Te ʼu Fehuʼi ʼa Te Kau Lautohi

ʼE tali koa e te kau Fakamoʼoni ʼa Sehova te ʼu faitoʼo ʼaē ʼe maʼu ai te toto?

Ko te tali ʼaenī neʼe toe toʼo pe mai Te Tule Leʼo ʼo te ʼaho 15 ʼo Sūnio 2000.

Ko tona tali fakahagatonu, ʼe fakafisi te kau Fakamoʼoni ʼa Sehova ki te toto. ʼE mātou tui mālohi ko te lao ʼa te ʼAtua ʼo ʼuhiga mo te toto ʼe mole fetogi ke ʼalutahi mo te manatu ʼa te hahaʼi. Kae ʼe lagaʼi ai te ʼu fehuʼi, koteʼuhi ʼi te temi nei kua feala ki te hahaʼi popoto ke nātou vaevae te toto ia koga tāfito e fā pea mo vaevae fakakoga. ʼI tana vakaʼi peʼe ina tali anai te ʼu meʼa ʼaia peʼe kailoa, ko te Kilisitiano ʼe mole ina vakaʼi pe anai te ʼu lelei pea mo te ʼu tuʼutāmaki ʼaē ʼe feala ke tupu ai. ʼE tuʼania tāfito ki te meʼa ʼaē ʼe ʼui e te Tohi-Tapu, pea mo tona ʼu fua kovi anai ki tana ʼu felogoi mo te ʼAtua Māfimāfi.

ʼE faigafua te ʼu meʼa tāfito ʼaē ʼe tonu ke kita vakaʼi. Moʼo tokoni atu ki te faʼahi ʼaia, koutou vakaʼi te ʼu puani faka Tohi-Tapu, mo te hisitolia pea mo te ʼu meʼa faka tōketā.

Neʼe ʼui e Sehova ʼAtua kia Noe, tatatou kui, ko te toto ʼe ko te meʼa makehe. (Senesi 9⁠:​3, 4) Ki muli age, ko te ʼu lao ʼaē neʼe foaki e te ʼAtua ki Iselaele, neʼe nātou fakahā ai te ʼuhiga taputapu ʼo te toto: “Ko te tagata fuli ʼo te ʼapi ʼo Iselaele pe ko te matāpule . . . ʼaē ʼe ina kai he faʼahiga toto, ʼe ʼau fakahaga anai toku fofoga ki te nefesi ʼaē ʼe kai ki te toto.” ʼI tana fakafisi ki te lao ʼa te ʼAtua, neʼe feala ki he tagata pe ko he fafine Iselaele ke ina uga te tahi ʼu hahaʼi ke nātou mulimuli kia ia, koia neʼe toe ʼui fēnei ai e te ʼAtua: “ ʼE ʼau pulihi anai ia ia ʼi te lotolotoiga ʼo tana hahaʼi.” (Levitike 17⁠:10) Ki muli age, ʼi te fono ʼaē neʼe fai ʼi Selusalemi, ko te kau ʼapositolo pea mo te kau tagata ʼāfea, neʼe nātou fai te tonu ʼaē ke kita ‘faka ʼāteaina mai te toto.’ Ko te faʼahi ʼaia ʼe maʼuhiga ohage ko tatatou fakamamaʼo mai te ʼu felāveʼi fakasino heʼeʼaoga pea mo te tauhi tamapua.​—Gaue 15⁠:​28, 29.

ʼI te temi ʼaia, neʼe koteā te faka ʼuhiga ʼo te kupu ‘faka ʼāteaina’? Neʼe mole kai e te kau Kilisitiano te toto, tatau aipe pe ko he toto foʼou pe ko he toto kua totoka; pea neʼe mole nātou kai he kanoʼi manu ʼo te manu ʼaē neʼe tege pe neʼe mole fakaʼalu tona toto. Neʼe toe tapuʼi te ʼu meʼa kai ʼaē neʼe gaohi ʼaki te toto, ohage ko te ʼu sosiso totoʼia. Kapau neʼe nātou kai te ʼu faʼahiga meʼa ʼaia ʼaē neʼe fakaʼaogaʼi ai te toto, pea neʼe nātou maumauʼi ai te lao ʼa te ʼAtua.​—1 Samuele 14⁠:​32, 33.

