Ko Sehova ʼe Ko Totatou Tauhi Ōvi

“Ko Sehova ʼe ko toku Tauhi Ōvi. ʼE mole au hala anai ʼi he meʼa.”​—Pesalemo 23:⁠1.

1-3. He koʼe ʼe mole tou punamaʼuli ʼi te fakatatau e Tavite ia Sehova ki he tagata tauhi ōvi?

 KAPAU ʼe fehuʼi atu peʼe puipui feafeaʼi e Sehova ia tana ʼu kaugana, koteā anai takotou tali kiai? Koteā ʼapē ka koutou fakatatau kiai ia te tokaga ʼofa ʼaē ʼa te ʼAtua ki tana ʼu kaugana agatonu? Kua hili kiai taʼu e 3 000, neʼe tohi te Pesalemo e te Hau ko Tavite, ʼo ina fai te fakatā matalelei ʼo ʼuhiga mo Sehova, pea neʼe ko he fakatā neʼe ina toʼo mai te gāue ʼaē neʼe ina fai ʼi tana kei tūpulaga.

² Neʼe tauhi ōvi ia Tavite ʼi tana kei tūpulaga, pea neʼe poto ʼi te leʼoleʼo ʼo te ʼu ōvi. Neʼe ina ʼiloʼi kapau ʼe tuku ʼāteaina te faga ōvi, pea ʼe nātou hēhē anai pea mo kaihaʼa nātou, peʼe kai nātou e te ʼu manu fekai. (1 Samuele 17:​34-36) Kapau ʼe mole honatou tagata tauhi ōvi moʼo tokaga kiā nātou, pea ʼe mole maʼu anai hanatou meʼa kai. Ki muli age, lagi neʼe manatuʼi e Tavite te ʼu temi loaloaga ʼaē neʼe ina taki ai te ʼu ōvi, mo puipui nātou pea mo fafaga nātou.

³ Koia ʼe mole tou punamaʼuli ai ʼi te fakatatau e Tavite ia te tokaga ʼa Sehova ki tana hahaʼi ki te gāue ʼa te tagata tauhi ōvi. Ko te Pesalemo 23 ʼaē neʼe tohi e Tavite, ʼe kamata fēnei: “Ko Sehova ʼe ko toku Tauhi Ōvi. ʼE mole au hala anai ʼi he meʼa.” Tou vakaʼi age muʼa pe koʼe ʼe matatonu tana fakatatau ʼaē ia Sehova ki he tagata tauhi ōvi. ʼAki te Pesalemo 23, ʼe tou vakaʼi anai peʼe ko te ʼu ʼaluʼaga fea ʼaē ʼe tatau ai te tokaga ʼa Sehova ki tana kau atolasio pea mo te tokaga ʼa he tagata tauhi ōvi ki tana ʼu ōvi.​—1 Petelo 2:⁠25.

ʼE Ko He Faʼifaʼitaki Lelei

4, 5. ʼE fakamatalatala feafeaʼi ʼi te Tohi-Tapu ia te ʼu agaaga ʼa te ʼu ōvi?

⁴ ʼI te Tohi-Tapu, ʼe lahi te ʼu higoa faka tuʼulaga ʼo Sehova, kae ko te tuʼulaga “Tauhi Ōvi” ʼe hā ʼaki lelei mai tana agamālū. (Pesalemo 80:1) Ke tou mahino lelei pe koʼe ʼe tāu mo Sehova ke fakahigoaʼi ko he Tauhi Ōvi, ʼe tonu muʼa ke tou mahino kiā faʼahi e lua: ʼuluaki, ʼe tonu ke tou mahino peʼe feafeaʼi te ʼu agaaga ʼo te ōvi, pea lua, ke tou mahino pe koteā te ʼu gāue pea mo te ʼu kalitātē ʼaē ʼe fakamaʼua ki he tagata tauhi ōvi lelei.

