“Koutou Mauli i Te Fakafetai”
“Koutou Mauli i Te Fakafetai”
“Ke afio te tokalelei o Kilisito i outou loto . . . Koutou mauli i te fakafetai.”—Kolose 3:15.
1. Koteā te kehekehe ʼaē ʼe tou fakatokagaʼi ʼi te kokelekasio faka Kilisitiano pea mo te malamanei ʼaē ʼe puleʼi e Satana?
ʼI TE ʼu kokelekasio e 94 600 ʼa te kau Fakamoʼoni ʼa Sehova ʼi te malamanei, ʼe tou maʼu ai te loto fakafetaʼi. ʼE kamata pea mo fakaʼosi te ʼu fono ʼaki te faikole, moʼo fakamālo kia Sehova. ʼI te agamāhani ʼe tou logo ki te ʼu kupu “fakafetai,” “ ʼe mātou fakamālo,” peʼe ko he tahi ʼu kupusiga palalau feiā ʼi te ʼu palalau ʼa te kau tūpulaga pea mo te kau matutuʼa, ʼo feiā kia nātou ʼe foʼofoʼou pea mo te kau Fakamoʼoni kua fualoa mokā nātou tauhi fakatahi fakafiafia. (Pesalemo 133:1) ʼE kehekehe ʼosi ia mo te hahaʼi tokolahi ʼaē ‘ ʼe mole nātou ʼiloʼi ia Sehova pea ʼe mole nātou fakalogo ki te logo lelei,’ ʼe nātou tahi manatu pe kia nātou totonu! (2 Tesalonika 1:8) ʼE tou maʼuʼuli nei ʼi te mālama ʼe mole maʼu ai te fakafetaʼi. Pea ʼe mole tou punamaʼuli heʼe tou ʼiloʼi peʼe ko ai te ʼatua ʼo te malamanei—ko Satana te Tevolo, te tupuʼaga lahi ʼo te manatu pe kia kita totonu, ʼaē kua maʼu e te hahaʼi tana aga fiatuʼu pea mo tana fakafeagai!—Soane 8:44; 2 Kolonito 4:4; 1 Soane 5:19.
2. Koteā te fakatokaga ʼe tonu ke tou muliʼi, pea koteā anai te ʼu fehuʼi ʼaē ka tou vakaʼi?
2 ʼE tonu ke tou nonofo tokaga heʼe tou maʼuʼuli nei ʼi te malamanei ʼa Satana, naʼa tou pikisia ʼi tona ʼu agaaga. ʼI te ʼuluaki sēkulō, neʼe fakamanatuʼi fēnei e te ʼapositolo ko Paulo ki te kau Kilisitiano ʼo Efeso: “Nee koutou fou muà ai o fai ki te aluaga o te malama-nei, o mulimuli ki te aliki o te malohi o te aele, o te laumalie ae e lolotoga gaue i te u fanau o te talagataa pea mo tatou nee tou fua nofo fuli ai i te u holi o totatou kakano, nee tou fai te u loto o te kakano mo tatatou u fakakaukau, pea i totatou uhiga, hagepe ko natou alâ, nee tou liliu ko he u fanau o te hauhau.” (Efeso 2:2, 3) Ko te tokolahi ia ʼaho nei ʼe nātou feiā. Koia, ʼe feafeaʼi anai hatatou taupau te loto fakafetaʼi? Koteā te tokoni ʼe foaki mai e Sehova? Koteā te ʼu ʼaluʼaga ʼe feala ai ke tou fakahā ʼe tou fakafetaʼi moʼoni?
