‘Tou ʼOlo Pea Mo Tou Fai Ni ʼu Tisipulo’
‘Tou ʼOlo Pea Mo Tou Fai Ni ʼu Tisipulo’
“Kua tuku mai kia te ʼau te pule katoa, ʼi te lagi pea mo te kele. Koia koutou ʼolo pea ke koutou fai ni ʼu tisipulo.”—Mateo 28:18, 19, MN.
1, 2. (a) Koteā te gāue ʼaē neʼe tuku e Sesu ki tana kau tisipulo? (b) Koteā te ʼu fehuʼi ʼe tou vakaʼi anai ʼo ʼuhiga mo te fakatotonu ʼa Sesu?
NEʼE ko te ʼaho ʼo te fasiga taʼu mātala ʼo te taʼu 33 ʼo totatou temi ʼi Iselaele, neʼe fakatahitahi te kau tisipulo ʼa Sesu ki te moʼuga ʼo Kalilea. Neʼe ʼamanaki hake ki selo tonatou ʼAliki ʼaē neʼe fakatuʼuake, kae neʼe tonu muʼa ke ina foaki age kia nātou te gāue maʼuhiga. Neʼe ʼi ai te gāue neʼe tuku e Sesu kia nātou. Neʼe koteā te gāue ʼaia? Pea neʼe tali feafeaʼi te kau tisipulo ki te gāue ʼaia? Pea ʼe malave feafeaʼi te gāue ʼaia kia tatou ia ʼaho nei?
2 Ko te gāue ʼaia neʼe tuku e Sesu kia nātou ʼe tuʼu ia Mateo 28:18-20 (MN ): “Kua tuku mai kia te ʼau te pule katoa, ʼi te lagi pea mo te kele. Koia koutou ʼolo pea ke koutou fai ni ʼu tisipulo ʼi te hahaʼi ʼo te ʼu fenua fuli pe, ʼo papitemaʼi ia nātou ʼi te huafa ʼo te Tāmai pea mo te ʼAlo pea mo te laumālie maʼoniʼoni, ʼo koutou ako ia nātou ke nātou mulimuli ki te ʼu meʼa fuli pe ʼaē neʼe ʼau fakatotonu atu kia koutou. Pea koʼeni, ʼe ʼau nofo mo koutou ʼi te ʼaho fuli pe, ʼo kaku ki te fakaʼosi ʼo te tuʼu ʼo te ʼu faʼahiga meʼa ʼaenī.” Neʼe talanoa ia Sesu ʼo ʼuhiga mo te “pule katoa,” mo te ʼu “fenua fuli,” mo “te ʼu meʼa fuli” ʼaē neʼe ina fakatotonu mai pea mo “te ʼaho fuli.” ʼAki te ʼu kupuʼi palalau ʼaia e fā ʼe malaga ai te ʼu fehuʼi maʼuhiga, pea ʼe feala ke tou fakaliliu fēnei tana ʼu palalau ʼaia: He koʼe ʼe tonu ke tou fakalogo ki te fakatotonu ʼaia? Ko te ʼu koga meʼa fea ʼaē ʼe tonu ke tou faka mafola ai? Koteā ʼaē ʼe tonu ke tou faka mafola? Pea ko te temi fea ʼe tonu ke fai ai te gāue ʼaia? Tou vakaʼi takitahi te ʼu fehuʼi ʼaia. *
“Kua Tuku Mai Kia Te ʼAu Te Pule Katoa”
3. He koʼe ʼe tonu ke tou fakalogo ki te fakatotonu ʼaē ke tou fai ni ʼu tisipulo?
3 ʼUluaki, he koʼe ʼe tonu ke tou fakalogo ki te fakatotonu ʼaē ke tou fai ni ʼu tisipulo? Neʼe ʼui fēnei e Sesu: “Kua tuku mai kia te ʼau te pule katoa, ʼi te lagi pea mo te kele. Koia koutou ʼolo pea ke koutou fai ni ʼu tisipulo.” ʼE fakahā e te kupu “koia” te tupuʼaga tāfito ʼo tatatou fakalogo ki te fakatotonu ʼaia. ʼUhi kua maʼu e Sesu te “pule katoa” koia ʼaē neʼe ina fai te fakatotonu ʼaia. E feafeaʼi te mālohi ʼo tana pule?
4. (a) ʼE lahi feafeaʼi te tuʼulaga pule ʼaē kua maʼu e Sesu? (b) ʼAki tatatou kua mahino ki te pule ʼa Sesu, ʼe tonu ke malave feafeaʼi kia tatou ia te fakatotonu ʼaē ke tou fai ni ʼu tisipulo?
