Ko He Tohi Kia Noe
Ko He Tohi Kia Noe
“KIA Noe, kua tuʼa lahi taku lau te fakamatala ʼo ʼuhiga mo koe ʼi te Tohi-Tapu pea mo tau faʼu ia te aleka ʼaē neʼe ke hāofaki ai ia koe pea mo tou famili mai te Tulivio.”
ʼE kamata feiā te tohi ʼa te kiʼi finemui ʼe taʼu 15 ʼe higoa ko Minnamaria, ʼi te sivi neʼe fai ki te kau ako mai te taʼu 14 ki te taʼu 21. Neʼe fakatuʼutuʼu te sivi ʼaia e te meli ʼo Finilani, mo te kau faiako ki te lea Finilani, pea mo te sosiete faʼu tohi Finilani. Neʼe tonu kia nātou ʼaē ʼe kau ki te sivi ke nātou faitohi ʼo fakatafito ki he tohi. Neʼe feala ke nātou faitohi ki te tagata ʼaē neʼe ina fai te tohi peʼe ko he tahi ʼe tuʼu ʼi te tohi ʼaia. Neʼe filifili e te kau faiako te ʼu tohi e 1 400 tupu mai te kau ako pea mo nātou momoli ki te kau sivi. Pea neʼe filifili leva e te kau sivi ia te tohi ʼaē ʼe lelei ʼaupito, mo te ʼu faitohi e hogofulu ʼe kau ki te tuʼulaga lua, pea mo te tahi ʼu tohi e hogofulu ʼe kau ki te tuʼulaga tolu. Neʼe fiafia ia Minnamaria ʼi tana sio ʼe tuʼu tana tohi ʼi te tolu kūtuga.
He koʼe koa neʼe faitohi ia Minnamaria, ʼaē kua taʼu hogofulu tupu, kia Noe, ko he tagata neʼe maʼuli kua hili kiai te ʼu taʼu e 5 000? ʼE ina fakamatala fēnei: “Ko te ʼuluaki meʼa neʼe ʼau manatu kiai neʼe ko te Tohi-Tapu. Kua ʼau ʼiloʼi lelei te hahaʼi ʼaē ʼe tuʼu ʼi te Tohi-Tapu. Kua tuʼa lahi ʼaupito taku lau tonatou ʼu hisitolia pea kua nātou hage kia ʼau ko he ʼu hahaʼi ʼe maʼuʼuli. Neʼe ʼau filifili ia Noe koteʼuhi neʼe fakaofoofo tona maʼuli pea neʼe mole tatau mo toku maʼuli.”
ʼE fakaʼosi fēnei te tohi ʼa Minnamaria kia Noe: “Ko tau tui mo tau fakalogo ʼe ko he faʼifaʼitaki ʼe kei tonu pe ke mātou mulimuli kiai. Ko tou maʼuli ʼe ina fakaloto mālohiʼi fuli ia nātou ʼaē ʼe nātou lau ia te Tohi-Tapu ke ʼalutahi te meʼa ʼaē ʼe nātou fai mo tanatou tui.”
ʼE fakahā lelei e te tohi ʼaenī ʼa te finemui ʼaē ʼe ina ako te Tohi-Tapu, ko te Tohi-Tapu “e mauli . . . pea e gaue” ki te hahaʼi tūpulaga pea mo matutuʼa.—Hepeleo 4:12.