Ko He ʼu Meʼa ʼOfa ʼe Leleiʼia e Te ʼAtua

ʼE MOLE lelei te ʼu meʼa ʼaē neʼe hoko ʼi te hisitolia ʼaenī. Neʼe maʼu e te Hau Fafine ko Atalia ia te tuʼulaga hau he neʼe aga fakakākā pea mo fai fakapō. ʼI tana manatu ʼaē kua fakapogi tona ʼu hōloga fuli, neʼe ina fakanofo hau ia ia totonu. Ko te tahi fafine, ia te fineʼaliki ko Seosepa, ʼaē neʼe ina leleiʼia ia Sehova mo tana Lao, neʼe lototoʼa ʼo fufū ia Seoasi, te foha ʼo te hau. Ko Seosepa mo tona ʼohoana, te Pelepitelo Lahi ko Seoiata, neʼe nā fufū ia te foha ʼaia ʼo te hau lolotoga taʼu e ono ʼi te ʼu kogafale ʼo te fale lotu.​—2 Hau 11:​1-3.

ʼI te taʼu fitu ʼo Seoasi, neʼe kua tokalelei ia te Pelepitelo Lahi ko Seoiata ke ina fakahoko tana fakatuʼutuʼu ʼaē ke fakahifo ia te Hau Fafine ʼaē neʼe ina kaihaʼa ia te tuʼulaga hau. Neʼe ina fakahāhā te tamasiʼi pea neʼe ina fakanofo ko te hau totonu ʼaia ʼo te puleʼaga. Ki muli age, ko te kau tagata leʼo ʼo te hau neʼe nātou ʼave te Hau Fafine agakovi ko Atalia ki tuʼa atu ʼo matehi, pea neʼe hoki fīmālie pea mo fiafia ai te hahaʼi. ʼAki te meʼa ʼaē neʼe fai e Seoiata pea mo Seosepa, neʼe tokoni lelei ʼaupito ki te toe fakatuʼu ʼo te tauhi moʼoni ʼi te fenua ʼo Suta. Ko te faʼahi ʼaē ʼe maʼuhiga tāfito, he neʼe nā kau ki te toe fakahoko atu ʼo te hōloga hau ʼo Tavite, ʼaē neʼe ina taki ki te Mesia.​—2 Hau 11:​4-21.

Ko te hau ʼaē neʼe hoki fakanofo, neʼe ina toe fai foki mo ia tana gāue neʼe leleiʼia e te ʼAtua. Neʼe kua fakaʼofaʼofa te ʼapi ʼo Sehova pea neʼe tonu ke gaohi. ʼI te holi mālohi ʼa Atalia ke pule tokotahi ʼi Suta, neʼe iku ai ki te mole kei gaohi fakaleleiʼi ʼo te fale lotu pea mo tona kaihaʼa. Koia neʼe lotomālohi ai ia Seoasi ke ina toe laga pea mo toe gaohi fakalelei ia te fale lotu. Neʼe ina foimo fakatotonu atu aipe ke tānaki te paʼaga ʼaē ʼe ʼaoga ki te gāue ʼo te ʼapi ʼo Sehova. Neʼe ina ʼui fēnei: “Ko te paʼaga fuli ki te ʼu meʼa ʼofa tapu ʼaē ʼe ʼaumai ki te ʼapi ʼo Sehova, te paʼaga ʼo te tukuhau, mo te paʼaga ki te maʼuli ʼo te takitokotahi, te paʼaga fuli ʼaē ʼe nātou tahi lotolelei ʼo foaki maʼa te ʼapi ʼa Sehova​—ke toʼo e te kau pelepitelo maʼa nātou totonu, ʼo tahi toʼo mai ia ia ʼaē ʼe ina ʼiloʼi; pea ke nātou toe gaohi fakalelei ia te ʼu faʼahi fuli ʼaē kua mafaʼafaʼa ʼo te fale tapu.”​—2 Hau 12:​4, 5.