Te ʼu Tupuʼaga ʼo Tatatou Loto Fakafetaʼi
3. Koteā ʼu meʼa ʼaē ʼe feala ai ke tou loto fakafetaʼi kia Sehova?
3 ʼE ko Sehova ʼAtua totatou Tupuʼaga, ʼaē ʼe tonu ke tou fakafetaʼi ki ai, tāfito la mokā ʼe tou fakatokagaʼi tona ʼu meʼa ʼofa ʼaē neʼe ina foaki mai kia tatou. (Sakopo 1:17) ʼI te ʼaho fuli, ʼe tou fakafetaʼi kia Sehova heʼe tou maʼuʼuli. (Pesalemo 36:9) ʼE tou sio ʼi ʼotatou ʼu tafaʼaki ki te ʼu tuʼuga fakamoʼoni ʼaupito ʼo te ʼu gāue ʼa Sehova, ohage ko te laʼā, te māhina, pea mo te ʼu fetuʼu. Ko totatou kele ʼe tapuke ai te ʼu lameni pea mo te ʼu faʼahiga kasa kehekehe ʼi te ʼaele ʼe ʼaoga ki te maʼuli, pea mo te ʼu fasiga taʼu kehekehe, pea ko te ʼu meʼa fuli ʼaia ʼe nātou fakamoʼoni ʼe tonu ke tou huʼi maʼua ki tatatou Tāmai ʼaē ʼe ʼi selo. Neʼe hiva fēnei te Hau ko Tavite: “Neʼe lahi te ʼu meʼa neʼe ke fai, Ê Sehova toku ʼAtua, ei tau ʼu gāue fakaofoofo pea mo tau ʼu manatu kia mātou; ʼe mole he tahi ʼe tatau mo koe. Kapau neʼe tonu ke ʼau tala pea mo ʼau talanoa kiai, ʼe nātou kaugamālie fau ke feala haku fakamatala.”—Pesalemo 40:5.
4. He koʼe ʼe tonu ke tou fakafetaʼi kia Sehova ʼo ʼuhiga mo te fakakaugā fakafiafia ʼaē ʼe tou maʼu ʼi totatou ʼu kokelekasio?
4 Logola ʼe mole tou maʼuʼuli nei ʼi he palatiso moʼoni, kae ko te ʼu kaugana ʼa Sehova ia ʼaho nei ʼe nātou maʼuʼuli ʼi te palatiso fakalaumālie. ʼI totatou ʼu Fale ʼo Te Puleʼaga pea mo tatatou ʼu fakatahi lalahi, ʼe tou sio ai ki te fua ʼo te laumālie maʼoniʼoni ʼo te ʼAtua ʼi totatou ʼu tēhina mo tuagaʼane ʼi te tui. ʼIo, mokā fai faka mafola ʼihi kau Fakamoʼoni ki te hahaʼi ʼe mole lahi tanatou tauhi lotu, ʼe nātou mulimuli ki te meʼa ʼaē neʼe ʼui e Paulo ʼi tana tohi ki te kau Kalate. ʼE nātou ʼuluaki talanoa ki “te u gaue a te kakano” pea nātou fehuʼi ki te hahaʼi ʼaē ʼe fakalogo ki tanatou fai faka mafola peʼe koteā ʼaē ʼe nātou fakatokagaʼi. (Kalate 5:19-23) Ko te tokolahi ʼe nātou fakamoʼoni ko te ʼu aga ʼaia ʼe hoko ʼi te temi nei. Ka tou fakamahino age te ʼu fua ʼo te laumālie ʼo te ʼAtua pea mo fakaafe nātou ki te Fale ʼo Te Puleʼaga ke nātou sio tonu ki te maʼuliʼi ʼo te ʼu fua ʼaia, pea ʼe nātou fakamoʼoni atu aipe ʼo ʼui fēnei: “E afio mooni te Atua ia koutou.” (1 Kolonito 14:25) Pea ʼe mole gata pe te aga ʼaia ʼi te Fale ʼo Te Puleʼaga ʼo totatou fenua. ʼI he fenua pe ʼe koutou ʼolo kiai, ka koutou felāveʼi mo he kau Fakamoʼoni ʼa Sehova ʼe kau ʼi te kau Fakamoʼoni ʼa Sehova e toko ono miliona tupu, ʼe koutou maʼu anai te taʼi loto fiafia ʼaia. ʼE mahino ia, ko te fakakaugā fakaloto mālohi ʼaia ʼe ko he tupuʼaga ke tou fakafetaʼi ai kia Sehova, ia ia ʼaē ʼe ina foaki tona laumālie moʼo faka fealagia ia te faʼahi ʼaia.—Sofonia 3:9; Efeso 3:20, 21.
