“Fakafiafia . . . Ia Sehova”
“Fakafiafia . . . Ia Sehova”
“Fakafiafia . . . ia Sehova, pea ʼe ina fakahoko anai te ʼu meʼa ʼaē ʼe kole e tou loto.”—Pesalemo 37:4.
1, 2. Ko ai te Matapuna ʼo te fiafia moʼoni, pea koteā ʼaē neʼe fakahā mai e te Hau ko Tavite ʼo ʼuhiga mo te faʼahi ʼaia?
“MANUIA te hahai e masiva i onatou loto, . . . manuia natou e manavaofa, . . . manuia natou tufuga o te tokalelei.” ʼO fakatahiʼi ki te tahi ʼu vaega e ono ʼo ʼuhiga mo nātou ʼaē ʼe maʼuli manuʼia, ʼe faʼufaʼu e te ʼu palalau taulekaleka ʼaia te ʼu ʼuluaki palalau fakatalakitupua ʼo te Akonaki maʼuhiga ʼa Sesu ʼi te Moʼuga, ʼaē neʼe tohi e te tagata faitohi Evaselio ko Mateo. (Mateo 5:3-11) Ko te ʼu palalau ʼaia ʼa Sesu, ʼe ina fakapapauʼi mai ʼe feala ke tou maʼu ia te maʼuli fiafia.
2 Ko te pesalemo ʼaia neʼe tohi e te Hau ko Tavite ʼo te Iselaele ʼāfea, ʼe ina fakahā lelei mai ko Sehova ʼe ko te Matapuna ʼo te fiafia moʼoni. Neʼe ʼui fēnei e Tavite: “Fakafiafia . . . ia Sehova, pea ʼe ina fakahoko anai te ʼu meʼa ʼaē ʼe kole e tou loto.” (Pesalemo 37:4) Kae he koʼe ʼe tou “fakafiafia” mokā tou ʼiloʼi ia Sehova pea mo tona ʼu tuʼuga kalitate? ʼAki te ʼu meʼa ʼaē kua ina fai pea mo te ʼu meʼa ʼaē ka ina fai anai ʼi te ka haʼu moʼo fakahoko tana fakatuʼutuʼu, he koʼe ʼe koutou lava falala ʼe ina fakahoko anai “te ʼu meʼa ʼaē ʼe kole e [tokotou] loto”? ʼE tou maʼu anai te ʼu tali kiai ʼi tatatou vakavakaʼi fakalelei ia te Pesalemo 37, vaega 1 ki te 11.
“ ʼAua Naʼa Ke Maheka”
3, 4. Ohage ko tona ʼui ia Pesalemo 37:1, koteā te tokoni ʼe foaki e Tavite, pea he koʼe ʼe lelei ke muliʼi ia ʼaho nei?
3 ʼE tou maʼuʼuli nei ʼi te “u temi faigataa,” pea ʼe mālohi te agakovi. Kua tou sio ki te hoko ʼa te ʼu palalau ʼaenī ʼa te ʼapositolo ko Paulo: “Ko te hahai agakovi mo kaka e fakaʼalu anai tonatou koviʼage, e natou fakahehe anai te kaiga pea mo natou.” (2 Timoteo 3:1, 13) ʼE feala ke tou fakaʼamu ki te hage ʼaē ʼe maʼuli fiafia pea mo fīmālie ia te hahaʼi agakovi! ʼE lava fakahēhē tatou e te ʼu meʼa fuli ʼaia, ʼo mole kei lelei ai tatatou sio fakalaumālie. Koutou tokagaʼi te fakatokaga ʼe fai mai e te ʼu ʼuluaki palalau ʼo te Pesalemo 37 ʼo ʼuhiga mo te tuʼutāmaki ʼaia: “ ʼAua naʼa ke ʼita ʼuhi ko te kau agakovi. ʼAua naʼa ke maheka kia nātou ʼaē ʼe nātou fai te aga heʼe faitotonu.”
