Te Tupuʼaga Lelei Ke Tou Tui Ai Ki Te ʼAtua

ʼI TE tohi Kolea ʼaē ko tona kupu tāfito 31 Reasons Why Young People Leave the Church (Ko Tupuʼaga e 31 ʼo Te Mavae ʼa Te Kau Tūpulaga ʼi Te ’Ēkelesia), ʼe ʼui ai ko te tokolahi ʼe mole kei nātou ʼolo ki te ʼēkelesia koteʼuhi heʼe mole nātou maʼu ai he ʼu tali lelei ki tanatou ʼu fehuʼi. Ohage la, ʼe nātou feʼekeʼaki, ‘He koʼe ʼe maʼuli mamahi te hahaʼi ʼaē ʼe tui ki te ʼAtua?’ pea ‘He koʼe ʼe tonu ke tou tui ki te ʼu akonaki fuli ʼa te ʼēkelesia kae ʼe lahi te ʼu akonaki ʼe mahino gataʼa pea ʼe mole felogoi tahi?’

ʼI tanatou mole leleiʼia te ʼu tali ʼaē neʼe foaki age e tanatou lotu, tokolahi ʼe nātou manatu ai ʼe mole tali kiai te Tohi-Tapu. Ka foaki e he tagata takitaki lotu he fakamahino ʼe fakatafito pe ki tana manatu ʼaʼana, pea ʼi te agamāhani ʼe mole mahino kiai te hahaʼi peʼe tupu ai tanatou mole kei tui ki te ʼAtua pea mo te Tohi-Tapu.

Neʼe ko te meʼa ʼaia neʼe hoko kia Abel, ʼaē neʼe akoʼi age ki ai e te lotu Polotesita ʼi Afelika Saute. ʼE ina ʼui fēnei: “ ʼE akoʼi mai ʼi te ʼēkelesia ko te hahaʼi fuli ʼaē ʼe mamate ʼe ‘toʼo’ nātou e te ʼAtua. Kae neʼe mole feala haku mahino pe koʼe ʼe ‘toʼo’ e te ʼAtua ʼofa te ʼu mātuʼa mai tanatou ʼu fānau. ʼI te kolo ʼo Afelika ʼaē neʼe ʼau lahilahi ai, ʼe mātou tuku te matuʼa moa ke maʼuli ʼo aʼu ki te kua lahilahi ake ʼo tona ʼu kiʼi ʼuhi. Kapau ʼe faitama he pipi fafine, pea ʼe mole mātou matehi kae mātou tuku ʼo aʼu ki tana fānauʼi tona ʼuhi pea mo lava kai tokotahi. Neʼe mole ʼau mahino pe koʼe ʼe mole ʼofa feiā te ʼAtua ki te hahaʼi.”

Ko Aram, ko te tagata Kanata, neʼe ina toe maʼu mo ia te ʼu manatu lotolotolua. ʼE ina fakamatala fēnei: “ ʼI toku taʼu 13, neʼe mate taku tāmai. ʼI te fai ʼavaifo, ko te tagata takitaki lotu neʼe ina fakamahino neʼe loto ia te ʼAtua ke mate taku tāmai ke feala hana ōvi age kia te ia ʼi selo. Neʼe ina ʼui fēnei: ‘ ʼE toʼo e te ʼAtua te ʼu hahaʼi agalelei  heʼe ʼofa ki te hahaʼi faitotonu.’ Neʼe mole ʼau mahino peʼe lava feafeaʼi ki te ʼAtua ke manatu pe kia ia tokotahi.”

ʼAki te temi, ko Abel pea mo Aram neʼe nā felāveʼi mo te kau Fakamoʼoni ʼa Sehova, ʼo nā ako te Tohi-Tapu mo nātou, pea nā maʼu leva te ʼu tali ki tanā ʼu fehuʼi. Neʼe tuputupu ia nāua te ʼofa ki te ʼAtua pea mo he tui mālohi kia te ia. Ki muli age, neʼe nā foaki tonā maʼuli kia Sehova ʼo nā liliu ko tana ʼu kaugana agatonu.

