Te Tupuʼaga ʼo Tanatou ʼOlo Ki Te ’Ēkelesia

“ ʼI TE temi nei, ʼi te Lepupilika ʼo Kolea, kua teitei laka age ʼi te tuʼa fā te hahaʼi lotu Présbytérienne ʼi te hahaʼi ʼo te lotu ʼaia ʼi Amelika.” Ko te ʼu palalau ʼaia neʼe tohi ʼi te nusipepa Newsweek, neʼe lagi punamaʼuli ai te tokolahi ʼaē neʼe nātou lau, koteʼuhi ʼe lahi te hahaʼi ʼe nātou manatu ko Kolea ʼe ko he fenua e lotu Confucianiste peʼe Putisi. Ia ʼaho nei, ʼe feala ki he tahi ʼe ʼalu ʼo mata fenua, ke sio ki te ʼu tuʼuga ʼēkelesia “Kilisitiano,” pea ʼi te agamāhani ʼe tuʼu ai te koluse mo he ʼu hila ʼe kula. ʼI te ʼu ʼAhotapu, ʼe ko he meʼa māhani hakita sio ki te hahaʼi ʼe nātou ʼolo taki toko lua peʼe taki toko tolu ki te ʼēkelesia mo tanatou Tohi-Tapu. ʼO mulimuli ki te sivi neʼe fai ʼi te taʼu 1998, ko te teitei toko 30 ʼi te teau ʼo te kau Kolea ʼe nātou ʼolo ki te ʼēkelesia Katolika peʼe Polotesita, ʼo nātou laka age ia nātou ʼaē ʼe nātou lau ʼe nātou Putisi.

Ia ʼaho nei, ʼi te ʼu potu fuli pe ʼe ko he meʼa māhani te sio ki te hahaʼi tokolahi feiā ʼe nātou ʼolo tuʼumaʼu ki te ʼēkelesia. ʼE mole hoko pe ʼi Kolea, kae ʼe toe feiā mo te tahi ʼu fenua ʼo Asia, mo Afelika pea mo Amelika Latina. He koʼe ʼe hahaʼi feiā ia nātou ʼaē ʼe nātou ʼui ʼe kei nātou tui ki te ʼAtua logola kua tokolahi te hahaʼi ʼe mole kei fia tauhi lotu? He koʼe ʼe nātou ʼolo ki te ʼēkelesia?

ʼI te sivi neʼe fai e te sosiete Gallup, neʼe hā ai ko te vaelua ʼo te hahaʼi Kolea ʼaē ʼe ʼolo ki te ʼēkelesia ʼe nātou fia maʼu te tokalelei ʼo te fakakaukau, pea ko te vahe e 1 ʼi te 30 ʼe nātou fia maʼu te maʼuli heʼegata ʼi tanatou ʼosi mate, pea ko te toko 1 ʼi te toko 10 ʼe nātou fia maʼu he maʼuli ʼe lelei, mo he ʼu koloā pea mo maʼuli fiafia.

Tokolahi te kau Siaina ʼe nātou ʼolo ki te ʼu ʼēkelesia heʼe nātou fia maʼu he ʼu manatu fakalaumālie, he neʼe mole kei nātou maʼu ʼuhi ko te fetogi māmālie ʼo te kominisi ʼaki te capitalisme. ʼI te taʼu fuli, ʼe tā te ʼu Tohi-Tapu e lauʼi miliona pea mo tufa ʼi Siaina, pea ʼe hage ʼe lau e te hahaʼi te tohi ʼaia ohage ko tanatou lau te kiʼi tohi kula ʼa Mao.

Ko ʼihi Katolika ʼi Pelesile, tāfito te kau tūpulaga, ʼe mole nātou fia talitali ke hoko mai te fakapapau ʼo he maʼuli fiafia ʼi te ka haʼu​—ʼe nātou loto ke hoko ʼi te temi nei. ʼE ʼui fēnei e te sulunale Tudo: “Kapau ʼi te ʼu taʼu 1970 neʼe ko te manatu ki te ʼāteaina ʼaē neʼe ina uga ai te loto pea mo te fakakaukau ʼa te hahaʼi [ke nātou ʼolo ki te ʼēkelesia], ʼi te temi  nei ʼe ko te fia maʼu koloā.” Neʼe fai te sivi ʼi Pilitania ʼo kole ai ki te hahaʼi ʼo te ʼu ʼēkelesia ke nātou fakahā te meʼa e tahi ʼe nātou leleiʼia ʼi tonatou ʼēkelesia. Neʼe ʼuluaki ʼui e te tokolahi ko tanatou fia fakakaugā.”

ʼE fakahā e te ʼu faʼahi fuli ʼaia, logola ʼe tokolahi te hahaʼi ʼaē ʼe kei tui ki te ʼAtua, kae ʼe lahi age ia nātou ʼaē ʼe nātou fia maʼu te ʼu meʼa ʼaē ʼe nātou loto kiai ʼi te temi nei kae mole ʼi te temi ka haʼu​—peʼe mole nātou fia ako ʼo ʼuhiga mo te ʼAtua. ʼE ko he tupuʼaga lelei koa ʼaia ke tou tui ai ki te ʼAtua? Koteā ʼaē ʼe ʼui e te Tohi-Tapu ʼo ʼuhiga mo te faʼahi ʼaia? ʼE koutou maʼu anai tona tali ʼi te alatike ʼaē ka hoa mai.