“Te Fakatotonu ʼa Sehova” ʼe Mole Feala Ke Hala
“Te Fakatotonu ʼa Sehova” ʼe Mole Feala Ke Hala
“Ke ʼau talanoa ki te fakatotonu ʼa Sehova; neʼe folafola mai kia te ʼau: ‘Ko koe ko toku foha . . . Kole mai kia te ʼau, ke ʼau foaki atu te ʼu puleʼaga ko hou tofiʼa.’ ”—Pesalemo 2:7, 8.
1. Koteā ʼaē ʼe kehekehe ai te fakatuʼutuʼu ʼa te ʼAtua mo ʼaē ʼo te ʼu puleʼaga?
ʼE ʼI AI te fakatuʼutuʼu ʼa Sehova ʼAtua maʼa te malamanei pea mo te kele. ʼE ʼi ai mo te fakatuʼutuʼu ʼa te ʼu puleʼaga. Kae ʼe kehekehe ʼaupito ia te ʼu fakatuʼutuʼu ʼaia! ʼE mole tonu ke tou punamaʼuli ki te faʼahi ʼaia, koteʼuhi ʼe ʼui fēnei e te ʼAtua: “Ohage pe ko te māʼoluga ake ʼo te lagi ʼi te kele, ʼo toe feiā aipe mo toku ʼu ala ʼe māʼoluga ake ia ʼi tokotou ʼu ala, pea mo taku ʼu manatu ʼi takotou ʼu manatu.” ʼE fakahoko moʼoni anai te fakatuʼutuʼu ʼa te ʼAtua koteʼuhi ʼe ina toe ʼui fēnei: “Ohage pe ko te tō ifo ʼo te ʼua lahi mai te lagi, ʼo feiā aipe mo te nive, pea ʼe mole toe liliu kiai ka mole heʼeki ina faka huhuʼa te kele pea mo gaohi ke ina fakatupu pea mo fakahomo, ke feala ai ke ina maʼu moʼoni te pulapula e te tagata to pulapula pea mo te pane kia ia ʼaē ʼe kai, ʼe feiā anai taku folafola ʼaē ʼe mavae atu ʼi toku gutu. ʼE mole toe liliu mai anai kia te ʼau ka mole hona ʼu fua, kae ʼe mahino papau ia ʼe ina fai anai te meʼa ʼaē kua ʼau leleiʼia, pea ʼe lava lelei anai te meʼa ʼaē neʼe ʼau fekauʼi ki ai.”—Isaia 55:9-11.
2, 3. Koteā ʼaē ʼe fakahā lelei ʼi te lua Pesalemo, pea koteā te ʼu fehuʼi ʼe malaga ai?
2 ʼE fakahā lelei ʼi te lua Pesalemo, ʼe fakahoko anai te fakatuʼutuʼu ʼa te ʼAtua ʼo ʼuhiga mo tana Hau faka Mesianike. Neʼe fakahā age e te ʼAtua ki te hau ko Tavite ʼo te Iselaele ʼāfea, ʼaē neʼe ina tohi te Pesalemo ʼaia, ke ina fakakikite ʼe gatutu anai te ʼu puleʼaga ʼi tona temi fakakatofa. ʼE fakafeagai anai te kau takitaki ʼo te ʼu puleʼaga ʼaia kia Sehova ʼAtua pea mo Ia ʼaē kua ina fakanofo. Kae neʼe toe hivaʼi fēnei e te tagata fai pesalemo: “Ke ʼau talanoa ki te fakatotonu ʼa Sehova; neʼe folafola mai kia te ʼau: ‘Ko koe ko toku foha . . . Kole mai kia te ʼau, ke ʼau foaki atu te ʼu puleʼaga ko hou tofiʼa pea ko hou ʼu kele te ʼu potu taupotu ʼo te kele.’ ”—Pesalemo 2:7, 8.