4 ʼI te ʼaho fuli ʼe tou logo ʼi te ʼu tala logo ki te ʼu aga heʼe faitotonu. Ko te ʼu hahaʼi fai gāue kākā ʼe nātou maʼu puleʼaki ke nātou hāo mai te tūʼa. ʼE faka popūlaʼi te hahaʼi vaivai e te hahaʼi agakovi. ʼE mole maʼu te hahaʼi fai fakapō pea ʼe mole fakatūʼa ia nātou. Ko te ʼu aga heʼe faitotonu ʼaia ʼe feala ke fakatupu ʼita pea mo fakamaveuveu te tokalelei ʼo totatou ʼatamai. ʼE lagi feala pe ke tou fakaʼamu ki te faʼahiga maʼuli ʼo te kau agakovi ʼaē ʼe hage ʼe nātou maʼuli fiafia. Kae ʼe lelei age anai koa totatou maʼuli mo kapau ʼe tou ʼiʼita? Ko te fakaʼamu ki te ʼu koloā ʼa te kau agakovi, ʼe ina fetogi anai koa te ʼu ikuʼaga ʼaē ka hoko kia nātou? Kailoa ia! Pea ʼe mahino ia ʼe mole he ʼuhiga ʼo tatatou “ ʼita.” Koteā tona tupuʼaga?
5. He koʼe neʼe fakatatau te kau agakovi ki te vao?
5 ʼE tali fēnei e te tagata fai pesalemo: “Ohage ko te vao, ʼe nātou fefe vave anai, pea ohage ko he vao foʼou ʼe nātou mamate anai.” (Pesalemo 37:2) ʼE lagi tou sio ʼe matalelei te vao foʼou kae ʼe mole tuai pea moamoa ʼo mate. ʼE toe feiā pe ʼo ʼuhiga mo te kau agakovi. Ko tonatou maʼuli fiafia ʼe faka temi pe ia. Pea ka nātou mamate, ʼe mole tokoni age anai kia nātou tonatou ʼu koloā ʼaē neʼe nātou maʼu ʼaki te kākā. Neʼe tohi fēnei e Paulo: “Ko te u totogi o te agahala e ko te mate.” (Loma 6:23) Ko te kau agakovi pea mo te hahaʼi fuli ʼaē ʼe heʼe faitotonu ʼe nātou maʼu pe anai tonatou “u totogi” pea gata ai. ʼE ko he maʼuli vaʼiganoa ʼaia!—Pesalemo 37:35, 36; 49:16, 17.
6. Koteā te ako ʼe feala ke tou maʼu mai te Pesalemo 37:1, 2?
6 E tonu koa ke tou ʼiʼita ʼi te maʼu koloā faka temi ʼa te hahaʼi agakovi? Koʼeni te ako ʼe maʼu mai te ʼu ʼuluaki vaega e lua ʼo te Pesalemo 37: ʼAua naʼa koutou tuku ia tonatou maʼuli lelei ʼaia ke ina fakahēʼi koutou mai takotou filifili ʼaē ke koutou tauhi kia Sehova. Koutou sio tuʼumaʼu ki te ʼu tapuakina pea mo te ʼu fakatuʼutuʼu fakalaumālie.—Tāʼaga Lea 23:17.
“Falala Kia Sehova Pea Mo Fai Te Meʼa ʼAē ʼe Lelei”
7. He koʼe ʼe tonu ke tou falala kia Sehova?
7 ʼE fakaloto mālohiʼi fēnei tatou e te tagata fai pesalemo: “Falala kia Sehova pea mo fai te meʼa ʼaē ʼe lelei.” (Pesalemo 37:3a) ʼE tonu ke tou falala mālohi kia Sehova mokā ʼe tou hoha pea mo lotolotolua. ʼE ko Ia ʼaē ka ina foaki katoa mai te tokalelei fakalaumālie. Neʼe tohi fēnei e Moisese: “Ko ia ʼaē ʼe nofo ʼi te potu fakalilo ʼa te Māʼoluga, ʼe nofo anai ʼi te malumalu ʼo te Māfimāfi.” (Pesalemo 91:1) ʼE ʼaoga kia tatou fuli ke tou falala kia Sehova mokā ʼe tou tuʼaniaʼi te tuputupu ʼo te maumauʼi ʼo te lao ʼi te tuʼu ʼaenī. Ka tou tatepa, ʼe ko he meʼa lelei mokā tokoni mai hotatou kaumeʼa. ʼO toe feiā pe ki tatatou ʼu faiga ʼaē ke tou haʼele agatonu, ʼe ʼaoga kia tatou ke tokoni mai ia Sehova.—Isaia 50:10.
