‘Koutou Akoʼi Nātou Ke Nātou Mulimuli Ki Te ʼu Meʼa Fuli Neʼe ʼAu Fakatotonu Atu Kia Koutou’
‘Koutou Akoʼi Nātou Ke Nātou Mulimuli Ki Te ʼu Meʼa Fuli Neʼe ʼAu Fakatotonu Atu Kia Koutou’
“Koia koutou ʼolo pea ke koutou fai ni ʼu tisipulo . . . , ʼo koutou ako ia nātou ke nātou mulimuli ki te ʼu meʼa fuli pe ʼaē neʼe ʼau fakatotonu atu kia koutou.”—Mateo 28:19, 20, MN.
1. Neʼe feafeaʼi te felogoi ʼa te tisipulo ko Filipo pea mo te tagata Etiopea?
KO TE tagata Etiopea neʼe ʼalu ki Selusalemi ʼo atolasio ki te ʼAtua ʼaē neʼe ʼofa ai, ko Sehova. Neʼe ina toe leleiʼia foki mo te Folafola ʼa te ʼAtua. ʼI tana liliu kiō ia ʼi tana saliote neʼe ina lolotoga lau te koga tohi ʼa te polofeta ko Isaia, pea neʼe felāveʼi mo Filipo, te tisipulo ʼa Kilisito. Neʼe fehuʼi age e Filipo ki te tagata Etiopea: “ ʼE ke mahino moʼoni koa ki te meʼa ʼaē ʼe ke lau?” Pea tali age e te tagata: “ ʼO feafeaʼi la haku mahino mo kapau ʼe mole takitaki ʼau e he tahi?” Neʼe tokoni age leva ia Filipo ki te tagata ako Tohi-Tapu fakamalotoloto ʼaia ke liliu ko he tisipulo ʼa Kilisito.—Gaue 8:26-39, MN.
2. (a) He koʼe ʼe maʼuhiga te tali ʼaē neʼe fai e te tagata Etiopea? (b) Koteā te ʼu fehuʼi ʼaē ka tou vakaʼi anai ʼe pipiki ki te fakatotonu ʼa Kilisito ʼaē ke fai ni ʼu tisipulo?
2 ʼE maʼuhiga te tali ʼaē neʼe fai e te tagata Etiopea. Neʼe ina ʼui fēnei: “ ʼO feafeaʼi la haku mahino mo kapau ʼe mole takitaki ʼau e he tahi.” Ei, neʼe ʼaoga ke ʼi ai he tahi moʼo fakamahino age te meʼa ʼaē neʼe ina lau. ʼE ʼasi lelei mai ʼi te fakamatala ʼaia, te maʼuhiga ʼaē ke fai he ako pea ʼe fakapipiki e Sesu te koga ʼaia ki tana fakatotonu ʼaē ke fai ni ʼu tisipulo. Koteā ʼaē ʼe pipiki ki te fakatotonu ʼaia? Moʼo tali kiai, tou hoko atu tatatou vakaʼi te ʼu palalau ʼa Sesu ʼaē ʼe tuʼu ia Mateo kapite 28. Neʼe talanoa tāfito te ʼuluaki alatike ki te ʼu fehuʼi ʼaenī: He koʼe ʼe tonu ke tou fakalogo ki te fakatotonu? Pea ko te ʼu koga meʼa fea ʼaē ʼe tonu ke tou fai faka mafola ai? ʼE tou vakaʼi age leva te tahi ʼu fehuʼi ʼe pipiki ki te fakatotonu ʼa Kilisito ʼaē ke fai ni ʼu tisipulo—Koteā ʼaē ʼe tonu ke tou faka mafola? Pea ko te temi fea ʼe tonu ke fai ai te gāue ʼaia?
“Koutou Ako Ia Nātou Ke Nātou Mulimuli Ki Te ʼu Meʼa Fuli Pe”
3. (a) ʼE liliu feafeaʼi he tahi ko he tisipulo ʼa Sesu Kilisito? (b) Koteā ʼaē ʼe tonu ke akoʼi ki he tisipulo?