4 ʼE pule ia Sesu ki tana kokelekasio, pea talu mai te taʼu 1914 kua ina maʼu te pule katoa ʼi te Puleʼaga ʼo te ʼAtua ʼaē kua fakatuʼu. (Kolose 1:13; ) ʼAki tona tuʼulaga alekaselo kua ina puleʼi ʼi selo ia te foʼi kautau ʼaselo ʼe lauʼi teau miliona. ( Apokalipesi 11:151 Tesalonika 4:16; 1 Petelo 3:22; Apokalipesi 19:14-16) Neʼe foaki age e tana Tāmai te mālohi katoa ke ina fakaʼauha “te ʼu puleʼaga fuli pea mo te pule fuli pea mo te mālohi fuli” ʼaē ʼe fakafeagai ki tana ʼu pelesepeto faitotonu. (1 Kolonito 15:24-26, MN; Efeso 1:20-23) ʼE mole pule pe ia Sesu ki te hahaʼi maʼuʼuli, kae ʼe ko te “Tuʼi fakamau o te hahai mauli mo te hahai mate” pea neʼe foaki age e te ʼAtua te mālohi moʼo fakatuʼuake te hahaʼi mamate. (Gaue 10:42; Soane 5:26-28) ʼE mahino ia, ko he fakatotonu ʼe haʼu mai He Tahi ʼe ina maʼu he pule māʼoluga feiā, ʼe ko he fakatotonu maʼuhiga ʼaupito. Koia, tou fakalogo fakaʼapaʼapa pea mo katoa ki te fakatotonu ʼa Kilisito ʼo tou ‘ ʼolo pea mo tou fai ni ʼu tisipulo.’
5. (a) Neʼe fakalogo feafeaʼi ia Petelo ki te fakatotonu ʼa Sesu? (b) Koteā te tapuakina neʼe maʼu e Petelo ʼi tana fakalogo ki te ʼu fakatotonu ʼa Sesu?
5 ʼI te kamata ʼa te minisitelio ʼa Sesu ʼi te kele, neʼe ina akoʼi fakalelei ki tana kau tisipulo, kapau ʼe nātou fakamoʼoni ki tona tuʼulaga pule pea mo fakalogo ki tana ʼu fakatotonu pea ʼe nātou maʼu ai anai te ʼu tapuakina. ʼI te tahi ʼaho neʼe ina ʼui fēnei ki te tagata tautai ko Petelo: “Koutou hoho atu ki te loloto pea koutou ʼaʼau tokotou ʼu kupega moʼo gelu.” Neʼe ʼiloʼi lelei e Petelo ʼe mole ʼi ai he ʼu ika, koia ʼaē neʼe ina ʼui fēnei age ai kia Sesu: “Faiako, neʼe mātou kinakina ʼi te po katoa ʼo mole maʼu hamatou meʼa.” Kae neʼe agavaivai ia Petelo, ʼo ina ʼui fēnei: “Kaʼe ʼaki tau fakatotonu mai, ʼe ʼau ʼaʼau anai te ʼu kupega.” ʼI te ʼosi fakalogo ʼa Petelo ki te fakatotonu ʼa Kilisito, neʼe ina maʼu “te tuʼula ika e lahi ʼaupito.” ʼI te ōfo ʼaupito ʼaia ʼa Petelo, neʼe “tō ifo ai [kia] tuli ʼo Sesu, ʼo ʼui maʼana: ‘Fakamamaʼo atu ia te ʼau ʼAliki. Heʼe ko ʼau ko te tagata agahala.’ ” Kae neʼe tali age e Sesu: “ ʼAua naʼa ke toe mataku. Heʼe ko te temi leva ʼaē, ko te ʼu tagata ʼaē ka ke puke maʼuli.” (Luka 5:1-10, MN; Mateo 4:18) Koteā te ako ʼe tou maʼu mai te fakamatala ʼaia?
6. (a) Koteā ʼe ʼasi mai ʼi te gelu milakulo ʼaē neʼe hoko ʼo ʼuhiga mo te fakalogo ʼaē ʼe fakamaʼua mai e Sesu? (b) ʼE tou lava faʼifaʼitakiʼi feafeaʼi ia Sesu?
6 Ko Petelo, mo Atelea pea mo ʼihi ʼapositolo neʼe tonu ke nātou ‘liliu ko te kau tautai tagata,’ heʼe ko te gāue neʼe foaki age e Sesu kia nātou ʼi tanatou ʼosi fai tanatou gelu fakaofoofo. (Maleko 1:16, 17) ʼE mahino ia, neʼe mole fakamaʼua age e Sesu ke nātou hoko fakalogo age pe kia ia. Neʼe ʼi ai te ʼu tupuʼaga tāfito neʼe tonu ai ke fakalogo ia Petelo mo Atelea ki te fakatotonu ʼa Sesu. Ohage pe ko tanā fakalogo ki te fakatotonu age e Sesu ke nā lī te kupega ʼo nā maʼu ai tanā ʼu ika, pea ʼe toe feiā anai mo tanā fakalogo ki te fakatotonu ʼa Sesu ke nā ‘puke he ʼu tagata,’ ʼe nā maʼu ai anai te ʼu tapuakina lahi. ʼAki he tui lahi, neʼe fakalogo te kau ʼapositolo ki te fakatotonu ʼa Sesu. Moʼo fakaʼosi, ʼe ʼui fēnei e te fakamatala: “Neʼe nātou toe ʼavake ai tonatou ʼu vaka ki ʼuta, pea neʼe nātou līaki ia meʼa fuli kae nātou mulimuli ia te ia.” (Luka 5:11, MN ) Ia ʼaho nei, ka tou fakaloto mālohiʼi niʼihi ke nātou kau ki te gāue ʼaē ko te fai ʼo ni ʼu tisipulo, ʼe tou faʼifaʼitakiʼi ia Sesu. ʼE mole tou faiga ke fai e te hahaʼi te faʼahi ʼaia, ʼuhi pe he neʼe tou ʼui age ke nātou fai, kae ʼe tou faiga ke nātou ʼiloʼi lelei te ʼu tupuʼaga tāfito ʼo tanatou fakalogo ki te fakatotonu ʼa Kilisito.