8. ʼE lava tokoni feafeaʼi kia tatou ia tatatou kau ki te minisitelio faka Kilisitiano ke ʼaua naʼa tou ʼiʼita fau ki te maʼu koloā ʼa te kau agakovi?
8 Kapau ʼe tou maʼumaʼua ʼo tokoni ki te hahaʼi ʼaē ʼe hage ko ni ʼu ōvi ke nātou maʼu te ʼatamai mālama ʼo ʼuhiga mo te ʼu fakatuʼutuʼu ʼa Sehova, pea ʼe tou tauʼi ai tatatou ʼiʼita ki te maʼu koloā ʼa te kau agakovi. ʼI te tuputupu ʼa te agakovi, ʼe tonu ke tou fakaʼaogaʼi lahi totatou temi moʼo tokoni ki te hahaʼi. Neʼe ʼui fēnei e te ʼapositolo ko Paulo: “Vakai naa koutou galoi te fai o te mea e lelei pea mo te mauli vaevae, koteuhi ko te u faahiga sakilifisio aia e leleiʼia e te Atua.” Ko te meʼa “lelei” ʼaupito ʼe feala ke tou fai, ko te vaevae ki te hahaʼi ia te logo lelei faka kolōlia ʼo te Puleʼaga ʼo te ʼAtua. Ko tatatou faka mafola ki te hahaʼi ʼe ko “he sakilifisio [moʼoni] o te fakavikiviki.”—Hepeleo 13:15, 16; Kalate 6:10.
9. Koutou fakamahino te ʼui ʼa Tavite ʼaē ke “maʼuli ʼi te kele.”
9 ʼE toe ʼui fēnei e Tavite: “Maʼuli ʼi te kele, pea mo nofo agatonu.” (Pesalemo 37:3b) ʼI te temi ʼo Tavite, ko “te kele” neʼe ko te fenua ʼaē neʼe foaki e Sehova maʼa Iselaele, te Kele ʼo Te Fakapapau. ʼI te temi hau ʼo Salomone neʼe ina puleʼi te potu tokelau ʼo Tane ʼo aʼu ki te potu saute ʼo Peele-Sepa. Neʼe ko te nofoʼaga ʼaia ʼo Iselaele. (1 Hau 4:25) Ia ʼaho nei, peʼe tou nonofo ʼifea kae ʼe tou fakatalitali ke hoko mai la te temi ʼaē ka liliu ai te kele katoa ko he palatiso ʼi he mālama foʼou pea mo faitotonu. Kae ʼi te temi nei, ʼe tou nonofo ʼi te tokalelei fakalaumālie.—Isaia 65:13, 14.
