ʼE Koutou Haʼele Anai Koa Mo Te ʼAtua?

“Haʼele mo tou ʼAtua ʼaki he loto fia mālalo.”​—Mikea 6:⁠8.

1, 2. He koʼe ko te tokaga ʼa Sehova kiā tatou ʼe lava fakatatau ki te tokaga ʼa he tāmai ʼo akoako tana tamasiʼi ke poto ʼi te haʼele?

 KO HE kiʼi tamasiʼi, ʼe mole heʼeki faʼa poto lelei ʼi te haʼele, ʼe tokoni ki ai tana ʼu mātuʼa ʼo pukepuke ʼi tana kamata haʼele. ʼE hage ʼe mole faʼa maʼuhiga ia te faʼahi ʼaia, kae ki te faʼē pea mo te tāmai, ʼe ko te kamataʼaga ʼaia ʼo te maʼuli ʼo tanā tamasiʼi ʼo ʼuhiga mo tona ka haʼu. Kua fakaʼamu la e te ʼu mātuʼa ki te ʼu māhina pea mo te ʼu taʼu ka haʼu, ke nā haʼele fakatahi mo tanā tamasiʼi, pea mo puke tona nima. ʼE lahi te ʼu ʼaluʼaga, ʼe nā fakaʼamu ai ke nā foaki ki tanā tamasiʼi he takitaki pea mo he tokoni ki tona ka haʼu.

² Pea ʼe toe feiā mo te fakaʼamu ʼa Sehova ʼAtua ʼo ʼuhiga mo tana ʼu fānau fakakelekele. ʼI te tahi lakaga neʼe ina ʼui fēnei ʼo ʼuhiga mo tana hahaʼi ko Iselaele, peʼe ko Efalaime: “Neʼe au akoako ia Efalaime ke poto ʼi te haʼele, ʼo au fua nātou ʼi ʼoku nima . . . Neʼe au toho nātou ʼaki te ʼu maea ʼa te tagata kelekele, ʼaki te ʼu maea ʼo te ʼofa.” (Osea 11:​3, 4) ʼI te vaega ʼaenī, ʼe fakatatau ia Sehova ki he tāmai ʼofa ʼe faʼa kātaki ʼo akoako tana tamasiʼi ke poto ʼi te haʼele, lagi ʼe ina puke ʼaki Tona ʼu nima mokā toka te kiʼi tamasiʼi. ʼE fia akoʼi tatou e tatatou Tāmai fonu ʼi te ʼofa ko Sehova, ke tou popoto ʼi te haʼele. ʼE toe fiafia foki ʼi te kaugā haʼele mo tatou mokā tou popoto ʼi te haʼele. Ohage ko te vaega ʼaē ʼe fakatafito kiai te alatike ʼaē ʼe tou ako, ʼe tou lava haʼele mo te ʼAtua! (Mikea 6:8) Kae koteā te faka ʼuhiga ʼo te haʼele ʼaē mo te ʼAtua? He koʼe ʼe tonu ke tou haʼele mo ia? E feafeaʼi hatatou haʼele mo te ʼAtua? Pea koteā te ʼu tapuakina ʼaē ʼe tou maʼu mokā ʼe tou haʼele mo te ʼAtua? Tou vakaʼi takitahi ia te ʼu fehuʼi ʼaia e fā.

Koteā Te Faka ʼUhiga ʼo Te Haʼele ʼAē Mo Te ʼAtua?

3, 4. (a) He koʼe ʼe lelei te ʼu palalau fakatātā ʼaē ʼe ʼui ko Sehova ʼe haʼele mo tatou? (b) Koteā te faka ʼuhiga ʼo te haʼele ʼaē mo te ʼAtua?

