“Ko ʼAē ʼe Fakasiosio Poto ʼe Gāue Anai ʼAki Te Poto”
“Ko ʼAē ʼe Fakasiosio Poto ʼe Gāue Anai ʼAki Te Poto”
KO TE takitaki ʼaē ʼe haʼu mai te Folafola ʼa te ʼAtua, ia te Tohi-Tapu, ‘ ʼe lelei age ia ʼi te aulo—ʼi he tuʼuga aulo.’ (Pesalemo 19:7-10) Koteā tona tupuʼaga? Koteʼuhi “ko te lao ʼa te poto [ia Sehova] ʼe ko he matapuna ia ʼo te maʼuli, moʼo hāofaki ʼo koutou mai te ʼu hele ʼo te mate.” (Tāʼaga Lea 13:14) Ka tou maʼuliʼi te ʼu tokoni mai te Tohi-Tapu ʼe mole ina hikihiki pe totatou maʼuli, kae ʼe toe tokoni mai pe foki ke tou fakamamaʼo mai te ʼu hele ʼaē ʼe fakatupu tuʼutāmaki kia tatou. Koia ʼe maʼuhiga ʼaupito ke tou kumi te ʼatamai mālama ʼo ʼuhiga mo te Tohi-Tapu pea mo tou maʼuliʼi te meʼa ʼaē ʼe tou ako!
Ohage ko tona fakamatala ia Tāʼaga Lea 13:15-25, neʼe fai te tokoni e te Hau ʼo te Iselaele ʼāfea ko Salomone, pea ʼe ʼaoga kia tatou ke tou maʼuli ʼo mulimuli ki te ʼatamai mālama pea ke feala hatatou maʼu hotatou maʼuli fiafia pea mo loaloaga. * ʼI tana fakaʼaogaʼi te tāʼaga lea ʼe totonu, ʼe ina fakahā mai te tokoni ʼa te Folafola ʼa te ʼAtua ke tou vāhaʼa lelei mo ʼihi, mo tou nonofo agatonu ki totatou minisitelio, mo maʼu he aga fakapotopoto ki te akonakiʼi ʼo tatou, pea mo tou filifili fakapotopoto totatou ʼu fakakaugā. ʼE toe palalau pe foki ki te tokaga ʼaē ʼo tuku he tofiʼa ki tatatou ʼu fānau, ʼo feiā mo tonatou akonakiʼi ʼi te ʼofa.
ʼE Haʼu Te ʼOfa Mai He Fakasiosio Poto ʼe Lelei
ʼE ʼui fēnei e Salomone: “Ko he fakasiosio poto ʼe lelei ʼe ina ʼaumai ai ia te ʼofa, kae ko te ala ʼa te hahaʼi kākā ʼe fefeka.” (Tāʼaga Lea 13:15) ʼE ʼui e te tohi, ko te kupuʼi palalau faka Hepeleo ʼaē neʼe fakaliliu ʼaki te “fakasiosio lelei,” peʼe ko te mahino lelei, “ ʼe faka ʼuhiga ki te fealagia ʼaē ki te tokaga, mo te fakafuafua lelei, pea mo te ʼu manatu fakapotopoto.” Ko he tahi ʼe ina maʼu te ʼu kalitate ʼaia ʼe mole faigataʼa kia ia hona ʼofainaʼi e niʼihi.
Koutou tokagaʼi age muʼa te fakasiosio poto ʼa te ʼapositolo ko Paulo ʼi tana felogoi mo tona tēhina Kilisitiano ko Filemone ʼi tana fakaliliu ake ia te tagata kaugana ʼa Filemone ʼaē neʼe hola, ia Onesimo, ʼaē neʼe liliu ko he Kilisitiano. Ko Paulo neʼe ina fakaloto mālohiʼi ia Filemone ke ina tali fakalelei ia te liliu ake ʼa Onesimo, ohage pe hana tali fakalelei te ʼapositolo totonu. Neʼe ʼui age e Paulo kia Filemone ke tuku ke ina totogi te maʼua ʼaē ʼe tonu ke huʼi age e Onesimo. Ei, neʼe feala noa pe kia Paulo ke ina fakaʼaogaʼi tona tuʼulaga pule pea mo fakatotonu age kia Filemone ia te meʼa ʼaē ʼe tonu ke ina fai. Kae neʼe filifili e te ʼapositolo ke ina fakatokatoka te fihifihia ʼaia ʼaki te fakaʼapaʼapa pea mo te ʼofa. ʼI tana fai te faʼahi ʼaia, neʼe loto falala ia Paulo ʼe feala kia Filemone ke ina muliʼi tana tokoni, peʼe feala pe la ke laka age ʼi te meʼa ʼaē neʼe ʼamanaki kiai. ʼE mole koa la tonu ke feiā tatatou ʼu felogoi mo totatou ʼu tēhina?—Kae ʼe fefeka te aga fakakākā ʼa te hahaʼi kākā. ʼO feafeaʼi? ʼE ʼui e te tagata poto, ko te kupuʼi palalau ʼaē ʼe fakaʼaogaʼi ʼi henī ʼe faka ʼuhiga ki te “mālohi pea mo tukupau, ʼa te aga fakakākā ʼa te hahaʼi agakovi. . . . ʼE pulinoa anai te tagata ʼaē kua loto mālohi ʼi tana ʼu aga ʼaē ʼe kovi, ʼo mole ina tokagaʼi te fakatotonu poto ʼa niʼihi.”