3 Koteā ʼaē ʼe tonu ke tou ako ki te hahaʼi ke feala hanatou liliu ko ni ʼu tisipulo ʼa Kilisito? Neʼe fakatotonu fēnei e Sesu ki tana kau tisipulo: “Koia koutou ʼolo pea ke koutou fai ni ʼu tisipulo ʼi te hahaʼi ʼo te ʼu fenua fuli pe, ʼo papitemaʼi ia nātou ʼi te huafa ʼo te Tāmai pea mo te ʼAlo pea mo te laumālie maʼoniʼoni, ʼo koutou ako ia nātou ke nātou mulimuli ki te ʼu meʼa fuli pe ʼaē neʼe ʼau fakatotonu atu kia koutou.” (Mateo 28:19, 20, MN ) Koia, ʼe tonu ke tou akoʼi ki te hahaʼi ia meʼa fuli neʼe fakatotonu mai e Kilisito. * Koteā anai ka tokoni ki he tahi ʼe akoʼi ki te ʼu fakatotonu ʼa Sesu, ke tuputupu tuʼumaʼu ʼi tona ʼuhiga tisipulo? ʼE tou maʼu te tali kiai ʼaki te ʼu kupuʼi palalau neʼe filifili lelei e Sesu. Koutou fakatokagaʼi, neʼe mole ʼui pe e Sesu: ‘Koutou akoʼi nātou ki te ʼu meʼa fuli ʼaē neʼe ʼau fakatotonu atu.’ Kae neʼe ina ʼui fēnei: ‘Koutou akoʼi nātou ke nātou mulimuli ki te ʼu meʼa fuli neʼe ʼau fakatotonu atu kia koutou.’ (Mateo 19:17) Koteā tona faka ʼuhiga?
4. (a) Koteā te faka ʼuhiga ʼo te mulimuli ki he fakatotonu? (b) Koutou fakahā ʼaki he faʼifaʼitaki peʼe feafeaʼi he akoʼi ʼo he tahi ke mulimuli ki te ʼu fakatotonu ʼa Kilisito.
4 Kapau ʼe tou mulimuli ki he fakatotonu, pea ʼe tou “faka ʼalutahi te meʼa ʼaē ʼe tou fai” mo te fakatotonu ʼaia—ei ʼe tou fakalogo kiai. Pea ʼe tou akoʼi feafeaʼi ki he tahi ke mulimuli, peʼe ke fakalogo ki te ʼu meʼa ʼaē neʼe fakatotonu age e Kilisito? Koutou fakakaukauʼi age muʼa he tagata ʼe ina faka ako te ʼu lao ʼo te ala ki hana kau ako taki motokā. ʼE lagi nātou ako te ʼu lao ʼaia ʼi te faleako motokā. Kae ke feala hanatou fakalogo ki te ʼu lao ʼaia, ʼe tonu ki te tagata faiako ke ina fakamahinohino age te lao ʼaia kia nātou mokā nātou uli motokā ʼi te ala, pea mo faigaʼi ai ke nātou mulimuli ki te ʼu meʼa ʼaē neʼe nātou ako ʼi te faleako. Pea ʼe toe feiā mokā tou ako te Tohi-Tapu mo te hahaʼi, ʼe tou akoʼi kia nātou te ʼu fakatotonu ʼa Kilisito. ʼE ʼaoga ke tou takitaki ia nātou mokā nātou faiga ke nātou mulimuli ki te ʼu fakatotonu ʼa Kilisito ʼi tonatou maʼuli ʼi te ʼaho fuli pea mo tonatou minisitelio. (Soane 14:15; 1 Soane 2:3) Koia, kapau ʼe tou fia fakahoko katoa te fakatotonu ʼa Kilisito ke fai ni ʼu tisipulo, ʼe tonu ke tou liliu ko he kau faiako pea mo he kau takitaki. Ka tou fai te faʼahi ʼaia, ʼe tou mulimuli ki te faʼifaʼitaki ʼa Sesu pea mo Sehova totonu.—Pesalemo 48:14; Apokalipesi 7:17.
5. He koʼe ʼe feala ki he tahi ʼe ina ako te Tohi-Tapu ke mole faʼa fia fakalogo ki te fakatotonu ʼaē ke fai ni ʼu tisipulo?