³ ʼIo, ʼe mole feala ki he tagata ke haʼele mo Sehova, heʼe ko te laumālie fakapulipuli. (Ekesote 33:20; Soane 4:24) Koia ka ʼui ʼi te Tohi-Tapu, ʼe ʼi ai te ʼu tagata neʼe nātou haʼele mo te ʼAtua, ʼe ko he ʼu palalau fakatātā. ʼE lelei te ʼu palalau fakatātā ʼaia ʼa te Tohi-Tapu, heʼe mahino gafua kiai te hahaʼi lanu kehekehe, pea ʼe mole he temi ʼe faka tuʼakoi tona fakaʼaogaʼi. Ei, ʼi te ʼu potu fuli pe peʼe ʼi he temi pe, ko te hahaʼi ʼe nātou mahino gafua mokā ʼe talanoa ki he toko lua ʼe nā kaugā haʼele fakatahi. ʼE hā mai ʼi te ʼu palalau ia te felogoi lelei pea mo te fakakaumeʼa. ʼAki te ʼu kalitātē ʼaia, ʼe tou mahino ai ki te faka ʼuhiga ʼo te haʼele ʼaē mo te ʼAtua. Kae tou toe vakaʼi age muʼa te tahi ʼu manatu.

⁴ Tou manatuʼi te ʼu tagata agatonu ʼaē ko Enoke pea mo Noe. He koʼe e ʼui neʼe nā haʼele  mo te ʼAtua? (Senesi 5:24; 6:9) ʼI te Tohi-Tapu, ʼe tau faka ʼuhiga te kupu “haʼele” ki he aga ʼa he tahi. Ko Enoke pea mo Noe neʼe nā māʼuʼuli ʼo mulimuli ki te finegalo ʼo Sehova ʼAtua. Neʼe mole nā faʼifaʼitakiʼi te maʼuli ʼa te hahaʼi ʼo tonā temi, neʼe nā kumi ia te takitaki ʼa Sehova pea mo nā mulimuli kiai. Neʼe nā falala ki te ʼAtua. Kae ko tona faka ʼuhiga koa, neʼe ko Sehova ʼaē neʼe ina fai te ʼu tonu maʼa nāua? Kailoa ia. Neʼe faʼu e Sehova te tagata ʼaki te loto faʼitaliha, pea ʼe ina loto ke tou fakaʼaogaʼi te meʼa ʼofa ʼaia ʼaki totatou ʼu “fealagia fakakaukau.” (Loma 12:​1, MN ) Koia ka tou fai he ʼu tonu, ʼe tou agavaivai anai ʼo tuku ke takitaki totatou ʼu fealagia fakakaukau e te poto māʼoluga ʼo Sehova. (Tāʼaga Lea 3:​5, 6; Isaia 55:​8, 9) ʼIo, ʼi totatou maʼuli, tou kaugā haʼele tuʼumaʼu mo Sehova.

 5. He koʼe neʼe talanoa ia Sesu ki te hilifaki ʼo he fasiga nima e tahi ki te loaloaga ʼo te maʼuli ʼo he tahi?

⁵ ʼI te Tohi-Tapu ʼe tau fakatatau ia te maʼuli ki he fagona peʼe ki he haʼele. ʼI ʼihi vaega, ʼe talanoa fakahagatonu ki te faʼahi ʼaia, kae ʼi ʼihi vaega ʼe mole talanoa fakahagatonu kiai. Ohage la, neʼe ʼui fēnei e Sesu: ‘Ko ai ʼaē ia koutou, ʼi tana lotohoha, ʼe ina lava hilifaki he fasiga nima e tahi ki te loaloaga ʼo tona maʼuli?’ (Mateo 6:27) E lagi mole koutou mahino ki ʼihi kupu ʼo te vaega. Ohage la, he koʼe neʼe talanoa ia Sesu ki te “fasiga nima e tahi,” ʼaē ʼe ko he fakafuafua ʼa te vaha ʼa he ʼu meʼa, ʼo ina ʼui ʼe hilifaki ki te ‘loaloaga ʼo te maʼuli’ ʼo he tahi, ʼaē ʼe fakafuafua ʼaki ni ʼu taʼu? a ʼI te vaega ʼaenī, neʼe fakatatau e Sesu ia te maʼuli ki he fagona. Neʼe ina fia fakamahino mai, kapau ʼe koutou lotohoha, pea ko takotou lotohoha ʼaia ʼe mole ina hilifaki anai he tahi temi ki tokotou temi maʼuli. Kae ko tona faka ʼuhiga koa ʼe mole tou lava haʼele fualoa mo te ʼAtua? Kailoa ia! ʼE tou vakaʼi anai moʼo tali kiai ia te lua fehuʼi: He koʼe ʼe tonu ke tou haʼele mo te ʼAtua?