5, 6. ʼE tou lava fakahā feafeaʼi tatatou loto fakafetaʼi ki te totogi, te meʼa ʼofa lahi ʼaupito ʼaē neʼe foaki mai e te ʼAtua?
5 Ko te meʼa ʼofa lahi ʼaupito pea mo haohaoa ʼaē neʼe foaki mai e Sehova, ʼe ko tona ʼAlo, ia Sesu, ʼaē neʼe ina faka fealagia ai ke fai he sakilifisio faitotogi maʼa tatou. Neʼe tohi fēnei e te ʼapositolo ko Soane: “Kapau nee feia te ofa o te Atua ia tatou, pea mo tatou foki, e tonu ke tou feofaofani.” (1 Soane 4:11) Ei, ʼe tou fakafetaʼi ki te totogi ʼo mole tou fakahā ʼaki pe totatou ʼofa pea mo tatatou fakamālo kia Sehova, kae ʼe tou toe fakahā foki ʼi tatatou ʼofa ʼaē ki te hahaʼi.—Mateo 22:37-39.
6 Ka tou fakatokagaʼi te ʼu felogoi ʼa Sehova mo te Iselaele ʼāfea, pea ʼe lahi te ʼu meʼa ʼe tou lava ako ai ʼo ʼuhiga mo te loto fakafetaʼi. ʼAki te Lao ʼaē neʼe tuku kia Moisese ke ina fakahā ki te puleʼaga, neʼe lahi te ʼu meʼa neʼe akoʼi e Sehova ki te hahaʼi. ʼAki “te faahiga poto mo te mooni i te lao,” ʼe lahi te ʼu meʼa ʼe feala ke tou ako moʼo tokoni kia tatou ke tou muliʼi te tokoni ʼaenī ʼa Paulo: “Koutou mauli i te fakafetai.”—Loma 2:20; Kolose 3:15.
Te ʼu Ako e Tolu ʼe Tou Maʼu Mai Te Lao ʼa Moisese
7. Neʼe faka fealagia feafeaʼi e te time ʼaē neʼe foaki e te kau Iselaele ke nātou fakahā ai tanatou loto fakafetaʼi kia Sehova?
7 ʼI te Lao ʼa Moisese, neʼe foaki e Sehova te ʼu ʼaluʼaga e tolu moʼo faka fealagia ki te kau Iselaele ke nātou fakahā tanatou leleiʼia moʼoni tana agalelei. ʼUluaki, neʼe ʼi ai te time. Ko te vahe e tahi ʼi te hogofulu ʼo te ʼu magisi ʼo te kele, ʼo fakatahiʼi mo “te ʼu vahe fuli e tahi ʼi te hogofulu ʼo te ʼu faga manu lalahi pea mo te faga manu liliki,” neʼe tonu ke foaki ohage ko he “meʼa taputapu maʼa Sehova.” (Levitike 27:30-32) Ka fakalogo te kau Iselaele, pea neʼe lahi te ʼu tapuakina neʼe foaki age e Sehova. “ ‘Koutou ʼaumai ki te faleoko te ʼu vahe e tahi ʼi te hogofulu fuli, ke maʼu he meʼa kai ʼi toku fale; pea koutou fakalelei age, kae ke koutou ʼahiʼahiʼi ʼau ki te faʼahi ʼaia,’ ko te tala ʼaia ʼa Sehova ʼo te ʼatu kautau, ‘peʼe mole ʼau avahi anai kia koutou te ʼu matapā ʼo te lagi pea mo huaʼi moʼoni anai kia koutou he tapuakina ʼo aʼu ki te mole toe ʼi ai ʼo he hoge.’ ”—Malakia 3:10.