5 Moʼo akoʼi te hahaʼi ke nātou mulimuli ki te ʼu fakatotonu ʼa Sesu, ʼe tonu ke tou tokoni kia nātou ke nātou fakalogo ki te fakatotonu ʼaē ke fai ni ʼu tisipulo. ʼE feala ki ʼihi kau ako Tohi-Tapu ke nātou tuʼaniaʼi te faʼahi ʼaia. Logola neʼe nātou gāue mālohi ʼi te ʼu lotu ʼo te Keletiate, kae neʼe mole akoʼi age e tonatou kau faiako ʼāfea ke nātou ʼolo ʼo fai ni ʼu tisipulo. ʼE fakahā fakalelei e ʼihi kau takitaki lotu kapau ʼe nātou ako ki tanatou hahaʼi ke nātou faka mafola te evaselio, pea ʼe mole toe ʼi ai anai he tahi ʼi te ʼu ʼēkelesia ʼo te Keletiate. ʼI tana talanoa ki te fakatotonu ʼa Sesu ke tou ʼolo ʼi te malamanei ʼo tokoni ki te hahaʼi fuli ke nātou liliu ko ni ʼu tisipulo, neʼe ʼui fēnei e te tagata fai Tohi-Tapu ko John R. W. Stott: “ ʼE ko he puani vaivai tāfito ʼo te kau Kilisitiano polotesita ia te fai faka mafola ia ʼaho nei, heʼe mole tou fakahoko te ʼu meʼa ʼaē ʼe fakamaʼua ʼi te fakatotonu ʼaia.” Neʼe ina toe ʼui fēnei: “ ʼE mole tou ʼolo totonu ki te hahaʼi ʼo faka mafola age kia nātou ia te evaselio. ʼI ʼihi temi, ʼe tou hage ko ni hahaʼi ʼe fai tokoni mai te mataʼone, ki niʼihi ʼe lolotoga malelemo. ʼE mole tou lava hāofaki ia nātou, heʼe tou matataku naʼa tou palapala.”
6. (a) Ka tou tokoni ki he tahi ʼe ina ako te Tohi-Tapu, ʼe tou lava muliʼi feafeaʼi ia te faʼifaʼitaki ʼa Filipo? (b) ʼE tou lava fakahā feafeaʼi tatatou tokaga ki he tahi ʼe ina ako te Tohi-Tapu ʼi tana kamata fai faka mafola?
6 Kapau ko he tahi ʼe ako mo tatou neʼe kau ʼi muʼa atu ki he lotu pea ko te ʼu hahaʼi ʼo te lotu ʼaia ʼe nātou ‘matataku ʼi te fai faka mafola,’ ʼe lagi faigataʼa anai kia ia tana fakalogo ki te fakatotonu ʼa Kilisito ke fai ni ʼu tisipulo. ʼE ʼaoga anai kia ia he tokoni. Koia, ʼe tonu ke tou faʼa kātaki mokā tou ako ia ia pea mo takitaki ia ia, ke feala ai hana mālama lelei pea mo uga ai ia ia ke ina fai hana ʼu gāue, ohage ko te ʼu meʼa neʼe akoʼi e Filipo ki te tagata Etiopea moʼo fakamālamaʼi ia ia pea mo uga ia ia ke papitema. (Soane 16:13; Gaue 8:35-38) Tahi ʼaē meʼa, ʼe tou gāue fakatahi anai mo nātou ʼi tanatou kamata faka mafola te Puleʼaga koteʼuhi ʼe tou loto ke mulimuli te kau ako Tohi-Tapu ʼaia ki te fakatotonu ʼaē ke fai ni ʼu tisipulo.—Tagata Tānaki 4:9, 10; Luka 6:40.
“Te ʼu Meʼa Fuli”
7. Koteā te tahi ʼu fakatotonu ʼe tonu ke akoʼi ki te hahaʼi ke feala hanatou “mulimuli ki te ʼu meʼa fuli”?
7 ʼE mole tou akoʼi pe ki te kau tisipulo foʼou ke nātou fai ni ʼu tisipulo. Neʼe fakatotonu mai e Sesu ke tou akoʼi te hahaʼi ke nātou “mulimuli ki te ʼu meʼa fuli” ʼaē neʼe ina fakatotonu mai. ʼE mahino ia ʼe kau kiai te ʼu fakatotonu lahi e lua—ke tou ʼofa ki te ʼAtua pea mo tou ʼofa ki totatou tatau. (Mateo 22:37-39) ʼE tou lava akoʼi feafeaʼi ki he tisipulo foʼou ke mulimuli ki te ʼu fakatotonu ʼaia?
