‘Ke Lelei Takotou Aga ʼi Te ʼu Puleʼaga’
‘Ke Lelei Takotou Aga ʼi Te ʼu Puleʼaga’
“Koutou fakaʼapaʼapa ki te ʼu faʼahiga tagata kehekehe, koutou ʼoʼofa ki te famili katoa ʼo te ʼu tēhina.”—1 Petelo 2:17, MN.
1, 2. (a) Koteā te ʼu palalau neʼe fai e te tagata ʼe gāue ʼi te sulunale ʼo ʼuhiga mo te kau Fakamoʼoni ʼa Sehova? (b) He koʼe ʼe faiga e te kau Fakamoʼoni ʼa Sehova ke nātou taupau te ʼu lekula māʼoluga ʼo ʼuhiga mo te aga?
KUA hili kiai te ʼu taʼu, ko te tagata neʼe tonu ke ina tohi he alatike ʼi te sulunale ʼi Amarillo, ʼi Texas ʼi Amelika, neʼe ina ʼaʼahi te ʼu lotu kehekehe ʼo te kolo ʼaia pea neʼe ina fakamatala leva tana ʼu sivisivi ʼaia. Neʼe ʼi ai te kūtuga neʼe ina tokagaʼi tāfito. Neʼe ina ʼui fēnei: “Lolotoga taʼu e tolu, neʼe ʼau kau ki te ʼu fakatahi ʼa te kau Fakamoʼoni ʼa Sehova ʼaē ʼe fai ʼi te taʼu fuli ʼi te foʼi fale lahi ʼi Amarillo. ʼI taku fakatahi mo nātou, neʼe mole ʼau sio ki he tahi ʼe sikaleti, peʼe ina ʼinu hana foʼi piele peʼe tauvele. Ko taku hoki felāveʼi ʼaia mo te hahaʼi ʼe aga maʼa ʼaupito, mo lelei ʼaupito tanatou aga, mo teu fakaʼapaʼapa, pea mo agalelei.” ʼE tau fai te ʼu palalau feiā ʼi te ʼu sulunale ʼo ʼuhiga mo te kau Fakamoʼoni ʼa Sehova. He koʼe ʼe vikiʼi tuʼumaʼu te kau Fakamoʼoni e he ʼu hahaʼi ʼe mole nātou lotu tahi?
2 ʼI te agamāhani, ʼe vikiʼi te hahaʼi ʼa te ʼAtua koteʼuhi ʼe lelei tanatou aga. Logola ʼe mole kei mulimuli te hahaʼi ki te ʼu lekula, kae maʼa te kau Fakamoʼoni ʼa Sehova, ʼe ko he maʼua ke nātou fakalogo ki te ʼu lekula māʼoluga ʼo ʼuhiga mo te aga, ʼe ko he maʼua ia pea ʼe kau ki tanatou tauhi. ʼE nātou ʼiloʼi ʼe feala ʼaki tanatou aga ke maʼu e te hahaʼi he ʼu manatu lelei ʼo ʼuhiga mo Sehova pea mo tonatou ʼu tēhina, pea ʼe vikiʼi ai te moʼoni ʼaē ʼe nātou faka mafola ʼuhi ko te lelei ʼo tanatou aga. (Soane 15:8; Tito 2:7, 8) Koia tou vakaʼi peʼe tou lava taupau feafeaʼi he aga ʼe lelei pea mo tou haga lagolago ki te ʼu fakavikiviki ʼaē ʼe fai kia Sehova pea mo tana kau Fakamoʼoni, pea ʼe lava fua lelei feafeaʼi kia tatou mokā tou fai feiā.