⁵ ʼE tau fakamatalatala ʼi te Tohi-Tapu ia te ʼu agaaga ʼa te ʼu ōvi, ʼe ko he ʼu manu ʼe nātou leleiʼia tonatou fakapelepeleʼi e tonatou tagata tauhi ōvi (2 Samuele 12:3), ʼe mole ko he ʼu manu ʼe agamālohi (Isaia 53:7), pea ʼe nātou vaivavai. (Mikea 5:8) Ko te tagata faitohi neʼe tauhi ōvi lolotoga ni ʼu taʼu, neʼe ina ʼui fēnei: “ ʼE mole tonu te ʼui ʼa ʼihi, ʼe feala he maʼuli ʼāteaina ʼa te ʼu ōvi kae mole honatou tagata tauhi ōvi. ʼE mole nātou tatau mo ʼihi faga manu, ʼe ʼaoga ʼi te temi fuli ke  leʼoleʼo pea mo taupau nātou.” Ke maʼuli lelei te ʼu manu vaivai ʼaia, ʼe tonu ke ʼi ai honatou tagata tauhi ōvi.​—Esekiele 34:⁠5.

 6. ʼE fakamahino feafeaʼi ʼi te tikisionalio faka Tohi-Tapu ia te ʼu gāue ʼaē neʼe fai e he tagata tauhi ōvi ʼi te temi muʼa?

⁶ ʼI te temi muʼa, neʼe koteā te ʼu gāue ʼaē neʼe fai e te tagata tauhi ōvi? ʼE fakamahino fēnei ʼi te tikisionalio faka Tohi-Tapu: “ ʼI te kei māfoatā, neʼe ina fakahū ki tuʼa te ʼu ōvi mai tonatou lotoʼā, pea neʼe haʼele ʼi muʼa ʼo taki nātou ki te ʼu koga meʼa lunaʼia ʼaē ka nātou kakai ai. ʼE ina leʼoleʼo ai nātou ʼi te ʼaho kātoa, ʼo tokaga naʼa hēhē he ōvi, pea kapau logola tana tokaga ʼaia kae ʼe hola he ōvi pea mo puli, ʼe ina kumikumi fakalelei anai ʼo aʼu ki tana maʼu pea ʼe ina toe taki mai ki te faga ōvi. . . . ʼI te afiafi, ʼe ina toe fakahū te faga ōvi ki te lotoʼā, pea ʼi tanatou fakalaka ʼi te matapā ʼe ina lau nātou ʼaki tana tokotoko peʼe nātou kātoa. . . . ʼI te agamāhani, ʼe ina toe leʼoleʼo te faga ōvi ʼi te pōʼuli naʼa kai nātou e he ʼu manu fekai, peʼe kaihaʼa nātou e he ʼu tagata kaihaʼa.” a

 7. He koʼe ʼi ʼihi temi neʼe tonu ki te tagata tauhi ōvi ke toe lahi tana faʼa kātaki pea mo tana agamālū?

⁷ ʼI ʼihi temi neʼe tonu ki te tagata tauhi ōvi ke toe lahi age tana faʼa kātaki pea mo tana agamālū ki tana faga ōvi, tāfito ki te ʼu ōvi fafine ʼaē ʼe faitatama pea mo te ʼu ʼuhiʼi ōvi. (Senesi 33:13) ʼE ʼui fēnei ʼi te tohi faka Tohi-Tapu: “ ʼI te agamāhani, ʼe fānauʼi te kiʼi akeno ʼi he faʼahi mamaʼo, ʼi te faʼahi moʼuga. Pea lolotoga te temi ʼaia ʼe gaohi fakaleleiʼi e te tagata tauhi ōvi ia te faʼē ʼa te kiʼi ʼuhi, pea ʼe ina hapai te kiʼi akeno ʼo fata ʼi tona kofu. Lolotoga ni ʼu ʼaho, ʼe ina fata anai ʼi tona ʼu nima peʼe ʼi tona kofu ʼo aʼu ki te temi ʼaē ka haʼele ai.” (Isaia 40:​10, 11) ʼO hā ʼaki mai, ko te tagata tauhi ōvi lelei, neʼe tonu ke mālohi pea mo agamālū.