8. Koteā ʼaē neʼe kehekehe ʼi te ʼu mōlaga pea mo te time?
8 Lua, ʼo mole gata pe ki te foaki ʼo te time, neʼe fakatuʼutuʼu e Sehova ke foaki e te kau Iselaele he ʼu meʼa ʼofa. Neʼe ina fakatotonu kia Moisese ke ina ʼui fēnei ki te kau Iselaele: “Ka koutou hū anai ki te fenua ʼaē ka ʼau foaki atu, pea ʼe tonu anai ke koutou fai te meʼa ʼaenī: ka koutou kai anai te pane ʼo te fenua, ʼe koutou toʼo anai he vahe maʼa Sehova.” ʼAki te tahi ʼu ʼuluaki fua ʼo tanatou ‘falena foʼou, neʼe tonu ke nātou fai ʼaki he ʼu foʼi kato ʼe hage he kolona” ʼo momoli ko “he vahe maʼa Sehova” ʼi tonatou ʼu taʼiake fuli. Koutou fakatokagaʼi neʼe mole fakamaʼua age kia nātou te lahi ʼo te ʼu ʼuluaki fua ʼaē ke nātou foaki. (Faka au 15:18-21) Kae ka foaki e te kau Iselaele honatou ʼu mōlaga moʼo fakahā tanatou loto fakafetaʼi, neʼe nātou ʼiloʼi ʼe tapuakinaʼi anai nātou e Sehova. Neʼe toe fai te fakatuʼutuʼu feiā ʼi te fale lotu ʼaē neʼe hā kia Esekiele. ʼE tou lau fēnei: “Ko te ʼu polopolo ʼo te ʼu ʼuluaki fua momoho fuli, pea mo te ʼu meʼa ʼofa fuli, ʼi tau ʼu meʼa ʼofa fuli—ʼe ʼavage anai ki te kau pelepitelo; pea ko te polopolo ʼo tau ʼu falena foʼou, ʼe ke foaki anai maʼa te kau pelepitelo, ke feala ai hau maʼu he tapuakina ki tou ʼapi.”—Esekiele 44:30.
9. Koteā te ako neʼe fakahā e Sehova ʼaki te fakatuʼutuʼu ʼaē ke tuku he ʼu toega fulumeto?
9 Tolu, neʼe fakatuʼutuʼu e Sehova te tae ʼo te ʼu toega fulumeto. Neʼe fakatotonu fēnei e te ʼAtua: “Ka ke fai anai te taʼukai ʼo tou fenua, ʼe mole tonu anai ke ke tae fuli te ʼu magisi ʼo tau gāueʼaga, pea ʼe mole tonu anai ke ke tae te ʼu meʼa ʼaē ʼe tō ʼi tau taʼukai. ʼE mole tonu anai ke ke toli fuli tau vite, pea ʼe mole tonu anai ke ke tae te ʼu fuhiga vite ʼo tau vite ʼaē ʼe leta haʼele. Heʼe ke tuku anai maʼa ia ʼe fakaʼofaʼofa pea mo te tagata matāpule. Ko ʼau Sehova tokotou ʼAtua.” (Levitike 19:9, 10) ʼO toe feiā aipe, neʼe mole fakahā age kia nātou te lahi ʼo te ʼu meʼa ʼaē neʼe tonu ke nātou tuku. Neʼe fakalogo pe ki te Iselaele takitokotahi tana fakafuafua te lahi ʼo te magisi ʼaē neʼe ina tuku maʼa te hahaʼi māsisiva. Neʼe fakamahino lelei te faʼahi ʼaia e te Hau Poto ko Salomone: “Ko ia ʼaē ʼe ʼofa kia ia ʼe veliveli, ʼe ina foaki kia Sehova, pea ko Ia ʼaē ka ina liufaki anai kia ia.” (Tāʼaga Lea 19:17) Koia neʼe akoʼi mai e Sehova te manavaʼofa pea mo te loto tokaga ʼaē ʼe tonu ke tou fakahā kia nātou ʼe maʼuli fakaʼofaʼofa.