10. Koteā tona fua mokā ʼe tou “nofo agatonu”?
10 Koteā anai tona fua mokā ʼe tou “nofo agatonu”? ʼE fakamanatuʼi mai e te tāʼaga lea: “Ko te tagata ʼaē ʼe ina fai he ʼu gāue agatonu, ʼe ina maʼu anai te ʼu tapuakina lahi.” (Tāʼaga Lea 28:20) Ka tou faʼa kātaki ʼo agatonu ʼi te faka mafola ʼo te logo lelei ki te hahaʼi ʼaē ʼe maʼuʼuli ʼi te faʼahi ʼaē ʼe tou nonofo ai, pea ʼe mahino ia ʼe feala ke tou maʼu ai ni ʼu tapuakina mai ia Sehova. Ohage la, ko Frank pea mo tona ʼohoana ko Rose, kua hili kiai taʼu e 40, neʼe nā fakatuʼutuʼu ke na pionie ʼi te kolo ʼi te potu tokelau ʼo Écosse. Ko te tokosiʼi ʼaē neʼe fia logo ki te moʼoni neʼe nātou mavae ʼi te fenua. Neʼe mole lotovaivai te taumatuʼa kae neʼe nā kamata faka mafola pea mo fai ni ʼu tisipulo. ʼI te temi nei kua lahi te ʼu kokelekasio ʼi te fenua ʼaia. ʼAki tanā agatonu neʼe nā maʼu moʼoni ai te tapuakina ʼa Sehova. ʼAki te agavaivai, ʼe fakamahino fēnei e Frank: “Ko te tapuakina ʼaē ʼe lahi tāfito, ko tamā kei nonofo aipe ʼi te moʼoni pea mo tamā kei ʼaoga kia Sehova.” Ei, ka tou “nofo agatonu” ʼe tou maʼu ai te ʼu tapuakina lahi.
“Fakafiafia . . . Ia Sehova”
11, 12. (a) E feafeaʼi hatatou “fakafiafia . . . ia Sehova”? (b) Koteā te fakatuʼutuʼu ʼe koutou lava fai ʼo ʼuhiga mo te ako takitokotahi, pea koteā anai tona fua moʼoni?
11 ʼE tonu ke tou “fakafiafia . . . ia Sehova” moʼo fakamālohiʼi tatatou ʼu felogoi mo ia pea mo falala tuʼumaʼu kia te ia. (Pesalemo 37:4a) ʼO feafeaʼi? ʼAua naʼa tou tokagaʼi fau totatou ʼu fihifihia, tatau aipe peʼe faigataʼa, kae ke tou tokaga tuʼumaʼu kia Sehova. Ohage la ʼe lelei ke tou toʼo hotatou temi moʼo lau tana Folafola. (Pesalemo 1:1, 2) ʼE koutou fiafia koa ʼi takotou lau te Tohi-Tapu? ʼE koutou fiafia anai mo kapau ʼe koutou lau ʼaki te fakatuʼutuʼu ʼaē ke lahi age te ʼu meʼa ʼe koutou ako ʼo ʼuhiga mo Sehova. He koʼe koa ʼe mole koutou ʼai muʼa hakotou kiʼi tuʼu mokā kua ʼosi he ʼu vaega ʼi takotou lau, pea koutou fai te fehuʼi ʼaenī, ‘Koteā te ako ʼe ʼau maʼu ʼi te ʼu vaega ʼaenī ʼo ʼuhiga mo Sehova?’ ʼE lagi ʼaoga anai ke ʼi ai hakotou kiʼi kaupepa ʼi te temi ʼaē ʼe koutou lau ai te Tohi-Tapu moʼo tohi kiai te ʼu puani ʼaē ʼe koutou leleiʼia. ʼI te ʼu temi fuli ʼaē ka koutou tuʼu ai moʼo fakakaukauʼi te ʼuhiga ʼo te koga tohi ʼaē ʼe koutou lau, koutou tohi he ʼu kupusiga palalau ke koutou manatuʼi he kalitate e tahi ʼo te ʼulugaaga taulekaleka ʼo te ʼAtua. ʼI te tahi pesalemo, neʼe hiva fēnei e Tavite: “Ke liliu te ʼu palalau ʼo toku gutu pea mo te metitasio ʼo toku loto ko he meʼa fakafiafia ʼi muʼa ia te koe, Ê Sehova, toku Maka pea mo toku Fakamaʼuli!” (Pesalemo 19:14) Ko tatatou tokaga fakalelei ʼaia ki te Folafola ʼa te ʼAtua ʼe “ko he meʼa fakafiafia” kia Sehova pea mo tatou.