ʼE toe ʼui fēnei e Salomone: “Ko ʼaē ʼe fakasiosio poto ʼe gāue anai ʼaki te poto, kae ko ia ʼaē ʼe mole poto ʼe ina folahi anai te agavale.” (Tāʼaga Lea 13:16) Ko he tahi ʼe fakasiosio poto ʼe mole ko he tahi ʼe kākā. ʼI henī ʼe fakapipiki ia te fakasiosio poto ki te ʼatamai mālama, pea ʼe faka ʼalutahi mo he tahi ʼe tokaga, ʼe ina fakakaukauʼi fakalelei te ʼu meʼa ʼaē ka ina fai. Ka fatufatuʼi peʼe laukoviʼi ia ia, ko te tagata ʼaē ʼe fakasiosio poto ʼe ina lolomi tona ʼu laugutu. ʼI te faikole, ʼe ina faigaʼi ke ina maʼuliʼi te fua ʼo te laumālie maʼoniʼoni ke ʼaua naʼa lahi fau tona ʼita. (Kalate 5:22, 23) ʼE mole tuku e te tagata tokaga ke puleʼi ia ia e he tahi tagata peʼe ko te ʼaluʼaga ʼaē ʼe hoko kia ia. Kae ʼe loto lolomi pea mo fakamamaʼo mai te ʼu kē ʼaē ʼe tau hoko ki te tagata ʼaē ʼe hoko ʼita mokā lave age he meʼa ki ai.
Ko ia ʼaē ʼe fakasiosio poto ʼe ina toe fai pe foki te ʼu tonu ʼo mulimuli ki te ʼatamai mālama. ʼE ina ʼiloʼi ko te ʼu aga fakapotopoto ʼe mole hoko fai feiā pe, ʼo muliʼi te meʼa ʼaē ʼe ʼi te loto, peʼe muliʼi te meʼa ʼaē ʼe fai e te hahaʼi. Koia, ʼe ina toʼo he temi ke ina sivisivi te ʼaluʼaga. ʼE ina tānaki te ʼu meʼa fuli ʼaē ʼe pipiki ki te ʼaluʼaga ʼaia pea mo vakaʼi peʼe ko te faʼahi fea ʼaē ʼe ina lava fai. Pea ʼe ina vakaʼi te Tohi-Tapu moʼo fai hana tonu, peʼe ko te lao fea peʼe ko te pelesepeto fea ʼaē ʼe fakapipiki kiai. Ko te ala ʼo te taʼi tagata ʼaia ʼe totonu tuʼumaʼu pe ia.—Tāʼaga Lea 3:5, 6.
“Ko He Tagata Faifekau Agatonu ʼe Ko He Faitoʼo Ia”
Kia tatou kau Fakamoʼoni ʼa Sehova, neʼe fakatotonu mai ke tou kalagaʼi te logo ʼaē neʼe foaki mai e te ʼAtua. Ko te ʼu palalau ʼi te tāʼaga lea ʼaē ʼe hoa mai ʼe tokoni mai kia tatou ke tou nonofo agatonu moʼo fakahoko tatatou gāue. ʼE ʼui fēnei ai: “Ko te tagata ʼave logo ʼaē ʼe agakovi ʼe tō kovi anai kia ia, kae ko he tagata faifekau agatonu ʼe ko he faitoʼo ia.”—Tāʼaga Lea 13:17.