ʼI te ʼu temi ʼāfea, ki te tokolahi ʼo te hahaʼi ko te kai ʼo te toto neʼe ko he meʼa noa, ohage ko tona fakahā mai e te ʼu tohi ʼo Tertullien (ʼi te lua pea mo te tolu sēkulō ʼo totatou temi). ʼI te tali e Tertullien ki te ʼu tukugakovi hala ʼaē neʼe ʼui ai ko te kau Kilisitiano neʼe nātou kai te toto, neʼe talanoa ki te ʼu telepi ʼaē neʼe nātou fai tanatou ʼu fuakava ʼo nātou kai te toto. Tahi ʼaē meʼa, neʼe ina fakatokagaʼi “mokā fai he gaoʼi ʼi te malaʼe faigaoʼi, [ko ʼihi] neʼe nātou fia ʼinu te toto ʼo ia ʼaē neʼe lākahala, . . . moʼo faitoʼo tonatou mahaki moa.”

Neʼe kovi te ʼu aga ʼaia ki te kau Kilisitiano (tatau aipe pe neʼe fai e ʼihi kau Loma te faʼahi ʼaia moʼo faitoʼo ʼo nātou). Neʼe tohi fēnei e Tertullien: “ ʼE mole mātou fakaʼaogaʼi te toto ʼo te ʼu manu ʼi tamatou meʼa kai.” Ko te kau Loma neʼe nātou fakaʼaogaʼi te ʼu meʼa kai ʼaē neʼe maʼu ai te toto, moʼo ʼahiʼahiʼi te agatonu ʼa te kau Kilisitiano moʼoni. Neʼe toe ʼui fēnei e Tertullien: “ ʼI te temi nei, ʼe ʼau fehuʼi atu kia koutou, ʼe lava mānumānu feafeaʼi [te kau Kilisitiano] ki te toto fakatagata, kae kua koutou ʼiloʼi papau ʼe nātou fakalialia ki te toto ʼo te manu?”

Ia ʼaho nei, ko te tokosiʼi ʼe nātou vakaʼi anai te lao ʼa te ʼAtua Māfimāfi mo kapau ʼe ʼui age e te tōketā ke nātou toʼo te toto. ʼE mahino ia, ʼe fia maʼuʼuli te kau Fakamoʼoni ʼa Sehova, kae ʼe maʼua ke tou fakalogo ki te lao ʼa Sehova ʼo ʼuhiga mo te toto. Koteā tona faka ʼuhiga mokā fakatatau ki te ʼu faitoʼo ʼo totatou temi?