 8. Koteā te ʼu tupuʼaga ʼo te falala ʼa Tavite kiā Sehova?

⁸ ʼE tāu mo feʼauga mo tatatou Tāmai ʼaē ʼe ʼi selo ko Sehova, ke fakatātā ki he “Tauhi Ōvi.” Ka tou vakavakaʼi te Pesalemo 23, pea ʼe tou mahino ai ko te ʼAtua ʼi tona ʼuhiga tagata tauhi ōvi, ʼe mālohi pea mo agamālū ʼi tana tokaga ʼaē kiā tatou. ʼI te vaega 1, ʼe fakahā ai e Tavite tana falala ʼaē ko te ʼAtua ʼe tokaga anai ʼo foaki ia meʼa fuli ʼaē ʼe ʼaoga ki Tana ʼu ōvi ke nātou ‘maʼu kātoa te ʼu meʼa ʼaē ʼe ʼaoga kiā nātou.’ ʼI te ʼu vaega ʼaē ʼe hoa kiai, ʼe fakahā ai e Tavite ia tupuʼaga e tolu ʼo tana falala: heʼe ko Sehova ʼe ina takitaki, mo ina puipui, pea mo ina fafaga Tana ʼu ōvi. Tou vakaʼi takitahi ia te ʼu tupuʼaga ʼaia.

“ ʼE Ina Takitaki Au”

 9. Ko te koga meʼa lelei fea ʼaē ʼe talanoa kiai ia Tavite, pea ʼe faka aʼu feafeaʼi te faga ōvi ki te ʼu koga meʼa ʼaia?

⁹ ʼUluaki tupuʼaga, ko Sehova ʼe ina takitaki tana hahaʼi. ʼE tohi fēnei e Tavite: “ ʼE ina fakatakoto au ʼi te ʼu koga meʼa lunaʼia ʼaē ʼe mahu ai te luna; ʼe ina takitaki au ke au ōvi ki te ʼu koga meʼa mālōlōʼaga ʼaē ʼe tatafe lelei ai te vai. ʼE ina toe fakaloto mālohiʼi toku nefesi. ʼE ina takitaki au ʼi te ʼu ala foufou ʼo te faitotonu ʼuhi ko tona huafa.” (Pesalemo 23:​2, 3) ʼE tākokoto fīmālie te faga ōvi ʼi te ʼu koga meʼa ʼaē ʼe mahu ai tanatou meʼa kai​—ʼi te ʼu vaega ʼaenī, ʼe fakahā ai e Tavite ko te ʼu ōvi ʼe nātou mākokona, mo falala, pea mo māʼuʼuli fīmālie. Ko te kupu faka Hepeleo ʼaē neʼe fakaliliu ʼaki te kupu “koga meʼa lunaʼia” ʼe faka ʼuhiga ki he “koga meʼa lelei.” ʼE mahino ia kanapaula neʼe mole ʼi ai he tagata tauhi ōvi ʼa te ʼu ōvi, ʼe mole nātou maʼu anai he koga meʼa lelei ke nātou tākokoto fīmālie ai. ʼE maʼua ki te ʼu tagata tauhi ōvi ke nātou takitaki te faga ōvi ki te ʼu “koga meʼa lelei” ʼaia.

10. ʼE fakahā feafeaʼi e te ʼAtua tana falala ʼaē kiā tatou?

¹⁰ ʼE takitaki feafeaʼi tatou e Sehova ia ʼaho nei? ʼE ina takitaki tatou ʼaki tana faʼifaʼitaki. Ko tana Folafola ʼe ina uga tatou ke tou “liliu ko he kau faʼifaʼitaki ʼo te ʼAtua.” (Efeso 5:​1, MN ) Ko te ʼu vaega ki muʼa pea ki muli mai, ʼe talanoa ki te manavaʼofa, mo te loto fakamolemole, pea mo te ʼofa. (Efeso 4:​32, 5:2) ʼE tuku mai e Sehova ia te faʼifaʼitaki lelei ʼo ʼuhiga mo te fakahā ʼo te ʼu kalitātē taulekaleka ʼaia. ʼE matatonu koa tana kole mai ʼaē ke tou faʼifaʼitakiʼi tona ʼu kalitātē? Ei. ʼE hā ʼaki mai ʼi te kole mai ʼaia ʼa te ʼAtua ke tou faʼifaʼitakiʼi tona ʼu kalitātē, tana falala ʼaē ʼe tou lavaʼi. He koʼe ʼe tou lava faʼifaʼitakiʼi te ʼu kalitātē ʼo Sehova? Neʼe faʼu tatou ki te pāki ʼo te ʼAtua, ko tona faka ʼuhiga ʼe tou maʼu tona ʼu kalitātē ʼo  ʼuhiga mo te ʼu aga ʼaē ke fai pea mo te fealagia ʼaē ke tou maʼuliʼi he ʼu kalitātē fakalaumālie. (Senesi 1:26) Koia, ʼe ʼiloʼi e Sehova logola totatou ʼuhiga heʼe haohaoa, kae ʼe tou maʼu te fealagia ʼaē ke tou maʼuliʼi tona ʼu kalitātē. Koutou fakakaukauʼi age muʼa​—ko totatou ʼAtua ʼofa ʼe falala ʼe tou lava faʼifaʼitakiʼi ia ia. Kapau ʼe tou muliʼi tana faʼifaʼitaki, pea ʼe ina taki anai tatou ki he ʼu ‘koga meʼa ʼe lelei ke tou mālōlō ai.’ ʼI te lotolotoiga ʼo te mālama agamālohi ʼaenī, ʼe tou ‘māʼuʼuli fīmālie’ anai, pea mo tou māʼuʼuli ʼi te tokalelei heʼe tou ʼiloʼi ʼe tapuakinaʼi tatou e te ʼAtua.​—Pesalemo 4:​8, 29:⁠11.