Te ʼAtamai Mālama​—Ko He Faʼahi Maʼuhiga Ke Tou Tui Ai Ki Te ʼAtua

Koteā ʼaē ʼe feala ke tou ako mai te ʼu meʼa ʼaia? Kua mahino mai, ke feala hakita tui ki te ʼAtua ʼe maʼuhiga ke kita maʼu te ʼatamai mālama totonu ʼo ʼuhiga mo te Tohi-Tapu. Neʼe ʼui fēnei e te ʼapositolo ko Paulo ki te kau Kilisitiano ʼo te kolo ʼāfea ʼo Filipe: “ ʼE ʼau haga faikole ʼo ʼuhiga mo te potu ʼaenī ʼi ʼaku ʼu faikole: ke ʼāsili tuputupu aipe tokotou ʼofa ʼi he ʼatamai mālama totonu pea mo he fakasiosio totonu ʼe katoa.” (Filipe 1:9, MN ) ʼI henī ʼe fakahā lelei e Paulo ko te ʼofa ki te ʼAtua pea mo te ʼu tēhina ʼi te tui, ʼe ʼalutahi mo te ʼatamai mālama ʼo ʼuhiga mo te ʼAtua pea mo te ʼiloʼi ʼaē pe koteā tona finegalo.

ʼE fakapotopoto te faʼahi ʼaia, koteʼuhi ko te ʼuluaki faʼahi ʼaē ʼe tonu ke tou maʼu ke tou tui pea mo falala ai ki he tahi, ʼe ko hatatou ʼiloʼi ia ia​—kapau ʼe tou ʼiloʼi lelei ia ia pea ʼe toe lahi age anai tatatou falala kia ia. ʼO toe feiā pe, ʼe tonu ke koutou maʼu te ʼatamai mālama totonu ke feala ai hakotou tui ki te ʼAtua. Neʼe ʼui fēnei e Paulo: “Ko te tui ʼe ko he ʼamanaki moʼoni ki he ʼu meʼa ʼe tou falala ki ai, ko te fakamoʼoni lelei ʼo te ʼu moʼoni logope la ʼe mole tou sisio ki ai.” (Hepeleo 11:1, MN ) Kapau ʼe tou tui ki te ʼAtua kae mole tou maʼu te ʼatamai mālama totonu ʼo te Tohi-Tapu, pea ʼe hage pe ko hatatou laga he ʼapi ʼi te ʼone. ʼE holo gafua.

Ko te ako ʼo te Tohi-Tapu ʼe tokoni atu ke koutou maʼu te ʼu tali ki te ʼu fehuʼi, ohage ko te fehuʼi ʼaē neʼe fia mahino ki ai ia Abel pea mo Aram: Pe koʼe ʼe mamate te hahaʼi? ʼE fakamahino fēnei e te Tohi-Tapu “aki he tagata e tahi nee hu mai te agahala ki te malama-nei pea aki te agahala ia te mate, pea nee ausia e te mate te tagata fuape: pea tahi, kua agahala fuli.” (Loma 5:12) ʼE matutuʼa te hahaʼi pea mo mamate, mole ʼuhi heʼe toʼo nātou e te ʼAtua ke nātou maʼuʼuli mo ia, kae ʼe tupu ko te agahala ʼa Atama. (Senesi 2:16, 17; 3:6, 17-19) Tahi ʼaē meʼa, ʼe fakahā e te Tohi-Tapu te ʼamanaki moʼoni ʼaē ʼe foaki e Sehova ʼAtua. ʼAki tona ʼAlo, ia Sesu Kilisito, ʼe ina foaki te ʼamanaki ʼo te fakatuʼuake ki te hahaʼi agahala.​—Soane 5:28, 29; Gaue 24:15.