ʼI te hili ʼo te Lua Tau Faka Malamanei, neʼe fakaʼaogaʼi lahi te ʼu foʼi huki ʼaki te toto katoa, kae neʼe mahino ki te kau Fakamoʼoni ʼa Sehova neʼe fakafeagai te faʼahi ʼaia ki te lao ʼa te ʼAtua​—pea ʼe kei tou tui papau kiai. Kae ʼaki te temi kua fetogi te ʼu meʼa faka tōketā. Ia ʼaho nei, ʼi te agamāhani ʼe mole fai te ʼu foʼi huki toto ʼaki te toto katoa kae ʼaki tona ʼu koga tāfito: (1) te ʼu globules rouges; (2) te ʼu globules blancs; (3) te ʼu plaquettes; (4) te plasma (sérum), te faʼahi vaia ʼo te toto. ʼO mulimuli ki te ʼaluʼaga ʼo ia ʼaē ʼe mahaki, ʼe feala ke ʼui e te ʼu tōketā, ʼe tonu ke foaki age ki ai te ʼu globules rouges, pe ko he ʼu globules blancs, pe ko he ʼu plaquettes, pe ko te plasma.  Ko te vaevae feiā ʼo te ʼu koga tāfito ʼo te toto, ʼe ina faka fealagia te fakaʼaogaʼi ʼo te faʼahiga toto e tahi ki te ʼu hahaʼi mahaki kehekehe. Ki te kau Fakamoʼoni ʼa Sehova, ko te foʼi huki toto ʼaki te toto katoa peʼe ko tona ʼu koga tāfito, ʼe ina maumauʼi te lao ʼa te ʼAtua. Tahi ʼaē meʼa maʼuhiga, ko te fakalogo ki te fakatotonu ʼaia ʼa te Tohi-Tapu, neʼe ina hāofaki nātou mai te ʼu tuʼutāmaki kehekehe, ʼo kau kiai mo te hépatite pea mo te SITA, ʼaē ʼe feala ke kita maʼu ʼi te toto.

Mai tona ʼuhiga ʼaē ʼe feala ke vaheʼi fakakoga te ʼu koga tāfito ʼaia ʼo te toto, koia ʼe lagaʼi ai te ʼu fehuʼi ʼo ʼuhiga mo te ʼu meʼa ʼaia. ʼE fakaʼaogaʼi feafeaʼi te ʼu koga ʼaia, pea koteā te ʼu puani ʼaē ʼe tonu ke vakaʼi e te kau Kilisitiano mokā nātou fakakaukauʼi peʼe nātou tali anai peʼe kailoa?

ʼE lahi ʼaupito te ʼu meʼa ʼe nātou faʼufaʼu te toto. Māʼia mo te plasma​—ʼaē ʼe teitei ko te vai katoa​—ʼe maʼu ai te ʼu hormones, mo te ʼu sels inorganiques, mo te ʼu enzymes, mo te ʼu éléments nutritifs, ʼo kau kiai mo te ʼu minéraux pea mo te suka. Ko te plasma ʼe toe maʼu ai te ʼu protéines ohage ko te albumine, mo te ʼu meʼa ʼaē ʼe nātou faka fealagia ke totoka te toto, pea mo te ʼu anticorps ʼaē ʼe nātou tauʼi te ʼu mahaki. ʼE vaheʼi kehe e te ʼu tōketā te ʼu protéines ʼo te plasma pea mo nātou fakaʼaogaʼi lahi. Ohage la, ko te facteur VIII ʼe ina fakatotoka te toto pea ʼe foaki ki te kau hémophiles ʼaē ʼe mole lava tāʼofi tonatou toto mokā nātou lavea. Kapau ʼe maʼu e he tahi he ʼu faʼahiga mahaki, ʼe foaki anai ki ai e te tōketā te ʼu foʼi huki ʼo te ʼu gammaglobulines, ʼaē ʼe toʼo mai te plasma ʼo te hahaʼi ʼaē ʼe nātou hāo mai te ʼu mahaki ʼaia. ʼE toe fakaʼaogaʼi e te ʼu tōketā mo te tahi ʼu protéines ʼo te plasma, kae ko te meʼa ʼaē neʼe tou talanoa kiai ʼi ʼoluga, ʼe ina fakahā mai peʼe lava vaheʼi kehe feafeaʼi te koga tāfito ʼo te toto (te plasma) moʼo maʼu ai hona ʼu kiʼi koga. *