11. ʼI tana takitaki tana ʼu ōvi, koteā ʼaē ʼe mahino kiai Sehova, pea ʼe hā feafeaʼi ʼi tana kole ʼaē ʼe ina fai mai kiā tatou?

¹¹ Ko Sehova ʼe ina takitaki tatou ʼaki he agamālū pea mo he faʼa kātaki. Ko te tagata tauhi ōvi ʼe ina ʼiloʼi te ʼu gataʼaga ʼo tana faga ōvi, koia ʼaē ʼe ina takitaki ai nātou “ ʼo mulimuli ki [tanatou] haʼele.” (Senesi 33:14) ʼO toe feiā mo Sehova, ʼe ina takitaki tana ʼu ōvi ‘ ʼo mulimuli ki tanatou haʼele.’ ʼE ina tokagaʼi totatou ʼu fealagia pea mo totatou ʼu ʼaluʼaga. ʼIo, ʼe mulimuli ki tatatou haʼele, ʼe mole ina fakamaʼua mai he meʼa ʼe mole tou lavaʼi. ʼE ina kole mai ke tou tauhi age kiā te ia ʼaki totatou loto kātoa. (Kolose 3:23) Kae e feafeaʼi mo kapau kua koutou mātutuʼa pea ʼe mole kei koutou lava fai takotou ʼu gāue māhani? Peʼe kua faka tuʼakoi takotou ʼu gāue heʼe koutou tau mo he mahaki kovi? Ko te ʼu ʼaluʼaga la ʼaia ʼaē ʼe fakafimālie ai te fakamaʼua ʼaē ke tou tauhi kiā Sehova mo totatou loto kātoa. ʼE kehekehe totatou mālohi. Ko te tauhi ʼaki he loto kātoa, ko tona faka ʼuhiga ke koutou fakaʼaogaʼi tokotou mālohi kātoa moʼo fai ia meʼa fuli ʼe koutou lavaʼi ki te tauhi ʼa te ʼAtua. Logola te ʼu vaivaiʼia ʼaē ʼe nātou faka tuʼakoi tatatou ʼu gāue kiā Sehova, kae ʼe ina leleiʼia te tauhi ʼaē ʼe tou fai age kiā te ia ʼaki he loto kātoa.​—Maleko 12:​29, 30.

12. Koteā te fakatuʼutuʼu ʼi te Lao ʼa Moisese ʼe hā ʼaki mai ko Sehova ʼe ina taki tana ʼu ōvi ‘ ʼo mulimuli pe ki tanatou haʼele’?