He Koʼe ʼe Tonu Ke Tou Haʼele Mo Te ʼAtua?

6, 7. Koteā ʼaē ʼe ʼaoga ʼaupito ki te hahaʼi heʼe haohaoa, pea he koʼe ʼe tonu ke tou haga kiā Sehova ʼo ʼuhiga mo te faʼahi ʼaia?

⁶ Ko te ʼuluaki tupuʼaga ʼaē ʼe tonu ai ke tou haʼele mo Sehova ʼAtua, heʼe ʼui fēnei iā Selemia 10:23: “ ʼE au ʼiloʼi pe, Ê Sehova, ko te tagata kelekele ʼe mole ʼa ia tona ala. ʼE mole ʼa te tagata ʼaē ʼe haʼele te takitaki ʼo tana haʼele.” Koia ko te tagata ʼe mole ina lavaʼi pea ʼe mole tonu ke ina taki tokotahi tona ala. ʼE ʼaoga ʼaupito kiā tatou ia he takitaki. Ko nātou ʼaē ʼe mole nātou fia haʼele tahi mo te ʼAtua, ʼe nātou hage ko Atama mo Eva. Ko te ʼuluaki taumātuʼa neʼe nā filifili e nāua totonu ia te meʼa ʼaē ʼe lelei pea mo te meʼa ʼaē ʼe kovi. (Senesi 3:​1-6) ʼE “mole” fakalogo kiā tatou ia te filifili ʼaia.

⁷ ʼE mole tou logoʼi koa te ʼaoga ʼaē ke takitaki tatou ʼi totatou maʼuli? ʼI te ʼaho fuli, ʼe ʼi ai te ʼu tonu ke tou fai, ko ʼihi ʼe maʼuhiga pea ko ʼihi ʼe mole maʼuhiga. ʼI te ʼu tonu ʼaia, ʼe ʼi ai ʼihi ʼe faigataʼa pea ʼe ʼi ai anai hona ʼu fua ki totatou ka haʼu​—pea mo nātou ʼaē ʼe tou ʼoʼofa ai. Kae koutou fakakaukauʼi age muʼa, mo kapau ko he tahi kua matuʼa ʼaupito pea mo lahi tona poto, ʼe fia tokoni mai ke tou fai te ʼu tonu ʼaia! Kae tokolahi ia ʼaho nei ʼe nātou falala pe kiā nātou totonu pea mo nātou fia takitaki faʼitaliha tonatou maʼuli. ʼE galo kiā nātou te moʼoni ʼo te ʼu palalau ʼaē ʼe ʼui iā Tāʼaga Lea 28:26: “Ko ʼaē ʼe falala ki tona loto ʼe vale ia, kae ko ʼaē ʼe haʼele ʼi te poto, ʼe hāo anai ia.” ʼE loto e Sehova ke tou hāo mai te ʼu tuʼutāmaki ʼaē ʼe tupu mai te falala ki totatou loto ʼaē ʼe kākā. (Selemia 17:9) ʼE ina loto ke tou haʼele ʼaki te poto, ke tou falala kiā te ia, heʼe ko totatou Takitaki pea mo Faiako. Ka tou fai ia te faʼahi ʼaia, pea ʼe tou maʼuli ʼi te tokalelei, mo te fiafia, pea mo te fīmālie.

 8. ʼUhi ko te agahala pea mo te heʼe haohaoa, ko te potu fea ʼaē ʼe ʼolo fuli kiai te hahaʼi, kae koteā ʼaē ʼe loto kiai e Sehova maʼa tatou?