8. Koutou tuku mai he faʼifaʼitaki peʼe tou lava akoʼi feafeaʼi ki he tisipulo foʼou te fakatotonu ʼaē ke ʼofa.
8 Koutou toe fakakaukauʼi te faʼifaʼitaki ʼo ia ʼaē ʼe ako ʼuli motokā. ʼI tana ʼalu ʼi te ala lahi ʼe fakalogo ki te ʼu meʼa ʼaē ʼe akoʼi age e te tagata faiako, pea mo ina sioʼi foki mo te tahi ʼu motokā. ʼE lagi fakahā age e te tagata faiako he tahi ʼe taki motokā ʼe agalelei ʼo ina tuku ki he tahi motokā ke fakalaka ʼi ʼona muʼa, peʼe ko he tahi ʼe taki motokā ʼe mole ina fakamū mālohi tana ʼu hila naʼa pulagia te ʼu motokā ʼaē ʼe haʼu mai muʼa, peʼe ko he tahi ʼe taki motokā ʼe tau ʼi te vaʼe ala moʼo tokoni ki he tahi ʼe mate tana motokā. ʼE ko he ʼu faʼifaʼitaki lelei ʼaia ke muliʼi e ia ʼaē ʼe akoako taki motokā mokā maʼu anai tona pelemi. ʼO toe feiā pe, ko he tisipulo foʼou ʼe haʼele ʼi te ala ʼo te maʼuli ʼe ina ako anai mai ia ia ʼaē ʼe ina fai tana ako pea mo ina toe ako mai te ʼu faʼifaʼitaki lelei ʼaē ʼe sio kiai ʼi te kokelekasio.—Mateo 7:13, 14.
9. ʼE akoʼi feafeaʼi e he tisipulo foʼou te ʼuhiga moʼoni ʼo te mulimuli ki te fakatotonu ʼo te ʼofa?
9 Ohage la, ʼe lagi sio anai he tahi ʼe ina ako te Tohi-Tapu ki he faʼe peʼe ko he tāmai ʼe faiga mālohi ke haʼu ʼo fono mo tana ʼu toe. ʼE lagi sio ki he tahi ʼe lotovaivai ʼe haʼu tuʼumaʼu pe ki te ʼu fono logola tana tau mo he mahaki fakaloto vaivai, peʼe ko he finematuʼa vitua ʼe ina ʼaumai ki te ʼu fono fuli he tahi ʼu hahaʼi matutuʼa, peʼe ko he tūpulaga ʼe kau ki te fakamaʼa ʼo te Fale ʼo Te Puleʼaga. ʼE lagi sio ki he tagata ʼāfea ʼi te kokelekasio ʼe lagolago mālohi ki te gāue fai faka mafola logola te lahi ʼo tona ʼu maʼua ʼi te kokelekasio. ʼE feala ke felāveʼi mo he Fakamoʼoni kua nofo fale, kae ko he tahi ʼe ina foaki he ʼu fakaloto mālohi fakalaumālie kia nātou fuli ʼe ʼolo age ʼo ʼaʼahi ia ia. ʼE lagi sio ki he taumatuʼa ʼe nā fai he ʼu fetogi lahi ke feala hanā taupau tanā ʼu mātuʼa kua matutuʼa. Kapau ʼe fakatokagaʼi e he tisipulo foʼou ia te agalelei, mo te manavaʼofa ʼa te kau Kilisitiano ʼaia, ʼe mahino ai kia ia te ʼuhiga moʼoni ʼo te fakalogo ki te fakatotonu ʼa Kilisito ʼaē ke kita ʼofa ki te ʼAtua pea mo totatou tatau, tāfito la totatou ʼu tēhina mo tuagaʼane ʼi te tui. (Tāʼaga Lea 24:32; Soane 13:35; Kalate 6:10; 1 Timoteo 5:4, 8; 1 Petelo 5:2, 3) Ki te faʼahi ʼaia, ʼe feala pea ʼe tonu ki te hahaʼi fuli ʼo te kokelekasio ke nātou liliu ko he kau faiako pea mo he kau takitaki.—Mateo 5:16.