ʼI Te Famili Kilisitiano
3. Koteā te ʼu tuʼutāmaki ʼaē ʼe tonu ke puipui mai ai te ʼu famili Kilisitiano?
3 Tou vakaʼi tatatou aga ʼi te famili. ʼI te tohi Die Neuen Inquisitoren: Religionsfreiheit und Glaubensneid (Ko Te ʼu Kumikumi Foʼou: Te ʼĀteaina ʼo Te Lotu Pea Mo Te Holi ʼo Te Lotu), neʼe fai e Gerhard Besier pea mo Erwin K. Scheuch, ʼe ʼui fēnei ai: “Maʼa [te kau Fakamoʼoni ʼa Sehova] ko te famili ʼe ko he faʼahi ʼe tonu ke puipui tāfito.” ʼE moʼoni te ʼu palalau ʼaia, pea ia ʼaho nei ʼe tonu ke puipui te famili mai te ʼu tuʼutāmaki kehekehe. Ko te ʼu fānau kua nātou “talagataʼa ki te ʼu mātuʼa,” pea ko te hahaʼi lalahi ʼe “heʼeʼofa” peʼe “heʼe fakatātāʼofi.” (2 Timoteo 3:2, 3, MN ) ʼI te loto famili, ʼe tā e te tagata tona ʼohoana, ʼe gaohi koviʼi e te ʼu mātuʼa tanatou ʼu fānau, pea ʼe agatuʼu te fānau, ʼo nātou palu te toloke pea mo fai te ʼu aga heʼeʼaoga, pea ʼe nātou feholaʼaki mai tonatou ʼu ʼapi. ʼE hoko fuli te ʼu faʼahi ʼaia kia nātou, ʼuhi ko te gāue ʼo te ‘laumālie ʼo te malamanei’ ʼaē ʼe fua kovi kia nātou. (Efeso 2:1, 2) ʼE tonu ke tou puipui totatou famili mai te laumālie ʼaia. ʼO feafeaʼi? ʼE tonu ke tou mulimuli ki te tokoni ʼa Sehova pea mo tana takitaki ʼaē ʼe ina fai ki te famili katoa.
4. Koteā te ʼu maʼua ʼe tonu ke fakahoko ʼi he famili Kilisitiano?
4 ʼE ʼiloʼi e te ʼu taumatuʼa Kilisitiano ʼe ʼi ai tonatou ʼu maʼua ʼi te faʼahi fakalaumālie, mo te faʼahi fakasino pea ʼo ʼuhiga mo te ʼu meʼa ʼi tonatou ʼu loto. (1 Kolonito 7:3-5; Efeso 5:21-23; 1 Petelo 3:7) ʼE ʼi ai te ʼu maʼua ʼa te ʼu mātuʼa Kilisitiano ki tanatou fānau. (Tāʼaga Lea 22:6; 2 Kolonito 12:14; Efeso 6:4) Pea ko te ʼu fānau Kilisitiano ʼaē ʼe lahilahi ake, ʼe nātou ako ʼe ʼi ai mo tonatou ʼu maʼua. (Tāʼaga Lea 1:8, 9; 23:22; Efeso 6:1; 1 Timoteo 5:3, 4, 8) Moʼo fakahoko te ʼu maʼua faka famili, ʼe tonu ke tou faiga lahi, mo tou lotomālohi, mo tou maʼu te ʼofa pea mo te loto faka sakilifisio. Kae kapau ʼe faiga lahi te famili katoa ke nātou fakahoko tonatou ʼu maʼua ʼaē neʼe foaki age e te ʼAtua, pea ʼe toe lahi anai mo te ʼu fua lelei kia nātou pea mo te kokelekasio. Ko te faʼahi ʼaē ʼe maʼuhiga tāfito, ʼe nātou vikiʼi ai te Tupuʼaga ʼo te famili, ia Sehova ʼAtua.—Senesi 1:27, 28; Efeso 3:15.
Te Fale Tautēhina Faka Kilisitiano
5. Koteā te ʼu lelei ʼe tou maʼu mokā tou fakatahi mo te ʼu tēhina pea mo tuagaʼane?
5 ʼI totatou ʼuhiga kau Kilisitiano, ʼe ʼi ai mo totatou ʼu maʼua ki totatou ʼu tēhina mo tuagaʼane ʼi te kokelekasio, pea mo nātou ʼaē ʼe ko “[totatou ʼu] tehina i te malama-nei.” (1 Petelo 5:9) ʼE maʼuhiga tatatou ʼu felogoi ʼi te kokelekasio ke tou tokalelei ai ʼi te faʼahi fakalaumālie. Ka tou fakatahi mo totatou ʼu tēhina Kilisitiano, ʼe fakaloto mālohiʼi tatou pea ʼe toe fafaga tatou ʼaki te meʼa kai fakalaumālie ʼaē ʼe foaki mai e “te kaugana agatonu mo fakapotopoto.” (Mateo 24:45-47) Kapau ʼe ʼi ai hotatou ʼu fihifihia, ʼe feala ke tou ʼolo ki totatou ʼu tēhina ke nātou foaki mai he ʼu tokoni fakapotopoto ʼe fakatafito ki te ʼu pelesepeto ʼo te Tohi-Tapu. (Tāʼaga Lea 17:17; Tagata Tānaki 4:9; Sakopo 5:13-18) ʼI te ʼu temi ʼaē ʼe tou faigataʼaʼia ai, ʼe mole līaki tatou e totatou ʼu tēhina. ʼE ko he tapuakina lahi tatatou kau ki te kautahi ʼa te ʼAtua.