ʼE faka maʼuhigaʼi ʼi henī te ʼu kalitate ʼo te tagata ʼave logo. Koteā ʼaē ʼe hoko mo kapau ko te tagata ʼave logo ʼe ina ʼave kovi te logo peʼe ina fetogi te logo? ʼE 2 Hau 5:20-27) Koteā ʼaē ʼe hoko mo kapau ʼe liliu he tagata faifekau ʼo heʼe agatonu pea mo ina fakagata tana tala te logo? ʼE ʼui fēnei e te Tohi-Tapu: “Kapau leva ʼe mole ke palalau moʼo fakatokaga te tagata agakovi ke maliu mai tona ala, ko ia, te tagata agakovi, ʼe mate anai ʼi tana hala, kae ki tona toto, [ko ʼau Sehova] ʼe ʼau toe kumi atu anai ki tou nima.”—Esekiele 33:8.
mole hoko anai koa he tautea kia ia? Koutou fakakaukauʼi age muʼa te meʼa ʼaē neʼe hoko kia Kehasi, te tagata kaugana ʼa te polofeta ko Eliseo, ʼi tana mānumānu neʼe ina ʼave te logo ʼe mole moʼoni kia Naamane, te pule ʼo te solia Silia. Pea neʼe maʼu e Kehasi te kilia ʼaē neʼe maʼu e Naamane. (Kae ʼi te tahi faʼahi, ko te tagata faifekau agatonu ʼe ko he faitoʼo kia ia totonu pea mo nātou ʼaē ʼe nātou fakalogo kia ia. Neʼe fakaloto mālohiʼi fēnei ia Timoteo e Paulo: “Tokaga kia koe pea mo tau faiʼakonaki, kataki i ai. Koteuhi i tau fai aia, e ke haofaki anai ia koe, ia koe pea mo natou e fakalogo kia te koe.” (1 Timoteo 4:16) Koutou fakakaukauʼi age ki te faitoʼo ʼe maʼu mai te fakahā fakalelei ʼo te logo lelei ʼo te Puleʼaga. ʼE ina fakaʼala te hahaʼi ʼaē ʼe loto faitotonu pea mo ina taki ia nātou ki te moʼoni ʼaē ʼe ina faka ʼāteaina ia nātou. (Soane 8:32) Tatau aipe peʼe mole fia logo kiai te hahaʼi, kae ko te tagata faifekau agatonu ‘ ʼe ina hāofaki moʼoni anai tona maʼuli.’ (Esekiele 33:9) ʼOfa pe ke ʼaua naʼa tou lotonoa ki te fakahoko ʼo totatou maʼua, ʼaē ke tou fai faka mafola. (1 Kolonito 9:16) Pea ʼofa pe ke tou tokakaga tuʼumaʼu ʼo “kalagai te Folafola,” kae ʼaua naʼa tou fulihi ke hage ʼe mole fefeka fau peʼe tou fakamataleleiʼi fau te logo ʼaia.—2 Timoteo 4:2.
“Ko ʼAē ʼe Ina Fakaʼaogaʼi Tona Fakatonutonuʼi ʼe Vikiʼi Ia”
Ko te tagata poto, ʼe tonu koa ke ʼita mokā fai age he tokoni ʼaoga? ʼE ʼui fēnei e Tāʼaga Lea 13:18: “Ko ʼaē ʼe ina meʼa noaʼi tona akonakiʼi ʼe liliu ia ʼo masiva pea mo lainoa, kae ko ʼaē ʼe ina fakaʼaogaʼi tona fakatonutonuʼi ʼe vikiʼi ia.” ʼE tou agapoto ʼo tali hotatou fakatonutonu tatau aipe peʼe neʼe mole tou loto kiai. Ko te tokoni ʼaē ʼe ʼi ai tona fakatafito lelei ʼe feala pe ke lahi age hona ʼaoga kia tatou, tāfito la mokā ʼe mole tou ʼiloʼi tona ʼaoga kia tatou. ʼAki tatatou fakalogo ki te taʼi tokoni ʼaia ʼe fakamaʼamaʼa ai tatou mai te ʼu lotomamahi pea mo tokoni mai ke tou fakamamaʼo mai te malaʼia. Ko te meʼa noaʼi ʼo te taʼi tokoni ʼaia ʼe iku ai anai ki he lainoa.