Te ʼu Tupuʼaga Tāfito Pea Mo Te ʼu Fakatuʼutuʼu Lelei
7, 8. (a) Koteā te ʼu tupuʼaga faka Tohi-Tapu ʼaē ʼe tonu ai ke tou faka mafola te Puleʼaga pea mo fai ni ʼu tisipulo? (b) Ko te vaega fea ʼaē ʼe ina uga tāfito koutou ke hoko atu takotou gāue faka mafola? (Vakaʼi te kiʼi nota ʼi te lalo pasina.)
7 ʼE tou kau ki te faka mafola ʼo te Puleʼaga pea mo te gāue ʼaē ke tou fai ni ʼu tisipulo heʼe tou fakamoʼoni ki te pule ʼa Kilisito. ʼE ko he tupuʼaga faka Tohi-Tapu ʼaia moʼo fai te gāue ʼaē ko te uga ʼo te hahaʼi ke nātou fai he ʼu gāue lelei. Koutou lau te ʼu fakamatala ka hoa mai neʼe fai e te kau Fakamoʼoni ʼa Sehova mai te ʼu fenua kehekehe, pea koutou fakatokagaʼi ʼi tanatou ʼu fakamatala pe neʼe tokoni feafeaʼi kia nātou te ʼu vaega faka Tohi-Tapu.
8 Ko Roy, neʼe papitema ʼi te taʼu 1951: “ ʼI taku foaki ʼo toku maʼuli kia Sehova, neʼe ʼau fai taku fakapapau ʼe ʼau tauhi tuʼumaʼu anai kia te ia. Pea ʼe ʼau fia fakahoko tuʼumaʼu taku fakapapau ʼaia.” (Pesalemo 50:14; Mateo 5:37) Ko Heather, neʼe papitema ʼi te taʼu 1962: “Ka ʼau manatuʼi te ʼu meʼa fuli neʼe fai e Sehova maʼaku, pea ʼe ʼau fia fakahā ki ai toku loto fakafetaʼi ʼo tauhi agatonu kia te ia.” (Pesalemo 9:1, 9-11; Kolose 3:15) Ko Hannelore, neʼe papitema ʼi te taʼu 1954: “ ʼE lagolago tuʼumaʼu te kau ʼaselo kia tatou mokā ʼe tou fai faka mafola—pea ʼe ko he toe pilivilesio lahi!” (Gaue 10:30-33; Apokalipesi 14:6, 7) Ko Honor, neʼe papitema ʼi te taʼu 1969: “Mokā hoko mai anai te ʼaho fakamāu ʼa Sehova, ʼe mole ʼau loto anai ke ʼui e he tahi ia muʼa ʼo Sehova pea mo tana kau Fakamoʼoni neʼe mole ʼau tala age te fakatokaga.” (Esekiele 2:5; 3:17-19; Loma 10:16, 18) Ko Claudio, neʼe papitema ʼi te taʼu 1974: “Ka tou fai faka mafola, ʼe ‘sio mai te ʼAtua’ kia tatou pea ‘ ʼe tou kaugā gāue mo Kilisito.’ ʼI te temi ʼaē ʼe tou kau ai ki te minisitelio, ʼe tou kaugā gāue mo totatou ʼu Kaumeʼa lelei.”—2 Kolonito 2:17. *
9. (a) ʼI te fakamatala ʼo ʼuhiga mo te gelu ʼa Petelo pea mo ʼihi ʼapositolo, koteā te fakatuʼutuʼu lelei ʼaē ʼe ina uga ai tatou ke tou fakalogo kia Kilisito? (b) Koteā te fakatuʼutuʼu lelei ʼaē ʼe tou fia fakalogo ai ki te ʼAtua pea mo Kilisito ia ʼaho nei, pea koteā tona tupuʼaga?