¹² Tou vakaʼi age muʼa ʼi te Lao ʼa Moisese, ia te ʼu sākilifisio ʼaē neʼe fakamaʼua ʼo ʼuhiga mo he lākahala, ke tou mahino ai ko Sehova ʼe ina takitaki ʼo “mulimuli ki te haʼele” ʼo tana ʼu ōvi. Neʼe loto e Sehova ki he ʼu sākilifisio lelei neʼe fai ʼaki he loto fakafetaʼi. Pea neʼe fai te ʼu sākilifisio ʼaia ʼo mulimuli pe ki te ʼu fealagia ʼo nātou ʼaē neʼe fai mōlaga. Neʼe ʼui fēnei ʼi te Lao: “Kapau . . . neʼe mole feala hana ʼaumai he akeno, pea ʼe tonu anai ke ina ʼaumai . . . he ʼu kulukulu e lua peʼe ko he ʼu lupe e lua kei muli.” Pea kapau neʼe mole ina lava foaki he ʼu lupe e lua, neʼe feala ke ina foaki he “falena lelei.” (Levitike 5:​7, 11) ʼAki te lao ʼaia, neʼe fakahā ai e te ʼAtua ʼe mole ina fakamaʼua he meʼa neʼe mole lava foaki e he tahi. Mai tona ʼuhiga ʼaē ʼe mole heʼeki fetogi te ʼAtua, koia ʼe tou loto fīmālie heʼe tou ʼiloʼi ʼe mole ina kole mai anai he meʼa ʼe mole tou lavaʼi; ʼe ina tali fakafiafia te ʼu meʼa ʼaē ʼe tou lava foaki age. (Malakia 3:6) ʼE ko he meʼa fakafiafia he takitaki ʼo tatou e he Tauhi Ōvi ʼe lotomahino feiā!

“ ʼE Mole Au Mataku Ki He Meʼa Kovi, Heʼe Ke Nofo Mo Au”

13. ʼI te Pesalemo 23:​4, ko te ʼu palalau fea ʼa Tavite ʼaē ʼe hā ʼaki mai tana felogoi lelei mo te ʼAtua, pea he koʼe neʼe ina fai ia te ʼu palalau ʼaia?

¹³ Ko te lua tupuʼaga ʼo te falala ʼa Tavite: heʼe ko Sehova ʼe ina puipui tana ʼu ōvi. ʼE tou lau fēnei: “Tatau aipe peʼe au haʼele ʼi te malaʼe fakapōʼuli, ʼe mole au tuʼania ki he meʼa kovi, heʼe ke nofo mo au; ko tau tokotoko pea mo tau kauʼi  ʼakau koʼena te ʼu meʼa ʼe nā fakafimālieʼi au.” (Pesalemo 23:4) ʼE hā mai ʼi te ʼu palalau ʼaenī ʼa Tavite, tana felogoi lelei mo te ʼAtua. Neʼe fai e Tavite ia te ʼu palalau ʼaia, moʼo fakahā mai ia te ʼu ʼaluʼaga ʼaē neʼe tokoni ai te ʼAtua kiā ia ke ina lava kātakiʼi tona ʼu faigataʼaʼia. Neʼe fakalaka ia Tavite ʼi te ʼu malaʼe fakamataku​—ʼi te ʼu temi ʼaē neʼe tuʼutāmakiʼia tona maʼuli. Kae neʼe mole mataku, he neʼe ina ʼiloʼi ko te ʼAtua neʼe nofo mo ia ʼaki Tana “tokotoko” pea mo Tana “kauʼi ʼakau.” ʼAki tana ʼiloʼi ʼaē neʼe lava puipui ia ia e te ʼAtua, neʼe loto fīmālie ai Tavite pea mo toe mālohi age tana falala ʼaē kiā Sehova. b

14. Koteā te fakapapau ʼaē ʼe tou maʼu ʼi te Tohi-Tapu ʼo ʼuhiga mo totatou puipui e Sehova, kae koteā ʼaē ʼe hoko kiā tatou fuli?

¹⁴ ʼE puipui feafeaʼi e Sehova ia tana ʼu ōvi ia ʼaho nei? ʼE fakapapau mai ʼi te Tohi-Tapu, ʼe mole ʼi ai anai he fakafeagai ʼe fai e te ʼu temonio peʼe ko te tagata, ʼe ina lava pulihi anai tana faga ōvi ʼi te kele. ʼE mole tuku anai e Sehova ke hoko ia te meʼa ʼaia. (Isaia 54:7; 2 Petelo 2:9) Kae ʼe mole faka ʼuhiga leva ko totatou Tauhi Ōvi ʼe ina hāofaki anai tatou mai te ʼu malaʼia fuli. ʼE hoko kiā tatou te ʼu fihifihia ʼaē ʼe tau mo te hahaʼi fuli, pea mo te ʼu fakafeagai ʼaē ʼe hoko ki te kau Kilisitiano moʼoni fuli. (2 Timoteo 3:12; Sakopo 1:2) ʼI ʼihi temi, ʼe hage pe ʼe tou “haʼele ʼi te malaʼe fakapōʼuli.” ʼE lagi feala ke tou meihiʼi mate ʼuhi ko te ʼu fakataga peʼe ko he mahaki kovi. Peʼe lagi ko he tahi ʼe tou ʼoʼofa ai ʼe ʼamanaki mate peʼe kua mate. ʼI te ʼu temi ʼaia ʼaē ʼe hage ai ʼe tou nonofo ʼi he ʼu temi fakapōʼuli, ko totatou Tauhi Ōvi ʼe nofo tuʼumaʼu mo tatou, pea ʼe ina puipui anai tatou. Ko te ʼu faʼahi fea ʼaē ʼe ina fakaʼaogaʼi moʼo puipui ʼo tatou?