10. Neʼe koteā te ʼu fua ki te hahaʼi ʼo Iselaele mokā neʼe mole nātou fakahā te loto fakafetaʼi?
10 Neʼe tapuakina e Sehova te kau Iselaele mokā nātou fakalogo lelei ʼo foaki te time, pea mo foaki te ʼu meʼa ʼofa, pea mo foaki ki te hahaʼi masiva. Kae ʼi te temi ʼaē neʼe mole nātou fakahā ai he loto fakafetaʼi, neʼe puli ia nātou te ʼofa ʼo Sehova. Neʼe tupu ai te tuʼutāmaki pea mo te maʼuli popūla. (2 Fakamatala 36:17-21) Pea koteā te ʼu ako kia tatou?
Tatatou ʼu Gāue Fakafetaʼi
11. Koteā te meʼa lelei ʼe tou lava fai moʼo fakahā ai tatatou loto fakafetaʼi kia Sehova?
11 Ko te meʼa lelei ke tou fai moʼo fakavikiviki pea mo fakahā tatatou loto fakafetaʼi kia Sehova ʼe ko te fai ʼo he “mōlaga.” ʼE moʼoni, ʼi totatou ʼuhiga Kilisitiano ʼe mole kei tou fakalogo ki te Lao ʼa Moisese, ʼaē neʼe ina fakamaʼua ke mōlaga he ʼu sakilifisio manu peʼe ko he ʼu magisi. (Kolose 2:14) Kae neʼe fakaloto mālohiʼi fēnei e te ʼapositolo ko Paulo te kau Kilisitiano Hepeleo: “Tou momoli tuumau he sakilifisio o te fakavikiviki ki te Atua, ko te fua aia o te u laugutu e natou fakamooni ki tona Huafa.” (Hepeleo 13:15) ʼI tatatou fakaʼaogaʼi totatou ʼu fealagia pea mo totatou ʼu koloā moʼo foaki he sakilifisio fakavikiviki kia Sehova, peʼe ʼi te fai faka mafola peʼe ki te “hahaʼi kaugamālie ʼaē ʼe fakatahitahi” ʼo te ʼu tēhina mo tuagaʼane Kilisitiano, ʼe feala ke tou fakahā he loto fakafetaʼi lahi ki tatatou Tāmai ʼofa ko Sehova ʼAtua ʼi selo. (Pesalemo 26:12) Ka tou fai te faʼahi ʼaia, koteā te ako ʼe feala ke tou maʼu ʼi te ʼu faʼahi ʼaē neʼe tonu ke fakahā ai e te kau Iselaele tanatou loto fakafetaʼi kia Sehova?
12. ʼO ʼuhiga mo totatou maʼua ʼi totatou ʼuhiga Kilisitiano, koteā te ako ʼe tou maʼu ʼi te fakatuʼutuʼu ʼo te time?
12 Ia meʼa fuli ʼaia, ko te foaki ʼo te time neʼe ko he maʼua neʼe tonu ki te kau Iselaele fuli ke nātou fai. ʼI totatou ʼuhiga Kilisitiano, ʼe fakamaʼua mai kia tatou ke tou kau ki te minisitelio pea mo te ʼu fono faka Kilisitiano. ʼE fakamaʼua mai kia tatou te ʼu gāue ʼaia. ʼI te lea faka polofeta lahi ʼa Sesu ʼo ʼuhiga mo te temi fakaʼosi, neʼe ina fakahā lelei fēnei: “Ko te logo lelei ʼaenī ʼo te puleʼaga ʼe faka mafola anai ʼi te kele katoa, ko he meʼa fakamoʼoni ia ki te ʼu puleʼaga katoa; pea hoko mai ai leva te fakaʼosi.” (Mateo 24:14, MN; 28:19, 20) ʼO ʼuhiga mo te ʼu fono faka Kilisitiano, neʼe uga fēnei e te ʼAtua ia te ʼapositolo ko Paulo ke ina tohi fēnei: “Pea tou fe’tokagaʼaki o fakaʼalaʼala ki te fai o te ofa pea mo te u gaue lelei. Aua naa tou liaki atatou fakatahi o hage ko te aga mahani a ihi, kae tou fe’tokoniʼaki, pea tafito leva, e koutou mamata ki te fakaovi mai o te Aho.” (Hepeleo 10:24, 25) ʼE tou fakahā tatatou fakafetaʼi kia Sehova mokā ʼe tou tali fakafiafia totatou maʼua ʼaē ke tou fai faka mafola pea mo faiako, pea mo tatatou kau tuʼumaʼu ki te ʼu fono ʼo te kokelekasio mo totatou ʼu tēhina mo tuagaʼane, ʼo tou faka ʼuhiga te ʼu fakatuʼutuʼu ʼaia ʼe ko he pilivilesio pea ko he meʼa maʼuhiga.