9 ʼE toe hā foki ʼi te fakamatala ʼo te gelu fakaofoofo ia te maʼuhiga ʼaē ke lelei te ʼu fakatuʼutuʼu ʼaē ʼe ina uga tatou ke tou fia fakalogo kia Kilisito—ko te ʼofa. ʼI te ʼui ʼaē e Petelo, “Fakamamaʼo atu ia te ʼau ʼAliki, heʼe ko ʼau ko te tagata agahala,” neʼe mole fakamamaʼo ia Sesu mai ia ia, pea neʼe mole ina tauteaʼi Petelo heʼe agahala. (Luka 5:8, MN ) Neʼe mole munaʼi e Sesu ia Petelo ʼi tana kole age ke fakamamaʼo ia te ia. Kae ʼaki te agaʼofa neʼe tali fēnei age e Sesu: “ ʼAua naʼa ke toe mataku.” Ko te mataku ʼe mole ko he tupuʼaga lelei ʼaia moʼo fakalogo kia Kilisito. Kae neʼe ʼui e Sesu kia Petelo mo tona ʼu kaugā gāue ke nātou faiva ʼi te tautai tagata. Ia ʼaho nei, ʼe mole tonu ke tou fakaʼaogaʼi te taʼi mataku ʼaia peʼe ko he ʼu meʼa fakaloto vaivai ohage ko te fakalainoaʼi pea mo te fakaufiufi moʼo fakakinauʼi te hahaʼi ke nātou fakalogo kia Kilisito. ʼE tou fakafiafia te loto ʼo Sehova mo kapau ʼe tou fakalogo ki ai ʼaki tokita loto katoa ʼuhi ko totatou ʼofa kia te Ia pea mo Kilisito.—Mateo 22:37.
“Koutou Fai Ni ʼu Tisipulo ʼi Te Hahaʼi ʼo Te ʼu Fenua Fuli Pe”
10. (a) Koteā te meʼa faigataʼa neʼe feala ke tau mo te kau tisipulo ʼa Sesu ʼo ʼuhiga mo tana fakatotonu ʼaē ke fai ni ʼu tisipulo? (b) Neʼe tali feafeaʼi e te kau tisipulo ia te fakatotonu ʼa Sesu?
10 Koʼeni te lua fehuʼi ʼaē ʼe malaga ʼo ʼuhiga mo te fakatotonu ʼa Kilisito: Ko te ʼu koga meʼa fea ʼaē ke fai ai ni ʼu tisipulo? Neʼe ʼui fēnei e Sesu ki tana kau tisipulo: “Koutou fai ni ʼu tisipulo ʼi te hahaʼi ʼo te ʼu fenua fuli pe.” ʼI te temi ki muʼa atu ʼo te minisitelio ʼa Sesu, neʼe tali e te kau Iselaele te hahaʼi ʼo te ʼu puleʼaga mo kapau ʼe nātou tauhi fakatahi mo nātou kia Sehova. (1 Hau 8:41-43) Neʼe faka mafola tāfito ia Sesu ki te kau Sutea, kae ʼi te temi leva ʼaia neʼe ina ʼui age ki tana kau tisipulo ke nātou ʼolo ki te hahaʼi ʼo te ʼu fenua fuli pe. Kae ko te ʼu telituale ʼaē neʼe fai faka mafola ai tana kau tisipulo neʼe tuʼakoi pe ki te kiʼi “kūtuga”—te kau Sutea—kae ʼe kua vave pe tanatou faka mafola ki te hahaʼi fuli. Logola te faigataʼa ʼo te fakatuʼutuʼu foʼou ʼaia ki te kau tisipulo, kae neʼe kua nātou tali lelei te fakatotonu ʼa Sesu. Hili pe taʼu e 30 ki te mate ʼo Sesu, neʼe feala ke ʼui e te ʼapositolo ko Paulo ko te logo lelei neʼe mole faka mafola pe ki te kau Sutea, kae neʼe kua faka mafola “ki te ʼu fakatupu fuape ʼaē ʼi te lalo lagi.”—Kolose 1:23, MN.
11. Neʼe fakalahi feafeaʼi te fai faka mafola talu mai te kamataʼaga ʼo te 20 sēkulō?
11 ʼI te ʼu temi pe ʼaenī kua hili, neʼe tou sio ki te gāue lahi feiā ʼi te ʼu telituale ʼaē neʼe fakahoko ai te faka mafola. ʼI te kamata ʼo te 20 sēkulō, neʼe mole lahi te ʼu fenua neʼe fai ai te faka mafola. Kae ko te ʼu tisipulo ʼa Kilisito ʼo te temi ʼaia neʼe nātou mulimuli ki te faʼifaʼitaki ʼa te kau Kilisitiano ʼo te ʼuluaki sēkulō, pea neʼe nātou fakalahi atu tanatou gāue ʼi te ʼu telituale pe ʼaē neʼe nātou faka mafola ai. (Loma 15:20) ʼI te kamata ʼo te ʼu taʼu 1930, neʼe nātou fai te ʼu tisipulo ʼi te ʼu fenua e teau. Ia ʼaho nei, kua mafola tatatou gāue fai faka mafola ʼi te ʼu fenua e 235.—Maleko 13:10.