12 ʼE tou lava maʼu feafeaʼi te fiafia mai tatatou ako pea mo tatatou metitasio? ʼE tou fakatuʼutuʼu tāfito ke lahi te ʼu meʼa ʼaē ʼe tou ako ʼo ʼuhiga mo Sehova pea mo tana ʼu gāue. Ohage ko te tohi Te tagata ʼaē ʼe lahi tokotahi ʼo te ʼu temi fuli pea mo te tohi Approchez-vous de Jéhovah * ʼe nā fakahā mai te ʼu meʼa lahi ʼe tou lava fakahā ai tatatou loto fakafetaʼi. Pea ʼe ʼui fēnei e Tavite ʼo ʼuhiga mo te kau faitotonu, ko Sehova “ ʼe ina fakahoko anai te ʼu meʼa ʼaē ʼe kole e [tokotou] loto.” (Pesalemo 37:4b) Neʼe ko te taʼi falala ʼaia neʼe ina uga te ʼapositolo ko Soane ke ina tohi te ʼu palalau ʼaenī: “Pea ko te falala aeni e tou mau ia te ia: kapau e tou kole he mea o fai ki tona finegalo, e ina fakalogo tatou. Pea kapau e tou iloi, e ina fakalogo tatou i he mea pe e tou kole, e tou iloi, e tou mau iâ tatou ia mea nee tou kole kia te ia.”—1 Soane 5:14, 15.
13. ʼI te ʼu taʼu ʼaenī kua hili, koteā te gāue neʼe tokagaʼi ʼi te ʼu fenua lahi ʼo ʼuhiga mo te faka mafola ʼo te Puleʼaga?
13 ʼI totatou ʼuhiga hahaʼi agatonu, ʼe tou fiafia lahi ʼi tatatou sio ki te faka lākatonuʼi ʼo te pule faʼitaliha ʼa Sehova. (Tāʼaga Lea 27:11) ʼE mole fiafia koa la totatou ʼu loto ʼi tatatou sio ʼaē ki te toe gāue faka mafola lahi ʼo totatou ʼu tēhina ʼi te ʼu fenua ʼaē neʼe tapuʼi ai te gāue pea mo fefeka ai te takitaki ʼa te ʼu puleʼaga? ʼE tou fakaʼamu mālohi ke tou sio ki te ʼāteaina ʼaē ʼe lagi hoko anai ʼi muʼa ʼo te fakaʼosi ʼo te tuʼu ʼaenī. Tokolahi te kau kaugana ʼa Sehova ʼe nātou nonofo ʼi te ʼu fenua ʼo te potu uesite, neʼe nātou kau mālohi ki te faka mafola ki te kau ako, te hahaʼi neʼe feholaki mai tonatou ʼu fenua, pea mo ʼihi ʼe nātou nonofo faka temi ʼi te potu uesite, pea mo tauhi ʼāteaina ai. ʼE tou fakaʼamu lahi ko te hahaʼi ʼaia ʼe nātou toe liliu anai kiō nātou, pea ke nātou haga faka mafola te mālama ʼo te moʼoni, tatau aipe mo kapau ʼe mata faigataʼa.—Mateo 5:14-16.
“Tuku Tou Maʼuli Kia Sehova”