Ohage ko te plasma ʼo te toto ʼaē ʼe feala ke vaheʼi fakakoga, ʼe toe feiā mo te tahi ʼu koga tāfito ʼo te toto (te ʼu globules rouges, mo te ʼu globules blancs, pea mo te ʼu plaquettes). Ohage la, ʼe maʼu ʼi te ʼu globules blancs te ʼu interférons pea mo te ʼu interleukines, ʼaē ʼe fakaʼaogaʼi moʼo tauʼi te ʼu taʼi mahaki pea mo te ʼu kosea. ʼE toʼo ʼi te ʼu plaquettes te ʼu meʼa ʼaē ʼe nātou faka fealagia te mole vave ʼo te ʼu lavea. Pea ʼi te temi nei (moʼo kamata) kua gaohi te ʼu faitoʼo foʼou ʼaki te ʼu kihiʼi koga ʼo te ʼu koga tāfito ʼo te toto. Ko te ʼu faitoʼo ʼaia ʼe mole ko he ʼu foʼi huki ʼo te ʼu koga tāfito ʼo te toto, heʼe fai tāfito ʼaki tonatou ʼu kiʼi koga veliveli. ʼE tonu koa ke tali e te kau Kilisitiano te ʼu faitoʼo ʼaē ʼe fai ʼaki te ʼu kiʼi koga veliveli ʼaia? ʼE mole feala ke tou tali ki te fehuʼi ʼaia. ʼE mole talanoa kiai te Tohi-Tapu, koia ʼe ʼa te kau Kilisitiano takitokotahi te vakaʼi ia te faʼahi ʼaia, ia muʼa ʼo te ʼAtua, ʼo mulimuli ki tonatou leʼo ʼo loto.

Ko ʼihi ʼe nātou fakafisi anai ki te ʼu faitoʼo fuli ʼaē ʼe faʼu ʼaki te toto (māʼia mo te ʼu kihiʼi koga ʼo te ʼu koga tāfito ʼo te toto ʼaē ʼe nātou tauʼi faka temi te mahaki). ʼE ko tanatou faʼahiga mahino ʼaia ki te fakatotonu ʼa te ʼAtua ke nātou ‘faka ʼāteaina mai te toto.’ ʼE nātou manatuʼi ko te lao ʼaē neʼe ina foaki ki Iselaele, neʼe ina fakamaʼua ke fakaʼalu te toto ʼa te manu pea ke ‘liligi ki te kele.’ (Teutalonome 12⁠:​22-24) He koʼe koa ʼe tonu ke kita vakaʼi te faʼahi ʼaia? Koteʼuhi moʼo teuteuʼi te ʼu gammaglobulines, mo te ʼu meʼa fakatotoka ʼo te toto, pea mo he tahi ʼu meʼa, ʼe tonu ke tānaki pea mo gaohi te toto. Koia ko ʼihi Kilisitiano ʼe nātou fakafisi ki te ʼu faitoʼo fuli ʼaia, ohage ko tanatou fakafisi ki te ʼu foʼi huki ʼaē ʼe fai ʼaki te toto katoa pe ko tona ʼu koga tāfito e fā. ʼE tonu ke tou fakaʼapaʼapa ki te tonu fakamalotoloto ʼaē ʼe nātou fai ʼo mulimuli ki tonatou leʼo ʼo loto.

Ko ʼihi Kilisitiano ʼe mole lagi tatau anai tanatou manatu. ʼE nātou toe fakafisi mo nātou ki te ʼu foʼi huki ʼaki te toto katoa, pe ko te plasma, pe ko te ʼu globules rouges, pe ko te ʼu globules blancs, pe ko te ʼu plaquettes. Kae ʼe lagi nātou tuku anai te tōketā ke ina faitoʼo nātou ʼaki te kiʼi koga ʼe toʼo mai te ʼu koga tāfito ʼo te toto. Māʼia mo te faʼahi ʼaia, ʼe lagi kehekehe anai te ʼu manatu ʼa te kau Kilisitiano. ʼE tali anai e he Kilisitiano te foʼi huki ʼo te gammaglobuline, kae ʼe mole ina tali anai te ʼu meʼa ʼaē ʼe toʼo mai te ʼu globules rouges pe ko te ʼu globules blancs. Koteā te ʼu meʼa ʼaē ʼe feala ke nātou uga he kau Kilisitiano ke nātou tali te ʼu kihiʼi koga ʼo te ʼu koga tāfito ʼo te toto?