3 Koteā te faka ʼuhiga ʼo “te fakatotonu ʼa Sehova” ki te ʼu puleʼaga? Koteā tona ikuʼaga ki te malamanei? ʼI tona fakahagatonu, ʼe faka ʼuhiga feafeaʼi te ʼu meʼa ʼaia ʼe hoko kia nātou ʼaē ʼe manavasiʼi ki te ʼAtua pea mo nātou lau ia te lua Pesalemo?
ʼE Gatutu Te ʼu Puleʼaga
4. E feafeaʼi hakotou fakamatala fakanounou te ʼu puani maʼuhiga ʼo te Pesalemo 2:1, 2?
4 ʼI te talanoa ʼa te tagata fai pesalemo ki te ʼu gāue ʼa te ʼu puleʼaga pea mo tana kau takitaki, ʼe ina kamata fēnei te lua pesalemo: “He koʼe kua gatutu te ʼu fenua pea mo muhumuhu te ʼu puleʼaga ki he meʼa noa? Ko te ʼu hau ʼo te kele kua nātou teuteu ki te tau pea ko te kau ʼaliki kua nātou fakatahitahi ohage ko he tokotahi ʼo fakafeagai kia Sehova pea mo tana fakanofo.”—Pesalemo 2:1, 2. *
5, 6. Koteā te “meʼa noa” ʼaē neʼe “muhumuhu” kiai te ʼu puleʼaga?
5 Koteā koa te “meʼa noa” ʼaē ʼe “muhumuhu” kiai ia te ʼu puleʼaga ʼi te temi nei? ʼE mole nātou tali te Tagata ʼaē neʼe fakanofo e te ʼAtua—te Mesia peʼe ko Kilisito—kae ʼe “muhumuhu” te ʼu puleʼaga, peʼe nātou fakakaukau ki te hoko atu ʼo tanatou pule. Ko te ʼu palalau ʼaia ʼo te lua pesalemo, neʼe toe ʼuluaki hoko foki ʼi te ʼuluaki sēkulō ʼo totatou temi, ʼi te temi ʼaē neʼe gāue fakatahi ai te kau takitaki Sutea mo te kau takitaki Loma moʼo fakapogi te Hau ʼaē neʼe kua hinoʼi e te ʼAtua, ia Sesu Kilisito. Kae neʼe hoko tāfito te ʼu palalau ʼaia ʼi te taʼu 1914, ʼaē neʼe fakanofo Hau ai Sesu ʼi selo. Talu mai ai, ʼe mole heʼeki tali e he kautahi faka politike te Hau fakanofo ʼa te ʼAtua.
6 Neʼe koteā koa te faka ʼuhiga ʼo te fehuʼi ʼa te tagata fai pesalemo ‘he koʼe koa ʼe mumuhu te ʼu puleʼaga ki he meʼa noa’? Ko tona faka ʼuhiga ko tanatou ʼu fakatuʼutuʼu ʼe mole hona ʼuhiga, ʼe vaʼiganoa pea ʼe mole iku anai. ʼE mole nātou lava ʼaumai te tokalelei pea mo te logo tahi ki te mālama ʼaenī. Kae ko tanatou ʼu gāue ʼe fakafeagai ki te pule fakaʼatua. ʼI tona fakahagatonu, ʼe nātou fakafihiʼi pea mo fakafeagai ki te Māʼoluga ʼAupito pea mo tana Fakanofo. Kae ʼe ko he agavale ia!
ʼE Mālo Te Hau ʼa Sehova
7. ʼI tanatou faikole, neʼe fakapipiki feafeaʼi e te ʼu ʼuluaki tisipulo ʼa Sesu ia te Pesalemo 2:1, 2 kia Sesu totonu?
