ʼAua Naʼa Koutou Tuku Ke Faʼifaʼitaliha Takotou Tamasiʼi!
ʼAua Naʼa Koutou Tuku Ke Faʼifaʼitaliha Takotou Tamasiʼi!
MAI he moʼi kele ʼe hage ʼe mole ʼi ai hona ʼuhiga, ʼe feala ke fakaliliu e he tagata faʼu ipu kele ko he meʼa matalelei ʼe ʼi ai tona ʼaoga. Tokosiʼi te hahaʼi tufuga ʼe nātou fakaliliu mai he moʼi kele ʼe mole faʼa lahi ko he ʼu tuʼuga meʼa ʼaoga pea mo matalelei. Lolotoga te ʼu taʼu e lauʼi afe, neʼe maʼu e te hahaʼi mai te kau tagata faʼu ipu ia te ʼu ipu ʼinu, mo te ʼu pa meʼa kai, pea mo te ʼu pa kuka, mo te ʼu foʼi ipu tānaki meʼa, pea mo te ʼu foʼi ipu fakateuteu.
ʼE toe tokoni lahi foki te ʼu mātuʼa ki te sosiete ʼaki tanatou faʼufaʼu te agaaga pea mo te ʼulugaaga ʼo tanatou fānau. ʼI te Tohi-Tapu, ʼe fakatatau ia nātou takitokotahi ki te kele, pea neʼe tuku age e te ʼAtua ki te ʼu mātuʼa ia te gāue maʼuhiga ke nātou faʼufaʼu “te lahe” ʼo tanatou fānau. (Sopo 33:6; Senesi 18:19) Ohage pe ko te faʼu ʼo he ipu maka matalelei, ʼe mole ko he gāue faigafua te faiga ʼaē ke liliu he tamasiʼi ko he fotufotuʼa tagata peʼe fafine kua poto ʼi te takitaki ʼo tona maʼuli pea mo fakafuafua lelei te ʼu meʼa. Ko te taʼi fetogi ʼaia ʼe mole hoko fakapunamaʼuli feiā pe.
ʼE lahi te ʼu faʼahi ʼe nātou fakalotoʼi te ʼu loto ʼo tatatou ʼu fānau. Ko te meʼa ʼaē ʼe kovi heʼe ʼi ai ʼihi faʼahi ʼe nātou maumauʼi tatatou fānau. ʼE mole tuku anai e he tāmai peʼe ko he faʼe fakapotopoto ke faʼifaʼitaliha tana fānau, kae ʼe ina akoʼi anai “ki te ala ʼaē ʼe ʼaoga ki ai” ʼaki te tui papau ʼaē “ka matuʼa anai, pea ʼe mole fakamamaʼo anai ia mai ai.”—Tāʼaga Lea 22:6.
Lolotoga te temi loaloaga pea mo maʼuhiga moʼo akoʼi ai he tamasiʼi, ʼe tonu anai ki te ʼu mātuʼa Kilisitiano fakapotopoto ke nātou toʼo he temi moʼo pulihi ʼo te ʼu fakaneke ʼaē ʼe feala ke fua kovi ki te loto ʼo tanatou fānau. ʼE ʼahiʼahiʼi lahi anai tonatou ʼofa ʼi tanatou faʼa kātaki ʼo foaki ki te fānau ia “te ako, pea mo te fakatonutonuʼi mai te ako faka Kilisitiano.” (Efeso 6:4, The New English Bible ) Kae ʼe mahino ia ʼe faigafua age anai te gāue ʼa te ʼu mātuʼa mo kapau ʼe nātou kamata tautonu.
