Ko He Aga ʼe Lelei ʼe Ina Fakatupu Te ʼu Fua Lelei

ʼI TE kiʼi motu veliveli ʼe vaha mo te potu saute ʼo Saponia, ko te faʼē pea mo tana ʼu tamaliki e toko tolu neʼe nātou kamata ako te Tohi-Tapu mo te kau Fakamoʼoni ʼa Sehova. ʼI te ʼiloʼi ʼo tanatou ako, ko te hahaʼi ʼo te kiʼi motu ʼaia ʼe tuʼu mamaʼo pea mo nātou taupau lelei te ʼu agaʼi fenua, neʼe mole kei nātou gūʼi te faʼē ʼaia mokā nātou felāveʼi mo ia. ʼE ʼui fēnei e te faʼē: “Neʼe mole au lotomamahi tāfito ʼi tanatou mole palalau mai, kae neʼe au lotomamahi ʼi tanatou mole palalau ki toku ʼohoana pea mo taku fānau.” Kae neʼe ina ʼui fēnei ki tana fānau: “ ʼE tonu ke tou haga fakamālo ki totatou ʼu vahaʼa fale heʼe loto kiai Sehova.”​—Mateo 5:​47, 48.

Ka nātou nonofo ʼi fale, neʼe ina akoʼi age ki tana fānau ke nātou aga fakaʼapaʼapa logola te mole aga fakakaumeʼa ʼa te hahaʼi. ʼI tanatou ʼolo tuʼumaʼu ki te kolo ʼaē ʼe tuʼu ai te ʼu matapuna vai vela, neʼe nātou faifakamālo tuʼumaʼu mokā nātou ʼolo ʼi te motokā. Ka nātou hū ki fale, neʼe nātou ʼui tuʼumaʼu “Konnichiwa!”​—ko tona faka ʼuhiga “Mālo te maʼuli!” Neʼe faʼa kātakiʼi aipe te famili ʼo faifakamālo ki te hahaʼi fuli ʼaē neʼe felāveʼi mo nātou, logola tanatou mole aga fakakaumeʼa age kiā nātou. Kae neʼe fakatokagaʼi e te hahaʼi ia te aga fakaʼapaʼapa ʼa te ʼu tamaliki.

Ki muli age, pea faifakamālo age te hahaʼi ʼo nātou ʼui “Konnichiwa.” Hili ʼaia taʼu e lua, kua teitei faifakamālo age te hahaʼi fuli ʼo te kolo ki te kiʼi famili. Mo te hahaʼi pe la ʼo te kolo neʼe nātou fefaifakamāloʼaki pea mo aga fakakaumeʼa age ki te kiʼi famili. Ko te tagata ʼaē ʼe lagolago ki te pule kolo neʼe ina fia fakapale te ʼu tamaliki he neʼe nātou faka fealagia te fetogi ia te aga ʼa te hahaʼi. Kae neʼe ʼui age e tanatou faʼē ki te tagata, neʼe nātou fai te aga ʼaē ʼe tonu ke fai e te kau Kilisitiano. Ki muli age, ko te sivi neʼe fai neʼe tonu ke fakamatala te maʼuli ʼo te hahaʼi ʼo te motu, pea neʼe fakamatala e te kiʼi tama te hisitolia ʼa te faʼē neʼe ina ako ki tona kiʼi famili ke nātou aga fakaʼapaʼapa ʼo faifakamālo ki te hahaʼi logola tanatou mole aga fakakaumeʼa. Neʼe mālo te kiʼi tama ʼi te sivi ʼaia, pea neʼe tā ʼi te sulunale ʼo te kolo ia te hisitolia ʼaē neʼe ina fakamatala. ʼI te temi nei, ʼe fiafia ʼaupito te kiʼi famili ʼuhi ko te ʼu fua lelei ʼaē neʼe maʼu ʼi tanatou maʼuliʼi te ʼu pelesepeto faka Kilisitiano. ʼE faigafua age hata faka mafola ia te logo lelei ki te hahaʼi mokā ʼe nātou aga fakakaumeʼa.