“Mai Te ʼu Lea Kehekehe”
12. Koteā te gāue faigataʼa ʼe talanoa kiai te lea faka polofeta ʼa Sakalia 8:23?
12 ʼE ko he meʼa faigataʼa te fai ʼo ni ʼu tisipulo ʼi te ʼu fenua fuli heʼe lahi te ʼu telituale pea mo te ʼu lea ʼa te hahaʼi ʼo te ʼu fenua ʼaia. ʼAki te polofeta ko Sakalia, neʼe fakakikite fēnei e Sehova: “ ʼE hoko anai ʼi te ʼu ʼaho ʼaia, ko te ʼu tagata e toko hogofulu mai te ʼu lea kehekehe ʼo te ʼu puleʼaga ʼe nātou puke anai te tapaʼi kofu ʼo te tagata Sutea, ʼo nātou ʼui fēnei: ‘ ʼE mātou ʼolo anai mo koutou, koteʼuhi neʼe mātou logo ko te ʼAtua ʼe nofo mo koutou.’ ” (Sakalia 8:23) ʼI he fakahoko lahi ʼo te lea faka polofeta ʼaia, ko te “tagata Sutea” ʼe ina fakatā te toe ʼo te kau Kilisitiano fakanofo, pea ko te ʼu “tagata e toko hogofulu” ʼe nātou fakatā “te toe hahaʼi tokolahi.” * (Apokalipesi 7:9, 10, MN; Kalate 6:16) Ko te toe hahaʼi tokolahi ʼaia ʼaē ko te ʼu tisipulo ʼa Kilisito, ʼe maʼu anai ʼi te ʼu fenua kehekehe, pea ohage ko tona ʼui e Sakalia ʼe nātou palalau ʼi te ʼu lea kehekehe. ʼE fai koa e te hahaʼi ʼa te ʼAtua ʼi te temi nei, ia te faʼahi ʼaia ʼo te gāue? Ei.
13. (a) Koteā te gāue ʼaē neʼe fai e te hahaʼi ʼa te ʼAtua ʼo ʼuhiga mo te tahi ʼu lea? (b) Koteā ʼaē neʼe fai e te tagata kaugana agatonu mo poto ke maʼu te meʼa kai fakalaumālie ʼi te ʼu lea kehekehe? (Vakaʼi mo te talanoa “Te ʼu Tohi Faka Tohi-Tapu Maʼa Te Kau Kivi.”)
13 ʼI te 1950, ko te toko 3 ʼi te toko 5 ʼo te kau Fakamoʼoni ʼa Sehova neʼe nātou palalau tāfito ʼi te Fakapilitānia. ʼI te 1980 neʼe liliu ko te toko 2 ʼi te toko 5, pea ia ʼaho nei ʼe ko te toko 1 ʼi te toko 5 ʼi te kau Fakamoʼoni ʼa Sehova ʼe Fakapilitānia. Koteā te fakatuʼutuʼu neʼe fai e te tagata kaugana agatonu mo poto ʼo ʼuhiga mo te tokolahi ʼaē ʼe mole lea Fakapilitānia? Neʼe nātou teuteuʼi te meʼa kai fakalaumālie ki te tahi ʼu lea. (Mateo 24:45) Ohage la, ʼi te taʼu 1950 ko tatatou ʼu tohi faka Tohi-Tapu neʼe tā ia lea e 90, kae ia ʼaho nei kua tā ia lea e 400. Neʼe ʼi ai koa hona ʼu fua, ia te tokaga lahi ʼaia neʼe fai ki te hahaʼi ʼo te ʼu lea kehekehe? Ei! ʼI te vāhaʼa fuli ʼo te taʼu, ko te toko 5 000 hahaʼi ‘mai te ʼu lea kehekehe’ neʼe nātou liliu ko te ʼu tisipulo! (Apokalipesi 7:9) Pea ʼe hoholo atu pe te tuputupu. ʼI ʼihi fenua ʼe lahi te hahaʼi ʼaē ʼe ʼaʼau ʼi te “kupega”!—Luka 5:6; Soane 21:6.
ʼE Feala Koa Hakotou Kau Ki Te Minisitelio ʼAoga ʼAia?
14. Koteā ʼaē ʼe tou lava fai moʼo tokoni ki te hahaʼi ʼo totatou telituale ʼaē ʼe nātou palalau ki he tahi lea? (Vakaʼi mo te talanoa “Te ʼu Lea ʼe Fai ʼAki Te ʼu Nima Moʼo Fai Ni ʼu Tisipulo.”)
