he tahi ʼe lotomamahi he neʼe ina fakaʼī ia nātou. He koʼe neʼe fai e te puleʼaga te lao ʼaia? Neʼe fakatokagaʼi ka hoko he fakaʼī, ʼi te agamāhani ʼe mole faifakalelei te hahaʼi naʼa ʼui e te telepinale ko nātou ʼaē ʼe hala. ʼI te tahi ia faʼahi, ʼe ʼiʼita te hahaʼi heʼe ʼi tanatou manatu neʼe tonu ke fai age he fakalelei, ʼo hoko ai he fihi lahi, kae neʼe ko he kiʼi fakaʼī veliveli pe.

ʼE mahino ia, ʼe mole fakamaʼua anai ke koutou faifakalelei mo kapau neʼe mole ko koutou ʼaē neʼe tupu ai te fakaʼī. Pea ʼi ʼihi temi ʼe tonu ke koutou fakapotopoto ʼo tokaga ki te ʼu meʼa ʼaē ka koutou palalau kiai. ʼE ʼui fēnei e te tāʼaga lea ʼāfea: “ ʼI te mahu ʼo te ʼu palalau ʼe mole masiva ai te agahala, kae ko ʼaē ʼe ina tāʼofi tona ʼu laugutu ʼe poto ia.” (Tāʼaga Lea 10:19; 27:12) Koia ʼe feala pe ke koutou aga fakaʼapaʼapa pea mo tokoni ki te hahaʼi.

Kae kua tokolahi te hahaʼi ʼi te temi nei ʼe mole kei nātou faifakalelei, tatau aipe mo kapau ʼe mole fakaaʼu te fihifihia ki te  telepinale. ʼI te loto fale ʼe feala ke meo fēnei te fafine, ‘Ko toku ʼohoana ʼe mole poto pe la ʼi te ʼui mai silou.’ ʼI te fale gāue ʼe feala ke lāuga fēnei he tagata pule gāue, ‘ ʼE mole fia lākahala pe la taku kau gāue, pea ʼe tahitahiga tanatou ʼui, silou.’ ʼI te faleako ʼe feala ke ʼui fēnei e te faiako, ‘ ʼE mole akoʼi age pe la ki te ʼu tamaliki ke nātou ʼui silou.’

ʼE lagi faigataʼa ki he tahi koteʼuhi ʼe ina tuʼaniaʼi naʼa mole tokagaʼi. ʼI tana tuʼania ʼaē naʼa mole tokagaʼi tana ʼu faifakalelei, ʼe lagi mole ina fakahā fakahagatonu anai te ʼu meʼa ʼaē ʼi tona loto. Pea ʼe feala ke faigataʼa te fakatokatoka mo kapau ko ia ʼaē neʼe lotomamahi ʼe fakamamaʼo mai ia ia ʼaē neʼe ina fakamamahiʼi ia ia.

ʼE lagi ko te tahi tupuʼaga ʼaē ʼe faigataʼa ai te faifakalelei koteʼuhi ʼe meʼa noaʼi e te hahaʼi te loto ʼo ʼihi. ʼE feala ke nātou manatu fēnei, ‘Tatau aipe peʼe ʼau faifakalelei kae ʼe mole puli anai te hala ʼaē neʼe kua ʼau fai.’ Māʼiape la mo ʼihi, ʼe nātou tuʼania ʼi te faifakalelei ʼuhi ko tona ʼu ikuʼaga. ʼE nātou feʼekeʼaki fēnei, ‘ ʼE ko ʼau anai koa ʼaē ka tukugakoviʼi pea mo fakaʼui mai anai koa ke ʼau foaki he totogi?’ Kae ko te tupuʼaga tāfito ʼaē ʼe mole tou faifakalelei ai heʼe tou fialahi. Ko he tahi ʼe mole ina fia ʼui “silou” ʼuhi ko tana fialahi fau, ʼe feala ke ina faka ʼuhiga fēnei ‘ ʼE mole ʼau fia tō lalo ʼo ʼui ko taku hala, heʼe pulinoa ai toku matagafua.’

Tatau aipe pe koteā te tupuʼaga, kae ʼe faigataʼa fau ki te tokolahi ia tanatou faifakalelei. Kae ʼe maʼuhiga koa ke tou faifakalelei? Koteā te ʼu fua lelei ʼo te faifakalelei?

[Paki ʼo te pasina 3]

“ ʼE mole akoʼi age pe la ki te ʼu tamaliki ke nātou ʼui silou”

[Paki ʼo te pasina 3]

“ ʼE mole fia lākahala pe la taku kau gāue”

[Paki ʼo te pasina 3]

“Ko toku ʼohoana ʼe mole poto pe la ʼi te ʼui mai silou”