Neʼe lagolago lelei te hahaʼi. Kae neʼe mole kātoa te loto ʼa te kau pelepitelo moʼo fakahoko tanatou gāue ʼaē ko te gaohi fakaleleiʼi ʼo te fale lotu. Neʼe fakatuʼutuʼu ai e te hau ke ina takitaki tonu te gāue, pea neʼe ina fakatotonu ke fetuku te ʼu meʼa ʼofa fuli ki te puha makehe. Neʼe ina tuku te gāue ʼaia kiā Seoiata, pea ʼe fakamatala fēnei: “Pea neʼe toʼo e Seoiata te pelepitelo ia te puha, ʼo puhi tona tāpunu pea ina tuku iā tafa ʼo te ʼaletale, ʼi te faʼahi mataʼu ʼi te hūʼaga ki te fale ʼo Sehova, pea ko te kau pelepitelo mo te kau tagata leʼo matapā neʼe nātou ʼai fuli kiai te paʼaga ʼaē neʼe ʼaumai maʼa te ʼapi ʼo Sehova. Pea koʼeni te meʼa ʼaē neʼe hoko: mokā nātou sisio kua fonu te paʼaga ʼi te puha, neʼe hake ake te sikalaipe ʼo te hau pea mo te pelepitelo lahi, pea neʼe nā lau te paʼaga ʼaē neʼe maʼu ʼi te ʼapi ʼo Sehova. Pea neʼe nā fakatoʼo te paʼaga ʼaē neʼe lau kiā nātou ʼaē neʼe nātou fakahoko te gāue, ia nātou ʼaia neʼe hinoʼi ke leʼoleʼo ki te gāue ʼi te ʼapi ʼo Sehova. Neʼe tufa leva e nātou ʼaia te totogi ʼo  te kau tufuga ʼakau, pea mo te kau laga fale ʼaē neʼe gāue ʼi te ʼapi ʼo Sehova, ʼo feiā mo te kau gāue sima mo te kau togi maka pea moʼo totogi te ʼu ʼakau pea mo te ʼu maka lalahi moʼo toe gaohi fakalelei ia te ʼu faʼahi ʼaē kua maumau ʼi te ʼapi ʼo Sehova, pea mo te ʼu meʼa fuli ʼaē neʼe toʼo mai moʼo toe gaohi fakalelei te fale.”​—2 Hau 12:​9-12.

Neʼe gāue te hahaʼi ʼaki tonatou loto kātoa. Neʼe toe fakatuʼu te ʼapi ʼo Sehova, pea neʼe feala ke toe hoko atu te tauhi kiā Sehova. Neʼe fakaʼaogaʼi fakaleleiʼi te ʼu meʼa ʼofa fuli, he neʼe tokaga lelei kiai te Hau ko Seoasi!

Ia ʼaho nei, ʼe tokaga lelei ia te kautahi fakahāhā ʼa Sehova ke fakaʼaogaʼi fakalelei ia te ʼu meʼa ʼofa fuli ki te fakahaʼele ki muʼa ʼo te tauhi ʼaē kiā Sehova, pea neʼe tali lelei kiai ia te kau Kilisitiano moʼoni ohage ko te kau Iselaele ʼo te temi muʼa​—ʼaki tonatou loto kātoa. Lagi ʼe koutou kau kiā nātou ʼaē ʼi te taʼu kua hili, neʼe nātou lagolago ʼaki tonatou loto kātoa ki te fakahaʼele ki muʼa ʼo te ʼu gāue ʼo te Puleʼaga. Tou vakaʼi age muʼa te ʼu faʼahiga fakaʼaogaʼi ʼo takotou ʼu meʼa ʼofa.

TE TĀ ʼO TE ʼU TOHI

ʼI te malamanei kātoa, ko te ʼu tohi ʼaenī neʼe tā ki te fai ʼo te ʼu ako pea mo tona tufa:

• Te ʼu Tohi e: 47 490 247

• Te ʼu Kiʼi Kaupepa e: 6 834 740

• Te ʼu Kaupepa Lalahi e: 167 854 462

• Te ʼu Kaletalio e: 5 405 955

• Te ʼu Nusipepa e: 1 179 266 348

• Te ʼu Kiʼi Pepa Lotu e: 440 995 740

• Te ʼu Foʼi ʼAta e: 3 168 611

ʼE tā te ʼu tohi ʼi Afelika, ʼi te Potu Noleto, ʼi te Lotomālie pea mo te Potu Saute ʼo Amelika, mo Asia, mo Eulopa, pea mo te ʼu fenua ʼo te Pasifika​—ʼo fakatahi ʼaia ko fenua e 19.

“ ʼE au higoa ko Katelyn May. Ko toku taʼu valu. ʼE au nofo mo taku falā, ko te 22 ‘euros,’ pea ʼe au fia foaki atu moʼo tokoni ki te totogi ʼo te masini tā tohi. Ko au ko tokotou kiʼi tuagaʼane ko Katelyn.”