7 Neʼe fakapipiki e te ʼu tisipulo ʼa Sesu ia te Pesalemo 2:1, 2 kia Sesu totonu. Neʼe fakatagaʼi nātou ʼuhi ko tanatou tui, pea neʼe faikole fēnei te kau tisipulo ʼa Sesu: “Tuʼi ʼAliki [ko Sehova], neʼe ko Koe ʼaē neʼe ke fakatupu ia te lagi pea mo te kele pea mo te tai pea mo te ʼu meʼa fuli ʼe maʼu ai, pea ʼaki te laumālie maʼoniʼoni neʼe ʼui e te gutu ʼo tamatou kui ko Tavite, tau kaugana, ‘He koʼe kua gatutu te ʼu fenua pea mo muhumuhu te ʼu puleʼaga ki he ʼu meʼa noa? Ko te ʼu hau ʼo te kele kua nātou teuteu ki te tau pea ko te kau ʼaliki kua nātou fakatahitahi fuli ʼo fakafeagai kia Sehova pea mo tana fakanofo.’ ʼO toe feiā pe mo Helote [Atipasi] pea mo Posio Pilato, pea mo te hahaʼi tagata ʼo te ʼu puleʼaga pea mo te ʼu hahaʼi ʼo Iselaele neʼe nātou fakatahi fuli ʼi te kolo ʼaenī ʼo fakafeagai ki tau kaugana maʼoniʼoni ko Sesu, ʼaē neʼe ke fakanofo.” (Gaue 4:24-27, MN; Luka 23:1-12) * Ei, ʼi te ʼuluaki sēkulō neʼe ʼi ai te fakatuʼutuʼu neʼe fai moʼo fakafeagai ki te kaugana fakanofo ʼa te ʼAtua, ia Sesu. Kae ʼi te ʼu sēkulō ki muli mai neʼe ʼi ai tona tahi fakahoko.
8. ʼE fakapipiki feafeaʼi ia Pesalemo 2:3 ki te ʼu puleʼaga ʼo te temi nei?
8 ʼI te temi ʼaē neʼe ʼi ai te hau ʼo te Iselaele ʼāfea, ohage ko Tavite, neʼe fakatahitahi te ʼu puleʼaga pagani pea mo te kau takitaki ʼo nātou fakafeagai kia ia ʼaē neʼe fakanofo e te ʼAtua. Kae e feafeaʼi ki totatou temi? Ko te ʼu puleʼaga ʼo te temi nei ʼe mole nātou fia fakalogo kia Sehova pea mo te Mesia. Koia ʼe ʼui ai ʼi te pesalemo ʼe nātou fai te ʼu palalau ʼaenī: “Tou motumotuhi tanā ʼu haʼi pea tou laku mamaʼo atu tanā ʼu maea!” (Pesalemo 2:3) Neʼe fakafeagai te kau takitaki mo te ʼu puleʼaga kia meʼa fuli ʼe fakamaʼua mai e te ʼAtua pea mo tana Fakanofo. Kae ʼe mahino ia, ʼe mole ʼi ai he fua ʼo te ʼu faiga ʼaē ke motumotuhi te ʼu haʼi ʼaia pea mo laku mamaʼo te ʼu maea ʼaia.
Ko Sehova ʼe Ina Vāʼi Ia Nātou
9, 10. He koʼe ʼe vāʼi e Sehova te ʼu puleʼaga?
9 ʼE mole tuʼaniaʼi e Sehova ia te ʼu faiga ʼa te kau takitaki ʼo te ʼu puleʼaga ke nātou fakatuʼu tonatou tuʼulaga pule. ʼE toe hoko fēnei te lua pesalemo: “Ko Ia ia ʼaē ʼe heka ʼi te lagi ʼe kata anai ia; ko Sehova totonu ʼe ina vāʼi anai ia nātou.” (Pesalemo 2:4) ʼE meʼa noaʼi e te ʼAtua te kau takitaki ʼaia heʼe ina fakahoko anai tana fakatuʼutuʼu. ʼE ina kataʼi tanatou fiatuʼu pea ʼe ina vāʼi nātou. Tou tuku pe ke nātou laupisiʼi te ʼu meʼa ʼaē ʼe nātou fia fakahoko, heʼe kia Sehova ʼe ko he meʼa fakakata. ʼE ina vāʼi tanatou fakafeagai koteʼuhi ʼe mole iku anai.