6. ʼE fakahā feafeaʼi e Paulo ʼe ʼi ai totatou ʼu maʼua ki te kau Kilisitiano?
6 Kae ʼi te kokelekasio ʼe mole tou atalitali pe ke foaki mai, ʼe tonu ke tou toe foaki. Koia neʼe ʼui fēnei e Sesu: “ ʼE lahi age te fiafia ʼi takita foaki, ʼi takita tali.” (Gaue 20:35, MN ) Neʼe faka maʼuhigaʼi e te ʼapositolo ko Paulo te loto fia foaki ʼi tana tohi fēnei: “Tou taupau maʼu te tala ʼi te kaugamālie ʼo tatatou ʼamanaki, ʼo mole tou lotovaivai, koteʼuhi ʼe agatonu, ia ia ʼaē neʼe ina fakapapauʼi mai. Tou fetokagaʼaki ke tou uga ia tatou ki te ʼofa pea mo te ʼu gāue matalelei, ʼo mole tou tuku tatatou ʼu fakatahi, ohage ko te agamāhani ʼa ʼihi, kae ke tou fefakaloto mālohiʼaki, tāfito la he kua koutou sio ki te fakaōviōvi mai ʼo te ʼaho.”—Hepeleo 10:23-25, MN.
7, 8. ʼE tou fakahā feafeaʼi te loto fia foaki ʼi totatou kokelekasio pea mo te kau Kilisitiano ʼo te tahi ʼu fenua?
7 ʼI te kokelekasio, ʼe tou “tala . . . tatatou ʼamanaki” mokā tou fai he ʼu tali ʼi te ʼu fono peʼe mokā tou fai he kiʼi fai palalau ʼi te polokalama ʼo te fono. Ko te ʼu faiga ʼaia ʼe mahino ia ʼe ina fakaloto mālohiʼi totatou ʼu tēhina. ʼE tou toe fakaloto mālohiʼi nātou mokā tou fai palalau mo nātou ʼi muʼa ʼo te kamata ʼo te ʼu fono pea mo te hili ʼo te ʼu fono ʼaia. ʼE fakaloto mālohiʼi ai ia ia ʼaē ʼe vaivai, mo fakafimālieʼi ia ia ʼe mamahi pea mo ia ʼe mahaki. (1 Tesalonika 5:14) ʼE loto fia foaki te kau Kilisitiano ʼi te faʼahi ʼaia, pea ʼe ko te tupuʼaga la ʼaia ʼo te punamaʼuli ʼa te hahaʼi foʼou ki te ʼofa ʼaē ʼe tou femaʼuʼaki ia tatou.—Pesalemo 37:21; Soane 15:12; 1 Kolonito 14:25.
8 Kae ʼe mole tou fakahā pe totatou ʼofa ʼi totatou kokelekasio. ʼE tou toe fakahā ki totatou fale tautēhina ʼi te malamanei katoa. Koia ʼe maʼu te ʼu kesi ʼaiʼaga meʼa ʼofa ʼi te ʼu kokelekasio, moʼo tānaki ai te Falā Ki Te ʼu Fale ʼo Te Puleʼaga. ʼE lagi matalelei totatou Fale ʼo Te Puleʼaga, kae ʼe tou ʼiloʼi ko te ʼu lauʼi afe ʼu tēhina mo tuagaʼane ʼi te tahi ʼu fenua, ʼe mole honatou koga meʼa lelei ke nātou fakatahi ai. Ka tou lagolago ki te kesi ʼo te Falā Ki Te ʼu Fale ʼo Te Puleʼaga, pea ʼe tou fakahā ai totatou ʼofa kia nātou ʼaia tatau aipe peʼe mole tou ʼiloʼi ia nātou.