“ ʼO Kaku Ki Te Fakaʼosi ʼo Te Tuʼu ʼo Te ʼu Faʼahiga Meʼa ʼAenī”
10. (a) ʼE tou fai anai ni ʼu tisipulo ʼo aʼu ki ʼafea? (b) Koteā te faʼifaʼitaki ʼaē neʼe tuku mai e Sesu ʼo ʼuhiga mo te fakahoko ʼo te ʼu maʼua ʼaia?
10 ʼE tonu ke tou fai ni ʼu tisipulo ʼo aʼu ki te temi fea? ʼO kaku ki te fakaʼosi ʼo te tuʼu ʼo te ʼu faʼahiga meʼa ʼaenī. (Mateo 28:20) ʼE feala koa ke tou fakahoko te koga ʼaia ʼo te gāue ʼaē neʼe fakatotonu mai e Sesu? ʼI totatou ʼuhiga kokelekasio faka malamanei, ʼe tou fakatuʼutuʼu mālohi ke tou fakahoko te gāue ʼaia. ʼI te ʼu taʼu kua hili, neʼe tou foaki fakafiafia totatou temi, totatou mālohi, pea mo totatou ʼu koloā moʼo kumi ia nātou ʼaē ʼe nātou “lotolelei ki te maʼuli heʼegata.” (Gaue 13:48, MN ) Ko hola e tolu miliona tupu ʼi te ʼaho fuli ʼe fai e te kau Fakamoʼoni ʼa Sehova moʼo faka mafola te Puleʼaga pea mo fai ni ʼu tisipulo ʼi te malamanei. ʼE tou fai te faʼahi ʼaia heʼe tou muliʼi te faʼifaʼitaki ʼa Sesu. Neʼe ina ʼui fēnei: “Ko taku meʼa kai ko te fai ʼo te finegalo ʼo ia ʼaē neʼe ina fekauʼi mai ʼau, pea mo ʼau fakaʼosi tana gāue.” (Soane 4:34, MN ) ʼE tou loto fakamalotoloto mo tatou ki te faʼahi ʼaia. (Soane 20:21) ʼE mole tou loto pe ke tou kamata te gāue ʼaē neʼe foaki mai kia tatou, kae ʼe tou toe fia fakaʼosi foki te gāue ʼaia.—Mateo 24:13; Soane 17:4.
11. Koteā te meʼa neʼe hoko ki ʼihi ʼi ʼotatou tēhina mo tuagaʼane Kilisitiano, pea koteā te fehuʼi ʼe tonu ke tou fai kia tatou totonu?
11 Kae ʼe tou toe lotomamahi heʼe tou sio ki ʼihi ʼi ʼotatou kaugā fagona ʼi te tui ʼe nātou vaivavai ʼi te faʼahi fakalaumālie, ʼo mole kei nātou fakalogo ki te fakatotonu ʼa Kilisito ʼaē ke fai ni ʼu tisipulo. ʼE ʼi ai koa he puleʼaki ʼe feala ke tou fai moʼo tokoni kia nātou ke nātou toe ʼōmai ʼo fakatahi mo tatou ʼi te kokelekasio pea ke nātou toe kau ki te fai ʼo ni ʼu tisipulo? (Loma 15:1; Hepeleo 12:12) ʼE feala ke tou tokoni kia nātou ʼi te ʼaho nei ʼo mulimuli pe ki te faʼahiga tokoni ʼaē neʼe fai e Sesu ki tana kau ʼapositolo ʼi te temi ʼaē neʼe nātou vaivai faka temi ai ʼi te faʼahi fakalaumālie.
Tou Fakahā Totatou ʼOfa
12. (a) ʼI muʼa ʼo te mate ʼo Sesu, koteā te meʼa ʼaē neʼe fai e tana ʼu ʼapositolo? (b) Neʼe feafeaʼi ia Sesu ki tana kau ʼapositolo logola tonatou ʼu vaivaiʼaga faigataʼa?