⁸ Ko te tahi tupuʼaga ʼaē ʼe tonu ai ke tou haʼele mo te ʼAtua, heʼe ko te loaloaga ʼaē ʼo tatatou haʼele. ʼE ʼi ai te moʼoni fakaʼofaʼofa ʼe talanoa kiai ia te Tohi-Tapu. ʼE feala pe ke tou ʼui, ko te hahaʼi fuli ʼe nātou ʼolo ki te potu e tahi. ʼI tana fakamatalatala ia te ʼu fihifihia ʼo te temi matuʼa,  ʼe ʼui fēnei iā Tagata Tānaki 12:5: “ ʼE ʼalu te tagata ki tona ʼapi ʼaē ka nofo fualoa ai, pea ko te hahaʼi tagilāulau neʼe nātou foli te ala.” Koteā koa te “ ʼapi ʼaē ka nofo fualoa ai?” ʼE ko te faitoka, te potu ʼaē ʼe tou ʼolo fuli kiai. (Loma 6:23) Kae ko Sehova ʼe mole loto ke nounou pea mo maveuveu totatou maʼuli, mai tatatou tutupu ʼo aʼu ki totatou mate. (Sopo 14:1) Koia, ʼe tou lava ʼamanaki ki he maʼuli ʼo talu ai, mo kapau ʼe tou haʼele mo te ʼAtua. ʼE mole koa la ko te meʼa ʼaia ʼe koutou loto kiai? Kapau koia, pea ʼe tonu ke koutou haʼele mo takotou Tāmai.

E Feafeaʼi Hatatou Haʼele Mo Te ʼAtua?

 9. He koʼe ʼi ʼihi temi neʼe nono ia Sehova mai tana hahaʼi, kae koteā te fakapapau ʼaē neʼe ina fai iā Isaia 30:⁠20?

⁹ Ko te tolu fehuʼi ʼaē ka tou vakaʼi, ʼe tonu ke tou metitāsioʼi lelei. Ko te fehuʼi ʼaenī: E feafeaʼi hatatou haʼele mo te ʼAtua? ʼE tou maʼu tona tali iā Isaia 30:​20, 21: “ ʼE mole toe nono anai tou Faiako Lahi, pea ko tou ʼu mata ʼe sio moʼoni anai ki tou Faiako Lahi. Pea ʼe logo anai tou ʼu taliga ki he folafola ʼe haʼu mai muli, ʼe ina ʼui fēnei: ‘Koʼeni te ala. Koutou haʼele ai,’ mo kapau ʼe tonu ke koutou ʼolo ki te faʼahi mataʼu peʼe kapau ʼe tonu ke koutou ʼolo ki te faʼahi hema.” ʼE fakaloto mālohi te koga tohi ʼaenī, heʼe ʼaki te ʼu palalau ʼa Sehova ʼi te vaega 20, neʼe lagi manatuʼi e te kau Iselaele, ʼi te temi ʼaē neʼe nātou fakafeagai ai kiā te ia, neʼe nono iā nātou. (Isaia 1:​15, 59:2) Kae ʼe ʼui ʼi te vaega ko Sehova ʼe mole nono, pea ʼe nātou sio lelei kiā te ia. ʼE feala ke tou manatu ki he tagata faiako ʼe tuʼu iā muʼa ʼo tana kau ako, ʼo ina fakahā age te ʼu meʼa ʼaē ʼe ina loto ke nātou mahino kiai.