9. Koteā te tupuʼaga tāfito ʼo te feʼofaniʼaki ʼa te kau Fakamoʼoni ʼa Sehova?
9 He koʼe ʼe feʼofaniʼaki te kau Fakamoʼoni ʼa Sehova? Neʼe ko te fakatotonu ʼaia ʼa Sesu. (Soane 15:17) Pea ko tanatou feʼofaniʼaki ʼe ko te fakamoʼoni ʼaia ʼe maʼuli te laumālie ʼo te ʼAtua ia nātou takitokotahi pea mokā nātou fakatahi. Ko te ʼofa ʼe kau ki “te fua o te Laumalie.” (Kalate 5:22, 23) ʼAki te ako ʼa te kau Fakamoʼoni ʼa Sehova ia te Tohi-Tapu, mo tanatou kau ki te ʼu fono, pea mo tanatou faikole tuʼumaʼu ki te ʼAtua, ʼe nātou feʼofaniʼaki ai ʼo mole hage ko te malamanei ʼaē kua “momoko . . . te ofa o te tokolahi.”—Mateo 24:12.
Tatatou Aga ʼi Te Malamanei ʼAē ʼe Tou Maʼuʼuli Ai
10. Koteā totatou maʼua ki te malamanei?
10 Ko te talanoa ʼa Paulo ki “te tala ʼi te kaugamālie ʼo tatatou ʼamanaki” ʼe ina fakamanatuʼi mai te tahi maʼua. ʼE tou fakahā tatatou tui ia muʼa ʼo te hahaʼi, mokā tou kau ki te gāue ʼaē ko te faka mafola ʼo te logo lelei kia nātou ʼaē ʼe mole heʼeki liliu ko totatou ʼu tēhina Kilisitiano. (Mateo 24:14; 28:19, 20; Loma 10:9, 10, 13-15) Ko te fai faka mafola, ʼe ko he tahi ʼaia faʼahiga foaki ki te hahaʼi. Moʼo fai te gāue ʼaia, ʼe fakamaʼua kiai he temi, he mālohi, he teuteuʼi, mo he akoako, pea mo he fakaʼaogaʼi ʼo totatou ʼu koloā. Kae neʼe toe tohi fēnei e Paulo: “ ʼE ʼi ai toku maʼua ki te hahaʼi Keleka pea mo te hahaʼi Matāpule, ki te hahaʼi ʼatamai pea mo nātou ʼe vavale: koia la ʼaē ʼe ʼau toe lotomālohi ai foki ke ʼau fakahā atu te logo lelei kia koutou ʼaē ʼi Loma.” (Loma 1:14, 15, MN ) Ohage ko Paulo, ʼofa pe ke tou foaki lahi moʼo fakahoko totatou “maʼua” ʼaia.
11. Koteā te ʼu pelesepeto faka Tohi-Tapu e lua ʼe nā takitaki tatatou felogoi mo te malamanei, kae koteā ʼaē ʼe tonu ke tou fakamoʼoni kiai?
11 ʼE ʼi ai koa hotatou tahi ʼu maʼua kia nātou ʼaē ʼe mole ko he kau Kilisitiano? Ei. ʼE tou mahino “e mauli te malama-nei katoa i te Kovi.” (1 Soane 5:19) ʼE tou ʼiloʼi neʼe ʼui e Sesu ʼo ʼuhiga mo tana kau tisipulo: “ ʼE mole nātou kau ʼi te malamanei, ohage pe ko ʼau ʼe mole ʼau kau ʼi te malamanei.” Kae ʼe tou fakamoʼoni ʼe tou maʼuʼuli ʼi te malamanei, ʼe tou gāue ʼi te malamanei pea mo tou maʼu ai he ʼu faʼahiga lelei. (Soane 17:11, 15, 16, MN ) Koia ʼe ʼi ai totatou ʼu maʼua ki te malamanei. Koteā te ʼu maʼua ʼaia? Neʼe tali e te ʼapositolo ko Petelo ki te fehuʼi ʼaia. ʼI muʼa ʼo te fakaʼauha ʼo Selusalemi, neʼe faitohi ki te kau Kilisitiano ʼo Asie Mineure, pea ʼe ʼi ai te koga ʼo te tohi ʼaia ʼe tokoni mai ke tou fakapotopoto ʼi tatatou felogoi mo te malamanei.
12. He koʼe ʼe ʼui ko te kau Kilisitiano ʼe ko te “kau matāpule pea mo he ʼu hahaʼi ʼe nonofo faka temi,” pea koteā ʼaē ʼe tonu ke nātou fakamamaʼo mai ai?