Ko He Kamataʼaga Tautonu
Ko te kau faʼu ipu ʼe nātou leleiʼia te gāue mo he moʼi kele ʼe faigafua tona feloleʼaki moʼo faʼu ʼaki he meʼa, pea mo feʼauga tona fefeka ke tuʼumaʼu mokā kua ʼosi te faʼu ʼo te ipu. ʼI te ʼosi fakamaʼa ʼo te kele, ʼe leleiʼia e te kau faʼu ipu hanatou gāueʼi te lahe ʼaia ʼi te ʼu māhina e ono ʼaē ʼe hoa mai kiai. ʼO feiā pe,
ko te temi lelei ʼaē ke kamata faʼufaʼu ai e te ʼu mātuʼa te loto ʼo tanatou fānau ʼe ko te temi ʼaē ʼe kei nātou fakalogo lelei ai pea mo akoʼi gafua ai ia nātou.ʼE ʼui e te kau popoto ʼe nātou sivisivi te agaaga ʼo te tamaliki, ko he tamasiʼi ʼi tona māhina valu kua māhani mo te lea ʼo tana ʼu mātuʼa, kua ʼi ai te faʼahiga noʼo ʼo ia mo tana ʼu mātuʼa, kua ina fakatuputupu he ʼu faʼahiga poto, pea kua kamata mamata ki te ʼu meʼa ʼi tona ʼu tafaʼaki. Ko te temi lelei ʼaē ke kamata faʼufaʼu ai tona loto ʼe ko te temi ʼaē ʼe kei veliveli ai. Ko he toe lelei ʼe maʼu anai e takotou tamasiʼi mo kapau, ohage ko Timoteo ʼe ‘ina ʼiloʼi te ʼu tohi taputapu talu mai tana kei veliveli’!—2 Timoteo 3:15. *
Ko te tamaliki ʼaē ʼe kei meamea ʼe nātou faʼifaʼitakiʼi tanatou ʼu mātuʼa. ʼO hilifaki atu ki tanatou faʼifaʼitakiʼi te ʼu meʼa ʼaē ʼe nātou logo kiai, mo te ʼu agaaga ʼo te ʼu mata, mo te ʼu gaūgaūe ʼo te ʼu nima, ʼe nātou ako te ʼofa, mo te lotoʼofa, mo te manavaʼofa mokā nātou sisio ʼe maʼuliʼi te ʼu kalitate ʼaia e tanatou ʼu mātuʼa. Kapau ʼe tou fia akoako te ʼu lao ʼa Sehova ki tatatou fānau, ʼe tonu muʼa ia ke tuʼu te ʼu fakatotonu ʼa te ʼAtua ʼi totatou ʼu loto. Ko te taʼi loto fakafetaʼi ʼaia ki te ʼu lao ʼa te ʼAtua ʼe ina uga anai te ʼu mātuʼa ke nātou palalau tuʼumaʼu ki tanatou fānau ʼo ʼuhiga mo Sehova pea mo tana Folafola. ʼE fakaloto mālohiʼi fēnei e te Tohi-Tapu: “Talanoa kiai mokā ke heka anai ʼi tou loto fale, mokā ke haʼele anai ʼi te ala, mokā ke takoto anai, pea mokā ke tuʼu ake anai.” (Teutalonome 6:6, 7) ʼE fakamatala e Francisco mo Rosa tanā fai te faʼahi ʼaia mo tanā ʼu tamaliki e lua. *
“ ʼI tuʼa atu ʼo te ʼu fai palalau ʼo te ʼaho fuli, ʼe ma faigaʼi ke ma palalau mo tamā ʼu tamaliki takitahi lolotoga te ʼu minuta e 15 ʼi te ʼaho fuli. Ka ma tokagaʼi he fihifihia, pea ʼe loaloaga anai te temi fai palalau—pea ʼe ʼi ai moʼoni te ʼu fihifihia. Ohage foki la, mole heʼeki faʼa fualoa ʼi te ʼosi ako ʼo tamā tama ʼaē kua taʼu nima, neʼe haʼu ʼo ʼui mai ʼe mole kei tui ia kia Sehova. Ko te meʼa ʼaē neʼe hoko, neʼe vāʼi ia ia e tona ʼu kaugā ako pea mo nātou ʼui age ʼe mole ʼi ai he ʼAtua.”