13. Koteā te ako ʼe tou maʼu mai te fakatuʼutuʼu ʼo ʼuhiga mo te ʼu meʼa ʼofa pea mo te tae ʼo te ʼu toega fulumeto?
13 ʼO hilifaki mai kiai, ʼe feala ke tou toe vakaʼi te tahi ʼu fakatuʼutuʼu e lua ʼaē neʼe tonu ai ki te kau Iselaele ke nātou fakahā tanatou loto fakafetaʼi—te ʼu meʼa ʼofa pea mo te tae ʼo te ʼu toega fulumeto. ʼO mole hage ko te time, ʼaē neʼe ko he fakamaʼua neʼe hinoʼi te lahi ʼo te ʼu meʼa ʼaē neʼe tonu ke nātou foaki, ko te ʼu meʼa ʼofa pea mo te tae ʼo te ʼu toega fulumeto neʼe mole hinoʼi tonā lahi. Kae neʼe faka fealagia e te ʼu fakatuʼutuʼu ʼaia ke fakahā e te kaugana ʼa Sehova te loloto ʼo te fakafetaʼi ʼo tona loto, ʼaē neʼe ina uga ia ia ke ina foaki. ʼO toe feiā pe, logola tatatou leleiʼia te fai faka mafola ʼi te minisitelio pea mo te kau ki te ʼu fono faka Kilisitiano ohage ko he ʼu maʼua tāfito ʼo te ʼu kaugana fuli ʼa Sehova, kae ʼe tou kau koa kiai ʼaki he loto katoa pea mo he lotolelei? ʼE tou fakaʼaogaʼi koa te ʼu faʼahi ʼaia moʼo fakahā tatatou loto fakafetaʼi kia meʼa fuli neʼe fai e Sehova maʼa tatou? ʼE tou kau katoa koa ki te ʼu gāue ʼaia, ʼo mulimuli ki totatou ʼu fealagia takitokotahi? Peʼe tou faka ʼuhiga pe koa totatou ʼu maʼua fuli ʼaia ohage pe ko he meʼa ʼe tonu ke tou fai? Ei, ko te ʼu fehuʼi ʼaia ʼe tonu ke tou tali takitokotahi kiai. Neʼe fakahā e te ʼapositolo ko Paulo te faʼahi ʼaia, ʼo ina ʼui fēnei: “Pea ke tahi vakai e te tagata tana gaue, e ina mau ai anai he mea ke fiameamea ai, kae mole ko he gaue a he tahi kehe.”—Kalate 6:4.
14. ʼE loto e Sehova ke tou fai feafeaʼi tatatou tauhi kia te ia?
14 ʼE ʼiloʼi lelei e Sehova ʼAtua totatou ʼu ʼaluʼaga pea mo totatou ʼu tuʼakoi. ʼE ina leleiʼia te ʼu sakilifisio, ʼaē ʼe momoli fakaʼofa age e tana ʼu kaugana, peʼe lahi peʼe veliveli. ʼE ina ʼiloʼi ʼe mole tatau fuli anai te ʼu meʼa ʼaē tou foaki, pea mo te ʼu meʼa ʼaē ʼe tou lava fai. ʼI te palalau ʼa Paulo ʼo ʼuhiga mo te ʼu meʼa ʼofa fakasino, neʼe ina ʼui fēnei ki te kau Kilisitiano ʼo Kolonito: “Kapau ʼe ʼuluaki maʼu ai te tali lelei, ʼe tali tāfito ʼuhi ko te meʼa ʼaē ʼe maʼu e he tahi, kae ʼe mole fai ʼo mulimuli ki te meʼa ʼaē ʼe mole ina maʼu.” (2 Kolonito 8:12, MN ) Ko te pelesepeto ʼaia ʼe toe lelei ki tatatou tauhi ki te ʼAtua. ʼE mole ko te lahi ʼo tatatou tauhi ʼaē ʼe leleiʼia ai tatou e Sehova, kae ko tatatou faʼahiga fai ʼo tatatou tauhi—ʼaki he loto fiafia pea mo he loto katoa.—Pesalemo 100:1-5; Kolose 3:23.