10. E feafeaʼi hakotou ‘logo ki he folafola ʼe haʼu mai muli’ mai tokotou Faiako Lahi?

¹⁰ ʼI te vaega 21, ʼe fai ai te tahi ʼu palalau fakatātā. ʼE ʼui ko Sehova ʼe haʼele ʼi muli ʼo tana hahaʼi, ʼo ina fakahāhā te ala ʼaē ʼe tonu ke nātou ʼolo ai. Neʼe ʼui e te hahaʼi sivi Tohi-Tapu, ʼe lagi faka ʼuhiga te kupusiga palalau ʼaia ki te gāue ʼa te tagata tauhi ōvi, ʼaē ʼi ʼihi temi neʼe muli ʼi tana ʼu ōvi, ʼo kalaga mai muli moʼo takitaki ʼo nātou pea mo leʼoleʼo nātou ke nātou haʼele fakatahi. ʼE ʼaoga feafeaʼi ia te faʼifaʼitaki ʼaia kiā tatou? Ka tou tuku te Folafola ʼa te ʼAtua ke ina taki tatou, pea ʼe tou lau anai te ʼu palalau neʼe tohi kua hili kiai te ʼu taʼu e lauʼi afe. ʼE hage ʼe haʼu mai muli te ʼu palalau ʼaia, he neʼe tohi kua hili kiai ni ʼu taʼu. Ohage pe ko tonatou ʼaoga ʼi te temi ʼaē neʼe tohi ai, ʼe kei nātou ʼaoga pe ʼi totatou temi. Ko te ʼu tokoni faka Tohi-Tapu ʼe nātou lava takitaki tatou mokā tou fai he ʼu tonu ʼi totatou maʼuli ʼo te ʼaho fuli, pea ʼe nātou toe tokoni mai ke tou fai he ʼu fakatuʼutuʼu ki totatou ka haʼu. (Pesalemo 119:105) Kapau ʼe tou kumi fakamalotoloto ia te ʼu tokoni ʼaia pea mo tou maʼuliʼi, pea ʼe ko Sehova ʼaē ʼe ina Takitaki anai tatou, pea ʼe tou haʼele anai mo ia.

11. Iā Selemia 6:​16, koteā te ʼu palalau fakatā ʼaē neʼe fai e Sehova ʼo ʼuhiga mo tana hahaʼi, pea neʼe nātou tali feafeaʼi?

¹¹ ʼE tou tuku koa ki te Folafola ʼa te ʼAtua ke ina takitaki tatou? ʼE lelei ʼi ʼihi temi ke tou vakavakaʼi fakalelei ia tatou totonu. Tou vakaʼi te vaega ʼaē ʼe tokoni mai anai kiā tatou moʼo fai ʼo te  faʼahi ʼaia: “Neʼe ʼui fēnei e Sehova: ‘Koutou tutuʼu ʼi te ʼu ala ʼo sisio, pea koutou fakalavelave peʼe ʼifea te ʼu ala ʼāfea: Kofea koa te ala lelei? Koutou haʼele ai pea mo koutou maʼu ai te fīmālie ki tokotou ʼu nefesi.’ ” (Selemia 6:16) ʼAki te ʼu palalau ʼaia, ʼe tou manatu ai ki he tagata ʼe ʼalu ʼi te ala, pea ʼe tuʼu ʼi te ʼu maga ala ʼo fakalavelave ki te hahaʼi ia te ala ʼaē ʼe tonu ke ʼalu ai. ʼI te faʼahi fakalaumālie, neʼe tonu ke fai feiā ia te hahaʼi Iselaele ʼaē neʼe fakafeagai kiā Sehova. Neʼe tonu ke nātou toe maʼu te ala ʼaē neʼe ina taki nātou ki “te ʼu ala ʼāfea.” Pea ko te “ala lelei” ʼaia neʼe ko te ala ʼo tanatou ʼu kui agatonu, te ʼu ala ʼaē neʼe mole aga fakapotopoto ia Iselaele ʼo mulimuli kiai. Kae neʼe mole fia fakalogo ia Iselaele ki te fakamanatu ʼofa ʼaia mai iā Sehova. ʼE toe hoko atu fēnei ʼi te vaega ʼaia: “Kae neʼe nātou ʼui fēnei: ‘ ʼE mole mātou haʼele ai anai.’ ” ʼE mole feiā ia te hahaʼi ʼa te ʼAtua ʼo te temi nei, heʼe nātou fakalogo ki te tokoni ʼaia.

12, 13. (a) Neʼe tali feafeaʼi e te kau tisipulo fakanofo ʼa Kilisito ia te tokoni ʼaē iā Selemia 6:16? (b) E feafeaʼi hatatou vakavakaʼi ia tatou totonu peʼe tou haʼele ʼifea ʼi te temi nei?