12 Moʼo kamata, ʼe ʼui fēnei e Petelo: “ ʼU ʼofaina, ʼe ʼau fakaloto mālohiʼi koutou, ohage ko he kau matāpule pea mo he ʼu hahaʼi ʼe nonofo faka temi, ke koutou fakamamaʼo mai te ʼu holi ʼo te kakano, te ʼu holi ʼaia ʼaē ʼe fakafeagai ki te nefesi.” (1 Petelo 2:11, MN ) ʼI tona ʼaluʼaga fakalaumālie, ko te kau Kilisitiano moʼoni ʼe ko he “kau matāpule pea mo he ʼu hahaʼi ʼe nonofo faka temi,” heʼe maʼuhiga age ʼi tonatou maʼuli te ʼamanaki ki te maʼuli heʼegata—ʼi selo maʼa te kau fakanofo pea mo te palatiso ka haʼu ʼi te kele maʼa te “tahi ʼu ōvi.” (Soane 10:16, MN; Filipe 3:20, 21; Hepeleo 11:13, Apokalipesi 7:9, 14-17) Kae koteā te ʼu holi ʼo te kakano? ʼE ko te holi ʼaē ke kita maʼu koloā, te holi ʼaē ke kita ʼiloa, te ʼu holi ki he ʼu felāveʼi fakasino heʼeʼaoga, pea mo te ʼu holi ʼaē ʼe ʼui ko te “manumanu.”—Kolose 3:5; 1 Timoteo 6:4, 9; 1 Soane 2:15, 16.
13. ʼE lava feafeaʼi ki te ʼu holi ʼo te kakano ke “fakafeagai ki [totatou] nefesi”?
13 ʼE moʼoni ko te ʼu holi ʼaia ʼe “fakafeagai ki [totatou] nefesi.” ʼE nātou fakatupu kovi ki tatatou ʼu felogoi mo te ʼAtua pea ʼe feala ke tuʼutāmaki ai tatatou ʼamanaki (totatou “nefesi,” peʼe ko totatou maʼuli). Ohage la, kapau ʼe tou holi ki te ʼu aga heʼeʼaoga, ʼe lava feafeaʼi hatatou momoli “[totatou ʼu] sino ko he sakilifisio mauli mo maonioni pea mo taau ki te Atua”? Kapau ʼe tou tō ki te hele ʼaē ko te fia maʼu koloā, pea e feafeaʼi hatatou lava “kumi muʼa te puleʼaga”? (Loma 12:1, 2; Mateo 6:33, MN; 1 Timoteo 6:17-19) ʼE lelei age ke tou faʼifaʼitakiʼi ia Moisese, ke tou fakafisi ki te ʼu fakahala ʼo te malamanei, pea mo tou fakamuʼamuʼa te tauhi kia Sehova ʼi totatou maʼuli. (Mateo 6:19, 20; Hepeleo 11:24-26) ʼE ko he faʼahi maʼuhiga ʼaia ke tou maʼu ai he ʼu felogoi fakapotopoto mo te malamanei.
‘Ke Lelei Tatatou Aga’
14. ʼI totatou ʼuhiga kau Kilisitiano, he koʼe ʼe tonu ke tou faiga ke lelei tatatou aga?
14 Ko te tahi tokoni maʼuhiga ʼaenī ʼe fai e Petelo: “Ke ia koutou he aga ʼe lelei ʼi te lotolotoiga ʼo te ʼu puleʼaga, ke feala ʼi te temi ʼaē ʼe nātou laukovi ai kia koutou ohage ko he kau agakovi, ke nātou faka kolōliaʼi te ʼAtua ʼi te ʼaho ʼo tana ʼaʼahi, koteʼuhi ʼe nātou sio mata ki takotou ʼu gāue lelei.” (1 Petelo 2:12, MN ) ʼI totatou ʼuhiga Kilisitiano, ʼe tou faiga ke tou tuku he faʼifaʼitaki lelei. ʼE tou gāue lelei ʼi te faleako. ʼI totatou fale gāue, ʼe tou faʼa gāue pea mo agatonu—tatau aipe peʼe mole agalelei totatou patolo. ʼI te loto fale ʼaē ʼe mole lotu tahi, ʼe faiga lahi e te tagata peʼe ko te fafine ʼohoana Kilisitiano ke mulimuli ki te ʼu pelesepeto faka Kilisitiano. ʼE mole faigafua tuʼumaʼu, kae ʼe tou ʼiloʼi ko tatatou aga ʼaē ʼe lelei ʼe fakafiafia kia Sehova pea ʼi ʼihi temi, ʼe fua lelei kia nātou ʼaē ʼe mole ko he kau Fakamoʼoni ʼa Sehova.—1 Petelo 2:18-20; 3:1.