14. Koteā te fakamoʼoni ʼe tou maʼu ʼe feala ke tou falala ai kia Sehova?
14 ʼE tou fiafia heʼe tou ʼiloʼi ʼe feala ke toʼo tatatou ʼu tuʼania pea mo te ʼu meʼa ʼe hage kia tatou ʼe mamafa! ʼO feafeaʼi? ʼE ʼui fēnei e Tavite: “Tuku tou maʼuli kia Sehova, pea ke ke falala kia te ia, pea ʼe ina fakahoko totonu anai.” (Pesalemo 37:5) ʼE lahi te ʼu fakamoʼoni ʼe tou maʼu ʼi totatou ʼu kokelekasio ke tou falala ai kia Sehova. (Pesalemo 55:22) Ko nātou ʼaē ʼe kau ki te minisitelio temi katoa, te kau pionie, te ʼu tagata taupau feʼaluʼaki, te kau misionea, pea mo te kau Petelite, ko he ʼu fakamoʼoni fuli ʼaia ʼe tou lava falala ko Sehova ʼe tokaga kia tatou. He koʼe ʼe mole koutou palalau mo nātou ʼaē ʼe koutou ʼiloʼi pea mo fehuʼi age pe neʼe tokoni feafeaʼi ia Sehova kia nātou? ʼE mahino ia ʼe koutou logo anai ki te ʼu tuʼuga fakamatala ʼo te tokoni ʼa Sehova kia nātou māʼiape la mo te ʼu temi faigataʼa. ʼE ina foaki tuʼumaʼu te ʼu meʼa tāfito ʼo te maʼuli.—Pesalemo 37:25; Mateo 6:25-34.
15. ʼE gigila feafeaʼi te faitotonu ʼa te ʼAtua?
15 Ka tou tuku tatatou falala katoa kia Sehova, pea ʼe feala ke tou sio ki te moʼoni ʼo te ʼu palalau ʼaenī ʼa te tagata fai pesalemo: “ ʼE mahino ia ʼe ina fakaliliu anai tau agatonu ohage ko te mālama, pea ko tau faitotonu ohage ko te temi ʼo te fetapā.” (Pesalemo 37:6) ʼI totatou ʼuhiga kau Fakamoʼoni ʼa Sehova, ʼi te agamāhani ʼe palalau kovi te hahaʼi ʼo ʼuhiga mo tatou. Kae ko Sehova ʼe ina avahi te ʼu mata ʼo te hahaʼi loto moʼoni ke nātou mahino ko te minisitelio ʼaē ʼe tou fakahoko, ʼe tou fai ʼaki te ʼofa kia Sehova pea mo te hahaʼi. Pea ʼi te temi pe ʼaia, logola te palalau kovi ʼa te tokolahi ʼo ʼuhiga mo tatou, kae ʼe ʼasi lelei pe tatatou agatonu. ʼE lagolago Sehova kia tatou ʼi te ʼu fakafeagai kehekehe pea mo te ʼu fakataga. Pea ko te faitotonu ʼa te hahaʼi ʼa te ʼAtua ʼe gigila ohage ko te gigila ʼa te laʼā ʼi te fetapā.—1 Petelo 2:12.
“Nofo Fakalogologo . . . Fakatalitali Ki Ai ʼAki He Holi Mālohi”
16, 17. ʼO mulimuli kia Pesalemo 37:7, koteā ʼaē ʼe tonu ke tou fai ʼi te temi nei, pea koteā tona tupuʼaga?
16 ʼE toe hoko atu fēnei te ʼu palalau ʼa te tagata fai pesalemo: “Nofo fakalogologo ia muʼa ʼo Sehova pea mo ke fakatalitali ki ai ʼaki he holi mālohi. ʼAua naʼa ke ʼita ki he tahi ʼe haʼele lelei tona ala, ki te tagata ʼaē ʼe ina fakahoko tana ʼu manatu.” (Pesalemo 37:7) ʼI te vaega ʼaenī, ʼe fakahā lelei e Tavite te ʼaoga kia tatou ke tou kātaki ʼo fakatalitali ki te gāue ʼaē ka fai e Sehova. Logola ko te fakaʼosi ʼo te tuʼu ʼaenī ʼe mole heʼeki hoko mai, kae ʼaua naʼa tou fiu. ʼE mole tou sio koa la ko te manavaʼofa ʼo Sehova pea mo tana faʼa kātaki ʼe lahi ʼaupito age? ʼE feala koa ʼi te temi nei ke tou fakahā ʼe tou faʼa kātaki ʼo fakatalitali, pea mo tou maʼumaʼua ʼi te faka mafola ʼo te logo lelei ʼi muʼa ʼo te hoko mai ʼo te fakaʼosi? (Maleko 13:10) ʼI te temi ʼaenī tou tekeʼi te ʼu aga ʼaē ʼe feala ke nātou pulihi tatatou fiafia pea mo totatou tokalelei fakalaumālie. ʼI te temi ʼaenī tou fakafeagai mālohi ki te fakahala ʼa te mālama ʼa Satana. Pea ʼi te temi ʼaenī tou taupau te ʼu aga maʼa ʼaē ʼe tonu ke fai, pea mo tou tokaga naʼa tou fai he meʼa ʼe puli ai tatatou agatonu ʼaē kia Sehova. Tou haga līaki te ʼu manatu heʼeʼaoga pea mo tou tekeʼi te ʼu felāveʼi fakasino heʼeʼaoga ʼaē ʼe fai e te hahaʼi, peʼe ko te tagata mo te tahi tagata, peʼe ko te fafine mo te tahi fafine.—Kolose 3:5.