¹² Talu mai ia te fakaʼosi ʼo te 19 sēkulō, neʼe fakalogo ia te ʼu tisipulo fakanofo ʼa Kilisito ki te tokoni ʼaē iā Selemia 6:16. ʼI tonatou ʼuhiga kūtuga, ʼe nātou takitaki te toe liliu ʼaki he loto kātoa ki “te ʼu ala ʼāfea.” ʼO mole hage ko te Keletiate, neʼe nātou agatonu ʼo taupau ia “te faʼifaʼitaki ʼo te ʼu folafola ʼo te maʼuli” ʼaē neʼe fakatuʼu e Sesu Kilisito, pea mo lagolago kiai tana ʼu tisipulo agatonu ʼo te ʼuluaki sēkulō. (2 Timoteo 1:​13, MN ) ʼI te temi nei, ko te kau Kilisitiano fakanofo pea mo te “tahi ʼu ōvi,” ʼe nātou fetokoniʼaki ke nātou haga haʼele ʼi te ala ʼo te maʼuli ʼaē neʼe mole fia fai kiai te Keletiate.​—Soane 10:​16, MN.

¹³ ʼAki tanatou foaki ia te meʼa kai fakalaumālie, neʼe tokoni te tagata kaugana agatonu mo poto ki te toko lauʼi miliona hahaʼi ke nātou maʼu “te ʼu ala ʼāfea” pea ke nātou haʼele mo te ʼAtua. (Mateo 24:​45-47) ʼE koutou kau koa ʼi te ʼu toko lauʼi miliona hahaʼi ʼaia? Kapau ʼe koutou kau ʼi te hahaʼi ʼaia, koteā ʼaē ʼe tonu ke koutou fai ke mole koutou hēhē, ʼo haʼele ʼi te ala ʼaē ʼe koutou loto kiai? ʼE ko he aga fakapotopoto hakotou vakavakaʼi ʼi ʼihi temi tokotou maʼuli, peʼe feafeaʼi takotou haʼele. Kapau ʼe koutou lau tuʼumaʼu te Tohi-Tapu pea mo te ʼu tohi faka Tohi-Tapu, mo kau ki te ʼu fono ʼaē neʼe fakatuʼutuʼu e te kau fakanofo ia ʼaho nei, pea ʼe koutou lolotoga akoako nei takotou haʼele mo te ʼAtua. Pea kapau ʼaki he agavaivai ʼe koutou maʼuliʼi te ʼu tokoni ʼaē ʼe foaki atu, pea ʼe koutou haʼele moʼoni mo te ʼAtua, ʼi “te ʼu ala ʼāfea.”

Tou Haʼele Ohage ʼe Tou “Sio Kiā Ia ʼAē ʼe Fakapulipuli”

14. Kapau ʼe tou tui papau ʼe maʼuli moʼoni ia Sehova, pea ʼe hā feafeaʼi anai ʼi te ʼu tonu ʼaē ʼe tou fai?

¹⁴ Ke feala hatatou haʼele mo Sehova, ʼe tonu ke tou tui papau ʼe maʼuli moʼoni. Tou manatuʼi, neʼe fakahā e Sehova ʼi te temi muʼa neʼe mole nono ia mai te hahaʼi agatonu ʼo Iselaele. Ia ʼaho nei, ʼe mole heʼeki fetogi, ʼe ina fakahā ki tana ʼu kaugana ʼe ko ia tonatou Faiako Lahi. ʼE koutou tui koa ʼe maʼuli moʼoni ia Sehova, ohage ʼe tuʼu ʼi ʼokotou muʼa ʼo ina akoʼi koutou? ʼE ʼaoga kiā tatou ia te taʼi tui ʼaia ke feala hatatou haʼele mo te ʼAtua. Neʼe feiā te tui ʼa Moisese, “koteʼuhi neʼe haga nofo agatonu ohage ʼe sio kiā Ia ʼaē ʼe fakapulipuli.” (Hepeleo 11:​27, MN ) Kapau ʼe tou tui ʼe maʼuli moʼoni ia Sehova, pea ʼe tou fai pe anai he ʼu tonu ʼe mulimuli ki tona finegalo. Ohage la, ʼe mole tou manatu anai ke tou fai he aga ʼe kovi, pea mo tou faiga leva ke tou fufū tatatou ʼu agahala ki te ʼu tagata ʼāfea ʼo te kokelekasio peʼe ki totatou famili. Kae ʼe tou faiga anai ke tou haʼele mo te ʼAtua, tatau aipe peʼe mole sio mai he tahi kiā tatou. ʼE tou mulimuli anai ki te tonu ʼaē neʼe fai e te Hau ko Tavite ʼo te temi muʼa: “ ʼE  au feʼaluʼaki anai ʼi te agatonu ʼo toku loto, ʼi toku loto fale.”​—Pesalemo 101:⁠2.