15. ʼE tou ʼiloʼi feafeaʼi ʼe lahi te ʼu palalau neʼe fai ʼo ʼuhiga mo te lekula māʼoluga ʼo te aga ʼaē ʼe maʼu e te kau Fakamoʼoni ʼa Sehova?
15 ʼE ʼiloga te fia taupau ʼa te kau Fakamoʼoni ʼa Sehova te ʼu lekula maʼuhiga, ʼi te ʼu palalau neʼe fai ʼo ʼuhiga mo nātou pea neʼe tā ʼi te ʼu sulunale kua hili kiai ni ʼu taʼu. Ohage la, ʼi te sulunale Italia Il Tempo neʼe tohi fēnei ai: “Ko te ʼu patolo ʼo te kau Fakamoʼoni ʼa Sehova ʼe nātou ʼui ko he ʼu hahaʼi gāue agatonu, pea ʼe lahi tanatou tui ohage ko he meʼa ʼe nātou tuʼania tuʼumaʼu kiai; kae ʼe tonu ke fakaʼapaʼapaʼi nātou ʼuhi ko tanatou aga.” Neʼe ʼui fēnei e te sulunale te Herald, ʼo Buenos Aires, ʼi Alasatine: “Neʼe fakahā lelei e te kau Fakamoʼoni ʼa Sehova lolotoga ni ʼu taʼu ʼe ko he ʼu hahaʼi gāue kinakina, mo gāue lelei, ʼe mole nātou maumau meʼa pea ʼe nātou manavasiʼi ki te ʼAtua.” Neʼe ʼui fēnei e Sergei Ivanenko, te tagata poto Lusia: “ ʼE ʼiloa te kau Fakamoʼoni ʼa Sehova ʼi te malamanei katoa ko he ʼu hahaʼi ʼe nātou fakalogo lelei ʼaupito ki te lao pea tāfito ʼe nātou totogi lelei tanatou ʼu tukuhau.” Neʼe ʼui fēnei e te fafine pule ʼo te fale ʼi Simipapue neʼe fakaʼaogaʼi e te kau Fakamoʼoni ʼa Sehova ki tanatou fakatahi: “Neʼe ʼau sio ki ʼihi kau Fakamoʼoni ʼe nātou tae te ʼu pepa pea mo fakamaʼa te ʼu fale vao. Neʼe mole maʼa feiā te fale ʼi muʼa atu. ʼE mulimuli takotou ʼu tūpulaga ki te ʼu pelesepeto. ʼE ʼau loto ke fakafonu te malamanei katoa e te kau Fakamoʼoni ʼa Sehova.”
Te Fakalogo ʼa Te Kau Kilisitiano
16. E feafeaʼi tatatou aga ki te ʼu puleʼaga ʼo te malamanei, pea koteā tona tupuʼaga?
16 ʼE toe talanoa ia Petelo ʼo ʼuhiga mo tatatou aga ki te ʼu puleʼaga ʼo te malamanei. ʼE ina ʼui fēnei: “ ʼUhi ko te ʼAliki koutou fakalogo kia meʼa fuli ʼaē neʼe fakatupu e te tagata: ki te hau, ʼuhi ko tona māʼoluga. Peʼe ki te ʼu kovana, koteʼuhi neʼe fekauʼi mai e te hau ke nātou fakatūʼa te kau agakovi, kae ke nātou vikiʼi ia nātou ʼaē ʼe nātou fai te meʼa ʼaē ʼe lelei. He koʼeni te finegalo ʼo te ʼAtua, ʼi takotou fai te aga ʼaē ʼe lelei, ʼe koutou tāpunuʼi ai te fakapōʼuli ʼo te hahaʼi vavale.” (1 Petelo 2:13-15, MN ) ʼE tou loto fakafetaʼi ki te ʼu lelei ʼaē ʼe tou maʼu mai te ʼu fakatuʼutuʼu faka puleʼaga, pea ʼe tou mulimuli ki te ʼu palalau ʼa Petelo, ke tou fakalogo ki tana ʼu lao pea mo totogi tatatou ʼu tukuhau. Logola ʼe tou fakamoʼoni neʼe fakagafua e te ʼAtua ki te ʼu puleʼaga, ke nātou fakatūʼa te hahaʼi ʼaē neʼe talagataʼa ki te lao, kae ʼe tou fakalogo tāfito ki te pule “ ʼuhi ko te ʼAliki.” ʼE ko te meʼa ʼaia ʼe loto kiai te ʼAtua. Pea tahi ʼaē meʼa, ʼe mole tou fia ʼulihi te huafa ʼo Sehova, mo kapau neʼe fakatūʼa tatou ʼuhi ko he meʼa kovi neʼe tou fai.—Loma 13:1, 4-7; Tito 3:1; 1 Petelo 3:17.