10 ʼI tana tahi ʼu pesalemo, neʼe talanoa ia Tavite ki te ʼu fili pea mo te ʼu puleʼaga, ʼo ina hivaʼi fēnei: “Ko koe, Ê Sehova te ʼAtua ʼo te ʼatu kautau, ko koe te ʼAtua ʼo Iselaele. ʼAla ake ʼo tauteaʼi te ʼu puleʼaga. ʼAua naʼa ke ʼofa ki he tahi ʼi te kau hahaʼi kākā agakovi ʼaia. Tuʼumaʼu pe ʼe nātou liliu mai ʼi te hola ʼo te afiafi, tuʼumaʼu pe ʼe nātou kō ohage ko he kuli pea mo nātou foli te kolo. Koʼeni! ʼE nātou puʼaki atu ʼi ʼonatou gutu te ʼu tuʼuga palalau, ʼe ʼi ai te ʼu heletā ʼi ʼonatou laugutu, heʼe ko ai ʼe fagono kia nātou? Kae ko koe, Ê Sehova ʼe ke kataʼi anai ia nātou; ʼe ke vāʼi anai te ʼu puleʼaga fuli.” (Pesalemo 59:5-8) ʼE kataʼi e Sehova te laupisi pea mo te maveuveu ʼa te ʼu puleʼaga ʼi tanatou ʼu faiga vale ʼaē ke nātou fakafeagai kia ia.
11. Koteā ʼaē ka hoko mokā fakafeagai anai te ʼu puleʼaga ki te finegalo ʼo te ʼAtua?
11 ʼE fakaloto mālohiʼi tatatou tui e te ʼu palalau ʼo te Pesalemo 2, heʼe ko te ʼAtua ʼe ina lava fakatokatoka he faʼahiga fihifihia pe ʼe hoko. ʼE feala hatatou tui papau ʼe fakahoko tuʼumaʼu e Sehova tona finegalo pea ʼe mole he temi ʼe ina līaki ai tana kau kaugana agatonu. (Pesalemo 94:14) Koia, koteā ʼaē ka hoko mokā fakafeagai anai te ʼu puleʼaga ki te finegalo ʼo Sehova? ʼE ʼui e te pesalemo ʼaia, ko te ʼAtua “ ʼe palalau age anai kia nātou ʼi tona ʼita,” ohage ko he ʼuʼulu mālohi ʼo te mana. Tahi ʼaē meʼa, ohage ko he tapa mālohi ʼo te ʼuhila, ʼi “tona hāūhāū lahi ʼe ina fakamaveuveu anai ia nātou.”—Pesalemo 2:5.
Te Hau Kua Fakanofo e Te ʼAtua
12. Ko te fakanofo fea ʼaē ʼe palalau kiai ia Pesalemo 2:6?
12 ʼE maveuveu moʼoni anai te ʼu puleʼaga ʼi te ʼu palalau ʼaē ka fai e Sehova ʼaki te tagata fai pesalemo. ʼE tala fēnei e te ʼAtua: “Ko ʼau, ʼio, kua ʼau fakanofo taku hau ki Sione, toku moʼuga tapu.” (Pesalemo 2:6) Ko te Moʼuga ʼo Sione neʼe ko he moʼuga ʼi Selusalemi, ʼaē neʼe fakanofo hau ai ia Tavite ki Iselaele. Kae ko te Hau faka Mesianike ʼaenī ʼe mole heka anai ia ʼi he hekaʼaga faka hau ʼi te kolo ʼaia peʼe ʼi he tahi kolo ʼo te kele. He neʼe fakanofo e Sehova ia Sesu Kilisito ke Hau Mesianike ʼi te Moʼuga ʼo Sione ʼaē ʼi selo.—Apokalipesi 14:1.
13. Koteā te fuakava ʼaē neʼe fai e Sehova mo tona ʼAlo?
13 Koʼeni leva te ʼu palalau ʼa te Hau Mesianike: “Ke ʼau talanoa ki te fakatotonu ʼa Sehova [ʼaē neʼe ina fai mo tona ʼAlo te fuakava ki te Puleʼaga]; [ko Sehova ʼAtua] neʼe folafola mai kia te ʼau: ‘Ko koe ko toku foha, ko ʼau ʼi te ʼaho nei, kua ʼau liliu ko tau Tāmai.’ ” (Pesalemo 2:7) ʼI tana palalau ki tana kau ʼapositolo, neʼe talanoa ia Kilisito ʼo ʼuhiga mo te fuakava ki te Puleʼaga: “Kaʼe, ko koutou ia ʼaē neʼe nonofo fakatahi tuʼumaʼu mo ʼau ʼi toku ʼu ʼahiʼahiʼi; pea ʼe ʼau fai he fuakava mo koutou, ohage ko taku tāmai neʼe ina fai te fuakava mo ʼau, ki he puleʼaga.”—Luka 22:28, 29, MN.