15. He koʼe ko te kaugā gāue mo ʼotatou tēhina mo tuagaʼane ʼe lava tokoni mai ke tou faka tui ko Sehova ʼe maʼuli moʼoni?

¹⁵ ʼE ʼiloʼi e Sehova totatou ʼuhiga heʼe haohaoa, mo totatou ʼuhiga agahala, pea mo te faigataʼa ʼi ʼihi temi ke tou tui ki he ʼu meʼa ʼe mole tou lava sio kiai. (Pesalemo 103:14) ʼE tokoni ʼaupito mai ke tou tekeʼi te ʼu vaivaiʼaga ʼaia. Ohage la, neʼe ina fakatahiʼi “he hahai ki tona huafa” mai te ʼu puleʼaga kehekehe ʼo te kele. (Gaue 15:14) ʼE tou fefakaloto mālohiʼaki anai mo kapau ʼe tou logo tahi ʼo gāue. ʼE toe mālohi age tatatou tui papau ʼaē ko te ʼAtua ʼe maʼuli moʼoni, mokā tou logo ki te ʼu ʼaluʼaga ʼaē neʼe tokoni ai ia Sehova ki he tēhina peʼe ko he tuagaʼane ke ina tekeʼi he faʼahiga vaivaiʼaga, peʼe ke ina kātakiʼi he ʼahiʼahi faigataʼa.​—1 Petelo 5:⁠9.

16. ʼAki tatatou ako te maʼuli ʼo Sesu, ʼe tokoni feafeaʼi mai anai ke tou haʼele mo te ʼAtua?

¹⁶ Kae ʼe tou tui tāfito ʼe maʼuli moʼoni ia Sehova, he neʼe ina fakahā mai ia te faʼifaʼitaki ʼo tona ʼAlo. Neʼe ʼui fēnei e Sesu: “E ko au te Ala, mo te Mooni pea mo te Mauli; e mole he tahi e haù ki te Tamai, kapau e mole fakalaka ia te au.” (Soane 14:6) Ke toe mālohi age tatatou tui papau ʼe maʼuli moʼoni ia Sehova, ʼe tonu ke tou ako ia te maʼuli ʼo Sesu ʼi te kele. Ko te ʼu palalau fuli ʼaē neʼe fai e Sesu pea mo tana ʼu gāue, neʼe ko he fakahā lelei ʼaia ʼo te ʼata ʼo te ʼulugaaga ʼo tana Tāmai ʼaē ʼe ʼi selo, ʼo toe feiā aipe ki tana ʼu gāue. (Soane 14:9) Ka tou fai he ʼu tonu, tou mulimuli ki te faʼifaʼitaki ʼa Sesu. ʼE tou muliʼi te ala ʼo Kilisito, mo kapau ʼe hā ʼi te ʼu tonu ʼaē ʼe tou fai neʼe tou fakakaukauʼi pea mo faikole kiā Sehova. (1 Petelo 2:21) Pea ʼe tou haʼele ai leva mo te ʼAtua.

Koteā Te ʼu Tapuakina ʼe Tou Maʼu Mokā ʼe Tou Haʼele Mo Te ʼAtua?