Neʼe mahino ia ki te ʼu mātuʼa ʼaia te ʼaoga ʼaē ke fakatuputupu ʼi te fānau ia te tui ʼaē ki tonatou Tupuʼaga. ʼE feala ke faʼufaʼu he tui feiā ki te fakaofoofo ʼo te ʼu meʼa ʼaē neʼe fakatupu e te ʼAtua. Koutou tokagaʼi te fia fāfā ʼa te tamaliki ki he manu, tanatou leleiʼia te toli ʼo te ʼu fisiʼi teu, peʼe ko te gaoʼi ʼi te ʼone ʼi te matatai! ʼE feala ke tokoni age te ʼu mātuʼa ke nātou fakapipiki te ʼu meʼa ʼaē neʼe fakatupu ki te Tupuʼaga. (Pesalemo 100:3; 104:24, 25) Ko te manavahe pea mo te fakaʼapaʼapa ʼaē ʼe nātou fakatuputupu ki te ʼu meʼa ʼaē neʼe fakatupu e Sehova ʼe feala ke nātou taupau maʼu ʼi tonatou maʼuli katoa. (Pesalemo 111:2, 10) ʼI tana mahino ki te meʼa ʼaia, ʼe lava fakatuputupu ʼi he tamasiʼi ia te fia fakafiafia ʼo te loto ʼo te ʼAtua pea ko te manavasiʼi ʼaē naʼa ina fakaloto mamahiʼi ia te ʼAtua. Ko te koga ʼaia ʼe feala pe anai ke ina uga ia ia ke ‘maliu mai te kovi.’—Tāʼaga Lea 16:6.
Logope te fia ʼiloʼi ʼa he tamasiʼi pea mo tana vave ʼaē ki te ako ʼo he meʼa, kae ki te fakalogo ʼe lagi ʼe mole ko he meʼa ʼe maʼu gafua e te tamaliki. (Pesalemo 51:5) ʼE lagi ʼi ʼihi temi ʼe nātou fia faʼifaʼitaliha peʼe nātou loto ke ʼavage te meʼa ʼaē ʼe nātou loto kiai. Kae ʼe tonu ki te ʼu mātuʼa ke nātou fakamaʼua ke mulimuli te fānau ki tanatou ʼu tonu, mo faʼa kātaki, pea mo fakatonutonuʼi ke ʼaua naʼa tauʼaka te ʼu aga ʼaia ʼi te loto ʼo te fānau. (Efeso 6:4) Ko te meʼa ʼaia neʼe hoko kia Phyllis mo Paul, ʼaē neʼe lelei tanā akoʼi tanā fānau e toko nima.
ʼE manatuʼi e Phyllis: “Logope ʼe tahi ʼalu pe te tamasiʼi mo tona natula, kae neʼe nātou tahi fia faʼifaʼitaliha. Neʼe faigataʼa, kae neʼe nātou toe mahino ai foki te faka ʼuhiga ʼo te kupuʼi palalau ‘kailoa.’ ” Neʼe tokagaʼi fēnei e Paul: “Neʼe ma tautau fakahā age te ʼu tupuʼaga ʼo te tonu ʼaē neʼe fai, mokā neʼe
kua nātou lava mahino kiai. Logope neʼe ma faigaʼi tuʼumaʼu ke ma agalelei, kae neʼe ma akoʼi age kia nātou ke nātou fakaʼapaʼapa ki tomā tuʼulaga pule ʼaē neʼe foaki mai e te ʼAtua.”Logola ʼe feala ke hoko he ʼu fihifihia ki he tamasiʼi ʼi tana kei veliveli, kae tokolahi te ʼu mātuʼa ʼe nātou tokagaʼi ko te temi ʼaē ʼe faigataʼa tāfito ai ʼe ko tona temi tūpulaga, ʼaē ʼe lahi ai te ʼu ʼahiʼahiʼi foʼou ʼe fai ki te tūpulaga ʼaē ʼe mole heʼeki fakapotopoto.