14 ʼE lahi te ʼu fenua ʼo te Potu Uesite, ʼaki te ʼōmai ʼa te hahaʼi ʼaē neʼe mavae mai tonatou ʼu fenua, kua maʼua ke fai ni ʼu tisipulo ʼi ‘te ʼu lea kehekehe.’ (Apokalipesi 14:6) ʼE tou lava tokoni feafeaʼi ki te hahaʼi matāpule ʼo totatou telituale? (1 Timoteo 2:4) ʼE feala ke tou fakaʼaogaʼi te ʼu tohi ʼaē neʼe tā ʼi tanatou lea. Koutou foaki kia nātou te ʼu tohi faka Tohi-Tapu ʼo tanatou lea. Kapau ʼe feala, koutou fakatuʼutuʼu ke ʼalu he Fakamoʼoni ʼe palalau ʼi te lea ʼaia ʼo ʼaʼahi ia nātou ʼaia. (Gaue 22:2) Kua faigafua te fai ʼo te ʼu fakatuʼutuʼu ʼaia, koteʼuhi kua lahi te kau Fakamoʼoni ʼe nātou ako te tahi ʼu lea ke feala hanatou tokoni ki te kau matāpule ke nātou liliu ko ni ʼu tisipulo ʼa Kilisito. ʼE ʼasi mai ʼi te ʼu tānaki gāue ʼe fua lelei ia te taʼi tokoni ʼaia.
15, 16. (a) Koteā te ʼu faʼifaʼitaki ʼe ʼasi mai ai te fua lelei ʼo te tokoni ki te hahaʼi matāpule? (b) Koteā te ʼu fehuʼi ʼe lagi lelei ke tou vakaʼi ʼo ʼuhiga mo te gāue ki te hahaʼi ʼo te tahi lea?
15 Tou vakaʼi te ʼu faʼifaʼitaki e lua mai Holani, ʼaē ʼe faka mafola ai te Puleʼaga ia lea e 34. Neʼe tali lelei e te taumatuʼa Fakamoʼoni ke nā ʼolo ʼo fai ni ʼu tisipulo ki te hahaʼi Polonia. ʼI te fua lelei ʼo tanā ʼu faiga ʼaia, ko te tēhina neʼe ina fakasiʼisiʼi tana gāue fakamālama ke ava ʼi he tahi ʼaho ʼo te vāhaʼa moʼo ako te Tohi-Tapu mo te hahaʼi ʼaē ʼe nātou fia logo. Mole tuai, neʼe fai e te taumatuʼa te ʼu ako Tohi-Tapu e 20 ʼi te vahaʼā fuli. Neʼe nā ʼui fēnei: “ ʼE ma fiafia ʼaupito ʼi tomā minisitelio.” ʼE fiafia tāfito te kau fai faka mafola, mokā fakahā e te hahaʼi tonatou loto fakafetaʼi ʼi tanatou logo ki te ʼu moʼoni faka Tohi-Tapu ʼi tanatou lea. Ohage la, lolotoga te fono neʼe fai ʼi te lea faka Vietenamia, neʼe tuʼu ki ʼoluga te matuʼa pea neʼe ina kole peʼe feala ke palalau. Neʼe tagi, pea mo ina ʼui fēnei ki te ʼu Fakamoʼoni: “ ʼE ʼau fakamālo atu ki takotou faiga ʼaē ke koutou ako taku lea faigataʼa. ʼE ʼau fakafetaʼi lahi ʼi taku lava ako he ʼu tuʼuga meʼa matalelei mai te Tohi-Tapu ʼi toku temi matuʼa ʼaenī.”
16 Koia, ʼe mole tou punamaʼuli ai ki te fua lelei ʼo te gāue ʼa te ʼu tēhina mo tuagaʼane ʼaē ʼe nātou gāue ʼi te ʼu kokelekasio matāpule. Neʼe ʼui fēnei e te taumatuʼa mai Pilitania: “Ko te gāue ʼi te ʼu telituale matāpule ʼe ko he gāue fakafiafia ʼaupito ʼi tamā gāue faka mafola ʼo te Puleʼaga ia taʼu e 40.” ʼE feala koa hakotou fai ni ʼu fetogi ke koutou kau ki te minisitelio maʼuhiga ʼaia? Kapau ko koutou tamaliki ʼe kei koutou ako, ʼe feala koa ke koutou ako he tahi age lea moʼo teuteuʼi te taʼi faʼahiga minisitelio ʼaia? Ka koutou fai te faʼahi ʼaia, ʼe koutou maʼu ai anai he ʼu tapuakina lahi. (Tāʼaga Lea 10:22) He koʼe koa ʼe mole koutou palalau mo takotou ʼu mātuʼa ki te faʼahi ʼaia?
Tou Fetofetogi Tatatou ʼu Faʼahiga Fai Faka Mafola
17. ʼE tou lava maʼu feafeaʼi ʼihi hahaʼi ʼo totatou telituale?
17 ʼE mahino ia, ʼe mole feala kia tatou fuli ke tou faka mafola ʼi te ʼu telituale lea kehe. Kae ʼe lagi feala ke tou fakalahi tatatou fai mafola ki te hahaʼi ʼo totatou telituale. ʼO feafeaʼi? ʼE mole tou fetogi anai te logo ʼaē ʼe tou tala, kae tou fetofetogi tatatou faʼahiga fai faka mafola. ʼE lahi te ʼu fenua, ko te hahaʼi tokolahi ʼe nātou maʼuʼuli ʼi te ʼu falefata ʼe faigataʼa takita hū kiai. Ko ʼihi ʼapi ʼe lāvaki mokā tou ʼolo atu ʼo fai faka mafola. ʼE tonu anai ke tou fetogi totatou ʼu hola fai faka mafola pea mo te ʼu koga meʼa ʼaē ʼe tou gāue ai. Ka tou fai feiā ʼe tou faʼifaʼitakiʼi anai ia Sesu, he neʼe faiga ke palalau mo te hahaʼi ʼi te ʼu ʼaluʼaga kehekehe.—Mateo 9:9; Luka 19:1-10; Soane 4:6-15.