17. Kapau ʼe tou haʼele ʼi te ala ʼa Sehova, ko te “fīmālie” fea ʼaē ka tou maʼu anai ki totatou ʼu nefesi?

¹⁷ ʼE tou maʼuli fiafia mokā tou haʼele mo Sehova ʼAtua. Tou manatuʼi te fakapapau ʼaē neʼe fai e Sehova ki tana hahaʼi mo kapau ʼe nātou kumi te ‘ala ʼaē ʼe lelei.’ Neʼe ina ʼui fēnei: “Koutou haʼele ai pea mo koutou maʼu ai te fīmālie ki tokotou ʼu nefesi.” (Selemia 6:16) Koteā te “fīmālie” ʼaia? ʼE tou maʼuli fīmālie koa ʼuhi heʼe kita maʼu koloā? Kailoa. ʼE foaki mai e Sehova ia te meʼa ʼe lelei age, ko he meʼa ʼe tahitahiga tona maʼu e te hahaʼi maʼu koloā ʼo te malamanei. Ko te maʼuli fīmālie ʼo te nefesi, ʼe ko te tokalelei ʼo te loto, te fiafia, te maʼuli faka feʼauga, pea mo te ʼu tapuakina fakalaumālie. ʼE koutou maʼu te taʼi fīmālie ʼaia, heʼe koutou falala neʼe koutou filifili ia te ala ʼaē ʼe lelei ki tokotou maʼuli. ʼE tahitahiga hatatou maʼu ʼi te mālama faigataʼa ʼaenī ia te taʼi maʼuli tokalelei ʼaia.

18. Ko te tapuakina fea ʼaē ʼe fia foaki atu e Sehova, pea koteā ʼaē ʼe tonu ke koutou faiga mālohi kiai?

¹⁸ ʼIo, ko te maʼuli ʼe ko he tapuakina lahi, tatau aipe peʼe nounou te maʼuli ʼaia. Kae ko Sehova neʼe mole ina fakatuʼutuʼu ke nounou tokotou maʼuli, mai tokotou temi tūpulaga ʼo aʼu ki tokotou temi matuʼa. Kailoa ia, ʼe loto e Sehova ke koutou maʼu ia te tapuakina ʼaē ʼe lahi tokotahi. ʼE loto ia ke koutou haʼele mo ia ʼo talu ai! ʼE hā lelei te manatu ʼaia iā Mikea 4:5: “Ko te hahaʼi fuli ʼe nātou haʼele anai ʼi te huafa ʼo tonatou ʼatua, kae kiā tatou, ʼe tou haʼele anai ʼi te huafa ʼo Sehova totatou ʼAtua ʼo aʼu ki he ʼu temi ʼe mole ʼiloʼi hona gataʼaga, ei, ʼo talu ai.” ʼE koutou fia maʼu koa ia te tapuakina ʼaia? ʼE koutou fia maʼu koa te maʼuli ʼaē ʼe ʼui e Sehova ʼe ko “te mauli mooni”? (1 Timoteo 6:19) Koia koutou faiga mālohi ʼo haʼele mo Sehova ʼi te ʼaho nei, mo ʼapogipogi, pea ʼi te ʼaho fuli pe ʼo aʼu ki he ʼu temi ʼe heʼegata!

[Kiʼi nota]

ʼE Koutou Tali Feafeaʼi Anai?

Koteā te faka ʼuhiga ʼo te haʼele mo te ʼAtua?

• He koʼe ʼe tonu ke koutou haʼele mo te ʼAtua?

• Koteā ʼaē ka tokoni atu anai ke koutou haʼele mo te ʼAtua?

• Koteā te ʼu tapuakina ʼe maʼu e nātou ʼaē ʼe nātou haʼele mo te ʼAtua?

[Fehuʼi]

[Paki ʼo te pasina 23]

Ka tou lau ia te Tohi-Tapu, ʼe tou logoʼi te leʼo ʼo Sehova mai muli, ʼe ina ʼui mai: “Koʼeni te ala”

[Paki ʼo te pasina 25]

ʼI te ʼu fono, ʼe tou maʼu ai te meʼa kai fakalaumālie ʼi tona lakaga totonu