“Neʼe mātou fono faka famili ʼo mātou palalau ki te ʼu masini tā tohi foʼou. Ko tamā ʼu tamaliki, ʼaē ʼe taʼu 11 te tahi kae taʼu 9 te tahi, ʼe nā fia foaki meʼa ʼofa atu, tanā foʼi falā ʼaē neʼe nā tānaki. ʼE mā fiafia ʼi te momoli atu ʼo tanā meʼa ʼofa pea mo ʼaē ʼa māua.”

 TE LAGA FALE

Ko te ʼu laga fale ʼaenī ʼaē neʼe fai moʼo lagolago ki te ʼu gāue ʼa te kau Fakamoʼoni ʼa Sehova:

• Te ʼu Fale ʼo Te Puleʼaga ʼi te ʼu fenua masiva e: 2 180

• Te ʼu Fale ʼo Te ʼu Fakatahi e: 15

• Te ʼu filiale e: 10

• Ko te hahaʼi ʼo te kau gāue faka malamanei ʼaē ʼe gāue temi kātoa e toko: 2 342

“ ʼI te fakaʼosi vāhaʼa ʼaenī, neʼe fai tamatou ʼuluaki fono ʼi tamatou Fale foʼou ʼo Te Puleʼaga. ʼE mātou fiafia ʼaupito ʼi tamatou maʼu he fonoʼaga ʼe feʼauga lelei moʼo fakavikiviki ki tatatou Tāmai, ia Sehova ʼAtua. ʼE mātou fakafetaʼi kiā Sehova pea mo koutou ʼi takotou tokaga mai kiā mātou ʼo faka fealagia ke lahi te ʼu Fale ʼo Te Puleʼaga. Ei, ko tamatou Fale ʼo Te Puleʼaga ʼe ʼaoga moʼoni ia ki te hahaʼi.”​—Chili.

“Ko te ʼu tēhina mo te ʼu tuagaʼane ʼe fakafetaʼi lahi ki te tokoni ʼaē ʼe foaki mai e te kautahi ʼa Sehova. ʼO aʼu mai ki te ʼaho nei, ʼe kei mātou palalau pe ki te temi fakaofoofo ʼaē neʼe mātou gāue fakatahi ai mo te kūtuga laga fale.”​—Moldavie.

“Mole heʼeki faʼa fualoa ko au mo toku ʼohoana neʼe mā fakamanatu te ʼu taʼu e 35 ʼo tamā nofo ʼohoana. Neʼe mā ʼahiʼahi vakaʼi peʼe koteā anai tamā ʼu meʼa ʼofa ʼe mā fefoakiʼaki, pea neʼe mā fakatotonu ai ke mā liufaki he meʼa kiā Sehova pea mo tana kautahi, koteʼuhi kanaʼaua te tokoni mai ʼa Sehova mo tana kautahi, ʼe lagi mole fua manuʼia anai tamā nofo ʼohoana. ʼE mā fia foaki atu te paʼaga ʼaenī moʼo tokoni ki te laga ʼo he Fale ʼo Te Puleʼaga ʼi he fenua masiva.”

“Mole heʼeki faʼa fualoa neʼe au maʼu toku tofiʼa, pea mai te ʼaluʼaga ʼaē ʼe mole lahi te meʼa ʼaē ʼe au loto kiai pea mo te ʼu meʼa ʼaē ʼe ʼaoga kiā au, koia ʼe au fia foaki atu te paʼaga ʼaenī moʼo tokoni ki te laga ʼo te ʼu Fale ʼo Te Puleʼaga, ʼaē ʼe lahi te ʼu fenua ʼe ʼaoga ʼaupito kiai.”

 TE ʼU TUʼUTĀMAKI

ʼI te ʼu ʼaho fakamuli ʼaenī, ʼe tau hoko te ʼu tuʼutāmaki kae neʼe mole fai he fakatokaga. ʼE kaugamālie te kau Fakamoʼoni ʼa Sehova ʼe nātou foaki te tahi ʼu meʼa ʼofa ʼo ʼuhiga mo te gāue ʼaē ʼe fai ʼi te malamanei kātoa moʼo tokoni ki te ʼu tēhina ʼaē neʼe hoko kiai te tuʼutāmaki. Koʼeni te ʼu fenua neʼe tokoni ai te kau Fakamoʼoni ʼa Sehova ki te hahaʼi ʼaē neʼe tuʼutāmakiʼia:

• Afelika

• Asia

• Te ʼu Caraïbes

• Te ʼu motu ʼo te Pasifika

“Ko au mo toku ʼohoana ʼe mā fia fakafetaʼi lahi atu ki te ʼu tokoni ʼaē neʼe momoli mai ʼo ʼuhiga mo te tuʼutāmaki ʼaē neʼe hoko ʼi te ʼafā. Neʼe mā lava fetogi ai te ʼato ʼo tomā ʼapi. ʼE mā fakafetaʼi moʼoni ki takotou tokoni vave mai kiā mātou.”