18. Neʼe fua lelei feafeaʼi te fai faka mafola ʼi te ʼu ʼaluʼaga kehekehe? (Vakaʼi mo te talanoa “Koutou Fai Ni ʼu Tisipulo Ki Te Hahaʼi ʼAē ʼe Gāue.”)
18 ʼI ʼihi koga meʼa ʼo te malamanei, ʼe ko he fakatuʼutuʼu maʼuhiga ia te fai ʼo ni ʼu tisipulo ʼi te ʼu potu fuli ʼe kita maʼu ai te hahaʼi. Neʼe faka maʼuhigaʼi tāfito e te kau fai faka mafola faiva ia te fai fagonogono ʼi te ʼu koga meʼa kehekehe. Neʼe mole gata tanatou fai faka mafola ʼi te ʼu ʼapi, kae ʼe nātou fai fagonogono ʼi te ʼu malaʼe vakalele, mo te ʼu pilō, mo te ʼu fale koloā, mo te ʼu tauʼaga motokā, te ʼu fale taliʼaga kā, te ʼu ʼōloto, te ʼu matatai, pea mo te tahi age ʼu koga meʼa. Tokolahi ʼi te kau Fakamoʼoni foʼou ʼi Hawaï, neʼe nātou ʼuluaki logo ki te moʼoni ʼi te ʼu faʼahi ʼaia. Ka tou fetogi tatatou ʼu faʼahiga fai faka mafola, ʼe feala ai hatatou fai fakalelei te fakatotonu ʼa Sesu ke fai ni ʼu tisipulo ʼa Kilisito.—1 Kolonito 9:22, 23.
19. Koteā te ʼu koga ʼo te fakatotonu ʼa Sesu ʼe tou vakaʼi anai ʼi te alatike ka hoa mai?
19 Ko te fakatotonu ʼa Sesu ke fai ni ʼu tisipulo ʼe mole gata ʼaki pe te ʼu fehuʼi ʼaē: He koʼe ʼe tonu ke tou fakalogo kiai pea ko te ʼu koga meʼa fea ʼaē ʼe tonu ke tou fai faka mafola ai? Kae ʼe toe lagaʼi ai te ʼu fehuʼi ʼaenī: Koteā ʼaē ʼe tonu ke tou faka mafola pea ko te temi fea ʼe tonu ke tou fai ai te gāue ʼaia? ʼE tou vakaʼi anai ʼi te alatike ka hoa mai te ʼu koga ʼaia e lua ʼo te gāue ʼaē neʼe fakatotonu mai e Sesu.
[Kiʼi nota]
^ ʼI te alatike ʼaenī ʼe tou vakaʼi anai te ʼu ʼuluaki fehuʼi e lua. Pea ʼe tou vakaʼi anai ʼi te alatike ka hoa mai te ʼu fehuʼi fakamuli e lua.
^ Ko te tahi ʼu tupuʼaga ʼo tatatou fai faka mafola ʼe tuʼu ʼi te ʼu koga tohi ʼo Tāʼaga Lea 10:5; Amosi 3:8; Mateo 24:42; Maleko 12:17; Loma 1:14, 15.
^ Kapau ʼe koutou fia maʼu he tahi ʼu manatu ʼo ʼuhiga mo te ʼu fakahoko ʼo te lea faka polofeta, koutou vakaʼi Te Tule Leʼo ʼo te ʼaho 15 ʼo Maio 2001, pasina 12, pea mo te tohi La Prophétie dʼIsaïe, lumière pour tous les humains II, pasina 408, neʼe tā e te kau Fakamoʼoni ʼa Sehova.
Kei Koutou Manatuʼi Koa?
• Koteā te ʼu tupuʼaga ʼe tonu ai ke tou kau ki te faka mafola ʼo te Puleʼaga pea mo fai ni ʼu tisipulo, pea koteā te fakatuʼutuʼu lelei ʼe tonu ke tou maʼu moʼo fai te ʼu faʼahi ʼaia?
• Neʼe fakahoko feafeaʼi e te ʼu kaugana ʼa Sehova ia ʼaho nei te fakatotonu ʼa Sesu ke fai ni ʼu tisipulo ʼi te hahaʼi ʼo te ʼu fenua fuli pe?
• ʼE tou lava fetogi feafeaʼi tatatou faʼahiga fai faka mafola, pea he koʼe ʼe tonu ke tou fai te faʼahi ʼaia?