Ko te alatike “Te ʼu Fehuʼi ʼa Te Kau Lautohi” ʼo Te Tule Leʼo Fakafalani ʼo te ʼaho 1 ʼo Sūnio 1990, neʼe ina fakatokagaʼi mai ko te ʼu protéines ʼo te plasma (pe ko te ʼu kihiʼi koga ʼo te ʼu koga tāfito ʼo te toto) ʼe haʼu mai te toto ʼo te fafine faitama ki te toto ʼo te kihiʼi tamasiʼi ʼaē ʼe ina fuafatuʼi. Koia ʼe foaki e te faʼe ki tana kiʼi tamasiʼi te ʼu immunoglobulines ke nātou tauʼi te ʼu mahaki. Tahi ʼaē faʼahi, ka ʼosi gāue te ʼu globules rouges ʼo te kihiʼi tamasiʼi, pea ʼe fetogi ai tonatou kiʼi koga ʼaē ʼe ina ʼave te oxygène.  Ko tona tahi koga ʼe liliu ko te bilirubine, ʼaē ʼe fakalaka ʼi te placenta ʼo ʼalu ki te faʼe ke ina pulihi ʼi tana fekau. Ko ʼihi Kilisitiano ʼe feala ke nātou manatu, kapau ʼe hoko feiā ʼi te fatu ʼa te faʼe, te ʼalu ʼa te ʼu kiʼi koga ʼo te ʼu koga tāfito ʼo te toto ki he tahi kehe, pea ʼe feala ke nātou tali te ʼu kiʼi koga ʼaia ʼo te toto pe ko te faʼahiga vai ʼaē ʼe fai ʼaki te hémoglobine ʼo te ʼu globules rouges.

Ko tona faka ʼuhiga koa, kapau ʼe kehekehe te manatu ʼa te kau Kilisitiano pea mo kehekehe tanatou ʼu tonu ʼaē ʼe nātou fai ʼo mulimuli ki tonatou leʼo ʼo loto, pea ʼe mole maʼuhiga te faʼahi ʼaia? Kailoa, ʼe maʼuhiga ʼaupito. Kae kua faigafua te faʼahi ʼaia. Ko te ʼu meʼa ʼaē neʼe tou vakaʼi ʼi ʼoluga, ʼe nātou fakahā mai ko te kau Fakamoʼoni ʼa Sehova ʼe mole nātou tali te ʼu foʼi huki ʼaē ʼe fai ʼaki te toto katoa pea mo tona ʼu koga tāfito. ʼE fakatotonu e te Tohi-Tapu ki te kau Kilisitiano, ke nātou ‘fakamamaʼo mai te ʼu failaulau ki te ʼu taulaʼatua, mo te toto, pea mo te folonikasio. (Gaue 15⁠:29) Kae ʼo ʼuhiga mo te ʼu kiʼi koga ʼo te ʼu koga tāfito ʼo te toto, ʼe ʼa te kau Kilisitiano takitokotahi te vakaʼi ia te faʼahi ʼaia, ʼi te faikole pea mo te metitasio fakamalotoloto.