17 ʼE tokoniʼi fēnei tatou e Tavite: “Tuku te ʼita pea mo te ʼita lahi. ʼAua naʼa ke ʼita pe ke ke fai ai he meʼa ʼe kovi. Koteʼuhi ʼe molehi anai te hahaʼi agakovi, kae ko nātou ʼaē ʼe falala kia Sehova e ko nātou ʼaia ʼe nātou maʼu anai te kele.” (Pesalemo 37:8, 9) Ei, ʼe feala ke tou falala ʼo fakatalitali ki te temi ʼaē kua ōvi mai, ʼaē ka pulihi ai e Sehova ʼi te kele te ʼu aga kovi fuli pea mo te hahaʼi ʼaē ʼe nātou fai ia te ʼu aga ʼaia.
“Kei Toe He Kiʼi Temi Siʼipe”
18, 19. Koteā te fakaloto mālohi ʼe koutou maʼu mai ia Pesalemo 37:10?
18 “Kei toe he kiʼi temi siʼipe, pea pulihi anai te tagata agakovi; pea ʼe mahino papau ia ʼe ke vakavakaʼi anai te potu ʼaē ʼe nofo ai, ka kua puli ia.” (Pesalemo 37:10) ʼE fakaloto mālohi te ʼu palalau ʼaia heʼe kua ōvi mai te fakaʼosi ʼo te tuʼu ʼaenī, pea mo te faʼifaʼitaliha ʼa te hahaʼi mai ia Sehova! Tatau aipe pe koteā te faʼahiga puleʼaga peʼe ko te faʼahiga pule neʼe fakaʼamu kiai te tagata kae neʼe mole ʼi ai hona ʼu fua lelei. Pea kua tou ōvi nei ki te temi ʼaē ka toe fakatuʼu ai te pule ʼa te ʼAtua, te teokalasia moʼoni, te Puleʼaga ʼo Sehova ʼaē ka takitaki e Sesu Kilisito. ʼE ina takitaki katoa anai te ʼu gāue ʼo te malamanei pea mo fakaʼauha te kau fakafeagai fuli ki te Puleʼaga ʼo te ʼAtua.—Taniela 2:44.
19 ʼI te mālama foʼou ʼaē ka takitaki e te Puleʼaga ʼo te ʼAtua, ʼe mole feala anai ke koutou maʼu he “tagata agakovi” tatau aipe peʼe koutou kumi. Ei, ʼe fakaʼauha vave anai ia nātou ʼaē ʼe fakafeagai kia Sehova. ʼE mole toe maʼu anai he tahi ʼe fakafeagai ki tana pule faʼitaliha peʼe mole fia fakalogo ki tana takitaki. Ko te hahaʼi fuli ʼe nātou manatu tahi anai moʼo fakafiafia ia Sehova. ʼE ko he maʼuli tokalelei anai—ʼe mole toe lokaʼi anai te ʼu matapā, he ʼu ʼā ukamea moʼo puipui totatou ʼapi, heʼe mole toe ʼi ai anai he meʼa ʼe fakatupu kovi ki te falala katoa pea mo te maʼuli fiafia!—Isaia 65:20; Mikea 4:4; 2 Petelo 3:13.