14. He koʼe koa ʼe feala ke ʼui ʼe tāu mo Sesu ke hau?
14 Ohage ko tona fakakikite ia Pesalemo 2:7, ʼi te papitema ʼo Sesu pea mo tona fakatuʼuake ko he laumālie, neʼe fakamoʼoni e Sehova ko Tona ʼAlo. (Maleko 1:9-11; Loma 1:4; Hepeleo 1:5; 5:5) Ei, ko te Hau ʼo te Puleʼaga ʼi selo ʼe ko te ʼAlo ʼulu tokotahi ʼaia ʼo te ʼAtua. (Soane 3:16) Mai tona ʼaluʼaga ʼaē ko Sesu ʼe kau ki te hōloga ʼo te Hau ko Tavite, ʼe tāu mo ia ke hau. (2 Samuele 7:4-17; Mateo 1:6, 16) ʼI te fakamatala ʼo te pesalemo ʼaia, ʼe ʼui fēnei e te ʼAtua ki tona ʼAlo: “Kole mai kia te ʼau, ke ʼau foaki atu te ʼu Puleʼaga ko hou tofiʼa pea ko hou ʼu kele te ʼu potu taupotu ʼo te kele.”—Pesalemo 2:8.
15. He koʼe koa ʼe kole e Sesu ia te ʼu puleʼaga ko hona tofiʼa?
15 Ko te Hau—te ʼAlo totonu ʼo te ʼAtua—ʼe ina maʼu te tuʼulaga ʼe hoa mai kia Sehova. Kua ʼiloʼi e Sehova ko Sesu ʼe agalelei, mo agatonu, pea mo tāu mo te falala. Pea tahi ʼaē meʼa, ʼe maʼu e Sesu ia te tofiʼa ʼi tona ʼuhiga ʼUluaki Tupu ʼa te ʼAtua. ʼI tona fakahagatonu, ko Sesu Kilisito ʼe “ko ia te paki ʼo te ʼAtua fakapulipuli, te ʼuluaki tupu ʼo te ʼu meʼa fuli ʼaē neʼe fakatupu.” (Kolose 1:15, MN ) Kapau ʼe ina kole ki te ʼAtua, pea ‘ ʼe ina foaki age anai kia te ia te ʼu puleʼaga ko hona tofiʼa pea ko hana ʼu kele te ʼu potu taupotu ʼo te kele.’ ʼE fai e Sesu ia te kole ʼaia heʼe ‘ ʼofa ki te ʼu meʼa ʼaē neʼe nofo mo te ʼu foha ʼo te tagata,’ pea ʼe ina loto ke hoko ʼi te kele pea mo te malamanei ia te finegalo ʼo tana Tāmai ʼaē ʼe ʼi selo.—Tāʼaga Lea 8:30, 31.
Te Fakatotonu ʼa Sehova ʼe Fakafeagai Ki Te ʼu Puleʼaga
16, 17. Ohage ko tona ʼui ia Pesalemo 2:9, koteā ʼaē ka hoko ki te ʼu puleʼaga?
16 Mai te ʼaluʼaga ʼaē ʼe lolotoga hoko nei ia te lua pesalemo, ʼi te ʼi henī fakapulipuli ʼa Sesu Kilisito, koteā ʼaē ka hoko ki te ʼu puleʼaga? Kua vave fakahoko e te Hau ia te palalau ʼaenī ʼa te ʼAtua: “ ʼE ke laliki anai nātou [ia te ʼu puleʼaga] ʼaki te tokotoko ukamea, ʼe ke laliki anai ke nātou lailai ohage ko he ipu maka.”—Pesalemo 2:9.
