Ko Te Kau Fai Faka Mafola ʼo Te Puleʼaga

Neʼe Ina Faka Kolōlia Te ʼAtua ʼi Tana Sio Ki Te Polokalama ʼi Te Televisio

NEʼE ʼui e te ʼapositolo ko Paulo “ko ʼihi ʼe nātou faka mafola ia Kilisito ʼaki te fuaʼā pea mo te fakafifihi; kae ko ʼihi ʼe nātou toe faka mafola ʼaki te lotolelei.” (Filipe 1:15, MN ) ʼI ʼihi temi, māʼia mo nātou ʼaē ʼe nātou faiga ke nātou palalau kovi ʼo ʼuhiga mo te hahaʼi ʼa Sehova, neʼe nātou fakatupu te fia logo ʼa te hahaʼi faitotonu ki te moʼoni.

ʼI Novepeli ʼo te taʼu 1998, neʼe fakahā ʼi te televisio ʼi Falani te Petele, te filiale ʼa te kau Fakamoʼoni ʼa Sehova ʼi Louviers, ʼi Falani. Logola te ʼu manatu kehekehe ʼaē neʼe tupu ʼaki te polokalama ʼaia, kae neʼe hoko ai te meʼa fakafiafia, neʼe mole ʼamanaki kiai.

Ia nātou ʼaē neʼe nātou sio ki te ʼata ʼaia, neʼe ʼi ai ia Anna-Paula, neʼe nofo ia kilometa e 60 ʼe mamaʼo mai te Petele. Ko Anna-Paula, ʼaē neʼe kua mavete mo tona ʼohoana pea neʼe ina taupau tana ʼu toe e toko lua, neʼe lolotoga kumi gāue. ʼI te uhu ake, neʼe telefoni ki te Petele moʼo kole age peʼe feala ke gāue ai. Neʼe ina ʼui fēnei: “Kia ʼau, neʼe ko he koga meʼa maʼa pea ko te gāue ʼaē neʼe fai ai neʼe ʼi ai tona ʼaoga.” Neʼe punamaʼuli ʼi te fakahā age ʼaē ko nātou fuli ʼaē ʼe gāue ʼi te Petele neʼe mole totogi tanatou gāue! ʼI tana ʼosi fai palalau nounou ʼo ʼuhiga mo te ʼu gāue ʼa te kau Fakamoʼoni ʼa Sehova, neʼe ina tali ke ʼaʼahi ia ia e te Fakamoʼoni.

ʼI te temi ʼaē neʼe ʼaʼahi ai ia ia e Léna, ko he pionie katoa ʼo te kokelekasio, neʼe nā fai palalau fualoa ai, pea neʼe tali e Anna-Paula te tohi Te ʼAtamai Mālama ʼAē ʼe Ina Taki Ki Te Maʼuli Heʼegata. * ʼI tana toe ʼaʼahi, neʼe kua ʼosi lau e Anna-Paula te tohi katoa pea neʼe lahi ʼaupito tana ʼu fehuʼi. Neʼe ina tali ke fai hana ako Tohi-Tapu. Neʼe ʼui fēnei e Anna-Paula: “Maʼa aku, neʼe ko te faigamālie ke ʼau ʼiloʼi ai ia te Folafola ʼa te ʼAtua. Neʼe mole heʼeki ʼau nofo mo haku Tohi-Tapu.”

ʼI Sanualio, neʼe ʼaʼahi e Anna-Paula te Petele, pea ʼi te vāhaʼa ʼaē neʼe hoa kiai, neʼe kau ki tana ʼuluaki fono. Mole tuai, neʼe ina kamata ako te Tohi-Tapu mo tana fānau pea mo fai faka mafola ki tona ʼu kaumeʼa. ʼE ina ʼui fēnei: “Neʼe mole feala ke ʼau taupau maʼa ʼaku te ʼu meʼa ʼaē neʼe ʼau ako. Neʼe ʼau fia vaevae te moʼoni ʼa te Tohi-Tapu mo te hahaʼi pea mo fakaloto fīmālieʼi nātou.” Hili tana faiga ʼaē ke ina tauʼi tona ʼu fihifihia, neʼe kamata kau tuʼumaʼu ia Anna-Paula ki te ʼu fono. Neʼe vave tana tuputupu fakalaumālie, pea neʼe papitema ʼi Maio ʼo te taʼu 2002.

Tahi ʼaē meʼa, ʼaki te faʼifaʼitaki lelei ʼa Anna-Paula pea mo tana faʼafai ʼi te fai faka mafola, neʼe kamata ako e tana faʼe ia te Tohi-Tapu pea neʼe papitema. ʼE ʼui fēnei e Anna-Paula: “ ʼE mole ʼau maʼu haku ʼu palalau moʼo fakamatala te fiafia ʼaē ʼe ʼau logoʼi. ʼE ʼau fakamālo kia Sehova ʼi te ʼaho fuli ʼi tana faka fealagia ʼaē ke ʼau ʼiloʼi ia ia, pea mo tauhi kia te ia pea mo te ʼu tapuakina fuli ʼaē neʼe ina foaki mai.”

[Kiʼi nota]

[Paki ʼo te pasina 8]

ʼI ʼoluga: Ko Anna-Paula

[Paki ʼo te pasina 8]

ʼI lalo: Ko te hūʼaga ʼo te filiale ʼo Falani