20, 21. (a) Ko ai “te kau agavaivai” ia Pesalemo 37:11, pea ʼe nātou maʼu ʼifea te “mahu ʼo te tokalelei”? (b) Koteā te ʼu tapuakina ʼe tou maʼu anai mo kapau ʼe tou faʼifaʼitakiʼi te Tavite Lahi?
20 Pea “ko te kau agavaivai ʼe nātou maʼu anai te kele.” (Pesalemo 37:11a) Kae ko ai koa te “kau agavaivai” ʼaia? Ko te kupu ʼaē neʼe fakaliliu ʼaki te kupu “agavaivai” ʼe ko he kupu ʼe faka ʼuhiga ki “te mamahi, te fia agavaivai, te fakatō laloʼi.” Ei ko “te kau agavaivai” ʼe ko nātou ʼaē fakatalitali ʼaki te agavaivai ke haʼu Sehova ʼo fakatonutonuʼi te ʼu aga heʼe faitotonu fuli ʼaē ʼe fai kia nātou. “ ʼE nātou fiafia moʼoni anai ʼi te mahu ʼo te tokalelei.” (Pesalemo 37:11b) Mo te temi nei pe la, ʼe tou maʼu te tokalelei lahi ʼi te palatiso fakalaumālie ʼi te kokelekasio faka Kilisitiano moʼoni.
21 Logola ʼe mole heʼeki pulihi te ʼu mamahi, kae ʼe tou felagolagoʼaki pea mo fakafimālie ia nātou ʼaē ʼe lotovaivai, pea ʼe tokoni ai ki te hahaʼi ʼa Sehova ke nātou maʼu te loto fīmālie moʼoni. Ko te ʼu tēhina ʼaē neʼe fakanofo ke nātou tauhi ki te ʼu ōvi, ʼe nātou tokaga ʼaki te ʼofa ki te ʼu meʼa fakalaumālie pea mo fakasino ʼaē ʼe ʼaoga kia tatou, pea ʼe feala ai hatatou kātakiʼi te mamahi ʼuhi ko tatatou faitotonu. (1 Tesalonika 2:7, 11; 1 Petelo 5:2, 3) Ko te tokalelei ʼaia ʼe ko he koloā maʼuhiga! ʼE ʼi ai foki mo tatatou ʼamanaki ki te maʼuli heʼegata ʼi te Palatiso kua ōvi mai ʼe fonu ai te tokalelei. Pea ʼofa pe, ke tou faʼifaʼitakiʼi te Tavite Lahi ko Sesu Kilisito, ʼaē neʼe gāue mālohi maʼa Sehova pea mo tauhi agatonu ʼo aʼu ki tana mate. (1 Petelo 2:21) Kapau ʼe tou fai feiā, ʼe tou fiafia ai anai, ʼo tou fakavikiviki ia ia ʼaē ʼe tou fakafiafia ai, totatou ʼAtua ko Sehova.
[Kiʼi nota]
^ Neʼe tā e te kau Fakamoʼoni ʼa Sehova.
ʼE Feala Koa Hakotou Tali?
• Koteā te ʼu ako neʼe koutou maʼu mai ia Pesalemo 37:1, 2?
• ʼE lava feafeaʼi hatatou “fakafiafia . . . ia Sehova”?
• Koteā te fakamoʼoni ʼe tou maʼu ʼe feala ai ke tou falala kia Sehova?
[Fehuʼi]
[Paki ʼo te pasina 9]
Ko te kau Kilisitiano ʼe mole nātou ‘fia fai kia nātou ʼaē ʼe nātou heʼe faitotonu’
[Paki ʼo te pasina 10]
“Falala kia Sehova pea mo fai te meʼa ʼaē ʼe lelei”
[Paki ʼo te pasina 11]
Koutou fakafiafiaʼi ia Sehova ʼo koutou ako lahi te ʼu meʼa ʼo ʼuhiga mo ia
[Paki ʼo te pasina 12]
“Ko te kau agavaivai ʼe nātou maʼu anai te kele”