Ko Te Gāue Ke Malave Ki Te Loto ʼo Te Tūpulaga
ʼE tonu ke gāueʼi te kele e te tagata faʼu ipu ʼi muʼa ʼo tana liliu ʼo moamoa. Ke lahi hana gāue ki te moʼi lahe ʼaia, ʼe lagi ina fakapala ke malū pea ke faigafua tona gāueʼi. ʼO toe feiā mo te ʼu mātuʼa, ʼe tonu ke nātou gāue kinakina ke ʼaua naʼa liliu te loto ʼo te tūpulaga ʼo logogataʼa. ʼE mahino ia, ko tanatou meʼa gāue tāfito ʼe ko te Tohi-Tapu, ʼaē ʼe feala ke nātou fakaʼaogaʼi moʼo ‘fakatonutonuʼi, mo fakatokatoka ʼo te ʼu meʼa, pea mo teuteuʼi tanatou tamasiʼi ki te gāue lelei fuli pe.’—2 Timoteo 3:15-17.
Kae ʼe lagi mole tali anai e he tūpulaga he tokoni mai tana ʼu mātuʼa ohage ko tana fai ʼi te temi ʼaē neʼe kei veliveli ai. ʼE lagi kamata tokaga tāfito te kau tūpulaga ki ʼihi kau tūpulaga, ʼo lagi tōtō ai leva te ʼu felogoi fakahagatonu pea mo tuʼumaʼu mo tanatou ʼu mātuʼa. ʼE tonu ke lahi age te faʼa kātaki ʼa te ʼu mātuʼa pea mo popoto ʼi tanatou felogoi mo te fānau, ʼuhi heʼe mole kei tatau tanatou aga ki tanatou fānau pea ʼe fetogi te tūpulaga. Kua ʼi ai te ʼu fetogi ʼo te agaaga ʼo te sino pea mo te ʼu meʼa ʼe logoʼi e te tūpulaga. ʼE tonu ke ina fai he ʼu tonu pea mo fakatuʼutuʼu hona ʼaluʼaga ʼe fua ai ki tona maʼuli katoa. (2 Timoteo 2:22) Lolotoga te temi faigataʼa ʼaia, ʼe tonu ke poto ʼi te lolomi te mālohi ʼe lagi ina maumauʼi māmālie tona loto—ko te fakaneke ʼo te ʼu kaugā ako.
ʼE tahitahiga te ʼiloʼi atu aipe te fakaneke ʼaia ʼi he temi pe e tahi. Kae ʼe fai māhani ʼaki he ʼu tuʼuga palalau peʼe ko he ʼu ʼaluʼaga fakatupu lotovaivai. ʼE malave te faʼahi ʼaia ki te puani ʼaē ʼe vaivai ai te kau tūpulaga tokolahi—ko tanatou tuʼania ʼaē naʼa mole tali nātou e ʼihi tūpulaga. ʼI tana mole fia fakalogo ki tona leʼo ʼo loto pea mo tana loto ʼaē ke tali ia ia, ʼe lagi kamata lagolago anai he tūpulaga ki “te u mea i te malama-nei” ʼaē ʼe mulimuli kiai ʼihi tūpulaga.—1 Soane 2:15-17; Loma 12:2.
Moʼo faka lēsili kovi te ʼaluʼaga, ʼe lagi toe fakamālohiʼi anai te fakaneke kovi ʼaia ʼo tona ʼu kaugā ako ʼaki te ʼu meʼa ʼaē ʼe holi kiai tona loto agahala. ʼE feala pe ke fia holi te tamasiʼi ki he ʼu faʼahiga meʼa ʼaki te ʼu taʼi palalau ʼaenī “Fakafiafia koe,” pea ke “Fai te meʼa ʼaē ʼe ke loto kiai.” ʼE manatuʼi e María te meʼa ʼaē neʼe hoko kia ia: “Neʼe ʼau fakalogo ki te kau tūpulaga ʼaē neʼe fakatahi mo ʼau, neʼe nātou ʼui ʼe feala ki te kau tūpulaga ke nātou fakafiafia faʼifaʼitaliha, ʼo mole lauʼia te ʼu ikuʼaga. ʼI taku fia fai te ʼu meʼa ʼaē neʼe fai e toku ʼu kaugā ako, neʼe ʼau fai te ʼu meʼa neʼe kovi ʼaupito tona ʼu ikuʼaga.” ʼI tokotou ʼuhiga mātuʼa, ʼe koutou fia tokoni ki takotou tamasiʼi ʼaē kua tūpulaga ke ina tauʼi te ʼu fakaneke ʼaia, kae ʼe koutou lava fakahoko feafeaʼi te faʼahi ʼaia?
