“Neʼe Kau Te ʼAho ʼAia ʼi Te ʼu ʼAho Lelei ʼo Toku Maʼuli”

KO TE sivi ʼaenī neʼe fai e te fale neʼe fakatuʼu e te puleʼaga ʼi ʼOsitalalia, ko tona higoa ko Beyondblue: “Ko te mahaki ʼulu, ʼe ko te mahaki ʼaē ʼe maʼu e te hahaʼi tokolahi pea ko te lagi mahaki ʼaia ʼaē ʼe lahi ʼaupito ʼi te kau tūpulaga.” ʼE fakahā e te ʼu sivi ko te teitei toko 100 000 kau tūpulaga ʼOsitalalia ʼe nātou mahahaki ʼulu ʼi te taʼu fuli.

ʼE mole hāo te kau tūpulaga Kilisitiano mai te mahaki ʼaia. Kae ko tanatou tui kiā Sehova neʼe tokoni ki te tokolahi iā nātou ke nātou kātakiʼi te ʼu manatu ʼaē ʼe kovi pea ke nātou fiafia ʼi tonatou temi tūpulaga. ʼI tanatou fai ia te faʼahi ʼaia, ʼe malave ai ki te hahaʼi. Koʼeni tona faʼifaʼitaki.

Ko te taʼahine ko Claire ʼe taʼu 18. Ko ia mo tana faʼē ʼe nā kau ki te kokelekasio ʼa te kau Fakamoʼoni ʼa Sehova ʼi Melbourne. Neʼe liliu ia Claire ʼo mahaki ʼulu ʼi te temi ʼaē neʼe līaki e tana tāmai tonatou famili. Kae neʼe mālohi tuʼumaʼu pe tana tui ki tana Tāmai ʼaē ʼe ʼi selo, ia Sehova. ʼI te tahi ʼaho, ko Lydia, te tōketā ʼo te famili, neʼe ʼalu ʼo vakaʼi ia te faʼē ʼa Claire ʼaē neʼe mahaki. Hili ʼaia, pea neʼe ina ʼave ia Claire ki te fale koloā lahi. ʼI te ala, neʼe ina fehuʼi age kiā Claire peʼe fakatahi mo he tama. Neʼe fakamahino age e Claire ʼi tona ʼuhiga Fakamoʼoni ʼa Sehova, neʼe mole fakatahi faka temi feiā pe mo he ʼu tama. Neʼe punamaʼuli ai te tōketā. Pea neʼe fakamahino age e Claire te tokoni ʼa te Tohi-Tapu kiā ia ke ina fai he ʼu tonu ʼe fakapotopoto ʼi tona maʼuli. Moʼo fakaʼosi, neʼe ina ʼui age ki te tōketā ʼe ina foaki age anai he tohi faka Tohi-Tapu, neʼe tokoni lahi kiā ia, ko tona kupu tāfito Les jeunes sʼinterrogent — Réponses pratiques.

Hili ʼaho e tolu ʼi tana maʼu te tohi ʼaia, neʼe telefoni ia Lydia ki te faʼē ʼa Claire, ʼo ina ʼui age tana leleiʼia ʼaupito te tohi, ʼo ina kole ai te tahi ʼu tohi e ono maʼa tona ʼu kaugā gāue. ʼI te temi ʼaē neʼe foaki age e Claire te ʼu tohi, neʼe fakamahino age e te tōketā tana punamaʼuli ʼi te tui ʼa Claire. Neʼe fehuʼi age e Claire peʼe ina fia ako te Tohi-Tapu mo ia, pea neʼe tali e te tōketā.

Lolotoga ni ʼu māhina, neʼe fai e Claire te ako ʼi te temi kai ʼo te tōketā. Pea neʼe kole age e Lydia peʼe fia palalau ia Claire ʼi te fono ʼe talanoa tāfito anai ki te mahaki ʼulu ʼi te kau tūpulaga. Logola tana mataku, kae neʼe tali e Claire. Neʼe ko te toko 60 tupu ʼaē neʼe kau ki te fono. Neʼe palalau ai te ʼu tōketā e toko fā ʼe nātou ʼiloʼi lelei te mahaki ʼulu. Pea neʼe ko te temi leva ʼo Claire ke palalau. Neʼe ina fakahā lelei te maʼuhiga ki te kau tūpulaga ke nātou felogoi mo te ʼAtua. Neʼe ina fakamahino ko Sehova ʼAtua ʼe lahi tana tokaga ki te kau tūpulaga pea mo tokoni kiā nātou ʼaē ʼe nātou kole he mālohi pea mo he fakaloto fīmālie. Pea neʼe ina toe fakahā age tana tui papau ʼaē, kua ōvi mai te temi ʼaē ka pulihi ai e Sehova te ʼu faʼahiga mahaki fuli pe ʼo te sino pea mo te ʼulu. (Isaia 33:24) Neʼe koteā te fua ʼo te fai faka mafola lelei ʼaia?

Neʼe ʼui fēnei e Claire: “Tokolahi neʼe nātou ʼōmai ʼi te hili ʼo te fono, ʼo fakahā mai tanatou punamaʼuli ki tanatou logo ki te finemui ʼe palalau ʼo ʼuhiga mo te ʼAtua. Neʼe au tufa te ʼu tohi Les jeunes sʼinterrogent e 23. Ko te ʼu taʼahine e toko tolu, ʼaē neʼe kau ki te fono, neʼe nātou tuku mai tanatou numelo telefoni. Ko te tahi ʼi te ʼu taʼahine ʼaia ʼe ina ako nei ia te Tohi-Tapu. Neʼe kau te ʼaho ʼaia ʼi te ʼu ʼaho lelei ʼo toku maʼuli.”