12 ʼI te fakaʼosi ʼo te minisitelio ʼo Sesu ʼi te kele pea ʼi te ʼamanaki hoko mai ʼo tona temi mate, neʼe ‘līaki ia ia e te kau ʼapositolo kae nātou feholaki.’ Ohage pe ko te meʼa ʼaē neʼe fakakikite e Sesu, neʼe nātou “mavetevete ai takitokotahi ki tona ʼapi.” (Maleko 14:50; Soane 16:32, MN ) Koteā ʼaē neʼe fai e Sesu ki tona ʼu tēhina ʼaē neʼe kua vaivai ʼi te faʼahi fakalaumālie? ʼI te ʼosi pe ʼo tona fakatuʼuake, neʼe ʼui e Sesu ki tana tahi ʼu tisipulo: “ ʼAua naʼa koulua manavasiʼi! Koulua ʼolo ʼo tala te logo ki ʼoku tēhina, ke nātou ʼolo ai ki Kalilea; pea ʼe nātou sisio anai ʼi ai kia te ʼau.” (Mateo 28:10, MN ) Logola te ʼu vaivaiʼaga faigataʼa ʼo te kau ʼapositolo, kae neʼe hoko atu pe e Sesu tana toʼo ia nātou, ko “ ʼoku tēhina.” (Mateo 12:49, MN ) Neʼe falala tuʼumaʼu pe kia nātou. ʼI te faʼahi ʼaia, neʼe manavaʼofa ia Sesu pea mo loto fakamolemole ohage ko te manavaʼofa pea mo te loto fakamolemole ʼa Sehova. (2 Hau 13:23) ʼE tou lava faʼifaʼitakiʼi feafeaʼi ia Sesu?
13. ʼE tonu ke tou feafeaʼi kia nātou ʼaē kua vaivai fakalaumālie?
13 ʼE tonu ke tou manavaʼofa kia nātou kua vaivai fakalaumālie peʼe kua nātou tuku tanatou fai faka mafola. Tou manatuʼi te ʼu gāue ʼofa neʼe nātou fai ʼi muʼa atu—lagi ko ʼihi kua lauʼi hogofulu taʼu tanatou gāue. (Hepeleo 6:10) ʼE tou loto moʼoni ke nātou toe kaugā gāue mo tatou. (Luka 15:4-7; 1 Tesalonika 2:17) ʼE tou lava fakahā feafeaʼi totatou ʼofa ʼaē kia nātou?
14. Ohage ko Sesu, ʼe tou lava tokoni feafeaʼi ki he tahi ʼe vaivai fakalaumālie?
14 Neʼe ʼui age e Sesu ki te kau ʼapositolo ʼaē neʼe kua lotovaivai, ke nātou ʼolo ki Kalilea pea ʼe nātou toe fesioʼaki ai anai. Ei, neʼe fakaafe nātou e Sesu ke nātou kau ki te fono makehe. (Mateo 28:10) ʼO toe feiā ia ʼaho nei, ʼe tou fakaloto mālohiʼi ia nātou ʼaē kua vaivai fakalaumālie ke nātou kau ki te ʼu fono ʼo te kokelekasio faka Kilisitiano, pea ʼe tonu ke tou fakaloto mālohiʼi liuliuga ia nātou. ʼO ʼuhiga mo te kau ʼapositolo, neʼe fua lelei tonatou fakaafe e Sesu, he neʼe ʼolo “te toko hogofulu-ma-tahi tisipulo ki Kalilea, ki te moʼuga ʼaē neʼe ʼui age e Sesu ke nātou felāveʼi kiai.” (Mateo 28:16, MN ) ʼE tou fiafia mokā tali feiā he fakaafe e nātou kua vaivai fakalaumālie pea mo nātou toe kau ki te ʼu fono faka Kilisitiano!—Luka 15:6.
15. ʼE tou lava muliʼi feafeaʼi ia te faʼifaʼitaki ʼa Sesu ʼi tatatou tali fakafiafia te kau vaivai fakalaumālie ʼaē ʼe ʼōmai ki te ʼu fono?