Tāʼaga Lea 20:5) ʼAki tana aga, ʼe lagi feala ai ke koutou tokagaʼi tona mamahi peʼe ko te ʼu meʼa ʼe fakatupu maveuveu kia ia. Koutou tali ki te ʼu meʼa ʼaē ʼe ʼaoga kiai kae neʼe mole ina tala fakahāhā atu, pea mo koutou ‘fakafimālieʼi tona loto.’—Kolose 2:2.
ʼAki takotou palalau pea mo takotou aga, koutou fakamoʼoni age ki ai ʼe koutou tokakaga ki ai. Koutou faigaʼi ke koutou ʼiloʼi te ʼu meʼa ʼe ina logoʼi ʼo ʼuhiga mo he ʼu meʼa, pea mo koutou faigaʼi ke koutou mahino ki tona ʼu fihifihia, ʼaē ʼe lagi kovi age ia ʼi te ʼu fihifihia ʼaē neʼe tau mo koutou ʼi tokotou temi ako. ʼI te lakaga totonu ʼaia, ʼe tonu ke sio atu takotou tamasiʼi ko koutou ko he tahi ʼe feala ke palalau ki ai ʼaki he loto falala. (ʼE moʼoni ia ʼe maʼuhiga ke tou pipiki maʼu ki te meʼa ʼaē ʼe totonu. ʼE lahi te ʼu mātuʼa ʼe nātou tokagaʼi ʼe nātou tautau fihi mo tanatou fānau, kae ʼe mole feala ke nātou tuku noa feiā mo kapau ʼe mata tonu te fakatuʼutuʼu ʼaē neʼe kua nātou fai. ʼI te tahi faʼahi, koutou vakaʼi fakalelei peʼe kua koutou mahino lelei ki te ʼaluʼaga ʼi muʼa ʼo hakotou fili ke akonakiʼi ʼaki te ʼofa pea mo tona faʼahiga fai, mo kapau ʼe ʼaoga kiai.—Tāʼaga Lea 18:13.
ʼE Toe ʼi Ai Pe Foki Te ʼu ʼAhiʼahi ʼi Te Loto Kokelekasio
ʼE lagi hage mai he ipu maka kua ʼosi, kae kapau ʼe mole heʼeki haka pea ʼe feala ke maumau noa ia ʼi te ʼu faʼahiga huhuʼa ka ʼai anai ki loto. ʼE fakatatau e te Tohi-Tapu ia te ʼu ʼahiʼahi pea mo te ʼu fihifihia ki te gāue ʼaia ʼaē ko te haka ʼo te ʼu ipu kele, koteʼuhi ʼe fakahā moʼoni ai totatou ʼuhiga. ʼE moʼoni ʼe palalau tāfito ia te Tohi-Tapu ki te ʼu ʼahiʼahi ʼo tatatou tui, kae ʼe feala pe ke fakapipiki te puani ʼaia ki te tahi ʼu ʼahiʼahi. (Sakopo 1:2-4) Ko te meʼa ʼaē ʼe fakapunamaʼuli, heʼe ko ʼihi ʼahiʼahi faigataʼa ʼa te kau tūpulaga ʼe lagi hoko pe ʼi te loto kokelekasio.