Ko te fakavikiviki, mokā ʼe tuha mo te faʼahi ʼaia, ʼe ina lagalaga ia tatou pea mo fakaloto mālohiʼi moʼoni ia tatou. Kae ʼe tonu foki ke tou ʼamanaki ki hotatou fakatonutonuʼi pea mo tou tali. Koutou tokagaʼi te ʼu tohi e lua ʼaē neʼe fai e te ʼapositolo ko Paulo kia Timoteo. Logope neʼe ina
vikiʼi tana agatonu, kae ʼe lahi te ʼu tokoni neʼe fai kia Timoteo ʼe tuʼu ʼi te tohi. ʼE lahi te fai tokoni ʼa Paulo ki te tūpulaga ʼo ʼuhiga mo tana pipiki maʼu ki te tui ʼaki he leʼo ʼo loto ʼe lelei, mo tana ʼu felogoi mo ʼihi ʼi te kokelekasio, mo tana fakatuputupu tana pipiki ki te ʼAtua pea mo tana maʼuli fakafeauga, mo tana akoʼi ʼo ʼihi, mo tana tekeʼi ʼo te ʼapositasia, pea mo te fakahoko ʼo tona minisitelio. ʼE tonu ki te kau tūpulaga ʼo te kokelekasio ke nātou kumi tokoni pea mo tali leleiʼi te ʼu tokoni ʼaē ʼe foaki age e nātou ʼaē kua fakapotopoto.“Haʼele Mo Te Kau Poto”
ʼE ʼui fēnei e te hau poto: “Ka hoko he meʼa ʼe kita loto kiai, pea ʼe ina fakafiafiaʼi tokita loto; kae ko te maliu kehe mai te meʼa ʼaē ʼe kovi ʼe ko he meʼa fakalialia maʼa te kau vale.” (Tāʼaga Lea 13:19) ʼE ʼui fēnei e te tohi ki te faka ʼuhiga ʼo te tāʼaga lea ʼaenī: “Ka hoko he fakatuʼutuʼu peʼe ko he meʼa ʼe kita fakaʼamu kiai, ʼe logoʼi e te tagata katoa tona fīmālie . . . Ko te fakahoko ʼo takita fakatuʼutuʼu, ʼe ko he meʼa lelei, koia ʼe mahino mai ko te maliu kehe mai te meʼa ʼaē ʼe kovi ʼe ko he meʼa fakalialia maʼa te kau vale. ʼE nātou fakahoko te meʼa ʼaē ʼe nātou holi kiai ʼaki pe he ʼu puleʼaki kovi, pea kapau ʼe tonu ke nātou līaki te meʼa ʼaē ʼe kovi, pea ʼe tonu ke nātou fakafisi ki te fiafia māʼia mo te fakahoko ʼo tanatou holi.” Koia ʼe maʼuhiga ʼaupito te fakatuputupu ʼo te fia fai ki he ʼu meʼa lelei!
Ko tatatou ʼu fakakaugā ʼe malave mālohi ki tatatou ʼu manatu, mo te ʼu meʼa ʼe tou leleiʼia, pea mo te ʼu meʼa ʼaē ʼe tou fehiʼa kiai! ʼE fai e Salomone te palalau moʼoni ʼi tana ʼui fēnei: “Ko ʼaē ʼe haʼele mo te kau poto ʼe liliu anai ia ʼo poto, kae ko ʼaē ʼe fakatahi mo te kau vale, ʼe fua kovi anai kia ia.” (Tāʼaga Lea 13:20) ʼI tona fakahagatonu, ko te hahaʼi ʼaē ʼe tou fakatahi mo nātou, ʼi te ʼu fakafiafia, ʼi te Internet, ʼi te ʼu tohi ʼaē ʼe tou lau, ʼe feala ke malave tanatou aga kia tatou ʼi te temi nei pea mo te ka haʼu. Koia ʼaē ʼe maʼuhiga ʼaupito ai ke tou filifili fakapotopoto te hahaʼi ʼaē ʼe tou fakakaugā ki ai!
‘Tuku He Tofiʼa’
ʼE tala fēnei e te hau ʼo Iselaele: “Ko te kau agahala ʼaē ʼe nātou kumi te malaʼia, kae ko te meʼa ʼaē ʼe lelei ʼe ina fakapale te kau agatonu.” (Tāʼaga Lea 13:21) ʼE ʼi ai te fakapale ʼe kita maʼu ʼi takita faiga ki te maʼuli agatonu, koteʼuhi ʼe tokaga ia Sehova ki te tagata agatonu. (Pesalemo 37:25) Kae ʼe tonu ke tou ʼiloʼi “ko te ʼu temi pea mo te ʼu meʼa fakafokifā” ʼe hoko kia tatou fuli. (Tagata Tānaki 9:11) ʼE tou lava fai koa he ʼu meʼa moʼo nofo teuteu ki te ʼu meʼa fakafokifā ʼaē ʼe feala ke hoko mai?