Moʼo tokoni mai kia tatou ke tou mahino ki te moʼoni ʼo ʼuhiga mo te fakatuʼuake, ʼe maʼu ʼi te Tohi-Tapu te ʼu tuʼuga fakamatala ʼo ʼuhiga mo te ʼu hahaʼi neʼe fakatuʼuake nātou e Sesu. (Luka 7:11-17; 8:40-56; Soane 11:17-45) Ka koutou lau te ʼu fakamatala ʼaia ʼi te Tohi-Tapu, pea koutou tokagaʼi te fiafia ʼaupito ʼa te ʼu kaumeʼa pea mo te famili ʼo nātou ʼaē neʼe fakatuʼuake. Koutou toe tokagaʼi neʼe uga ai nātou ke nātou fakavikiviki ki te ʼAtua pea mo tui kia Sesu.

Ia ʼaho nei, ʼe toe malave tatau ki te hahaʼi ia te ʼatamai mālama totonu ʼo ʼuhiga mo te ʼAtua pea mo tana fakatuʼutuʼu. ʼI te temi muʼa, tokolahi te hahaʼi neʼe mole nātou mahino ki te ʼu akonaki, neʼe nātou taʼomia ai pea mo nātou lotolotolua, koteʼuhi neʼe ʼi ai te ʼu fehuʼi maʼuhiga neʼe mole nātou maʼu he ʼu tali lelei kiai. Kae ʼi tanatou ako te Tohi-Tapu, neʼe nātou maʼu te ʼu tali, ʼo fetogi katoa ai tonatou maʼuli.

Te ʼOfa Ki Te ʼAtua​—Te Tupuʼaga Tāfito ʼo Tatatou Tauhi Kia Te Ia

Logola ʼe maʼuhiga te ʼatamai mālama totonu ke feala hatatou tui ki te ʼAtua, kae ʼe ʼi ai te tahi faʼahi ʼe tonu ke ina uga ai he tahi ke fakalogo pea mo tauhi kia te ia. ʼI te fehuʼi ʼaē kia Sesu pe koteā te fakatotonu ʼa te ʼAtua ʼaē ʼe lahi tokotahi, neʼe ina ʼui fēnei: “E ke ofa anai ki te Aliki tou Atua mo tou loto katoa, mo tou laumalie katoa, mo tau fakakaukau katoa pea mo tou malohi katoa.” (Maleko 12:30) Kapau ʼe ʼofa he tahi ki te ʼAtua ohage ko tona fakahā e Sesu, pea ʼe fia fakalogo moʼoni anai pea mo tauhi kia te Ia. ʼE koutou fai anai koa te faʼahi ʼaia?

Ko Rachel, ʼaē neʼe gāue misionea ʼi Kolea lolotoga ni ʼu taʼu, ʼe ina fakahā te tupuʼaga ʼo tana tui: “ ʼE ʼau fakakaukauʼi te loto fia foaki ʼaē ʼe fakahā e Sehova ki te hahaʼi, mo tana loto fakamolemole ki tana hahaʼi, pea mo tana loto ʼaē ke lelei totatou maʼuli, ʼo ina akoʼi mai te meʼa ʼaē ʼe ina loto ke  tou fai. ʼUhi ko te ʼu faʼahi fuli ʼaia ʼe tuputupu ai toku ʼofa ki te ʼAtua, pea ko te ʼofa ʼaia ʼe ina uga ʼau ke ʼau tauhi kia te ia.”

Ko Martha, ko te fafine vitua ʼi Siamani, neʼe tauhi kia Sehova lolotoga taʼu e 48. ʼE ina ʼui fēnei: “He koʼe ʼe ʼau tauhi kia Sehova? Heʼe ʼau ʼofa kia te ia. ʼI te ʼu afiafi fuli ʼe ʼau palalau kia Sehova ʼi te faikole pea mo ʼau fakahā age toku loto fakafetaʼi lahi ki tana ʼu tapuakina fuli, tāfito te sakilifisio faitotogi.”