ʼE lagi hā mai ki tuʼa ʼe lelei te maʼuli fakalaumālie ʼo takotou tamasiʼi ʼaē kua tūpulaga, kae lagi ʼi tona loto kua vaelua ia. (1 Hau 18:21) Ohage foki la, ko Megan neʼe ina tauʼi te ʼu manatu faka mālama neʼe maʼu e ʼihi tūpulaga neʼe ʼōmai ki te Fale ʼo Te Puleʼaga:
“Neʼe ʼau muliʼi te kiʼi kūtuga ʼo te kau tūpulaga, maʼa nātou ko te maʼuli faka Kilisitiano neʼe ko he meʼa fakapiko pea neʼe mole feala ai hanatou fakafiafia. Neʼe nātou fai te ʼu taʼi palalau ʼaenī: ‘Kehe pe ke ʼau taʼu 18, pea ʼau mavae ʼi te moʼoni,’ peʼe nātou ʼui fēnei ‘Kua ʼau fakaʼamu la ke ʼau mavae ʼi te moʼoni.’ Neʼe mole fia fakatahi te kūtuga ʼaia mo ʼihi tūpulaga neʼe mole manatu tahi mo nātou, ʼo nātou fakahigoaʼi te kau tūpulaga ʼaē ʼe mole manatu tahi mo nātou ko te kau sagato.”
Kapau ko he toko tahi peʼe ko he toko lua ʼe nā agakovi, pea ʼe feʼauga ai moʼo fakalotoʼi fuli ia nātou ʼe kau ki he kūtuga. ʼI te agamāhani ko nātou ʼaē ʼe nātou kau ki he kūtuga ʼe nātou mulimuli ki te meʼa ʼaē ʼe fai e te kaugamālie. ʼE feala ke tuʼu ia te agavale mo te fia toʼa kae tō noa te fakapotopoto. ʼE lahi te ʼu fenua, neʼe ʼi ai te kau tūpulaga Kilisitiano neʼe nātou fai te ʼu meʼa ʼe kovi koteʼuhi neʼe nātou muliʼi te aga ʼa te kaugamālie.
ʼE moʼoni ia, ʼe ʼaoga ke ʼi ai he ʼu fakakaugā fakafiafia ʼa te kau tūpulaga. Koteā ʼaē ʼe lava fai e te ʼu mātuʼa? Koutou fakakaukau lelei ki honatou ʼu temi fakafiafia, pea mo koutou fakatuʼutuʼu he ʼu gāue lelei mo tokotou famili peʼe ko he fefioʼaki ʼo te kau Loma 12:13) Koutou fakaloto mālohiʼi takotou fānau ke ina fai he faʼahiga gāue ʼe lelei, ohage la ko te ako ke poto ʼi he faʼahiga meʼa mahōlō, peʼe ke ina akoako he tahi lea peʼe ko he faʼahiga poto gāue. ʼE lagi feala anai ke ina fai te faʼahi ʼaia ʼi te loto fale, ʼaē ʼe mole hoko anai ki ai he tuʼutāmaki.
tūpulaga mo he ʼu hahaʼi lalahi. Koutou faigaʼi ke koutou feʼiloʼiʼaki mo te ʼu kaumeʼa ʼo takotou tamasiʼi. Koutou fakaafe ia nātou ke koutou kakai fakatahi, peʼe ko he afiafi ke koutou fakatahi mo nātou. (ʼE Feala Pe Ke Liliu Te Ako Ko Hona Hāofakiʼaga
Ko te ako ʼo he tūpulaga ʼe feala ke tokoni age ki ai ke mahino ʼe ʼi ai te temi ʼo te gaoʼi. ʼE ʼui fēnei e Loli, ko he fafine neʼe pule faleako lolotoga taʼu e 20 ʼi te faleako lahi: “Kaugamālie ʼaupito te kau tūpulaga neʼe ʼau sio kiai ʼi te faleako neʼe ko te kau Fakamoʼoni. Tokolahi neʼe vikiʼi ʼi te lelei ʼo tanatou aga, kae ko ʼihi neʼe mole ʼi ai honatou kehekehe mo ʼihi kau ako. Ko te ʼu faʼifaʼitaki lelei neʼe maʼu mai ia nātou ʼaē neʼe tokakaga lelei ki tanatou ako. ʼE ʼau tokoniʼi anai te ʼu mātuʼa ke nātou tokakaga fakalelei ki te haʼele lelei ʼo te ako ʼo tanatou ʼu tamaliki, ke nātou feʼiloʼiʼaki mo tanatou kau faiako, pea mo fakalotoʼi tanatou ʼu tamaliki ki te ʼaoga ʼaupito ʼo te maʼu ʼo he ʼu nota ʼe lelei. Ko ʼihi ʼe lagi nātou laka anai, kae ʼe feala pe ki te kau ako fuli ke nātou maʼu he ʼu nota ʼe feʼauga pea mo fakaʼapaʼapaʼia ai ia nātou mai tanatou kau faiako.”
