“Moʼo Fakaʼilo Te Huafa ʼo Sehova”

ʼI TE malamanei katoa, ko te hahaʼi ʼe nātou leleiʼia te ʼu nusipepa ʼo Te Tule Leʼo pea mo te Réveillez-vous ! ʼuhi ko te manatu fakalaumālie pea mo te ako ʼaē ʼe maʼu ai. Mole heʼeki faʼa fualoa neʼe faitohi mai te fafine ʼi Falani ʼo ina fakahā mai tana manatu ʼaenī:

“ ʼE kei ʼau finemui, neʼe ʼau haʼu mai Afelika pea neʼe mole lelei taku ako. Mole heʼeki faʼa fualoa, neʼe ʼau kamata lau takotou ʼu nusipepa. ʼI te lelei ʼo takotou ʼu alatike, neʼe ʼau tokagaʼi te maʼuhiga ʼo te lautohi. ʼAki takotou ʼu nusipepa, kua lelei taku faʼahiga palalau, pea kua faka haʼu ʼo siʼisiʼi te ʼu hala ʼaē ʼe ʼau fai ʼi taku faitohi.

“ ʼE ko he meʼa fakaofoofo kia ʼau te ʼu alatike kehekehe ʼaē ʼe koutou palalau kiai ʼo ʼuhiga mo te tagata, mo te kele, pea mo te Tupuʼaga. ʼE mahino lelei te ʼu alatike ʼaia, ʼo tupu ai hata fia lau hoholo takotou ʼu nusipepa. ʼE mole ʼi ai he tahi kehe ʼe ina maʼu te fealagia ʼaē ke ina akoʼi te hahaʼi kehekehe ʼi te moʼi temi e tahi.

“ ʼE ʼau toe punamaʼuli foki ʼi taku sio ko te ʼu meʼa fuli ʼaia ʼe mole koutou fakamaʼua kiai he totogi, kae ʼe koutou fai moʼo fakaʼilo te huafa ʼo Sehova. ʼE ʼau ʼiloʼi ʼe ina tapuakina ia koutou, pea ʼe ʼau fai atu taku fakafetaʼi kia koutou. Koutou haga maʼu te mālohi ʼo te Tupuʼaga ke hoko atu takotou faiako.”

ʼE lolotoga fakahoko nei e te kau Fakamoʼoni ʼa Sehova tanatou akoʼi te Tohi-Tapu ki te hahaʼi ʼi te ʼu fenua e 235. Ko Te Tule Leʼo ʼe tā kia lea e 148, pea ko te Réveillez-vous ! kia lea e 87. ʼE mole tā te ʼu nusipepa ʼaia moʼo vikiʼi ʼo he tagata. Ko te ʼu tokoni faka Tohi-Tapu ʼaē ʼe maʼu ai pea mo te ʼu logo ʼaē ʼe ʼaoga ki totatou temi, ʼe fakatuʼutuʼu moʼo fakavikiviki ki te Tupuʼaga ʼaē ʼe ina ʼui fēnei: “Ko ʼau, Sehova, . . . ia Ia ʼaē ʼe ina akoʼi koe ke ʼaoga kia te koe.” (Isaia 48:17) ʼOfa pe ke ʼaoga kia koutou takotou lau tuʼumaʼu ia te Tohi-Tapu mo te ʼu tokoni faka Tohi-Tapu ʼaenī.