“ ʼE au higoa ko Connor pea ko toku taʼu 11 ʼaenī. ʼI taku sio ki te meʼa ʼaē neʼe hoko ʼaki te hake ʼa te foʼi peau, neʼe au fia tokoni ki te hahaʼi. ʼE au fakaʼamu ko te paʼaga ʼaenī ʼe au momoli atu, ʼe tokoni anai ki toku ʼu tēhina mo tuagaʼane.”

TE ʼU KAUGANA MAKEHE ʼE GĀUE TEMI KĀTOA

ʼE kaugamālie te kau Kilisitiano ʼe nātou gāue temi kātoa ʼi te gāue fai faka mafola peʼe ʼi te ʼu Petele. Ko te ʼu tēhina mo tuagaʼane ʼaē ʼe nātou loto lelei ke nātou gāue temi kātoa, ʼe taupau ia nātou ʼaki te ʼu meʼa ʼofa, pea ʼi te kau gāue ʼaia, ʼe ʼi ai:

• Te kau misionea e toko: 2 635

• Te ʼu taupau feʼoloʼaki e toko: 5 325

• Te kau Petelite e toko: 20 092

“Mai tona ʼaluʼaga ʼaē ʼe mole au lava gāue nei ʼi te Petele [ko te kiʼi tama ʼe taʼu nima], koia ʼe au momoli atu taku meʼa ʼofa mo toku ʼofa kātoa. Ka au lahi anai, ʼe au ʼalu anai ʼo gāue kinakina ʼi te Petele.”

Ko He Lagolago Ki Te Ako ʼo Te Tohi-Tapu

Neʼe fakatotonu e Sesu Kilisito ki tana ʼu tisipulo ke nātou “fakahoko he u tisipulo i te atu puleaga.” (Mateo 28:19) ʼE fakalogo te kau  Fakamoʼoni ʼa Sehova ki tana ʼu folafola, ʼo nātou maʼumaʼua ʼi te fai faka mafola pea mo te akoʼi ki te hahaʼi ia te logo ʼo te Tohi-Tapu ʼi te ʼu fenua e 235. ʼE nātou tā pea mo tufa te ʼu tohi faka Tohi-Tapu ia lea e 413.

ʼI tona fakahagatonu, ko te meʼa ʼofa maʼuhiga ʼaupito ʼaē ʼe lava foaki e he Kilisitiano, ʼe ko tona temi, moʼo tokoni ki te hahaʼi ke nātou ako ke nātou mahino ki te ʼAtua pea mo Tana ʼu fakatuʼutuʼu. ʼE fakaʼaogaʼi lahi e te kau Fakamoʼoni ʼa Sehova tonatou temi pea mo tonatou mālohi moʼo tokoni ki tonatou ʼu tatau. ʼE toe lahi foki mo te paʼaga ʼaē ʼe nātou foaki, pea ko te ʼu meʼa ʼofa fuli ʼaia, te ʼu faʼahiga meʼa ʼofa kehekehe, ʼe tokoni ki te fakaʼiloʼilo ʼo te huafa ʼo Sehova pea mo tana ʼu fakatuʼutuʼu ʼi te kele kātoa. ʼOfa pe ke hoko atu ia te tapuakina ʼa Sehova ki te ʼu faiga ʼaia moʼo tokoni ki te hahaʼi ke nātou ako ke nātou mahino lahi age kiā te ia. (Tāʼaga Lea 19:17) Ko te loto foaki ʼaia moʼo tokoni ki te hahaʼi ʼe ina fakafiafia te loto ʼo Sehova!​—Hepeleo 13:​15, 16.

[Talanoa ʼo te pasina 28-30]

Te ʼu Faʼahiga Fai Moʼo Foaki

HE ʼU MEʼA ʼOFA KI TE GĀUE FAKA MALAMANEI

Ko te tokolahi ʼe nātou tānaki kehe hanatou foʼi falā ke nātou ʼai ki te ʼu kesi ʼaiʼaga meʼa ʼofa ʼaē ʼe tohi ai: “Te ʼu meʼa ʼofa ki te gāue faka malamanei.​—Mateo 24:14.”