17. Ka fakafeagai mai kia tatou te ʼu “hahaʼi vavale,” koteā ʼaē ʼe feala ke tou falala kiai?
17 Kae ko ʼihi “hahaʼi vavale” ʼo te ʼu puleʼaga ʼe nātou fakatagaʼi tatou peʼe fakafeagai mai ʼi he tahi ʼu ʼaluʼaga—ohage la ʼe nātou fai he ʼu fasituʼu kia tatou. Kae ʼi te temi ʼaē kua loto kiai ia Sehova, ʼe faifai pea hā tanatou ʼu loi, pea ʼe fakagata moʼoni ai tonatou “fakapōʼuli.” Kae ʼaki tatatou aga faka Kilisitiano, ʼe tou ʼiloʼi ai peʼe ko ai ʼaē ʼe moʼoni. Koia ʼi te agamāhani, ko te ʼu puleʼaga ʼaē ʼe aga fakahagatonu ʼe nātou vikiʼi tatou heʼe tou fai te meʼa ʼaē ʼe lelei.—Loma 13:3; Tito 2:7, 8.
Te ʼu Kaugana ʼa Te ʼAtua
18. ʼI totatou ʼuhiga kau Kilisitiano, koteā te ʼu faʼahi ʼaē ʼe mole tonu ai ke tou fakaʼaogaʼi kovi totatou ʼāteaina?
18 ʼE fakatokagaʼi fēnei mai e Petelo: “Koutou hage ko he ʼu tagata ʼe ʼāteaina, ʼo mole koutou taupau tokotou ʼāteaina, ohage ko he meʼa moʼo ʼuʼufi te aga ʼaē ʼe kovi, kae ohage ko ni ʼu kaugana ʼa te ʼAtua.” (1 Petelo 2:16, MN; Kalate 5:13) Ia ʼaho nei, ko tatatou mālama ki te Tohi-Tapu ʼe ina faka ʼāteainaʼi tatou mai te ʼu akonaki ʼo te lotu hala. (Soane 8:32) ʼE tou maʼu te loto faʼifaʼitaliha, pea ʼe feala ke tou fili te ʼu meʼa ʼe tou loto kiai. Kae ʼe mole tonu ke tou fakaʼaogaʼi kovi totatou ʼāteaina ʼaia. Ka tou filifili totatou ʼu kaumeʼa, totatou ʼu mutuʼi meʼa, te faʼahiga faʼu ʼo totatou ʼulu, tatatou ʼu fakafiafia—ʼo feiā mo te kai pea mo te ʼinu—ʼe tou manatuʼi ko te kau Kilisitiano moʼoni ʼe ko he ʼu kaugana ʼa te ʼAtua, ʼo mole nātou fai pe te meʼa ʼaē ʼe nātou leleiʼia. ʼE tou fili ke tou tauhi kia Sehova kae mole tou kaugana ki tatatou ʼu holi ʼo te kakano, peʼe ko te ʼu aga peʼe ko te faʼahiga maʼuli ʼa te malamanei.—Kalate 5:24; 2 Timoteo 2:22; Tito 2:11, 12.
19-21. (a) ʼE tonu ke feafeaʼi tatatou aga ki te ʼu pule ʼo te malamanei? (b) Neʼe fakahā feafeaʼi e ʼihi tanatou “ ʼoʼofa ki te famili katoa ʼo te ʼu tēhina”? (c) Koteā totatou maʼua ʼaē ʼe maʼuhiga tāfito?