15 ʼE tou fakatalitali feafeaʼi anai he Kilisitiano kua vaivai fakalaumālie ʼe haʼu ki te Fale ʼo Te Puleʼaga? Koteā te meʼa neʼe fai e Sesu ʼi tana sio ki tana kau ʼapositolo, ʼaē neʼe vaivai fakalaumālie faka temi, ʼi tanatou ʼōmai ki te koga meʼa ʼaē neʼe nātou fakatuʼutuʼu kiai? “Neʼe fakaōvi age ia Sesu pea neʼe lea kia nātou.” (Mateo 28:18, MN ) Neʼe mole sio mamaʼo ia kia nātou kae neʼe ʼalu kia nātou. ʼE mahino ia ʼi te temi ʼaē neʼe ʼuluaki fakaōvi age ai ia Sesu kia nātou neʼe ko he meʼa fakafiafia ki te kau ʼapositolo! ʼOfa pe ke tou fakatuʼutuʼu ʼo ʼolo ʼo tali fakafiafia ia nātou kua vaivavai fakalaumālie, he neʼe nātou faiga mālohi ke nātou toe liliu mai ki te kokelekasio faka Kilisitiano.
16. (a) Koteā te ako ʼe tou maʼu ʼi te faʼahiga tokaga ʼa Sesu ki tana kau tisipulo? (b) ʼE tou lava maʼu feafeaʼi te manatu ʼa Sesu ʼo ʼuhiga mo te kau vaivai fakalaumālie? (Vakaʼi te kiʼi nota ʼi te lalo pasina.)
16 Koteā te tahi meʼa ʼaē neʼe fai e Sesu? ʼUluaki, neʼe ina fakahā te logo ʼaenī: “Kua tuku mai kia te ʼau te pule katoa.” Lua, neʼe ina foaki te fakatotonu ʼaenī: “Koia koutou ʼolo pea ke koutou fai ni ʼu tisipulo.” Tolu, neʼe ina fai te fakapapau ʼaenī: “ ʼE ʼau nofo mo koutou ʼi te ʼaho fuli pe.” Kae ʼe koutou fakatokagaʼi te meʼa ʼaē neʼe mole fai e Sesu? Neʼe mole ina fakatonutonuʼi te kau tisipulo ʼuhi ko tonatou ʼu vaivaiʼaga pea mo tanatou lotolotolua. (Mateo 28:17, MN ) Neʼe fua lelei koa tana fakaōvi kia nātou? Ei. Mole tuai, neʼe toe kau te kau ʼapositolo ki te “akoʼi pea mo tala ʼo te logo lelei.” (Gaue 5:42, MN ) Ka tou muliʼi te faʼifaʼitaki ʼa Sesu ʼo tou tokaga ki te kau vaivai fakalaumālie, ʼe tou toe maʼu tona ʼu fua lelei ʼi tatatou kokelekasio. *—Gaue 20:35.
“ ʼE ʼAu Nofo Mo Koutou ʼi Te ʼAho Fuli Pe”
17, 18. Koteā te ʼu manatu mālohi ʼe tou maʼu ʼi te ʼu palalau ʼaenī ʼa Sesu, “ ʼE ʼau nofo mo koutou ʼi te ʼaho fuli pe”?
17 ʼI te ʼu palalau fakaʼosi ʼo te gāue ʼaē neʼe fakatotonu mai e Sesu, “ ʼe ʼau nofo mo koutou ʼi te ʼaho fuli pe,” ʼe tou maʼu te manatu mālohi maʼa nātou fuli ʼe nātou faiga ke nātou fakahoko te fakatotonu ʼa Kilisito ke fai ni ʼu tisipulo. ʼAua naʼa tou matataku ki te ʼu fakafeagai ʼo totatou ʼu fili ki tatatou faka mafola te Puleʼaga, peʼe ki te ʼu loi ʼaē ʼe nātou lau ʼo ʼuhiga mo tatou. Koteā tona tupuʼaga? Ko Sesu, totatou Takitaki, ʼaē ʼe ina maʼu ‘te pule katoa ʼi te lagi pea mo te kele’ ʼe tokoni mai kia tatou ʼi te temi fuli!