17 Ko te ʼu tokotoko ʼo te ʼu hau ʼo te temi ʼāfea, neʼe nātou fakatātā te pule faka hau. Neʼe faʼu ʼihi tokotoko ʼaki te ukamea, ohage ko ʼaē ʼe palalau kiai ia te pesalemo ʼaenī. ʼE fakahā e te palalau fakatā ʼaenī, ʼe faigafua anai ki te Hau hana fakaʼauha te ʼu puleʼaga. Ka tāʼi mālohi he ipu kele ʼaki he tokotoko ukamea, ʼe laliki ai pea ʼe mole toe feala hona gaohi.
18, 19. Ke feala hanatou felogoi lelei mo te ʼAtua, koteā ʼaē ʼe tonu ke fai e te ʼu hau ʼo te kele?
18 ʼE ko he maʼua koa ke laliki feiā te kau takitaki ʼo te ʼu puleʼaga? Kailoa ia, heʼe fakatokagaʼi fēnei nātou e te tagata fai pesalemo: “ ʼI te temi nei, ko koutou ʼu hau, ke ia koutou te fakasiosio poto; koutou tuku ke akonakiʼi koutou, kau tuʼi fakamāu ʼo te kele.” (Pesalemo 2:10) ʼE kole age ki te ʼu hau ke nātou tokagaʼi fakalelei te ʼu palalau ʼaia, ke nātou maʼu te fakasiosio poto. ʼE tonu ke nātou fakakaukauʼi te vaʼiganoa ʼo tanatou ʼu fakatuʼutuʼu, mokā ʼe fakatatau ki te ʼu tapuakina ʼaē ka foaki e te Puleʼaga ʼo te ʼAtua maʼa te malamanei.
19 ʼE tonu ke fetogi te aga ʼa te ʼu hau ʼo te kele ke feala hanatou felogoi lelei mo te ʼAtua. ʼE tokoniʼi ia nātou ke nātou “tauhi kia Sehova ʼi te manavasiʼi pea mo [nātou] fakafiafia ʼi he tetetete.” (Pesalemo 2:11) Koteā ʼaē ka hoko kia nātou mo kapau ʼe nātou muliʼi te tokoni ʼaia? ʼE mole nātou gatutu anai peʼe maveuveu tanatou fakakaukau, kae ʼe nātou fiafia anai ʼuhi ko te ʼu lelei ʼaē ka foaki age e te Hau Mesianike. ʼE tonu ki te kau takitaki ʼo te kele ke nātou situʼa ki tanatou fialahi pea mo tanatou aga fefeka ʼi tanatou faʼahiga takitaki. Tahi ʼaē meʼa, ʼe tonu anai ke nātou foimo fetogi tautonu pea mo nātou mahino lelei ki te tauʼaluga ʼo te pule faʼitaliha ʼa Sehova, pea mo tona Māfimāfi pea mo tana Hau Mesianike.
“Koutou ʼUma Ki Te ʼAlo”
20, 21. Koteā te faka ʼuhiga ʼo te “ ʼuma ki te ʼalo”?
20 ʼE fai leva e te Pesalemo 2 ia te fakaafe manavaʼofa ki te kau takitaki ʼo te ʼu puleʼaga. ʼE tokoniʼi ia nātou ke nātou līaki tanatou fakafeagai fakatahi, kae ke nātou fai te faʼahi ʼaenī: “Koutou ʼuma ki te ʼalo, ke ʼaua naʼa malaga [te] hāūhāū [ʼo Sehova ʼAtua] pea mo koutou mamate mai te ala, heʼe ko tona ʼita ʼe haʼu fakavilivili.” (Pesalemo 2:12a) ʼE tonu ke kita fakalogo ki te Tuʼi ʼAliki ko Sehova mokā ina fai he fakatotonu. Neʼe mole tonu ki te kau takitaki ʼo te kele ke nātou ‘muhumuhu ki he meʼa noa’ ʼi te temi ʼaē neʼe fakanofo hau ai e te ʼAtua tona ʼAlo. Neʼe tonu ke nātou foimo fakamoʼoni ki te Hau pea mo fakalogo katoa kia te ia.