15, 16. (a) Koteā ʼaē ʼe fakaʼaogaʼi e Sehova moʼo tokoni mai ke tou kātakiʼi totatou ʼu fihifihia? (b) Koutou fakamatala te hisitolia ʼo te tēhina ʼe hā ai te tokoni ʼaē ʼa Sehova kiā tatou ʼi te ʼu temi ʼahiʼahi.

¹⁵ ʼE mole fakapapauʼi mai e Sehova ʼe ina fai anai he milakulo moʼo hāofaki ʼo tatou. c Kae ʼe feala ke tou tui papau: ko Sehova ʼe tokoni mai anai ke tou maʼu puleʼaki ʼo ʼuhiga mo te ʼu fihifihia ʼaē ʼe tau mo tatou. ʼE ina lava foaki mai te poto ʼaē moʼo tauʼi he “faahiga ahiahi [pe].” (Sakopo 1:​2-5) Ko te tagata tauhi ōvi ʼe ina fakaʼaogaʼi tana tokotoko peʼe ko tana kauʼi ʼakau moʼo kapu te ʼu manu fekai, pea ʼe ina toe fakaʼaogaʼi moʼo uga ʼo te ʼu ōvi ke nātou haʼele fakatahi. Ko Sehova ʼe ina lava fakaʼaogaʼi totatou ʼu tēhina peʼe ko totatou ʼu tuagaʼane, moʼo uga ʼo tatou ke tou maʼuliʼi he tokoni faka Tohi-Tapu ʼe ko he puleʼaki lelei anai ki totatou maʼuli. Tahi ʼaē meʼa, ʼe lava foaki mai e Sehova ia te mālohi moʼo kātakiʼi hotatou fihifihia. (Filipe 4:13) ʼAki tona laumālie maʼoniʼoni, ʼe ina lava foaki mai ia te “mālohi ʼaē ʼe fakalaka ʼi te mālohi māhani.” (2 Kolonito 4:​7, MN ) Ko te laumālie ʼo te ʼAtua ʼe lava tokoni mai ke tou kātakiʼi he ʼahiʼahi ʼe feala ke fai mai e Satana kiā tatou. ʼE ko he meʼa fakaloto fīmālie hatatou ʼiloʼi ʼe tokoni mai Sehova ʼi te temi fuli pe.

¹⁶ Ei, ʼe mole tou haʼele tokotahi tāfito la te ʼu temi fakamataku ʼaenī ʼe tou fakalaka ai. ʼE nofo pe mo tatou totatou Tauhi Ōvi, ʼo tokoni mai ʼi te ʼu faʼahi ʼaē ʼe lagi mole tou faʼa mahino lelei kiai. Tou vakaʼi age muʼa te faʼifaʼitaki ʼa te tagata ʼāfea, neʼe tau mo te mahaki ʼo te ʼuto. “ ʼE au tala fakahagatonu atu, ʼi te kamata neʼe au feʼekeʼaki peʼe mole ʼita ia Sehova kiā au peʼe mole kei ʼofa kiā au. Kae neʼe au fakapapau ʼi toku loto ʼe mole au mavae anai mai iā Sehova. Koia neʼe au fakahā kiā ia taku ʼu tuʼania. Pea neʼe tokoni mai Sehova, ʼo ina tau fakaʼaogaʼi he ʼu tēhina mo tuagaʼane, moʼo foaki mai he ʼu tokoni fakaloto fīmālie. Tokolahi iā nātou ʼaia, neʼe nātou fakamatala mai te ʼu fakatuʼutuʼu lelei ʼaē neʼe nātou fai ʼo ʼuhiga mo te ʼu mahaki kovi neʼe tau mo nātou. Neʼe au mahino ai ʼe mole ko au tokotahi pe ʼaē ʼe tau mo he ʼahiʼahi feiā. Neʼe au ʼiloʼi papau ai ko Sehova ʼe ʼofa kiā au, he neʼe au maʼu te tokoni ʼaoga, mo te ʼu tokaga ʼofa ʼa te ʼu tēhina mo tuagaʼane. ʼE moʼoni, ʼe kei au nofo nei mo toku mahaki, pea ʼe mole au ʼiloʼi pe koteā anai ʼaē ka hoko kiā au, kae ʼe au ʼiloʼi papau ko Sehova ʼe nofo mo au pea ʼe tokoni mai anai ke au kātakiʼi toku mahaki.”