ʼE ʼui fēnei e Salomone: “Ko he tahi ʼe agalelei ʼe ina tuku anai he tofiʼa ki te ʼu foha ʼo te ʼu foha.” (Tāʼaga Lea 13:22a) Ko he tofiʼa maʼuhiga ʼe tuku holo e te ʼu mātuʼa mokā nātou tokoni ki tanatou fānau ke nātou maʼu te ʼatamai mālama ʼo ʼuhiga mo Sehova pea mo taupau he ʼu felogoi lelei mo ia! ʼE mole koa la fakapotopoto te fai fakatomuʼa ʼo he fakatuʼutuʼu ki te famili, ʼi te faʼahi faka koloā, naʼa fokifā pe kua mate tautonu he tahi ʼo te ʼu mātuʼa? ʼE lahi te ʼu fenua, ʼe fai e te ʼu tāmai, he ʼu pepa ʼe fakamoʼoni ai ʼe maʼu anai e te fānau te ʼu koloā ʼo te ʼapi, pea mo ina tānaki he vaega falā ʼi te fale paʼaga ke hoki fakaʼaogaʼi ki ʼamuli.
E feafeaʼi ki te tofiʼa ʼo te tagata agakovi? ʼE toe ʼui fēnei e Salomone: “Ko te koloā ʼo te tagata agahala ʼe ko he meʼa ia ʼe tānaki fakalelei maʼa te tagata agatonu.” (Tāʼaga Lea 13:22b) ʼO hilifaki atu ki te ʼu tapuakina kua tou maʼu ʼi te temi nei, kae ʼe fakamoʼoni anai mokā fakahoko e Sehova tana fakapapau ʼaē ke ina fakatupu “he lagi foou mo he kele foou, e mauli i ai te susitisia.” (2 Petelo 3:13) ʼE pulihi anai te kau agakovi, kae “ko te kau agavaivai ʼe nātou maʼu anai te kele.”—Pesalemo 37:11.
Ko he tagata tokaga ʼe ina fakafuafua lelei te meʼa ʼaē ʼe ina fai tatau aipe peʼe mole lahi hona ʼu koloā. ʼE ʼui fēnei e Tāʼaga Lea 13:23: “Ko te kele ʼaē neʼe fuli e te ʼu tagata masiva, ʼe ina foaki he meʼa kai lahi, kae ʼe ʼi ai te tagata ʼe pulihi anai ʼuhi ko tana mole aga fakapotopoto.” Ko te tagata ʼaē ʼe mole lahi tona ʼu koloā ʼe ina maʼu lahi anai hana meʼa ʼuhi ko tana gāue kinakina pea mo te tapuakina ʼa te ʼAtua. Kae ʼe feala pe ke pulinoa te ʼu koloā ʼuhi ko te mole fakafuafua lelei pea mo te mole aga fakapotopoto.
“Kumi Ia Ia ʼAki Te Akonaki”
Talu mai tanatou kei liliki, ʼe ʼaoga ke akonakiʼi te hahaʼi heʼe haohaoa. ʼE ʼui fēnei e te hau ʼo Iselaele: “Ko ʼaē ʼe mole ina fakaʼaogaʼi te kauʼi ʼakau ʼe fehiʼa ia ki tona foha, kae ko ʼaē ʼe ʼofa ki ai ʼe ina kumi ia ia ʼaki te akonaki.”—Tāʼaga Lea 13:24.
Ko te kauʼi ʼakau ʼe ina fakatātā te tuʼulaga pule. Ia Tāʼaga Lea 13:24, ʼe faka ʼuhiga ki te tuʼulaga pule ʼa te ʼu mātuʼa. ʼI te ʼu vaega ʼaia, ko te fakaʼaogaʼi ʼo te kauʼi ʼakau ʼe mole ina fakamaʼua ke kinisi he tamasiʼi. Kae ʼe faka ʼuhiga ki te ʼu puleʼaki moʼona akoʼi. ʼI he faʼahiga ʼaluʼaga, ʼe lagi feʼauga pe he fakatonutonuʼi ʼe maʼamaʼa ʼe fai ki he tamasiʼi ke ina fai ai te aga ʼaē ʼe lelei. Kae ki he tahi tamasiʼi, ʼe lagi ʼaoga anai ke fakatonutonuʼi mālohi. ʼE ʼui fēnei e te Tāʼaga Lea 17:10: “ ʼE hū gafua he valoki ki he tagata poto, ʼi he tā tuʼa teau ʼo he tagata vale.”