21 He koʼe ʼe tonu ke nātou “ ʼuma ki te ʼalo”? ʼI te temi ʼaē neʼe tohi ai te pesalemo ʼaenī, ko te ʼuma ki he tahi neʼe ko he aga fakakaumeʼa pea neʼe ko he faʼahiga tali kāiga moʼo fakatalitali he kau fakaafe. ʼE feala pe ke toe faka ʼuhiga te ʼuma ki te nofo agatonu. (1 Samuele 10:1) ʼI te vaega ʼaenī ʼo te lua pesalemo, ʼe fakatotonu e te ʼAtua ki te ʼu puleʼaga ke nātou ʼuma, peʼe ke nātou fai he fakatalitali lelei ki tona ʼAlo ʼaē neʼe ina fakanofo ke Hau.
22. Ko te fakatokaga fea ʼaē ʼe tonu ke fakalogo kiai ia te kau takitaki ʼo te ʼu puleʼaga?
22 ʼE ko he lea pātapāta kia Sehova tanatou fakafisi ki te Hau ʼaē neʼe ina fili. ʼE nātou fakafeagai ki te pule faʼitaliha ʼa Sehova ʼAtua ʼo te ʼatulaulau pea mo tana pule, pea mo te fealagia ʼaē ʼe ina maʼu moʼo fili te Hau ʼaē ʼe lelei ʼaupito moʼo takitaki te malamanei. ʼE hoko fakapunamaʼuli anai te hāūhāū ʼo te ʼAtua ki te kau takitaki ʼo te ʼu puleʼaga, ʼi te temi ʼaē ka nātou faiga ai anai ke nātou fakahoko tanatou ʼu fakatuʼutuʼu. “Ko tona ʼita ʼe haʼu fakavilivili,” peʼe ulo vave anai pea ʼe mole feala anai hona tāʼofi. ʼE tonu ki te kau takitaki ʼo te ʼu puleʼaga ke nātou tali te fakatokaga ʼaenī pea mo fakalogo kiai. Kapau ʼe nātou mulimuli kiai, pea ʼe nātou maʼuʼuli anai.
23. ʼE kei toe koa he temi ki te hahaʼi ke nātou fai teā?
23 ʼE fakaʼosi fēnei te pesalemo faka polofeta ʼaia: “Manuʼia ia nātou ʼe fenonoʼi ia te ia [Sehova].” (Pesalemo 2:12b) ʼE kei maʼu te temi ki te hahaʼi ke nātou hāofaki tonatou maʼuli. ʼE toe feiā foki mo te kau takitaki, ʼaē ʼe nātou lagolago ki te ʼu fakatuʼutuʼu ʼa te ʼu puleʼaga ʼe kei feala ke nātou hāofaki tonatou maʼuli. ʼE feala ke nātou feholaki kia Sehova, ʼaē ʼe ina foaki te puipui ʼaki te takitaki ʼo tona Puleʼaga. Kae ʼe tonu muʼa ke nātou foimo fai te faʼahi ʼaia ʼi muʼa ʼo te fakaʼauha e te Puleʼaga faka Mesianike ia te ʼu puleʼaga ʼaē ʼe fakafeagai age kiai.
24. E feafeaʼi hatatou maʼu he maʼuli fīmālie lahi tatau aipe peʼe tou maʼuʼuli ʼi te mālama maveuveu ʼaenī?
24 Kapau ʼe tou ako fakalelei te Tohi-Tapu pea mo tou maʼuliʼi tana ʼu tokoni, ʼe tou lava maʼu he maʼuli fīmālie lahi tatau aipe peʼe tou maʼuʼuli ʼi te mālama maveuveu ʼaenī. ʼE maʼuli fiafia anai totatou famili pea mo tou ʼāteaina mai te ʼu tuʼania ʼaē ʼe hoko ʼi te mālama ʼaenī mo kapau ʼe tou maʼuliʼi te ʼu tokoni faka Tohi-Tapu. Ka tou muliʼi te ʼu pelesepeto faka Tohi-Tapu, ʼe tou tui papau ʼe tou fakafiafia te Tupuʼaga. ʼE gata pe ki te Pule Faʼitaliha ʼo Te ʼAtulaulau ʼe ina lava foaki mai “te mauli nei pea mo te mauli kahau,” mokā ina ʼosi fakaʼauha ʼi te kele ia nātou ʼe fakafeagai ki te takitaki ʼa te Puleʼaga.—1 Timoteo 4:8.