Tou Fakatuputupu Pea Mo Taupau He Manatu Faka Pionie
15, 16. (a) Koteā te pikipikiga ʼo te gāue pionie pea mo te loto fakafetaʼi? (b) ʼE lava feafeaʼi kia nātou ʼaē ʼe mole lava pionie hanatou lagolago ki te manatu faka pionie?
15 Kapau ʼe tou toʼo te minisitelio temi katoa moʼo fakahā tatatou loto fakafetaʼi kia Sehova, pea ʼe tou maʼu ai te fakapale lahi. ʼAki te ʼofa kia Sehova pea mo te fakafetaʼi ki tona ʼofa makehe, neʼe fai te ʼu fetogi lahi e te ʼatu kaugana ʼa Sehova ʼi tonatou maʼuli, ke lahi ai tanatou gāue maʼa Sehova. Ko ʼihi ʼe feala ke nātou pionie katoa, ʼo nātou fai hola e 70 ʼi te māhina fuli moʼo faka mafola te logo lelei pea mo ako te moʼoni ki te hahaʼi. Ko ʼihi, ʼe nātou tuʼakoi ʼuhi heʼe ko tonatou ʼu ʼaluʼaga kehekehe, ʼe nātou pionie vaeluaʼi temi ʼi ʼihi temi, ʼo nātou faka mafola ia hola e 50 ʼi te māhina.
16 Kae e feafeaʼi ki te ʼu tuʼuga kaugana ʼa Sehova ʼaē ʼe mole feala ke nātou pionie katoa peʼe vaeluaʼi temi? ʼE feala ke nātou fakahā tanatou loto fakafetaʼi ʼaki tanatou fakatuputupu pea mo taupau te manatu faka pionie. ʼO feafeaʼi? ʼAki tanatou fakaloto mālohiʼi ia nātou ʼe feala ke pionie, ʼo nātou fakahū ki te loto ʼo tanatou fānau te loto ʼaē ke gāue temi katoa, pea mo nātou kau mālohi ki te gāue fai faka mafola mokā ʼe nātou fealagia kiai. ʼE fakalogo te meʼa ʼaē ʼe tou foaki ʼi totatou minisitelio ki te loloto ʼo te fakafetaʼi ʼo totatou loto ʼo ʼuhiga mo te ʼu meʼa ʼaē neʼe fai e Sehova, mo te ʼu meʼa ʼaē ʼe ina lolotoga fai, pea mo te ʼu meʼa ʼaē ka ina fai anai maʼa tatou ʼi te ka haʼu.
Tou Fakahā Tatatou Loto Fakafetaʼi ʼAki Totatou “ ʼu Koloā”
17, 18. (a) ʼAki totatou “ ʼu koloā,” ʼe tou lava fakahā feafeaʼi tatatou loto fakafetaʼi? (b) Koteā ʼaē neʼe ʼui e Sesu ʼo ʼuhiga mo te meʼa ʼofa ʼa te fafine vitua, pea koteā tona tupuʼaga?