 “ ʼE Ke Teuteuʼi ʼi ʼOku Muʼa Te Laupapa”

17. Koteā ʼaē ʼe ʼui e Tavite ʼo ʼuhiga mo Sehova iā Pesalemo 23:​5, pea he koʼe ʼe tatau mo te gāue ʼa he tagata tauhi ōvi?

¹⁷ ʼI te temi nei, ʼe fakahā e Tavite ia te tolu tupuʼaga ʼo tana falala ʼaē ki tona Tauhi Ōvi: heʼe ko Sehova ʼe ina fafaga tana ʼu ōvi, pea ʼe lahi te meʼa kai ʼaē ʼe ina fafaga ʼaki nātou. ʼE tohi fēnei e Tavite: “ ʼE ke teuteuʼi ʼi ʼoku muʼa te laupapa iā muʼa ʼo nātou ʼaē ʼe fakafeagai mai kiā te au. Neʼe ke pani lolo toku ʼulu, ko toku ʼipu neʼe fonu ʼaupito.” (Pesalemo 23:5) ʼI te vaega ʼaenī, ʼe ʼui e Tavite ko tona Tauhi Ōvi ʼe tali kāiga lelei, heʼe mahu ia te meʼa kai pea mo te meʼa ʼinu ʼaē ʼe ina foaki. ʼE tatau te ʼu fakatatau ʼaia e lua, ʼo ʼuhiga mo he tagata tauhi ōvi ʼe tokaga ki tana faga manu pea mo he tagata tali kāiga lelei. Heʼe ko te tagata tauhi ōvi ʼe tonu ke ina ʼiloʼi peʼe maʼu ʼifea te ʼu koga meʼa lunaʼia pea mo te ʼu vai ke maʼu e tana faga ōvi ‘te ʼu meʼa fuli ʼaē ʼe ʼaoga kiā nātou.’​—Pesalemo 23:​1, 2.

18. Koteā ʼaē ʼe hā ʼaki mai ko Sehova ʼe tali kāiga lelei?

¹⁸ ʼE tali kāiga lelei koa totatou Tauhi Ōvi? Ei! Koutou fakafuafua age muʼa ʼi te temi nei, ia te meʼa kai fakalaumālie lelei, mo lahi pea mo kehekehe ʼaē ʼe tou maʼu. ʼAki te tagata kaugana agatonu mo poto, ʼe foaki mai e Sehova te ʼu tohi faka Tohi-Tapu ʼaoga pea mo te ʼu akonaki lelei ʼi te ʼu fono, ʼi te ʼu fakatahi lalahi​—pea ko te ʼu fakatuʼutuʼu fuli ʼaia ʼe ʼaoga ki totatou maʼuli fakalaumālie. (Mateo 24:​45-47) ʼE mole tou ʼiloʼi ia te hoge fakalaumālie. Kua lauʼi miliona te ʼu Tohi-Tapu pea mo te ʼu tohi ako faka Tohi-Tapu ʼaē neʼe tā e “te tagata kaugana agatonu mo poto,” pea ʼe tou maʼu te ʼu tohi ʼaia ʼi te temi nei ia lea e 413. ʼE kehekehe ʼaupito ia te meʼa kai fakalaumālie ʼaia ʼe foaki e Sehova​—te “huapipi” ʼaē ko te ʼu ʼuluaki akonaki faka Tohi-Tapu, pea mo “te meakai fefeka,” ʼaē ko te ʼu akonaki loloto ʼa te Tohi-Tapu. (Hepeleo 5:​11-14) Koia, ʼe tou maʼu te ʼu tokoni ʼaē ʼe ʼaoga kiā tatou mokā tou tau mo he ʼu fihifihia peʼe ko he ʼu tonu ke tou fai. ʼE tou ʼifea anai mo kanapaula ʼe mole tou maʼu te meʼa kai fakalaumālie ʼaia? ʼIo, ko totatou Tauhi Ōvi ʼe tali kāiga lelei!​—Isaia 25:​6, 65:⁠3.