25. Koteʼuhi ʼe hoko moʼoni anai “te fakatotonu ʼa Sehova,” koteā ʼaē ʼe ʼamanaki hoko ʼi totatou temi?
25 ʼE hoko moʼoni anai “te fakatotonu ʼa Sehova.” Heʼe ko te ʼAtua ʼaē neʼe ina fakatupu ia tatou, ʼe ina ʼiloʼi te meʼa ʼaē ʼe lelei ki te malamanei, pea ʼaki te Puleʼaga ʼo tona ʼAlo ʼofaina ʼe ina fakahoko anai tana fakatuʼutuʼu ʼaē ke ina tapuakina te hahaʼi fakalogo ʼo foaki age kia nātou ia te tokalelei, mo te maʼuli fiafia, pea mo te fīmālie heʼegata. ʼO ʼuhiga mo totatou temi, neʼe tohi fēnei e te polofeta ko Taniela: “ ʼI te ʼu ʼaho ʼo te ʼu hau ʼaia, ko te ʼAtua ʼo te lagi ʼe ina fakatuʼu anai he puleʼaga ʼe mole pulihi anai ʼi he temi. . . . ʼE ina laliki anai pea mo fakagata anai te ʼu puleʼaga fuli ʼaia, pea ko ia totonu ʼe tuʼu anai ʼo aʼu ki he ʼu temi ʼe mole ʼiloʼi hona gataʼaga.” (Taniela 2:44) Koia ʼi te temi nei, tou “ ʼuma ki te ʼAlo” pea mo tou tauhi ki te Tuʼi ʼAliki, ko Sehova!
[Kiʼi nota]
^ ʼI te kamata, neʼe ko te Hau ko Tavite te “fakanofo,” pea ko “te ʼu hau ʼo te kele” neʼe ko te ʼu pule Filisitini ʼaē neʼe nātou fakatahitahi tanatou ʼu foʼi kautau moʼo fakafeagai kia ia.
^ ʼE toe fakahā e te tahi ʼu vaega ʼo te Tauhi Foʼou, ko Sesu ʼe ko te Fakanofo ʼa te ʼAtua ʼaē ʼe talanoa kiai te lua pesalemo. ʼE ʼiloga lelei te faʼahi ʼaia mokā tou fakatatau te Pesalemo 2:7 mo Gaue 13:32, 33 pea mo Hepeleo 1:5; 5:5. Vakaʼi mo Pesalemo 2:9 pea mo Apokalipesi 2:27.
ʼE Koutou Tali Feafeaʼi Anai?
• Koteā te “meʼa noa” ʼaē neʼe “muhumuhu” kiai te ʼu puleʼaga?
• He koʼe ʼe vāʼi e Sehova te ʼu puleʼaga?
• Koteā te fakatotonu neʼe fai e te ʼAtua moʼo tauteaʼi te ʼu puleʼaga?
• Koteā te faka ʼuhiga ʼo te “ ʼuma ki te ʼalo”?
[Fehuʼi]
[Paki ʼo te pasina 16]
Neʼe hivaʼi e Tavite ia te mālo ʼa te Hau Mesianike
[Paki ʼo te pasina 17]
Neʼe fakatuʼutuʼu ia te kau takitaki pea mo te hahaʼi ʼo Iselaele ke nātou fakafeagai kia Sesu Kilisito
[Paki ʼo te pasina 18]
Neʼe fakanofo ia Kilisito ke Hau ʼi te Moʼuga ʼo Sione ʼi selo