19 ʼE toe hoko atu fēnei e Petelo: “Koutou fakaʼapaʼapa ki te ʼu faʼahiga tagata kehekehe, koutou ʼoʼofa ki te famili katoa ʼo te ʼu tēhina, koutou manavasiʼi ki te ʼAtua, koutou fakaʼapaʼapa ki te hau.” (1 Petelo 2:17, MN ) ʼE tou fakaʼapaʼapa ki te ʼu hahaʼi ʼaia, koteʼuhi ʼe fakagafua e Sehova ʼAtua ke nātou fai tonatou ʼu tuʼulaga pule kehekehe. ʼE toe feala pe ke tou faikole ʼo ʼuhiga mo nātou, ke feala hatatou hoko atu totatou minisitelio ʼi te tokalelei pea ʼaki he pipiki mālohi ki te ʼAtua. (1 Timoteo 2:1-4) Kae ʼe tou toe “ ʼoʼofa ki te famili katoa ʼo te ʼu tēhina.” ʼE tou faiga tuʼumaʼu ke tou fai ki totatou ʼu tēhina Kilisitiano, te ʼu meʼa ʼaē ʼe lelei kae mole ko te ʼu meʼa ʼaē ʼe kovi.
20 Ohage la, ʼi te temi ʼaē neʼe mavetevete ai te fenua ʼo Afelika ʼuhi ko te fetauʼaki ʼa te hahaʼi ʼo te ʼu lanu kehekehe, neʼe makehe ʼaupito te aga ʼa te kau Fakamoʼoni ʼa Sehova. Neʼe tala fēnei e te sulunale Reformierte Presse ʼo Suisi: “ ʼI te taʼu 1995, neʼe feala ki te kautahi ʼo te African Rights . . . ke nātou fakamoʼoni neʼe kau te ʼu lotu fuli [ki te tau] gata pe ki te kau Fakamoʼoni ʼa Sehova.” Ko te kau Fakamoʼoni ʼa Sehova ʼaē ʼe nonofo ʼi te ʼu fenua tai ohage ko te Eulopa, ʼi tanatou logo ki te ʼu meʼa fakamataku ʼaia neʼe hoko, neʼe nātou foimo momoli te ʼu meʼa kai pea mo te ʼu meʼa faitoʼo ki tonatou ʼu tēhina pea mo te hahaʼi ʼo te fenua ʼaia neʼe lahi ai te maʼuli fakaʼofaʼofa ʼa te hahaʼi. (Kalate 6:10) Neʼe nātou mulimuli ki te ʼu palalau ʼaē ʼe tohi ia Tāʼaga Lea 3:27: “ ʼAua naʼa ke fakafisi te meʼa ʼaē ʼe lelei kia nātou ʼaē ʼe tonu ke fai ki ai, mokā ʼe feala ki tou nima ke ina fai te faʼahi ʼaia.”
21 Kae ʼe ʼi ai te maʼua ʼe maʼuhiga tāfito age ʼi tatatou fakaʼapaʼapa ki te ʼu pule pea mo te ʼofa ki totatou ʼu tēhina. Koteā te maʼua ʼaia? Neʼe ʼui fēnei e Petelo: “Koutou manavasiʼi ki te ʼAtua.” ʼE lahi age totatou ʼu maʼua kia Sehova ʼi totatou ʼu maʼua ki te tagata. ʼO feafeaʼi? Pea ʼe lava feafeaʼi hatatou fakafuafua lelei totatou ʼu maʼua ki te ʼAtua pea mo totatou ʼu maʼua ki te ʼu puleʼaga? ʼE tali anai ki te ʼu fehuʼi ʼaia te alatike ʼaē ka hoa mai.
Kei Koutou Manatuʼi Koa?
• Koteā te ʼu maʼua faka Kilisitiano ʼi te loto famili?
• ʼE tou lava fakahā feafeaʼi he loto fia foaki ʼi te kokelekasio?
• Koteā totatou ʼu maʼua ki te malamanei?
• Koteā te ʼu fua lelei ʼe tou maʼu mokā tou mulimuli ki te lekula māʼoluga ʼo ʼuhiga mo te aga?
[Fehuʼi]
[Paki ʼo te pasina 9]
ʼE tou lava maʼu feafeaʼi he fiafia lahi ʼi te famili Kilisitiano?
[Paki ʼo te pasina 10]
He koʼe ʼe feʼofaniʼaki te kau Fakamoʼoni ʼa Sehova?
[Paki ʼo te pasina 10]
ʼE lava feafeaʼi hatatou fakahā te ʼofa ki totatou ʼu tēhina tatau aipe peʼe mole tou feʼiloʼiʼaki lelei mo nātou?