ʼE moʼoni, ko te ʼofa ki te ʼAtua ʼe ina uga tatou ke tou tauhi kia te ia ʼaki totatou loto katoa. Kae ʼe lava maʼu feafeaʼi e he tahi te ʼofa ʼaia? ʼE tou ʼofa lahi ki te ʼAtua heʼe tou loto fakafetaʼi ki tona ʼofa ʼaē kia tatou. Koutou tokagaʼi te fakamanatu ʼa te Tohi-Tapu, ʼaē ʼe ina fakamāfanaʼi totatou loto: “Ko ʼaē ʼe mole ʼofa neʼe mole ina ako te ʼiloʼi ʼo te ʼAtua, koteʼuhi ko te ʼAtua ʼe ʼofa. ʼAki te meʼa ʼaenī neʼe hā ai te ʼofa ʼo te ʼAtua kia tatou, koteʼuhi neʼe fekauʼi mai e te ʼAtua tona ʼAlo ʼulu tokotahi ki te malamanei, ke feala ai ʼaki ia ia ke tou maʼu ai te maʼuli. Ko te ʼofa ʼi te faʼahi ʼaia, neʼe mole ko tatou ʼaē neʼe ʼoʼofa ki te ʼAtua, ka ko ia ʼaē neʼe ʼofa kia tatou pea mo ina fekauʼi mai tona ʼAlo ko he sakilifisio faifakalelei ki ʼatatou ʼu agahala.”​—1 Soane 4:8-10, MN.

ʼE koutou mahino koa ki te lahi ʼaupito ʼo te ʼofa ʼaia? Kapau la ʼe koutou tafea ʼi he vaitafe ʼe tatafe mālohi pea ʼe hāofaki koutou e he tahi logola neʼe feala ke mate mo ia. ʼE koutou galoʼi anai koa ia ia, peʼe mole koutou loto fakafetaʼi ʼaupito kia te ia? ʼE mole koutou loto anai koa ke koutou fai ia meʼa fuli maʼa ia. ʼE mole he ʼofa ʼe feala ke fakatatau ki te ʼofa lahi ʼaē neʼe fakahā e te ʼAtua ʼi tana foaki tona ʼAlo, ia Sesu Kilisito, ko he sakilifisio faitotogi. (Soane 3:16; Loma 8:38, 39) Ka malave ki tokotou loto te ʼofa ʼo te ʼAtua, pea ʼe uga anai koutou ke koutou ʼofa pea mo tauhi kia te ia ʼaki tokotou loto katoa.

Te ʼu Tapuakina ʼi Te Temi Nei Pea Mo Te Ka Haʼu

Logola ko totatou ʼofa ki te ʼAtua ʼaē ʼe ina uga tāfito ia tatou ke tou fai tona finegalo, kae ʼe fakaloto fīmālie te ʼiloʼi ʼaē ʼe fakapale e te ʼAtua ia nātou ʼaē ʼe tauhi kia te ia. ʼE fakahā lelei e te ʼapositolo ko Paulo ia te faʼahi ʼaia: “E mole feala ki he tahi ke lelei ki te Atua, kapau e mole ina mau te tui, he ko ae e laka ki te Atua, e maua ke tui, e mauli  pea e ina fakapale natou e natou kumi iaʼia.”​—Hepeleo 11:6.

