Ko Te Totogi ʼe Ina Fakavikiviki Ia Te Faitotonu ʼo Te ʼAtua

ʼI TE hili ʼaē ʼo te talagataʼa ʼo Atama mo Eva, neʼe fai e Sehova te fakatuʼutuʼu ʼo ʼuhiga mo te Hāko ʼaē ka maumauʼi anai tona muliʼi vaʼe. (Senesi 3:15) Neʼe hoko te faʼahi ʼaia ʼi te temi ʼaē neʼe matehi ai e te ʼu fili ʼo te ʼAtua ia Sesu Kilisito ʼi te pou fakamamahi. (Kalate 3:​13, 16) Neʼe haohaoa ia Sesu mai te agahala, he neʼe tupu faka milakulo ʼi te fatu ʼo te taupoʼou ʼaki te mālohi ʼo te laumālie maʼoniʼoni. Pea ʼaki tana taʼataʼa ʼaē neʼe ina liligi, neʼe ina faka fealagia ke ʼi ai te totogi ʼaē moʼo faka ʼāteaina te tagata fuape, mai te agahala pea mo te mate ʼaē neʼe tuku holo mai e Atama.​—Loma 5:​12, 19.

ʼE mole he meʼa ʼe feala ke ina tāʼofi te hoko ʼa te ʼu fakatuʼutuʼu ʼo te ʼAtua māfimāfi ko Sehova. ʼI te temi pe ʼaē neʼe tō ai te tagata ki te agahala, neʼe fai atu aipe e Sehova ia te fakatuʼutuʼu lelei ke ina foaki te totogi, pea neʼe feala ai hana felogoi mo nātou ʼaē neʼe nātou tui ki te fakahoko ʼo tana ʼu fakapapau. Neʼe feala ai ki te hahaʼi agahala ʼo te hōloga ʼo Atama, ohage ko Enoke, mo Noe, pea mo Apalahamo, ke nātou haʼele pea mo fakakaumeʼa mo te ʼAtua kae mole ʼulihi Tona ʼuhiga maʼoni ʼoni.​—Senesi 5:24; 6:9; Sakopo 2:⁠23.

Ko ʼihi ʼo te ʼu hahaʼi ʼaē neʼe tui kiā Sehova neʼe nātou fai te ʼu agahala mamafa. Ohage la ko te Hau ko Tavite. ʼE lagi koutou feʼekeʼaki ‘pe koʼe neʼe haga tapuakinaʼi e Sehova te Hau ko Tavite ʼi tana ʼosi tono mo Pati-Sepa pea mo tana fekauʼi ke matehi tona ʼohoana ko Ulia?’ Ko tona tupuʼaga tāfito he neʼe fakahemala moʼoni ia Tavite pea neʼe tui. (2 Samuele 11:​1-17; 12:​1-14) ʼO fakatafito ki te sākilifisio ʼaē neʼe tonu ke foaki e Sesu Kilisito ki ʼamuli, neʼe feala ai ki te ʼAtua ke ina fakamolemole te ʼu agahala ʼa Tavite ʼaē neʼe fakahemala pea mo haga taupau maʼu ia Tana faitotonu. (Pesalemo 32:​1, 2) Moʼo fakamoʼoni ki te faʼahi aia, ʼe fakamahino ʼi te Tohi-Tapu te ʼuhiga taulekaleka ʼo te totogi ʼaē neʼe huʼi e Sesu, ʼaē “ ʼe fakahā ai tana faitotonu [ʼa te ʼAtua], he neʼe ina fakamolemole te ʼu agahala ʼaē neʼe hoko ʼi te temi muʼa” pea mo te ʼu agahala ʼo “te temi nei.”​—Loma 3:​25, 26, MN.

Ei, ʼe maʼu e te malamanei te ʼu tapuakina lahi ʼuhi ko te maʼuhiga ʼo te taʼataʼa ʼo Sesu. ʼO fakatafito ki te totogi, ko te hahaʼi agahala ʼaē ʼe fakahemala ʼe feala ke nātou felogoi lelei mo te ʼAtua. Pea tahi, ʼaki te totogi ʼe toe fakatuʼuake anai te kau mate ʼi te mālama  foʼou ʼa te ʼAtua. ʼE kau ai anai te ʼu kaugana agatonu ʼo te ʼAtua ʼaē neʼe mamate ʼi muʼa ʼo te foaki e Sesu ia te totogi, pea mo te hahaʼi tokolahi neʼe mamate kae neʼe mole nātou ʼiloʼi ia te ʼAtua pea neʼe mole nātou tauhi kiā te Ia. ʼE ʼui fēnei ʼi te Tohi-Tapu: “ ʼE ʼi ai anai he fakatuʼuake ʼo te kau faitotonu pea mo te kau heʼe faitotonu.” (Gaue 24:​15, MN ) ʼI te temi ʼaia, ʼo fakatafito ki te faitotogi, ko Sehova ʼe ina fakapale anai ia nātou fuli ʼaē neʼe fakalogo, ʼo foaki kiā nātou ia te maʼuli heʼegata. (Soane 3:36) Neʼe fakamahino fēnei e Sesu totonu: “He ko te ʼAtua, ʼi tona ʼofa lahi ki te malamanei, neʼe ina foaki mai tona ʼAlo ʼulu tokotahi, koteʼuhi ko ʼaē ʼe tui kiā te ia, ke ʼaua naʼa fakaʼauha kae ke ina maʼu ia te maʼuli heʼegata.” (Soane 3:​16, MN ) Ko te ʼu tapuakina fuli ʼaia ʼe foaki anai ki te malamanei ʼuhi ko te fakatuʼutuʼu ʼaē neʼe fai e te ʼAtua ʼaki ia te sākilifisio faitotogi.

Kae ko te faʼahi ʼaē ʼe maʼuhiga tāfito ʼo ʼuhiga mo te totogi, ʼe mole ko te ʼu tapuakina ʼaē ʼe tou maʼu mai ai. ʼE ʼaoga tāfito ia te totogi ʼo Kilisito ki te huafa ʼo Sehova. ʼE ina fakamoʼoni ko Sehova, ʼe ko te ʼAtua ʼe haohaoa tana faitotonu, pea ʼe feala ke felogoʼi lelei mo te hahaʼi agahala pea mo taupau tona maʼa pea mo tona maʼoniʼoni. Kanapaula neʼe mole fakatuʼutuʼu e te ʼAtua ke ʼi ai he totogi, ʼe mole he tahi ʼi te hōloga ʼo Atama, peʼe ko Enoke, peʼe ko Noe, peʼe ko ʼApalahamo, ʼe feala anai hana felogoi lelei pea mo kaumeʼa lelei mo Sehova. Neʼe mahino te tagata fai Pesalemo ki te faʼahi aia pea neʼe ina tohi fēnei: “Kanapaula neʼe ke lamalama te ʼu hala, Ê Sah, Ê Sehova, ko ai koa ʼaē ʼe feala anai ke tuʼu?” (Pesalemo 130:3) ʼE tou fakamālo ʼaupito kiā Sehova ʼi tana momoli ifo tona ʼAlo ʼofaina ki te kele, pea mo tou fakafetaʼi kiā Sesu ʼi tana tali lelei ʼaē ke ina foaki tona maʼuli moʼo totogi ʼaki ʼo tatou!​—Maleko 10:45.