18 Ko te fakapapau ʼaenī ʼa Sesu “ ʼE ʼau nofo mo koutou ʼi te ʼaho fuli pe” ʼe ko he fakaloto mālohi lahi. ʼE ʼi ai te ʼu ʼaho ʼe tou fiafia ai ʼi tatatou faiga fakamalotoloto ʼo fakahoko te fakatotonu ʼa Kilisito ʼaē ko te fai ʼo ni ʼu tisipulo, kae ʼe toe ʼi ai pe foki mo te ʼu ʼaho ʼe tou lotomamahi ai. (2 Fakamatala 6:29) Ko ʼihi ia tatou ʼe tau mo te ʼu temi mamahi mokā mate he tahi neʼe ʼofa ai. (Senesi 23:2; Soane 11:33-36) Ko ʼihi ʼi tanatou kua matutuʼa ʼe nātou mahamahaki pea mo vaivavai. (Tagata Tānaki 12:1-6) Ko ʼihi ʼe nātou tauʼi te ʼu meʼa fakatupu lotovaivai ʼi ʼonatou loto. (1 Tesalonika 5:14) Pea ko ʼihi ʼe nātou tau mo te ʼu fihifihia faka ekonomika. Kae logola te ʼu faigataʼaʼia fuli ʼaia, ʼe fua lelei totatou minisitelio heʼe ko Sesu ʼe nofo mo tatou ʼi te “ ʼaho fuli pe,” ʼo feiā mo te ʼu ʼaho ʼaē ʼe tou lotovaivai ai.—Mateo 11:28-30, MN.
19. (a) Koteā te ʼu fakatotonu ʼe tou maʼu ʼi te gāue ʼa Sesu ke fai ni ʼu tisipulo? (b) Koteā ʼaē ʼe feala ai ke tou fakahoko te gāue ʼaē neʼe fakatotonu mai e Kilisito?
19 Neʼe tou ako ʼi te alatike ʼaenī pea mo te alatike kua ʼosi, ʼe tonu ke fai katoa te ʼu koga ʼo te fakatotonu ʼa Sesu ʼaē ke fai ni ʼu tisipulo. Neʼe tala mai e Sesu he koʼe ʼe tonu ke tou fakalogo ki te fakatotonu ʼaia, pea ko te ʼu koga meʼa fea ʼaē ʼe tonu ke tou fai faka mafola ai. Neʼe ina toe ʼui mai foki koteā ʼaē ʼe tonu ke tou akoʼi pea ko te temi fea ʼe tonu ke tou fai ai te gāue ʼaia. ʼE moʼoni, ʼe mole ko he meʼa faigafua te fai ʼo te gāue lahi ʼaia. Kae ʼaki te lagolago mai ʼo te pule ʼa Kilisito, pea mo tana nofo mo tatou, ʼe feala ke tou fai te faʼahi ʼaia! ʼE mahino ia ʼe koutou ʼio kiai.
[Kiʼi nota]
^ ʼE fakahā e te tohi ko Sesu neʼe ina ʼui fēnei, “koutou papitemaʼi ia nātou . . . koutou akoʼi ia nātou,” kae neʼe mole ina ʼui ‘koutou papitemaʼi ia nātou pea mo akoʼi ia nātou.’ Koia, ko te fakatotonu ʼaē ke papitemaʼi pea mo akoʼi ʼe mole “ko he ʼu gāue ʼe fehoaʼaki.” Kae ko te “ako ʼe ko he gāue ʼe fai hoholo, ʼe fai ʼi muʼa ʼo te papitema . . . pea hoki fai leva te papitema.”
^ ʼE feala hakotou maʼu he tahi ʼu fakamatala peʼe koteā te tokoni ke foaki kia nātou kua vaivai fakalaumālie ʼi Te Tule Leʼo ʼo te ʼaho 1 ʼo Fepualio 2003, pasina 15 ki te 18.
ʼE Koutou Tali Feafeaʼi Anai?
• E feafeaʼi hatatou akoʼi niʼihi ke nātou mulimuli ki te gāue ʼaē neʼe fakatotonu mai e Sesu?
• Koteā te ʼu ako ʼe lava maʼu e he tisipulo foʼou mai niʼihi ʼo te kokelekasio?
• Koteā te meʼa ʼe tou lava fai moʼo tokoni kia nātou ʼaē ʼe nātou vaivai fakalaumālie?
• Koteā te fakaloto mālohi pea mo te fakaloto fīmālie ʼe tou maʼu mai te fakapapau ʼa Sesu “ ʼE ʼau nofo mo koutou ʼi te ʼaho fuli pe”?
[Fehuʼi]
[Paki ʼo te pasina 15]
ʼE tonu ke tou liliu ko he kau faiako pea mo he kau takitaki
[Paki ʼo te pasina 17]
ʼE lahi te ʼu ako maʼuhiga ʼe maʼu e he tisipulo foʼou mai te faʼifaʼitaki ʼa ʼihi