Ko nātou ʼaē ʼe ʼoʼofa pea mo fakalogo ki te ʼAtua ʼe tapuakina moʼoni nātou. Tokolahi ʼe lelei age tonatou maʼuli heʼe nātou mulimuli ki te ʼu pelesepeto ʼa te Tohi-Tapu. (Tāʼaga Lea 23:20, 21; 2 Kolonito 7:1) Ko nātou ʼaē ʼe nātou maʼuliʼi te ʼu pelesepeto ʼo te Tohi-Tapu ʼo ʼuhiga mo te gāue agatonu pea mo te faʼa gāue, ʼi te agamāhani ʼe falala tonatou patolo kia nātou pea ʼe mole lahi tonatou ʼu fihifihia ʼi te faʼahi ʼo te paʼaga. (Kolose 3:23) ʼI tanatou tuku tanatou falala kia Sehova, ʼe maʼu e te ʼu kaugana ʼa te ʼAtua te tokalelei ʼi te ʼu temi faigataʼa. (Tāʼaga Lea 28:25; Filipe 4:6, 7) ʼE nātou falala tāfito ki te maʼuli heʼegata ʼi te Palatiso ʼaē ka fakatuʼu.​—Pesalemo 37:11, 29.

Koteā te manatu ʼa nātou ʼaē ʼe nātou maʼu te ʼu tapuakina ʼaia ʼo ʼuhiga mo Sehova? Ko Jacqueline, ko te tuagaʼane ʼo Kanata, ʼe ina fakahā tana loto fakafetaʼi ki te ʼAtua: “ ʼE ina foaki tuʼumaʼu kia tatou te ʼu meʼa ʼofa taulekaleka, pea mo te ʼamanaki moʼoni ʼo te maʼuli heʼegata.” Koʼeni te manatu ʼa Abel, ʼaē neʼe tou talanoa ki ai ʼi te kamata: “Neʼe ko he meʼa foʼou kia ʼau te ʼamanaki ʼo te maʼuli heʼegata ʼi te palatiso, pea ʼe ʼau fakaʼamu lahi ke hoko mai te fakatuʼutuʼu ʼaia. Kae tatau aipe pe neʼe mole ʼi ai he Palatiso, kae ʼe ʼau fiafia pe anai ʼi te fakahā ʼo toku ʼofa ki te ʼAtua ʼo ʼau tauhi kia te ia.”

ʼE Feala Ke Koutou Maʼu Mo Koutou Te Tui Moʼoni

ʼE ʼui fēnei e te Tohi-Tapu: “Ko Sehova ʼo te ʼatu kautau ʼe ina fakamāuʼi ʼaki te faitotonu, ʼe ina sivisivi te ʼu ifiifi pea mo te loto.” (Selemia 11:20) ʼE moʼoni, ʼe vakaʼi e Sehova te meʼa ʼaē ʼe fufū pea mo loloto ia tatou. ʼE tonu ke tou tahi vakaʼi te tupuʼaga ʼo tatatou tui ki te ʼAtua. Ko te ʼu akonaki pea mo te ʼu manatu hala ʼo ʼuhiga mo te ʼAtua neʼe lagi tupu ai tatatou fai he ʼu meʼa ʼe kovi ʼi muʼa atu. Kae ʼaki te ʼatamai mālama totonu ʼo te Tohi-Tapu, ʼe feala ke tou maʼu he ʼu felogoi lelei mo te Tupuʼaga, ia Sehova ʼAtua.​—1 Timoteo 2:3, 4.

ʼAki te ʼu ako Tohi-Tapu ʼaē ʼe fai e te kau Fakamoʼoni ʼa Sehova, ʼe nātou tokoni ai ki te hahaʼi ke nātou maʼu te ʼatamai mālama totonu ʼo ʼuhiga mo te ʼAtua. (Mateo 28:20) Ko te tokolahi ʼaē neʼe nātou tali te tokoni ʼaia neʼe nātou ʼoʼofa ki te ʼAtua pea mo loloto ai tanatou tui kia te ia. ʼAki tanatou ako Tohi-Tapu, neʼe nātou maʼu ai “te poto ʼaoga pea mo te fealagia fakakaukau,” ʼaē ʼe tokoni kia nātou ke nātou “haʼele fīmālie” ʼi te temi tuʼutāmakiʼia ʼaenī. (Tāʼaga Lea 3:21-23) Kae ko te meʼa ʼaē ʼe maʼuhiga, kua nātou maʼu ʼi te temi nei te ʼamanaki “ ʼe moʼoni ia pea ʼe tukupau ia” ki te ka haʼu. (Hepeleo 6:19, MN ) ʼE feala ke koutou maʼu mo koutou te tui moʼoni pea mo te ʼu tapuakina ʼaia.