Ko te akonaki ʼaē ʼe fai e te ʼu mātuʼa ʼe tonu ke fai tuʼumaʼu ʼaki te ʼofa pea mo fai fakapotopoto ke fua lelei ki te fānau. Ko te ʼu mātuʼa ʼofa ʼe mole nātou meʼa noaʼi te ʼu hala ʼo tanatou tamasiʼi. Kae ʼe nātou kumi te ʼu hala ʼaia ʼaē neʼe fai e te tamasiʼi moʼo fakatonutonuʼi tautonu naʼa faigataʼa leva hona fetogi. ʼE moʼoni ia, ʼe tokagaʼi e te ʼu mātuʼa ʼofa ia te tokoni ʼaenī ʼa Paulo: “ ʼU tāmai, ʼaua naʼa koutou fai ke ʼiʼita takotou fānau, kae ke koutou haga akoʼi age kia nātou te akonaki pea mo te manatu ʼa Sehova.”—Efeso 6:4, MN.
Koteā ʼaē ʼe hoko mo kapau ʼe tuku e te ʼu mātuʼa ke faʼifaʼitaliha tanatou fānau kae mole nātou akonakiʼi? ʼE maʼu anai koa e te ʼu mātuʼa he fakafetaʼi he neʼe nātou tuku ke faʼifaʼitaliha tanatou fānau? Kailoa ia! (Tāʼaga Lea 29:21) ʼE ʼui fēnei e te Tohi-Tapu: “Ko he tama ʼe tuku ke faʼitaliha ʼe ina fakaufiufiʼi anai tana faʼe.” (Tāʼaga Lea 29:15) Ko te mole fakahoko e te ʼu mātuʼa tonatou ʼuhiga pule ʼe hā ʼaki ai tanatou fakaʼaoʼaoganoa peʼe ko tanatou mole ʼofa. Kae ko te fakahoko lelei pea mo tuʼumaʼu ʼo te ʼuhiga pule, ʼe fakahā ai ia te ʼofa.
ʼE fakapale anai ia ia ʼaē ʼe gaohi meʼa tokaga pea mo aga faitotonu, ʼo mulimuli ki te ʼatamai mālama totonu. ʼE fakaloto mālohiʼi fēnei tatou e Salomone: “Ko te tagata agatonu ʼe kai ʼo aʼu ki tana mākona, kae ʼe gaʼasi anai te fatu ʼo te kau agakovi.” (Tāʼaga Lea 13:25) ʼE ʼiloʼi e Sehova ia te meʼa ʼaē ʼe lelei kia tatou ʼi te ʼu potu fuli ʼo te maʼuli—ʼi te ʼu meʼa faka famili, mo tatatou ʼu felogoi mo te hahaʼi, mo totatou minisitelio, peʼe ʼi te ʼu temi ʼaē ʼe akonakiʼi ai tatou. Pea ʼaki tatatou maʼuliʼi fakapotopoto te tokoni ʼaē ʼe maʼu ʼi tana Folafola, ʼe mahino papau ia ʼe tou fakafiafia anai ki te faʼahiga maʼuli ʼaē ʼe lelei ʼaupito.
[Kiʼi nota]
^ ʼO ʼuhiga mo he fakamatala ʼo Tāʼaga Lea 13:1-14, vakaʼi Te Tule Leʼo ʼo te ʼaho 15 ʼo Sepetepeli 2003 ʼi te pasina 21 ki te 25.
[Paki ʼo te pasina 28]
Ka fatufatuʼi peʼe laukoviʼi ia ia, ko te tagata ʼaē ʼe fakasiosio poto ʼe ina lolomi tona ʼu laugutu
[Paki ʼo te pasina 29]
ʼE lahi te ʼu gāue lelei ʼe fakahoko e te tagata fai faka mafola agatonu ʼo te Puleʼaga
[Paki ʼo te pasina 30]
Logola ʼe ko he meʼa fakaloto mālohi hotatou vikiʼi kae ʼe tonu ke tou tali mo totatou fakatonutonuʼi
[Paki ʼo te pasina 31]
Ko he tāmai ʼofa ʼe mole ina meʼa noaʼi te ʼu hala ʼo tana tamasiʼi