ʼI te māhina fuli, ʼe momoli e te ʼu kokelekasio te falā ʼaia ki te filiale ʼo tonatou fenua. ʼE toe feala foki hatatou momoli fakahagatonu he ʼu meʼa ʼofa ki te filiale ʼo totatou fenua. ʼE feala ke tou foaki he ʼu faʼahiga koloā kehekehe. ʼE tonu ke tou momoli tahi mo te ʼu meʼa ʼofa ʼaia, he tohi ʼe ina fakamahino fakanounou ai te ʼu meʼa ʼofa ʼaia.

TE ʼU MEʼA ʼOFA ʼE FAKA TUʼAKOI

ʼE feala ke tou foaki he paʼaga ʼaki te faka tuʼakoi makehe ʼaenī kapau ʼe tou kole te paʼaga ʼaia, pea ʼe toe liufaki mai anai. Kapau ʼe koutou fia maʼu he tahi ʼu fakamahino, pea koutou faitohi ki te filiale.

KO HE MEʼA ʼOFA KUA FAKATUʼUTUʼU

ʼO hilifaki atu ki te ʼu meʼa ʼofa faka paʼaga ʼaia ʼaē ʼe mole honatou ʼu faka tuʼakoi pea mo te ʼu meʼa ʼofa ʼaē ʼe faka tuʼakoi, ʼe toe ʼi ai te tahi ʼu faʼahiga fai meʼa ʼofa moʼo lagolago ki te haʼele lelei ʼo te gāue faka malamanei ʼo te Puleʼaga. ʼE kau kiai te ʼu meʼa ʼaenī:

Polices dʼassurance: ʼE feala ke foaki ki te Sosiete Watch Tower he police dʼassurance peʼe ko he letelete / peʼe ko he posio.

Te Falā ʼi Te Fale Paʼaga: ʼO mulimuli ki te ʼu meʼa ʼaē ʼe fakamaʼua e te ʼu fale paʼaga ʹo tokotou fenua, ʼe feala ke koutou tuku te Sosiete Watch Tower ke taupau ki takotou falā ʼi te fale paʼaga, peʼe ko he compte dépôt, peʼe ko he compte de retrait personnel, peʼe feala ke fakatoʼo te ʼu meʼa ʼaia ki te Sosiete ʼi takotou mate.

Te ʼu Vahe ʼo He Matani Gāue: ʼE feala ke foaki ki te Sosiete Watch Tower te ʼu meʼa ʼaia ohage ko he meʼa ʼofa kātoa, peʼe ko he fakatuʼutuʼu ʼe faka fealagia ai kiā ia ʼaē ʼe ina foaki ke hoholo atu tana maʼu te paʼaga.

Te ʼu Kele Pea Mo Te ʼu Nofoʼaga: ʼE feala ke tou foaki te ʼu koloā ʼaia ʼaē ʼe feala hanatou fakatau, peʼe tou faka tuʼakoi ke feala hatatou fakaʼaogaʼi ʼi totatou temi maʼuli. ʼE tonu ke tou fakahā te faʼahi ʼaia ki te filiale ʼo totatou fenua ʼi muʼa ʼo tatatou foaki kiai te ʼu koloā ʼaia.

Te ʼu Pepa ʼAē ʼe Tohi Ai Te Loto Fakamuli ʼo He Tahi Pea Mo Te ʼu Kotala Fidéicommis: ʼE feala ke tou foaki he kele peʼe ko he paʼaga ki te Sosiete Watch Tower ʼo tou tohi ʼi he pepa totatou loto fakamuli, ʼo mulimuli pe ki te lao, peʼe toe feala ke tou fai te kotala fidéicommis ʼaē ʼe ʼui ai ʼe maʼu anai e te Sosiete totatou ʼu koloā ʼi tatatou ʼosi mate. ʼE lagi feala ke fakasiʼisiʼi te tukuhau ʼaē ʼe tonu ke totogi e ia ʼaē ʼe ina fai te kotala ʼaia, mo kapau ʼe fai mo te kautahi faka lotu.

Kapau ʼe koutou fia ʼiloʼi he tahi ʼu faʼahi ʼo ʼuhiga mo te ʼu fakatuʼutuʼu foaki meʼa ʼofa ʼaia, koutou faitohi ki te filiale ʼo tokotou fenua.

[Haʼuʼaga ʼo te paki pasina 27]

Faithful video: Stalin: U.S. Army photo