“ ʼE Au Nofo Anai ʼi Te Fale ʼo Sehova”

19, 20. (a) Iā Pesalemo 23:​6, koteā te falala ʼaē neʼe fakahā e Tavite, pea e feafeaʼi hatatou fakahā ia te falala ʼaia? (b) Koteā anai ka tou vakaʼi ʼi te alatike ʼaē ka hoa mai?

¹⁹ ʼI te kua mahino ʼa Tavite ki te ʼu gāue ʼa te Tauhi Ōvi pea mo Tali Kāiga lelei, neʼe ina ʼui fēnei: “ ʼIo, ko te agalelei pea mo te lotoʼofa ʼe nā muliʼi anai au ʼi te ʼaho fuli pe ʼo toku maʼuli; pea ʼe au fia nofo ʼi te fale ʼo Sehova ki te loaloaga ʼo te ʼu ʼaho.” (Pesalemo 23:6) ʼE palalau ia Tavite ʼaki he loto fonu ʼi te fakafetaʼi pea mo te tui​—neʼe fakafetaʼi he neʼe ina manatuʼi tona maʼuli ki muʼa atu pea neʼe tui ʼi tana sio ki te ka haʼu. Neʼe ʼiloʼi e te tagata tauhi ōvi ʼāfea ʼaia, ʼe maʼuli fīmālie anai mo kapau ʼe felogoi tuʼumaʼu mo tona Tauhi Ōvi ʼaē ʼe ʼi selo, ohage pe ʼe nofo ʼi Tona fale, pea ʼe tokaga tuʼumaʼu anai ia Sehova kiā te ia.

²⁰ ʼE tou loto fakafetaʼi ki te ʼu palalau taulekaleka ʼaē ʼe tuʼu ʼi te Pesalemo 23! Neʼe tāu mo feʼauga ia te fakatatau ʼaē neʼe fai e Tavite moʼo fakahā ko Sehova ʼe ina takitaki, mo ina puipui, pea mo fafaga tana ʼu ōvi. Neʼe taupau te ʼu palalau fakafetaʼi ʼa Tavite, ke tou falala mo tatou kiā Sehova, ʼe ko totatou Tauhi Ōvi. Ei, kapau ʼe tou felogoi tuʼumaʼu mo Sehova, pea ʼe tokaga anai kiā tatou heʼe ko totatou Tauhi Ōvi ʼofa “ki te loaloaga ʼo te ʼu ʼaho” ʼo talu ai. Pea mai tona ʼaluʼaga ʼaē ko tatou ko tana ʼu ōvi, ʼe ko totatou maʼua ke tou haʼele mo Sehova, ia totatou Tauhi Ōvi lahi. ʼE tou vakaʼi anai te faʼahi ʼaia ʼi te alatike ʼaē ka hoa mai.

[Kiʼi nota]

ʼE Kei Koutou Manatuʼi Koa?

• He koʼe ʼe tāu mo feʼauga ke fakatatau e Tavite ia Sehova ki he tauhi ōvi?

• ʼE hā feafeaʼi te lotomahino ʼa Sehova ʼi tana takitaki tatou?

• ʼE tokoni feafeaʼi mai ia Sehova ke tou kātakiʼi totatou ʼu fihifihia?

• Koteā ʼaē ʼe hā ʼaki mai ko Sehova ʼe Tali Kāiga lelei?

[Fehuʼi]

[Paki ʼo te pasina 18]

Ohage ko he tagata tauhi ōvi ʼi Iselaele, ko Sehova ʼe ina takitaki Tana ʼu ōvi