[Talanoa ʼo te pasina 6]

Te ʼu Fehuʼi Faigataʼa ʼe Tonu Ke Maʼu Ni ʼu Tali Kiai

“ ʼI taku lolotoga ako ʼi te lopitali te gāue tōketā, neʼe ʼau sio ki te hahaʼi agalelei neʼe nātou mamahi ʼuhi ko te mahaki pea mo te ʼu tuʼutāmaki. Kapau ʼe ʼi ai he ʼAtua, pea he koʼe ʼe ina fakagafua ke hoko te ʼu meʼa ʼaia? ʼE ʼaoga pe koa te lotu ke tou maʼu ai te tokalelei ʼo te ʼatamai?”​—Ko te tagata Kolea neʼe kau ʼi muʼa atu ʼi te lotu ‘ Presbytérienne. ’

“Neʼe ʼau fia ʼiloʼi ʼo ʼuhiga mo toku tāmai, ʼaē neʼe ʼinu kava tuʼumaʼu, pe neʼe ʼalu ki ʼifeli peʼe ki selo. Neʼe ʼau mataku ʼi te mate pea mo te ʼifeli. Neʼe mole ʼau mahino peʼe lava feafeaʼi ki he ʼAtua ʼofa ke ina fakamamahiʼi he tahi ʼo heʼegata ʼi ʼifeli.”​—Ko te tagata Pelesile neʼe katolika ʼi muʼa atu.

“Koteā ʼaē ka hoko ki te kele pea mo te hahaʼi ʼi te ka haʼu? ʼE lava feafeaʼi ki te hahaʼi ke nātou maʼuʼuli ʼo heʼegata? ʼE lava maʼu feafeaʼi e te hahaʼi te tokalelei moʼoni?”​—Ko te tagata Siamani neʼe katolika ʼi muʼa atu.

“Neʼe mole ʼau mahino ki te akonaki ʼaē ʼe ina ʼui ka mate he tahi, pea ʼe ʼulu tona laumālie ki he tahi sino, peʼe ko he manu peʼe ko he tagata. ʼE mole feala ki te ʼu manu ke nātou tauhi ki te ʼAtua, koia kapau la ʼe toe ʼulu totatou laumālie ki te sino ʼo he manu moʼo totogi tatatou ʼu agahala, pea ʼe lava feafeaʼi hatatou fakatokatoka tatatou ʼu agahala pea mo hikihiki mai te ʼaluʼaga ʼaia?”​—Ko he tagata ʼo Afelika Saute neʼe Inituisi ʼi muʼa atu.

“Neʼe ʼau lahilahi ake ʼi te famili neʼe lotu Confucianiste, pea neʼe ʼau kau māhani ki te toʼotoʼoga ʼaē neʼe fai maʼa tamatou ʼu kui ʼaē kua mamate. ʼI taku hili ki te laupapa te ʼu meʼa kai ʼaē neʼe momoli faka sakilifisio pea mo ʼau tulolo, neʼe ʼau feʼekeʼaki peʼe ʼōmai anai te ʼu kui ʼaē kua mamate ʼo kai te meʼa kai pea mo sisio mai ki tamatou tulolo.”​—Ko te tagata Kolea neʼe kau ʼi te lotu ‘ Confucianiste ’ ʼi muʼa atu.

Neʼe maʼu e te hahaʼi fuli ʼaia te ʼu tali ki tanatou ʼu fehuʼi ʼi tanatou ako te Tohi-Tapu mo te kau Fakamoʼoni ʼa Sehova.