Ko te tokolahi ʼo te hahaʼi ʼe nātou tali lelei te ʼu faitoʼo ʼaē ʼe feala ke nātou foimo lelei ai, tatau aipe peʼe feala ke tuʼutāmaki ai tonatou maʼuli, ohage la mo kapau ʼe nātou fakaʼaogaʼi te ʼu faitoʼo ʼaē ʼe fai ʼaki te toto. Ko te Kilisitiano moʼoni ʼe ina faiga ke ina maʼu he manatu fakapotopoto, pea ʼe mole ina vakaʼi pe te ʼu tuʼutāmaki fakasino ʼaē ʼe feala ke hoko ʼaki te ʼu faitoʼo ʼaia. Ko te kau Fakamoʼoni ʼa Sehova ʼe nātou fakafetaʼi ki te ʼu tōketā ʼaē ʼe nātou faiga ke nātou fai he ʼu faitoʼo lelei ki te hahaʼi, kae ʼe nātou vakavakaʼi te ʼu faitoʼo fuli ke nātou ʼiloʼi tonatou ʼu fua lelei pea mo tonatou ʼu fua kovi. Kae kapau ʼe nātou vakaʼi te ʼu faitoʼo ʼaē ʼe fai ʼaki te toto, pea ʼe nātou faka maʼuhigaʼi tāfito te meʼa ʼaē ʼe ʼui e te ʼAtua pea mo tanatou felogoi mo tonatou Tupuʼaga.​—Pesalemo 36⁠:⁠9.

ʼE ko he tapuakina ki te Kilisitiano mokā loto falala ohage ko te tagata fai pesalemo ʼaē neʼe ina tohi fēnei: “Ko Sehova ʼAtua ʼe ko te laʼā pea mo te meʼa tali tau; ʼe ina foaki te ʼofa pea mo te kolōlia. Ko Sehova ʼe mole ina fakafisi anai he meʼa lelei kia nātou ʼaē ʼe haʼele fakahagatonu. Ê Sehova . . . ʼe manuʼia te tagata ʼaē ʼe falala kia te koe”!​—Pesalemo 84⁠:​11, 12.

[Kiʼi nota]

[Talanoa ʼo te pasina 31]

TE ʼU FEHUʼI ʼE FEALA KE FAI KI TE TŌKETĀ

Kapau ʼe tonu ke tafa koutou peʼe fai atu he faitoʼo ʼaki te toto, koutou fai te ʼu fehuʼi ʼaenī:

ʼE ʼiloʼi fuli koa e te ʼu tōketā pea mo te ʼu afilimie ia toku ʼuhiga Fakamoʼoni ʼa Sehova, pea ʼe mole tonu ke foaki mai he foʼi huki toto (ʼaki te toto katoa, pe ko te ʼu globules rouges, pe ko te ʼu globules blancs, pe ko te ʼu plaquettes, pe ko te plasma ʼo te toto) tatau aipe pe koteā te ʼu ʼaluʼaga ʼaē ʼe feala ke hoko kia ʼau?

Kapau ʼe feala ke fai tokotou faitoʼo ʼaki te ‘plasma’ ʼo te toto, pe ko te ʼu ‘globules rouges,’ pe ko te ʼu ‘globules blancs,’ pe ko te ʼu ‘plaquettes,’ koutou fai te ʼu fehuʼi ʼaenī:

Neʼe fai koa te faitoʼo ʼaki he koga ʼo te ʼu koga tāfito e fā ʼo te toto? Kapau koia, pea ʼe feala koa ke koutou fakamahino mai te ʼu meʼa ʼaē ʼe maʼu ai?

ʼE tonu ke lahi feafeaʼi te faitoʼo ʼaē ʼe foaki mai, pea ʼe foaki feafeaʼi mai anai?

Kapau ʼe feala ke ʼau tali te kiʼi koga ʼaia ʼo te ʼu koga tāfito e fā ʼo te toto ʼo mulimuli ki toku leʼo ʼo loto, pea koteā te ʼu tuʼutāmaki ʼaē ʼe feala ke hoko kia ʼau?

Kapau ʼe mole fakagafua mai e toku leʼo ʼo loto ke ʼau tali te kiʼi koga ʼaia, pea koteā te tahi faitoʼo ʼaē ʼe feala ke ʼau fakaʼaogaʼi?

ʼI taku ʼosi vakaʼi fakalelei ia te ʼu faʼahi ʼaia, ko ʼāfea ʼaē ʼe tonu ke ʼau fakahā atu ai taku tonu?