[Fehuʼi]
[Talanoa ʼo te pasina 10]
Te ʼu Tohi Faka Tohi-Tapu Maʼa Te Kau Kivi
Ko Albert ʼe nofo ʼi Amelika, ko te tagata ʼāfea Kilisitiano, ʼe minisi katoa pea ʼe kivi. Kua toe lelei age tona minisitelio pea mo tana ʼu gāue tagata taupau heʼe ina fakaʼaogaʼi te ʼu tohi faka Tohi-Tapu maʼa te kau kivi. ʼE ina fakahoko feafeaʼi tona ʼu maʼua ʼi tona kokelekasio?
ʼE ʼui fēnei e James, te tēhina taupau pelesita: “ ʼE fai fakalelei e Albert te tēhina taupau ki te gāue tana gāue ʼi tomatou kokelekasio.” ʼE kau ia Albert ʼi te hahaʼi kivi e toko 5 000 ʼi Amelika ʼaē neʼe nātou maʼu ʼaki te temi ʼi te lea Fakapilitānia pea mo te lea faka Sepania ia te ʼu tohi faka Tohi-Tapu maʼa te kau kivi. Talu mai te taʼu 1912, neʼe tā e te tagata kaugana agatonu mo poto te ʼu tohi faka Tohi-Tapu e lauʼi teau tupu maʼa te hahaʼi kivi. ʼE fakaʼaogaʼi e te kau Fakamoʼoni ʼa Sehova te ʼu masini tā foʼou moʼo tā ʼi te taʼu fuli te ʼu lauʼi miliona tohi maʼa te hahaʼi kivi ia lea e hogofulu tupu pea mo nātou tufa te ʼu tohi ʼaia ia fenua e 70 tupu. ʼE koutou ʼiloʼi koa he tahi ʼe ʼaoga anai kiai te ʼu taʼi tohi faka Tohi-Tapu ʼaia?
[Talanoa ʼo te pasina 11]
Te ʼu Lea ʼe Fai ʼAki Te ʼu Nima Moʼo Fai Ni ʼu Tisipulo
Ko te ʼu lauʼi afe kau Fakamoʼoni ʼi te malamanei katoa, ʼo kau ai te kau tūpulaga faʼafai e tokolahi, ʼe nātou ako te lea ʼaki te ʼu nima moʼo tokoni ki te hahaʼi tuli ke nātou liliu ko ni ʼu tisipulo ʼa Kilisito. ʼI Pelesile, mole heʼeki faʼa fualoa neʼe papitema te toko 63 hahaʼi tuli pea ko te toko 35 Fakamoʼoni ia nātou ʼaia kua nātou pionie temi katoa. ʼI te malamanei katoa, ʼe fakaʼaogaʼi te lea ʼaē ʼe fai ʼaki te ʼu nima ʼi te ʼu kokelekasio e 1 200 tupu pea mo te ʼu kiʼi kūtuga. ʼE lahi ʼaupito te ʼu kilometa ʼe fai e te taupau faka silikosikilipisio mokā ina foli te ʼu kokelekasio ʼaē ʼe fai ai te lea ʼaki te ʼu nima ʼi Lusia!
[Talanoa ʼo te pasina 12]
Koutou Fai Ni ʼu Tisipulo Ki Te Hahaʼi ʼAē ʼe Gāue
Ko te Fakamoʼoni ʼi Hawaï neʼe felāveʼi mo te tagata takitaki ʼo te sosiete kā ʼi tana ʼalu ʼo fagonogono ki te hahaʼi gāue. Logola te maʼumaʼua ʼo te tagata, kae neʼe ina tali ke nā ako te Tohi-Tapu ʼi tona pilō ʼi te vaeluaʼi hola ʼi te vāhaʼa fuli. ʼI te ʼu Feliafā uhu fuli, ʼe ina ʼui age ki tana kau gāue ke nātou tali ki te telefoni, ke feala hana tokaga katoa ki tana ako. Ko te tahi Fakamoʼoni ʼi Hawaï ʼe ina fai tuʼa tahi ʼi te vāhaʼa fuli, te ako Tohi-Tapu ʼa te fafine patolo ʼo te fale koloā sūlie. ʼE fai te ako ʼi te fakatauʼaga sūlie ʼo te fale koloā. Ka ʼalu age he tahi ʼo fai hana fakatau, pea ʼe fakatafa te Fakamoʼoni, pea nā toe hoko atu te ako mokā ʼosi mavae te hahaʼi faifakatau.
ʼAki te fakatuʼutuʼu ʼa te kau Fakamoʼoni ke nātou ʼolo ki te ʼu koga meʼa kehekehe, neʼe feala ai ki te tagata takitaki sosiete pea mo te fafine patolo ʼo te koloā ke nā logo ki te moʼoni. ʼE feala koa ke koutou fakakaukauʼi he ʼu koga meʼa ʼo te telituale ʼo tokotou kokelekasio ʼe feala ai ke koutou felāveʼi mo ni hahaʼi ʼe faigataʼa tonatou maʼu atu kiō nātou?
[Paki ʼo te pasina 12]
ʼE feala koa ke koutou gāue ʼi he telituale matāpule?