ʼE toe feala pe foki ki te ako ʼaia ke tokoni ki te kau tūpulaga ke nātou tuputupu ʼi te faʼahi fakalaumālie. ʼE feala ke nātou ako ai he ʼu agamāhani ʼe lelei ʼo ʼuhiga mo te ako, pea mo te poto ʼo te lolomi ʼo tanatou fakakaukau, pea mo nātou fakahoko tonatou ʼu maʼua. Ko tanatou popoto ʼi te lautohi lelei pea mo te puke maʼu ʼo te ʼu manatu ʼe tokoni moʼoni anai kia nātou ke nātou liliu ko he kau ako pea mo he kau faiako faiva ʼo te Folafola ʼa te ʼAtua. (Nehemia 8:8) ʼE feala ki te ʼu fakamaʼua ʼo tanatou ako pea mo tanatou ʼu ako fakalaumālie ke tokoni age kia nātou ke nātou mahino ki te tuʼulaga ʼe maʼu e te ʼu fakafiafia.
Ko He Faka Maʼuhigaʼi ʼAia ʼo Takotou ʼu Mātuʼa Pea Mo Sehova
ʼI Heleni ʼi te temi muʼa, neʼe lahi te ʼu ipu maka neʼe tuʼu tahi aipe te ʼu higoa ʼo te tagata faʼu ipu pea mo ʼaē ʼo ia ʼaē neʼe ina teuteuʼi te ipu kele. ʼO toe feiā pe, ʼi te famili ʼi te agamāhani ʼe ʼi ai tuʼumaʼu he toko lua moʼo akoʼi ʼo te fānau. ʼE kau tokolua ia te tāmai mo te faʼe ki te faʼufaʼu ʼo te loto ʼo tanā tamasiʼi, pea ko ia ʼi hona ʼaluʼaga fakatā ʼe maʼu lua e takolua tamasiʼi tokolua “ ʼu higoa.” Ohage ko te tagata faʼu ipu, pea mo te tagata teuteu ipu, ʼe koutou lava fiafia anai ʼi takotou gāue, ʼi takotou faʼufaʼu he tamasiʼi ke liliu ʼo maʼuhiga pea mo matalelei.—Tāʼaga Lea 23:24, 25.
Ko te fua lelei ʼo te faiga mālohi ʼaia ʼe lahi tona fakalogo ki te temi ʼaē neʼe koutou fakaʼaogaʼi moʼo faʼufaʼu ʼo te loto ʼo takotou tamasiʼi. ʼE lagi koutou lava ʼui anai: “Ko te lao ʼo tona ʼAtua ʼe ʼi tona loto; pea ʼe mole vaivai anai tana haʼele.” (Pesalemo 37:31) ʼE maʼuhiga ʼaupito ia te ʼaluʼaga ʼo te loto ʼo takotou tamasiʼi, koia ʼaua naʼa koutou tuku ke faʼifaʼitaliha.
[Kiʼi nota]
^ pal. 8 Ko ʼihi mātuʼa ʼe nātou lau te Tohi-Tapu ki tanatou tamasiʼi ʼaē ʼe kei meamea. ʼE feala ki te leʼo māmālie pea mo te meʼa fakafiafia ʼaia ʼe hoko ki ai, ke fakatuputupu ia ia te leleiʼia ʼo te lautohi ki tona maʼuli katoa.
^ pal. 9 Neʼe fetogi te ʼu higoa.