17 ʼE ʼui fēnei ia Tāʼaga Lea 3:9: “Faka maʼuhiga ia Sehova ʼaki tou ʼu koloā pea mo te ʼu polopolo ʼo tou ʼu koloā fakakelekele fuli.” ʼE mole kei fakamaʼua ki te ʼu kaugana ʼa Sehova ke nātou foaki te time. Kae neʼe tohi fēnei e Paulo ki te kokelekasio ʼo Kolonito: “Ke tahi foakipe o fai ki te mea kua tonu ki ai tona loto, aua naa fai mo te loto mamahi, pe ko he maua, koteuhi e ofa te Atua kia ia ae e ina foaki fakafiafia.” (2 Kolonito 9:7) ʼE tou toe fakahā tatatou loto fakafetaʼi ʼaki te foaki meʼa ʼofa moʼo lagolago ki te gāue fai faka mafola ʼaē ʼe fai ʼi te malamanei katoa. Ko tatatou loto fakafetaʼi, ʼe ina uga tatou ke tou fai tuʼumaʼu te faʼahi ʼaia, pea kapau ʼe tou fealagia, pea tou tuku kehe ʼi te vāhaʼa fuli he ʼu meʼa ʼofa ohage ko tona fai e te kau ʼuluaki Kilisitiano.—1 Kolonito 16:1, 2.
18 ʼE mole ko te lahi ʼo te ʼu meʼa ʼofa ʼaē ʼe ina fakahā ai tatatou loto fakafetaʼi kia Sehova. Kae ko te tupuʼaga ʼo tatatou foaki te meʼa ʼofa ʼaia. Neʼe ko te meʼa ʼaia neʼe fakatokagaʼi e Sesu ʼi tana sioʼi te hahaʼi ʼaē neʼe tuku meʼa ʼofa ki te puha tānaki paʼaga ʼo te fale lotu. ʼI te sio ʼa Sesu ki te fafine vitua masiva neʼe ina ʼai te “kii fala-lua,” pea neʼe ʼui maʼana: “Mooni, e au tala atu kia koutou, e lahiʼage te mea nee tuku e te finetaka masiva aeni ia natou fuli. Koteuhi nee natou li te toe o onatou koloa ki te u molaga, kae kia te ia, mai tona masiva, nee ina li te mea nee ina mau, tona mauliʼaga katoa.”—Luka 21:1-4.
19. He koʼe ʼe lelei ke tou toe vakavakaʼi te ʼu faʼahi ʼaē ʼe feala ai ke tou fakahā tatatou loto fakafetaʼi?
19 ʼOfa pe ki te ako ʼaenī ʼaē neʼe tou vakaʼi ai te faʼahiga fakahā ʼo tatatou loto fakafetaʼi, ke ina uga tatou ke tou toe vakavakaʼi te ʼu ʼaluʼaga ʼaē ʼe tou lava fakahā ai te faʼahi ʼaia. ʼE feala koa ke tou fakatuputupu tatatou sakilifisio fakavikiviki kia Sehova, ʼo feiā mo tatatou lagolago ʼi te faʼahi faka paʼaga, ki te gāue ʼaē ʼe fai ʼi malamanei katoa? ʼO mulimuli ki te meʼa ʼaē ʼe tou fai, tou tui papau ko tatatou Tāmai manavaʼofa ko Sehova, ʼe fiafia anai ʼi tatatou fakahā te loto fakafetaʼi.
ʼE Kei Koutou Manatuʼi Koa?
• Koteā te ʼu tupuʼaga ʼaē ʼe tonu ai ke tou fakafetaʼi kia Sehova?
• Koteā te ʼu ako ʼe tou maʼu mai te foaki ʼo te time, te ʼu meʼa ʼofa, pea mo te tae ʼo te ʼu toega fulumeto?
• ʼE tou gāueʼi feafeaʼi te manatu faka pionie?
• ʼE tou lava fakaʼaogaʼi feafeaʼi totatou “ ʼu koloā” moʼo fakafetaʼi kia Sehova?
[Fehuʼi]
[Paki ʼo te pasina 15]
“Ko te faiofa taulekaleka fuape mo meaofa lelei fuape e fakahifo mai oluga”
[Paki ʼo te pasina 16]
ʼI henī, koteā te ʼu ako e tolu ʼe tou maʼu mai te Lao?
[Paki ʼo te pasina 18]
Koteā te ʼu sakilifisio ʼe tou lava fai?